1-3. Yika yalingiwile kuli Evotia ni Sentiki? Mba kuchi ahwishile mulonga wacho? (Tala chizulie ha uputukilo.)

TWAKULEMESA chinji Mbimbiliya, mumu tunanyingika ngwetu, yili Mukanda wa Zambi. Mu Mbimbiliya muli shimbi jize mujihasa kutukwasa kwehuka milonga, nawa muyihasa kutufumba muze mutulinga upi. Ha chino, kuchi mutuhasa kukaula kanawa shimbi jamo? Achinyonga hali mapwo wano aali akuwayisa aku sekulu yitangu, Evotia ni Sentiki. Mbimbiliya yinambe ngwo, ayo kazwelele, alioze kuyishi kutulweza mumu liaka. Tutalenu yize te muyihasa kulingiwako.

² Kota Evotia kasanyikine mandumbu ni mapangi ku zuwo lienyi hanga aye ni kulia ni kunwa. Alioze kakasanyikine Sentiki. Hakupalika cha mashimbu Sentiki yevwa akwo kanahanjika chinji hakutwala ku yuma yize alile, chocho yevwa uli unji. Aye kota kambile ngwenyi: ‘Chisolo kutayiza ngwe Evotia kavulama kungusanyika ku zuwo lienyi! Ngwami tuli masepa apema.’ Sentiki kanyongene ngwenyi, Evotia te keshi kumuzanga nawa ngwenyi, te kakumwehuka chinji. Ha chino, Sentiki neye yasanyika mandumbu ni mapangi jacho hanga aye ni kulia ku zuwo lienyi, alioze kasanyikine Evotia! Mulonga uno kota wanehene mbwanja yinji mu chikungulwila. Mbimbiliya yakusolola ngwo, Paulu kakwashile mapangi jacho ni kwaakolweza hanga  alivwashane. Ayo kota kamupanjikile kanawa ni kununga kuwayila Yehova ni chiseke.—A-Fwilipu 4:2, 3.

³ Mu yikungulwila yetu musono, ha mashimbu amwe mutuhasa kupwa ni mulonga ni umwe ndumbu hanji pangi. Alioze ni mutukaula shimbi ja mu Mbimbiliya mutuhasa kuhwisa milonga yacho. Kwamba umwenemwene, mutuhasa kuyehuka. Nawa nyi twakaula yize Mbimbiliya yakwamba, mutusolola ngwetu pundu lume twakulemesa Mukanda wa Yehova.—Samu 27:11.

4, 5. Chiyulo chika mutuhasa kuwana mu Liji lia Zambi chize muchitukwasa kufunga kanawa manyonga jetu?

⁴ Hi chashi ko kufunga kanawa manyonga jetu mashimbu eswe. Mutuhasa kwivwa uli chipwe kutenuka nyi umwe mutu matusosomba hanji matusolwela katonde, mumu lia munyachi, mujimba, chikowa, hanji chize twapwa. Nawa chino muchihasa kutunehena yikola yinji ku mbunge nyi mutu yoze unatupinjisa hanji kutusosomba kali ndumbu hanji pangi yetu mu ufulielo. Chiyulo chika cha Liji lia Zambi chize muchihasa kutukwasa?

⁵ Yehova kananyingika yize muyihasa kulingiwa nyi atu keshi kuhasa kufunga manyonga hanji mbunge jo. Nyi twevwa uli, mutuhasa kwamba hanji kulinga chimwe chuma chize kulutwe lia matangwa muchitunehena yikola ku mbunge. Mu Mbimbiliya, Yehova kakutulongesa chize mutufunga manyonga ha kutwamba ngwenyi: “Kanda ulipupula kutenuka.” Twakwehuka milonga yinji muze twakukaula shimbi yino, ni kuhona kutenuka kawashi-washi! (Tanga Chilumbununyi 7:9; Yishima 16:32.) Mbimbiliya yakutulweza nawa chize twatamba kukonekena akwetu. Nawa Yesu kambile ngwenyi, nyi twakonekenene akwetu, Yehova neye keshi kutukonekena. (Mateu 6:14, 15) Shina watamba kupwa chimbovu ni kukonekena akwenu?

6. Yika muyihasa kulingiwako, nyi twafungile kanawa manyonga jetu?

⁶ Nyi kutushi kuhasa kufunga manyonga jetu, mutuhasa kununga kwivwa uli nawa mutuhasa kuputuka kwivwila akwetu chipululu hanji toto. Hanji mutuhasa kushinjila akwetu mu chikungulwila hanga no apwe ni yitanga yacho. Chikwo nawa, chipwe ngwe mutusweka uli hanji kole, nihindu akwetu matunyingika ngwo uli tuli nawo ku mbunge. Hachino, mandumbu ni mapangi mahasa kwehuka kwenda ni yetu. (Yishima 26:24-26) Makulwana kakuzachisa Mbimbiliya hanga atukwase twehuke uli ni kole ni kukonekena akwetu. (Ulevi 19:17, 18; A-Roma 3:11-18) Nyi makulwana matukwasa, shina twakukaula chiyulo chize chinakatuka mu Mukanda wa Yehova?

7, 8. (a) Kuchi Yehova akusongwela atu jenyi? (b) Usongwelo uka nawa twakuwana mu Mbimbililiya, nawa mumu liaka twatamba kuukaula?

⁷ Musono, Yehova kakusongwela waze ali mu chihanda cha ululikiso wenyi hano hashi, ni kwaalongesa. Kuchi iye akuchilinga? Iye hanatongola Kristu hanga apwe “mutwe wa chikungulwila” nawa Kristu hanatongola “ndungo wa mwenemwene, wa kukanyama” hanga alongese ni kusongwela atu ja Zambi. (A-Efwesu 5:23; Mateu 24:45-47) Chizechene ngwe, chizavu cha tusongo cha ku sekulu yitangu, ndungo yono kakulemesa chinji Mbimbiliya, mumu yili Liji lia Zambi. (Tanga 1 A-Tesalonika 2:13.) Usongwelo uka uze twakuwana mu Mbimbiliya?

⁸ Mbimbiliya yakutusongwela hanga tukunguluke mashimbu eswe. (A-Hepreu 10:24, 25) Yakukolweza yetweswe hanga tupwe ni ufulielo umuwika uze wakatuka ha malongeso a Mbimbiliya. (1 A-Korindu 1:10) Yakutukolweza nawa hanga tuliange “kufupa Wanangana.” (Matthew 6:33) Mbimbiliya yakutulongesa hanga twambujole sango lipema ku zuwo ni zuwo, ha mbunga ni ku yihela yeswayo mutuhasa kuwana atu. (Mateu 28:19, 20; Yilinga 5:42; 17:17; 20:20) Yakusongwela makulwana anunge ni kukwasa chikungulwila  hanga chipwe chalinanga. (1 A-Korindu 5:1-5, 13; 1 Timoteu 5:19-21) Nawa yakutulweza ngwo, twatamba kupwisa mijimba yetu yalinanga ni kwehuka manyonga hanji ndako jize Yehova akwivwila lwaji.—2 A-Korindu 7:1.

9. Iya yoze Yesu atongwele hanga atukwase kunyingika kanawa Liji lia Zambi?

⁹ Amwe mahasa kunyonga ngwo kafupiwile mutu niumwe hanga aalumbunwine Mbimbiliya. Alioze kukatuka ha mwaka 1919, Yesu kakuzachisa “ndungo wa mwenemwene, wa kukanyama” hanga akwase atu ja Zambi kunyingika yize Mbimbiliya yakulongesa ni kukaula malongeso jamo. Nyi mutukaula shimbi ja Mbimbiliya, chikungulwila muchipwa chalinanga, sambukila, ni kulinunga. Achilihule ngwenyi, ‘Shina mungushishika kuli Yesu ni kukaula usongwelo wa “ndungo wa mwenemwene?’

10. Kuchi mukanda wa Ezekiele unalumbununa chihanda cha ululikiso wa Yehova mu malilu?

¹⁰ Mbimbiliya yakutulongesa ngwo, tuvumbi twa Yehova mu malilu no kali akululieka kanawa. Chakutalilaho, Ezekiele kamwene mu usolwelo Yehova kanatwame ha limwe temba nawa linende fuji jinji, kulita ni sali lize Yehova mazanga kulitwala. (Ezekiele 1:4-28) Temba linalumbunuka chihanda cha ululikiso wa Zambi mu malilu, chize chakukaula kawashi-washi usongwelo wenyi. Temba liacho lia kusongwela nawa chihanda cha ululikiso wenyi hano hashi. Achinyonga ha yuma yinji yize yinalumuka mu ululikiso wa Zambi hakupalika cha miaka kumi. Twiwulukenu ngwetu Yehova mwe unasongwela kwalumuka chacho. Kwasala hakehe hanga Kristu ni angelo anongese hano hashi hapi. Ha chino, kukuchi kapwa nawa mutu niumwe yoze makahona kuhalisa Yehova hanji jina lienyi chipwe kuhanjika upi hakutwala ku kuyula chenyi!

11, 12. Yika ululikiso wa Yehova unalingi ha matangwa wano akusula?

¹¹ Tutalenu yuma yize ululikiso wa Yehova unalingi ha matangwa wano akusula. Mulimo wakutunga mazuwo. Tununu twa mandumbu ni mapangi kanahondangana ha kutunga chishina chinene cha Yela ja Yehova ku Warwick, mu mbonge ya Nova Iorque E.U.A. Nawa tununu twa akwa-kulihana ene, kanatungu Mazuwo a Wanangana ni mitango. Akwa-kulihana jacho kakwaasongwela ku Chizavu cha Hashi heswe cha akwakutunga mazuwo, (Departamento Mundial de Projeto/Construção). Tunasakwilila chinji hakunoma mandumbu waze analihana hanga alinge mulimo wa kutunga Mazuwo a Wanangana! Nawa tuvumbi twa Yehova hashi heswe kakusa tachi hakuhana yuma yize alinayo hanga akwase mulimo wacho. Yehova kakuwahisa atu jenyi ha kulikehesa ni ha ushishiko uze akusolola.—Luka 21:1-4.

¹² Fumbo. Yehova kakuzanga chinji kulongesa atu jenyi. (Izaia 2:2, 3) Kashika anatwehe shikola jeka ni jeka jize ngwe; Shikola ya Mulimo wa Pioneliu, Shikola ya Akwa-Kwambujola Wanangana, Shikola ya Ngiliate, Shikola ya Akwa ku Mbetele, Shikola ya Tulayi a Mambonge ni Mapwo jo, Shikola ya Makulwana amu Chikungulwila, Shikola ya Mulimo wa Wanangana, Shikola ya Makulwana aku Mitango ni Mapwo jo. Nawa mu site yetu jw.org, tunawanemo Mbimbiliya ni mikanda yikwo, mu kulakaji a malimi. Mu site nawa muli yikuma ya twanuke ni asoko, ni chihanda chize chinasolola sango ja yuma yize yinalingiwa. Shina wakuzachisa site jw.org, mu munda ni mu uwayilo wenu wa mu usoko?

13. Chiteli chika tuvumbi twa Yehova alinacho?

¹³ Chili chiwape chinene ha kupwa mu ululikiso wa Yehova ni kunyingika yize iye akuzanga hali yetu! Kwamba pundu, kukatuka haze tunakanyingikina yize yakuvwisa Zambi kuwaha, tuli ni chiteli cha kumwononokena ni kulinga yuma yize yalita. Chipwe ngwe atu anji kakuzanga kulinga  yuma yipi, yetu twatamba ‘kwivwila lwaji yuma yipi,’ ngwe chize Yehova akuyivwila lwaji. (Samu 97:10) Kutwatambile kupwa ngwe atu waze akunyonga, “chipi ngwo, chipema, chipema ngwo, Chipi.” (Izaia 5:20) Twakulinanga ku mwono wetu weswe, mumu twakuzanga chinji kuvwisa Yehova kuwaha. (1 A-Korindu 6:9-11) Yuma yize Yehova akutulongesa mu Mbimbiliya, yili mumu lia upeme wetu. Twakumuzanga chinji kashika twakuzanga kushishika kuli iye. Kashika twakukaula usongwelo wenyi ku zuwo lietu, mu chikungulwila, ku mulimo, ku shikola hanji kweswako tuli. (Yishima 15:3) Tutalenu ha yuma yize twatamba kushishika kuli Zambi.

14. Kuchi yisemi mahasa kushishika kuli Yehova?

¹⁴ Chize mutufumba ana jetu. Mu Mbimbiliya, Yehova kakuhana kuli yisemi usongwelo wa chize atamba kufumba ana jo. Akwa-Kristu kanafupiwa kukeya hanga achine kwaalumbula hakupwa ni manyonga a hano hashi. (A-Efwesu 2:2) Chakutalilaho, ku yihela yimwe tata mahasa kunyonga ngwenyi, ‘Mujiko lio mapwo e akulongesa ana.’ Alioze Mbimbiliya yinasolola pundu ngwo, atata e ekwete chiteli chakulongesa ana jo hakutwala kuli Yehova. (A-Efwesu 6:4) Yisemi waze akuzanga Yehova kakuzanga nawa ana jo hanga apwe masepa jenyi amwenemwene, ngwe chize apwile Samuele muze te uchili kanuke.—1 Samuele 3:19.

15. Kuchi mutuhasa kushishika kuli Yehova muze mutukwata yiyulo yilemu?

¹⁵ Chize mutukwata yiyulo. Muze mutufupa kukwata yiyulo yilemu ku mwono, twatamba kunyingika chize Yehova akunyonga ha yiyulo yacho, mba tuhase kushishika kuli iye. Mbimbiliya ni ululikiso wenyi muyihasa kutukwasa. Chakutalilaho, musono, amwe yisemi waze hanayi ni kutwama ku yifuchi yeka, hanakwate yiyulo yakutuma ana jo akemba ku yifuchi yo hanga alele kuli asoko jo. Ha chino, hanga ayo eswe ni aali ahase kukalakala ni kupwa ni mbongo jinji. Kwamba pundu, chino chili chiyulo cha mutu ni  mutu, alioze lunga ni pwo katamba kulihula ngwo, ‘Yika Yehova manyonga ha chiyulo chetu?’ (Tanga A-Roma 14:12) Chitangu twatamba kupwa ni malinjekela hanga tunyonge ha yize Mbimbiliya yakwamba, shimbu kanda tukwata yiyulo yilemu hakutwala ku usoko ni ku mulimo wetu. Tunafupiwa ukwaso wa Zambi, mumu kutuchi kuhasa kusongwela mashimbo jetu ukawetu.—Jeremia 10:23.

16. Chiyulo chika umwe mama akwachile muze mwanenyi asemukine? Yika yamukwashile mba akwate chiyulo chalita?

¹⁶ Amwe yisemi muze te haya ni kutwama mu chifuchi cheka, o yasema mwana, chocho, yazanga kutuma mwano wakemba hanga amulele kuli akako. Alioze ha mashimbu jacho, pwo yaputuka kulilongesa Mbimbiliya ni umwe Chela cha Yehova. Aye yanyingika ngwenyi, chiteli cha kulongesa mwanenyi hakutwala kuli Yehova chili ni cho. (Samu 127:3; Yishima 22:6) Pwo liacho yalemba kuli Yehova, ngwe chize Mbimbiliya yakutulweza hanga tulinge. Aye yeta hanga Yehova amukwase kulinga yuma yize yalita. (Samu 62:7, 8) Aye nawa yalumbununa kapinda wenyi kuli pangi yoze te akulilongesa nenyi Mbimbiliya ni kuli mandumbu akwo mu chikungulwila. Chipwe ngwe, asoko ni masepa jenyi kapwile ni kumulweza ngwo katamba kutuma mwana kuli akako, nihindu aye yakwata chiyulo chakulinga yuma yize yalita. Muze mukwo-lunga te akumona chize mandumbu ni mapangi anakwase mukwo-pwo hamwe ni mwano, aye yakomoka chinji, chocho yaputuka kulilongesa Mbimbiliya ni kuya kukunguluka hamwe ni usoko wenyi. Yono mama kanakawahilila chinji hakunyingika ngwenyi, Yehova kanakakumbulula yilemba yenyi!

17. Nyi tunalilongesa Mbimbiliya ni umwe mutu, usongwelo uka twatamba kukaula?

¹⁷ Chize mutuhasa kukaula usongwelo. Nyi mutushishika kuli Zambi, mutukaula usongwelo uze twakutambula mu ululikiso wenyi. Chakutalilaho, tuhengwolenu yize twatamba kulinga muze hitwaputuka kulongesa umwe mutu mukanda Yika Chamwenemwene Mbimbiliya Yakulongesa? Hanatulweze ngwo twatamba kusa amwe mashimbu muze mutuhwisa hita longeso hanga tukwase longi anyingike kanawa ululikiso wa Yehova. Hachino, mutuhasa kuzachisa chinema, Yika Yakupwa mu Zuwo Lia Wanangana? ni kamukanda Aya Analingi Upale wa Yehova Musono? Muze mahwisa kulilongesa mukanda Yika Mbimbiliya Yakulongesa, mutuhasa kukwasa longi hanga ‘alikolweze mu ufulielo’ hakulilongesa nenyi mukanda “Lifungenu Mu Zango Lia Zambi”, chipwe ngwe hamupapachisa kulu. (A-Kolosu 2:7) Shina wakukaula usongwelo uno wamu ululikiso wa Yehova?

18, 19. Yuma yika yatamba kutulingisa hanga tusakwile Yehova?

¹⁸ Tuli ni yuma yinji yize yatamba kutulingisa hanga tusakwilile Yehova! Chuma chitangu chili ngwo, “muli iye tuli ni mwono, muli iye twakwenda, muli iye tuli ni kupwa chetu.” (Yilinga 17:27, 28) Hanatwehe nawa Mukanda wenyi, Mbimbiliya. Chizechene ngwe, akwa-Kristu amu Tesalonika, twakulemesa chinji Mbimbiliya, mumu sango jize jilimo, jinakatuka kuli iye.—1 A-Tesalonika 2:13.

¹⁹ Mbimbiliya yakutukwasa hanga tukundame kuli Yehova, ni iye kukundama kuli yetu. (Tiangu 4:8) Twakuwahilila chinji hakunyingika ngwetu, Tata yetu kakutusanyika hanga tupwe mu ululikiso wenyi! Twakwivwa ngwe mukwa-kwimba masamu yoze wasonekene ngwenyi: “Sakwilenu Yehova, mumu iye mupema; mumu utu wa zango lienyi wa mutolo.” (Samu 136:1) Mu versu jeswe ja mwaso uno, mukwa-kwimba masamu yafunyina-funyina maliji wano ngwo, “utu wa zango lienyi wa mutolo.” Chochene, nyi twashishika kuli Yehova ni kukaula usongwelo uze akutwaha mu ululikiso wenyi, iye makatwaha mwono wa mutolo nawa makashishika kuli yetu ku miaka yeswe!