1-3. Nemene jë la ewekë ka traqa koi Euodia me Sunetuke ekö? Nemene la aqane troa neëne la itre jole cili? (Wange ju la pane iatr.)

EASA wange atrune la Tusi Hmitrötr ke, atre hi së laka, Tus i Akötresieti hi lai. Hetrenyi e hnine ej la itre eamo ka troa ananyi së qa ngöne la itre jol me hane haji së e traqa ju së tria. Matre nemene la aqane tro sa ujë qëmekene la itre eamo ne ej? Pane mekune ju la hna melëne hnene la lue trejin föe hna iën ekö, Euodia me Sunetuke. Öni Tusi Hmitrötr, nyidroti a iwesitrë, ngo tha hna qaja pe la kepin. Tro sa pane mekune la ewekë ka traqa koi nyidro.

² Maine jë hnei Euodia hna hëne la itre trejin ne la ekalesia kowe la hnalapa i angeic matre troa nango ce xen. Ngo tha hane pë hë hë Sunetuke. Ame hë la kola dreng hnei Sunetuke la itre xan a qaja la madrine i angatr ngöne la ijine cili, wesitre ju hi angeic. Maine jë, öni angeic e kuhu hni angeic: ‘Tha trotrohnine kö ni la kepine matre tha hnei Euodia kö hna hane hë ni! Lue treme sineene hi nyiho lo.’ Ame koi Sunetuke, tha hnimi angeic  kö hnei Euodia, me mekune ka hape, tha pi ithanata hë Euodia me angeic. Matre hnei Sunetuke hna hëne lo itre atr ka ce xen me Euodia kowe la hnalapa, ngo tha hane pë hë hë Euodia! Kola mekune laka, celë hi ka aciane la gomegom e hnine la ekalesia. Tusi Hmitrötr a qaja ka hape, hnei Paulo hna hajine la lue trejine föe, me xatua nyidro troa iloi. Kola mekune laka, hnei nyidroti hna kapa la ihaji Paulo, me catre nyihlue i Iehova ngöne la madrin.—Filipi 4:2, 3.

³ Ame fe ngöne la itre ekalesia enehila, hetrenyi la itre jol thene la itre trejin. Ngo e hne së hna xötrethenge la itre eamo ne la Tusi Hmitrötr, tro së lai a nyinyine itre ej. Goi tro fe së lai a neëne itre ej. Ketre, ame la easa xötrethenge la hna qaja hnei Tusi Hmitrötr, easë hi lai a amamane ka hape, ka tru koi së la tus i Akötresie.—Salamo 27:11.

4, 5. Nemene la itre eamo hna hamëne hnene la Wesi Ula i Akötresie göi troa xomehnöthe la trenge hni së?

⁴ Tha ka hmaloi kö troa xomehnöth la trenge hni së. Hnene laka, isa qenenöje së kö, me isa hane ngönetrei së kö, maine jë troa akötrë së hnei ketre, maine qaqa së pena. Ame e cili, tha madrine kö së, nge easa wesitr. Ketre, tru catre hmaca kö la hleuhleu së, e hna akötrë së hnene la trejin me easë. Matre nemene la eamo hna hamë së hnene la Wesi Ula i Akötresie göne lai?

⁵ Tha sihngödri kö koi Iehova la thangane kowe la atr, e tha xomehnöthe kö angeic la trenge hni angeic. Hnene laka tru la elëhni së, ewekë menu pi hi së, me ujë qene hmo. Tusi hmitrötr a upi së troa xomehnöthe la trenge hni së, kola hape: “The saqe kö la hni eö troa elëhni.” Pane mekune ju la etrune la itre jol hne së hna neën, e hne së hna xötrethenge la eamo celë! (E jë la Ate Cainöj 7:9; Ite Edomë 16:32.) Tusi Hmitrötre fe a upi së troa nue la ngazo i ketre. Öni Iesu lo, e tha nue kö së la ngazo i ketre, ketre tha tro kö Iehova a nue la ngazo së. (Mataio 6:14, 15) Haawe, nyipi ewekë tro sa catre xomihni, me saqe nue la ngazo i ketre.

6. Nemene la ewekë ka troa traqa e tha xomehnöthe kö së la trenge hni së?

⁶ Maine tha xomehnöthe kö së la itre trenge hni së, tro së lai a lapa fë elëhni, nge tro fe hë së lai a methinëne la atr. Maine pena tro së lai a ithanatane matre tro la itre trejin ne la ekalesia a nyi xöle së. Nge maine easa thele troa juetrëne la trenge hni së, ngo tro pala kö a mama la sipu aliene la hni së. Ame hë e cili, tro hë la itre trejin a lapa ananyi së. (Ite Edomë 26:24-26) Nge tro hë la itre qatre thup a thele jëne matre tro sa xometrije la elëhni me nue la ngazo i ketre jëne la Tusi Hmitrötr. (Levitiko 19:17, 18; Roma 3:11-18) Ame e cili, tro kö sa xötrethenge la itre eamo hna hamëne hnene la Tus i Akötresie?

7, 8. (a) Nemene la aqane amekötine Iehova la nöje i Nyidrë? (b) Nemene la itre xa hna amekötin ka mama e hnine la Tusi Hmitrötr, nge pine nemene matre loi e tro sa trongëne itre ej?

⁷ Iehova la ka iujine la götrane ka mama ne la organizasio i Nyidrë ka ej e celë fen. Hnei Nyidrëti hna acili Iesu troa “he ne la ekalesia,” nge hnei Iesu Keriso hna acile la “hlue ka nyipici me ka inamacan” matre troa inine me amekötine la nöje i Akötresie. (Efeso 5:23; Mataio 24:45-47) Ka tru kowe la hlue cili la Tusi Hmitrötr ke, Wesi Ula i Akötresieti hi lai, celë hi aqane goeëne fe lo lapa ne xomi meköt ekö ngöne la hneijine la itre pane keresiano. (E jë la 1 Thesalonika 2:13.) Nemene  la itre xa hna amekötin ka mama e hnine la Tusi Hmitrötr?

⁸ Tusi Hmitrötr a upi së troa icasikeu lapa. (Heberu 10:24, 25) Eje a upi së asë troa lapaune kowe la itre ini ka cas ka ej e hnine la Tusi Hmitrötr. (1 Korinito 1:10) Eje fe a upi së troa ‘thele panëne la Baselaia i Akötesie.’ (Mataio 6:33) Kolo fe a upi së troa cainöje ngöne la itre hnalapa trootro, me ngöne la gaa tru atr, me ngöne la nöjei götrane ga hetre atr. (Mataio 28:19, 20; Ite Huliwa 5:42; 17:17; 20:20) Kola upe la itre qatre thup troa thupëne la ekalesia matre tro pala hi ej a pë ethan. (1 Korinito 5:1-5, 13; 1 Timoteo 5:19-21) Ketre ej a upi së troa nyidrawane la ngönetrei së me thipetrije la itre mekune me itre hna majemine hna sisine hnei Iehova.—2 Korinito 7:1.

9. Drei la hnei Iesu hna acil matre troa aijijë së troa trotrohnine la Wesi Ula i Akötresie?

⁹ Hetrenyi la itre atr ka mekune ka hape, tha ajane kö angatr tro la ketre a qejepengöne koi angatr la Tusi Hmitrötr. Ngo, qaane lo 1919, hnei Iesu hna aijijëne la nöje i Akötresie troa trotrohnine la itre ini qa hnine la Tusi Hmitrötr, me trongëne itre ej jëne la “hlue ka nyipici me ka inamacan.” E hne së hna xötrethenge la hna qaja hnine la Tusi Hmitrötr, easë hi lai a thele matre tro pala hi a pë ethan la ekalesia, me tingeting, me cas. Matre loi e tro sa isa waipengö së me hape, ‘Tro kö ni a nyipici koi Iesu me xötrethenge la hna amekötin hnene la hlue ka nyipici?’

10. Nemene la aqane qejepengöne Ezekiela la götrane ka tha mama kö ne la organizasio i Akötresie e koho hnengödrai?

¹⁰ Easa atre jëne la Tusi Hmitrötr, ka hape, itre hlue i Iehova fe e hnengödrai a huliwa thenge la aqane amekötine Iehova. Jëne la ketre iamamany, hnei Ezekiela hna goeëne la Iehova a të hune la ikariota me nyinyape catre ngöne la nöjei götrane hna ajan hnei Iehova. (Ezekiela 1:4-28) Ame la ikariota, tre kola qajaqaja la götrane ka tha mama kö ne la organizasio i Akötresie ka ej e koho hnengödrai, nge ka saqe trongëne la itre hna amekötin hnei Iehova. Nge kola mama la thangane lai kowe la götrane ka mama ne la organizasio i Nyidrë e celë fen. Pane mekune ju la itre ewekë hna sazen hnene la organizasio i Iehova lo treen lao macatre ka ase hë. Nge Iehova kö la atrekë huliwane lai. Easenyi catre hë matre lepe apatrene pi Keriso me itre angela la fene ka ngazo celë. Matre pë hmaca kö atr ka troa thaipië Iehova me adrone la ëje i Nyidrë, me qeje gelene la aqane musi Nyidrë!

11, 12. Nemene la hna kuca hnene la organizasio i Iehova ngöne la itre drai tixenuë celë?

¹¹ Pane mekune ju la hna kuca hnene la organizasio i Iehova ngöne la itre drai tixenuë celë. Xupi Uma. Hnene la itre hadredre lao trejin hna huliwa catr matre xupe la itre uma ka hnyipixe ne la organizasio i Iehova e Warwick (Neweyok). Itre thauzane lao trejin ka saen e cailo fen a xupe la itre Uma Ne Baselaia me itre Bethela. Angatr  a drengethenge la itre hna amekötin koi angatr hnene la biero thatraqane la xupi uma e cailo fen (WDC). Tru la ole së kowe la itre ka catre huliwa ngöne la hna xupi uma! Nge the qaja kö la hna hamën hnene la itre hlue i Iehova e cailo fen matre troa ixatua nyithupene la itre hna xupi uma cili. Iehova a amanathithine la itre hlue i nyidrë, hnene la hna ipië me nyipici koi Nyidrë.—Luka 21:1-4.

¹² Ini. Tru la aja i Iehova troa inine la itre hlue i Nyidrë. (Isaia 2:2, 3) Matre hetrenyi la itre ini ka nyimutre. Kola qaja la Ini koi itre pionie, me Ini koi Itre Ka Cainöj, me Ini Ne Gileada, me Ini Koi Itre Ka Xötrei Lö Hnine La Bethela, me Ini Koi Itre Qatre Thupe Ka Iwai Trootro Me Itre Föi Angatr, me Ini Thatraqane La Itre Qatre Thup Ne La Ekalesia, me Ini Ne Cainöjëne La Baselaia, me Ini Thatraqane La Itre Atre Ne La Komite Ne Filial Me Itre Föi Angatr. Nge hetrenyi fe ngöne la site së jw.org la Tusi Hmitrötr, me itre xa itusi së ngöne la itre hadredre lao qene hlapa. Hetre götrane fe thatraqane la itre nekönatr, me thatraqane la hnepe lapa memine fe lo itre ka hnyipi traqa. Epuni kö a amamane la site së ngöne la  hna cainöje trootro me ngöne la ijine hmi hnepe lapa?

NYIPICI JU KOI IEHOVA ME ORGANIZASIO I NYIDRË

13. Nemene la hnëqa ne la itre hlue i Iehova?

¹³ Drei la ketre manathith troa nyi atrene la organizasio i Iehova, me hane atre la itre hna amekötin koi së! Eje hi laka, atre hë së la aqane troa amadrinë Iehova, haawe, hnëqa së troa drengethenge Nyidrë, me kuca la ka meköt. Nge ala nyimu ju hë la itre ka thele troa kuca la ngazo, ngo ame së, tro sa ‘sisine la ngazo,” tui Iehova. (Salamo 97:10) Tha tro pi kö sa tune lo itre ka mekune ka hape, ame “la ngazo, te, loi ; ngo loi, te, ngazo.” (Isaia 5:20) Easa ajane troa amadrinë Iehova, matre ka ej e kuhu hni së troa pë ethan la mele së. (1 Korinito 6:9-11) Ame la hnei Iehova hna qaja e hnine la Tusi Hmitrötr, tre nyine loi koi së. Tru la ihnimi së koi Nyidrë, nge aja së troa nyipici koi Nyidrë. Celë hi matre, easa xötrethenge la itre hnei Nyidrëti hna amekötin ngöne la hnalapa, me hnine la ekalesia, me ngöne la hna huliwa, me ngöne la hna ini, me ngöne la nöjei götran. (Ite Edomë 15:3) Pane mekune ju la itre xa götrane la mele së laka, nyipi ewekë tro sa nyipici koi Akötresie.

14. Nemene la aqane tro la keme me thin a nyipici koi Iehova?

¹⁴ Aqane troa hiane la itre nekönatr. Hetrenyi e hnine la Tusi Hmitrötr la itre ithuemacanyi thatraqane la keme me thin göi aqane troa hiane la itre nekö i nyidro. Loi e tro la itre keresiano a thupën matre tha tro kö a ajojezi nyidro hnene la aqane waiewekëne la fene celë. (Efeso 2:2) Ame ngöne la itre xa hnalapa, tro la kem a mekune ka hape, ‘Hane la föeng matre troa inine la itre nekönatr.’ Ngo Tusi Hmitrötr a amekötin hnyawane kowe la kem troa qeje Iehova kowe la itre nekö i angeic. (Efeso 6:4) Ame la ajane la kem me thin, tre tro la itre nekö i nyidro a imelekeu hnyawa me Iehova, tui Samuela lo angeic a nekönatr.—1 Samuela 3:19.

15. Nemene la aqane tro sa nyipici koi Iehova la easa axeciëne la itre mekune ka tru?

¹⁵ Aqane troa axecië mekun. Qëmekene tro sa axeciëne la itre mekune ka tru, loi e tro sa pane thele la mekuna i Iehova matre tro sa nyipici koi Nyidrë. Tusi Hmitrötr me organizasio i Nyidrë a xatua së ngöne la götrane cili. Hnene la itre xa keme me thin ka mele trenyiwa ngöne la ketre nöj, hna iupi fë la nekö i angatr medreng ngöne lo nöje i angatr, matre troa thupën hnene la itre sinee i angatr. Celë hi lai ka troa aijijë angatr troa catre huliwa göi troa hetre mani. Eje hi laka, ketre mekune lai nyine troa isa axeciën, ngo loi e tro la lue trefën a isa waipengöi nyidro me hape, ‘Nemene la mekuna i Iehova göne la mekuna i nyiho?’ (E jë la Roma 14:12.) Loi e troa pane wange la hna qaja hnei Tusi Hmitrötr qëmekene troa axeciëne la itre mekune ka tru göne la hnepe lapa me huliwa së. Ame e cili, ka nyipi ewekë catre la ixatua i Iehova, ke, thatreine kö së troa sipu amekötine la itre jë së.—Ieremia 10:23.

16. Nemene la nyine troa axeciën hnene la ketre thin? Nemene la ka xatua angeic troa xomi mekune ka loi?

 ¹⁶ Thupene la hna fek hnene la lue trefën kowe la ketre nöj, hnahone pi hi föe la nekö i nyidro trahmany. Ame hnei nyidroti hna mekune troa upe la nekönatre kowe la lue qaaqa hmunë ngöne la nöje i nyidro. Ngo ame hë e thupen, ini Tusi jë hi la föe memine la ketre Atre Anyipici Iehova. Nge angeic a atre e cili ka hape, hnëqa i angeic troa inine la nekö i angeic göi Iehova. (Salamo 127:3; Ite Edomë 22:6) Hnene la föe hna thith koi Iehova, tune lo hna upi angeic hnei Tusi Hmitrötr troa kuca, me sipo iele Nyidrë troa xatua angeic troa xomi mekune ka loi. (Salamo 62:7, 8) Hnei angeice fe hna ithanatane la jol kowe la ka ini Tus me angeic me itre xa trejin hnine la ekalesia. Ngacama hna uku angeic hnene la itre sinee i angeic troa iupi fë la medreng kowe la lue qaaqa hmunë, ngo ase hë angeic mekune ka hape, tha mekune ka loi kö lai. Öhne hnyawa hi la föi angeic la aqane xatua angeic memine la nekönatr hnene la itre trejin. Hna ketri nyidrëti hnyawa matre hane jë fe hë nyidrëti nyiqaane ini Tusi Hmitrötr, me hane sine la itre icasikeu. Pane mekune ju la madrine ne la föe la angeic a öhne ka hape, hnei Iehova hna sa la thithi angeic!

17. Nemene la hna amekötine nyine tro sa xötrethenge ngöne la easë a inine la Tusi Hmitrötr memine la ketre atr?

¹⁷ Aqane troa xötrethenge la itre hna amekötin. E ka nyipici së koi Akötresie, tro së lai a xötrethenge la itre hna amekötine qaathene la organizasio i Nyidrë. Hanawang la nyine tro sa kuca ngöne la easa nyiqaane ini Tus me ketre atr jëne la itus, Nemene La Nyipi Ini Hna Hamën Hnei Tusi Hmitrötr? Hna upi së lo troa xome la hnepe menetr thupene la hna ini Tusi matre troa xatua angeic troa atrepengöne la organizasio i Iehova. Loi e tro sa amamane la video hna hape, Ka Tune Kaa La Itre Icasikeu Hun? Me ce wang la boroshür, Itre Drei La Ka Kuca La Aja i Iehova Enehila? Ame hë la kola afenesin la itus Ini Tus, loi e tro sa inine me angeic la itus, “Thupë Nyipunieti Ju Kö Ngöne La Ihnimi Akötesie” matre troa “acatene” catrëne la lapaune i angeic, ngacama hna bapataiso angeice hë. (Kolose 2:7) Epuni kö a xötrethenge la hna amekötine celë qaathene la organizasio i Iehova?

18, 19. Nemene la itre kepine matre loi e tro sa ole koi Iehova?

¹⁸ Nyimu kepine matre loi e tro sa ole koi Iehova! Ame la hnapan, “ka mele kö shë, me enij, me eje kö [jëne] nyidë.” (Ite Huliwa 17:27, 28) Hne së fe hna kapa qaathei Nyidrë la ketre Tus, ene la Tusi Hmitrötr. Matre tune la itre keresiano ne Thesalonika, easa wange atrune la ahnahna cili ke, maca lai qaathei Nyidrë.—1 Thesalonika 2:13.

¹⁹ Hnene la Tusi Hmitrötr hna xatua së troa easenyi koi Iehova, matre Nyidrëti fe a easenyi koi së. (Iakobo 4:8) Tru la ole së koi Iehova ke, hnei Nyidrëti hna könë së matre troa hane nyi atrene la organizasio i Nyidrë. Casi hi la mekuna së memine la atre cinyihane la Salamo kola hape: “Ole Iehova jë, ke [ka lolo] anganyidë ; ke epine palua la ihnimi nyidë.” (Salamo 136:1) Ame ngöne la nöjei xötr ne la Salamo celë, anyimua mama la hnëewekë hna hape “epine palua la ihnimi nyidë.” Haawe, e hne së hna nyipici koi Iehova me xötrethenge la itre hna amekötine qaathene la organizasio i Nyidrë, tro hë sa kapa qaathei Nyidrë la mele ka tha ase palua kö, nge tro Nyidrëti a nyipici koi së uti hë epine palua!