1-3. ¿Kasa eeka süpüla sülatüin sümüin Evodia otta Síntique? ¿Kasa waaʼinrajatka süpüla nnojoliinjanain waya mojujiraain namaa na wawalayuukana? (Piirakaa sümüin tü ayaakuaakat).

KOJUTÜSHAATASÜ wamüin tü Wiwüliakat süka nünüikin shia Maleiwa. Suluʼu tü Wiwüliakat, eesü pütchi achiaaka waya suulia sünainpünaain waya kasa mojusü otta süpüla wanoukteʼerüin wakuwaʼipa waainjüle kasa mojusü. ¿Kasaka waaʼinrüin wachiaanapa sükajee tia pütchikalüirua? Jülüja paaʼin tü alatakat sümaiwa paala sümüin Evodia otta Síntique. Aʼülüjaajiraashii naya saashin tü Wiwüliakat, nnojotpejeʼe süküjüin jamüin naʼülüjiraaka. Jülüjataa paaʼin tüü.

² Eesüjaʼa suunejaale Evodia waneeinnua wawalayuu shipialuʼumüin sünain ekawaa, nnojotpejeʼe suunejaain Síntique. Shiasaʼa saapapa Síntique nanüiki na wayuu chajanakana sünain tü ekawaakat, jashichisü maʼin shia. Eesüjaʼa müle sünüiki süleʼeruʼu: «¿Jamüsüche nnojotka suunejaain taya Evodia? Saʼaleewainya taya taaʼinruʼu». Saashin Síntique, nnojotsü anain süshoʼu sümüin Evodia otta kaaʼinsü Evodia suulia. Shiasaʼa suunejaaka Síntique waneeinnua wayuu sünain ekawaa otta nnojotsü suunejaain Evodia. Eeshiijaʼa mojujiraale waneeinnua wawalayuu sünainjee tia. Saashin tü Wiwüliakat, nüchiaain Pablo naya piamashiikana wawalayuu otta nüküjüin namüin choʼujaain anajiraain naya nachikuaʼa. Oonooshii  naya jieyuukana sümaa nünüiki Pablo jee ayatüshii naya aʼyataain nümüin Jeʼwaa sümaa talatüin naaʼin (Filip. 4:2, 3).

³ Müsia maaʼulu yaa, eeshii wawalayuu eekai mojujiraain namaa waneeinnua wawalayuu. Eepejeʼe süpüla wanoukteʼerüin wanee mojujirawaa waaʼinrüle tü sümakat tü Wiwüliakat. Akaʼaya waya, nnojoleena sünainpünaain kasachiki sutuma. Waaʼinrüle tü sümakat tü Wiwüliakat, weeʼiyateerü sünain kojutüin wamüin tü karaloukta nümaʼanajeejatkat Jeʼwaa (Sal. 27:11).

4, 5. ¿Jarat tü pütchi suluʼujeejatkat tü Wiwüliakat akaaliinjeenaka waya suulia waashichijaain?

⁴ Kapüleesia wamüin wachecherüin waaʼin suulia jashiee. Eesü mojule maʼin waaʼin jee jashichire maʼin waya sutuma airuʼuluin pütchi wamüin jee müliale waya atumawaa sutuma naatain wakuwaʼipa, naatain watapaʼa jee wayolojo. Mojuleejeeria maʼin waaʼin niale wanee wawala müin aainjalaa wamüin. ¿Jarat tü pütchi suluʼujeejatkat tü Wiwüliakat akaaliinjeenaka waya?

⁵ Nütüjaa aaʼu Jeʼwaa kasain akaaliinjeechin wanee wayuu süpüla nüchecherüin naaʼin suulia jashiee. Wanaa sümaa jashichin maʼin waya, eeshii waaʼinrüle wanee kasa mojeetka atuma waaʼin. Nüküjüin Jeʼwaa tü waaʼinrajatkat, müshi nia: «Nnojo paashichijaamaatüin». Woonoole sümaa pütchikat tüü, nnojoleena waya sünainpünaain wanee kasachiki (paashajeʼera Eclesiastés 7:9; Proverbios 16:32). Süküjüinya wamüin tü Wiwüliakat, motuinjatüin waaʼin naainjala na waneeinnua. Naashin Jesuu, nnojorüle motuin waaʼin naainjala na waneeinnua, nnojoleerü motuin naaʼin Jeʼwaa tü waainjalakat (Mat. 6:14, 15). ¿Choʼujaasüche püchecherüin paaʼin suulia jashiee süpüla motuin paaʼin naainjala na waneeinnua?

6. ¿Kaseerü alataka nnojorüle wachecherüin waaʼin suulia jashiee?

⁶ Nnojorüle wachecherüin waaʼin suulia jashiee, aashichijaweena waya sooʼomüin wayuu jee ütteerü waaʼin sünain. Eesüjaʼa süpüla wanaawain naaʼin waneeinnua wawalayuu wamaa. Nayaawateetpejeʼe saaʼu mapa na wawalayuukana üttüin waaʼin nünain wanee wawala, jaʼitairü wounjulajüin süchiki. Suluʼujee tia, akaaʼinjaweena naya woulia (Prov. 26:24-26). Nakaaliinjeena waya na laülaashiikana sükajee tü Wiwüliakat süpüla wasünneʼerüin suluʼujee waaʼin tü jashieekat, tü üttaakat aaʼin otta süpüla motuin waaʼin naainjala na waneeinnua (Lev. 19:17, 18; Roma 3:11-18). Naaʼinrapa tia na laülaashiikana, ¿paaʼinreetche tü nümakat Jeʼwaa pümüin suluʼu tü Wiwüliakat?

7, 8. (1) ¿Jamüsü suʼuniria nutuma Jeʼwaa tü nupueulosekat? (2) ¿Kasa waaʼinrajatka saashin tü Wiwüliakat? ¿Jamüsü waaʼinrajatka tia?

⁷ Nuʼunirüin Jeʼwaa sukuwaʼipa tü nupueulose yaakat mmapaʼa otta nikirajüin shia. ¿Jamüsü sukuwaʼipa nutuma? Niʼitaain Jesuu süpüla shikiipüʼüin tü nupueulosekat; müshia Jesuu, niʼitaain «chi achepchiee oonookai otta kekiikai maʼin» süpüla nikirajüin tü nupueulosekat Maleiwa otta süpüla nuʼunirüin shia (Éf. 5:23; Mat. 24:45-47, TNM). Kojutüsü maʼin tü Wiwüliakat nümüin chi achepchieekai süka nünüikin shia Maleiwa maʼaka kojutüin shia namüin na aluwataaushii jee laülaayuu eejanakana nakalioʼu na nikirajüinkana Jesuu (paashajeʼera 1 Tesalónica 2:13, TNM). ¿Kasa waaʼinrajatka saashin tü Wiwüliakat?

⁸ Saashin tü Wiwüliakat, outkajaainjana waya waneepia (Heb. 10:24, 25). Jee sükaaliinjain waya süpüla wanaawain tü watüjakat süchiki tü Wiwüliakat (1 Cor. 1:10). Sütütüleʼerüinya waaʼin tü Wiwüliakat süpüla palajanain watuma Nuluwataaya Maleiwa (Mat. 6:33, TNM). Süküjüin wamüin waküjüinjanain pütchi sainküin piichi, eere jouluin wayuu otta eepünaale eein wayuu wapüla (Mat. 28:19, 20; Aluw. 5:42; 17:17; 20:20). Süküjüin namüin na laülaashiikana naaʼinmajüinjanain na wawalayuukana süpüla wuleinjatüin nakuwaʼipa (1 Cor. 5:1-5, 12, 13; 1 Tim. 5:19-21). Otta müsia süküjüin wamüin keisalainjanain waya, nnojoluinjatüin jülüjain waaʼin kasa mojusü jee walerajüinjatüin tü kasa nülerajakat Jeʼwaa (2 Cor. 7:1).

9. ¿Jarai chi niʼitaakai Jesuu süpüla nikirajüin waya sünain tü Nünüikikat Maleiwa?

 ⁹ Eeshii eekai nnojoluin choʼujaain namüin naashin nekirajünüin sünain tü Wiwüliakat sutuma wayuu. Niapejeʼe eʼitaanüin nutuma Jesuu chi achepchieekai süpüla nikirajüin nupueulose Maleiwa soʼujee juyakat 1919. Naaʼinrüin tia süpüla wayaawatüin saaʼu tü shikirajakalü anain tü Wiwüliakat sümaa waaʼinrüin tü sümakat. Sutuma tia, wulesü wakuwaʼipa, anajiraashii sümaa paaʼinwajiraain waya namaa na wawalayuukana. Püsakira paaʼin sünain tüü: «¿Ayateeiche waneepiain taya nümaa Jesuu? ¿Ayateetche taaʼinrüin tü nuluwataakalü anain chi achepchieekai?».

10. ¿Kasa nüküjaka Ezequiel süchiki tü nupueulose Maleiwa chakat iipünaa?

¹⁰ Sünainjee tü sümakat tü Wiwüliakat, wayaawata aaʼu paaʼinwain na aʼyataakana nümüin Jeʼwaa chaa iipünaa. Jamüshijaʼa Ezequiel, niʼrüin Jeʼwaa suluʼu neʼejena, kawachirasü maʼin shia sümaa eein süpüla sujununtaain nutuma suwachiraluʼu (Ezeq. 1:4-28). Tü neʼejenakat Jeʼwaa, shiyaawase tü nupueulose chakat iipünaa, jüüjüüchonsü shia sünain aaʼinraa tü nümakat Jeʼwaa. Müsia tia, sünainpünaasü tü nupueulose yaakat mmapaʼa. Soto waaʼin kojuyairüin kasa sunoukteʼeraka tü nupueulose Jeʼwaa yaakat mmapaʼa. Niapejeʼe Jeʼwaa akaaliinjain tü nupueulosekat sünain aaʼinraa tia. Soʼu palit kaʼi, najaʼttireerü Jesuu otta na aapieekana tü wayuu mojulaasükalüirua. Nnojoleerü wayuu eekai mojutüin amüin Jeʼwaa, mojutüin atuma tü nünüliakat otta eekai mojuin anüiki süchiki sukuwaʼipa nuluwataaya Jeʼwaa.

11, 12. ¿Kasa suuntaka saaʼinrüin tü nupueulosekat Jeʼwaa maaʼutpünaa yaa?

¹¹ Wekirajaa sünain tü kasa suuntakat saaʼinrüin tü nupueulosekat Jeʼwaa maaʼutpünaa yaa. Sünain akumajaa Piichi Outkajaalee jee Weteet. Watta naalii na wawalayuu aʼyataakana maʼin sünain akumajaa tü Weteet chakat Warwick (Nueva York, Estados Unidos). Wainmashaata na wawalayuu aʼyataakana maʼin sainküin mma sünain akumajaa Piichi Outkajaalee jee Weteet. Naya wawalayuukana, jülüjashii naya naaʼin na wawalayuu aʼyataakana suluʼu Departamento Mundial de Diseño y Construcción. Talatüshii maʼin waya namaa na wawalayuu aʼyataakana maʼin sünain akumajaa Piichi Outkajaalee jee Weteet. Otta müshiʼiya na wawalayuukana sainküin mmakat süpüshuaʼa, asülajüshii nneerü süpüla sukumajünüin Piichi Outkajaalee jee Weteet. Anakuwaʼipaliishii nutuma Jeʼwaa na wayuu suluʼukana nupueulose süka nnojoluin yaletüin naaʼin jee süka waneepiain naya nümaa (Luc. 21:1-4).

¹² Ekirajawaa. Kamalainsü nümüin Jeʼwaa nikirajüin na wayuu suluʼukana nupueulose (Is. 2:2, 3). Anuu sünülia tü ekirajawaa eekat nutuma Jeʼwaa: Ekirajawaa napülajatka na Pürekutsootkana, Ekirajawaa napüla na Aküjüliikana pütchi, Ekirajaalee Galaad sutuma Watchtower, Ekirajawaa napüla na Weteliita Jekennuukana, Ekirajawaa napüla na Alapalaakana waaʼu sümaa Naʼwayuuse, Ekirajawaa napüla na Laülaashiikana suluʼu Outkajaalee, Ekirajawaa napülajatka na Laülaashiikana otta na Aʼyataakana neʼipajee otta Ekirajawaa napüla na Shikiipüʼükana Weteet sümaa Naʼwayuuse. Weʼrajaale suluʼu jw.org, wousüteerü anain tü Wiwüliakat suluʼu wainma anüikii jee müsia karalouktairua. Akaʼaya suluʼu, eesü pütchi napülajatka na tepichikana, na kapüshikana otta pütchi aküjünaka süchiki tü alatakat namüin na wawalayuukana sainküin mmakat. ¿Eeshia pia aküjüin pütchi süka jw.org? ¿Eesia püchajaain pütchi suluʼu süpüla pikirajaain sümaa püpüshi?

13. ¿Kasa waaʼinrajatka sutuma suluʼuinnapain waya tü nupueulosekat Jeʼwaa?

¹³ Talatüsü maʼin waaʼin süka suluʼuin waya nupueulose Jeʼwaa otta sutuma watüjaain saaʼu tü keeʼireekat naaʼin waaʼinrüin. Süka watüjaaitpain saaʼu tia, oonooinjana waya sümaa nünüiki Jeʼwaa otta waaʼinrüinjatü tü anakat nümüin. Walerajüinjatü tü kasa nülerajakat Jeʼwaa, jaʼitairü wattain saalii wayuu keejiaka amüin aaʼinraa kasa mojusü (Sal. 97:10). Nnojotsü wanaawainjatüin  waaʼin namaa na wayuu anakana amüin tü kasa mojusükat otta mojukana amüin tü kasa anasükat (Is. 5:20). Talateere watuma Jeʼwaa, acheküsü wulein wanoula jee wakuwaʼipa nuʼupala (1 Cor. 6:9-11). Tü nüküjakat wamüin Jeʼwaa suluʼu tü Wiwüliakat süpülajatü anain wakuwaʼipa. Aishii waya nüpüla Jeʼwaa otta waneepieeshii waya nümaa. Waaʼinrüinjeseʼe tü nümakat wamüin süpüla anain wakuwaʼipa sümaa wapüshi, namaa na wawalayuukana, namaa na aʼyataajiraakana wamaa, namaa na koleejiajiraakana wamaa otta jalapünaale waya (Prov. 15:3). Wekirajaa sünain waneeirua kasa weeʼiyatüinjatka akajee waneepiain waya nümaa Maleiwa.

14. ¿Kasa naaʼinrajatka na kachoinkana waneepieere naya nümaa Jeʼwaa?

¹⁴ Pikirajapa na püchonniikana. Nüküjüin Jeʼwaa suluʼu tü Wiwüliakat tü naaʼinrajatkat na kachoinkana süpüla anain natuma nekirajia nachonnii. Na wawalayuu kachoinkana, jülüjeesü naaʼin nakuwaʼipa suulia wanaawain naaʼin namaa na manoujainsaliikana (Éf. 2:2). Jamüsüjaʼa suluʼu waneeirua mma, eeshi nümüle wanee wayuu kachonkai: «Shiainjatü tü jietkat ekirajaka na tepichikana». Nnojotpejeʼe müinjatüin tia saashin tü Wiwüliakat, niainjachi chi toolokoi ekirajaka nüchonnii nüchiki Jeʼwaa (Éf. 6:4). Aire Jeʼwaa napüla na kachoinkana, nachajaweerü sukuwaʼipa süpüla aleewain maʼin nachonnii nümaa Jeʼwaa maʼaka naaʼin Samuel jintüliiwaʼaya nia (1 Sam. 3:19).

15. ¿Kasa waaʼinrajatka süpüla waneepiainjanain waya nümaa Jeʼwaa waaʼinrajatpa wanee kasa?

¹⁵ Waaʼinrajatpa wanee kasa. Süpülapünaa waneeküin wanee kasa waaʼinrajatka, watüjaainjatü aaʼu palajana jamüin nünüiki Jeʼwaa süchiki tia süpüla ayatüin waya waneepiain nümaa. Sükaaliinjain waya tü sümakat tü Wiwüliakat otta nupueulose Maleiwa sünain aaʼinraa tia. Maaʼulu yaa, eeshii waneeinnua wayuu kepiakana suluʼu wanee mma naatajatü, shiasaʼa kachonpa naya, neʼikajaain nachon noumainpaʼamüin, sümaʼanamüin  napüshi süpüla nayainjanain aaʼinmajüin. Naaʼinrüin tia süpüla naaʼinmaain tü naʼyataainkat jee tü nneetkat. Mayaainjeʼe nnojoluin jaralüin aküjüin namüin na kachoinkana tü naaʼinrajatkat naka nachonnii, anasü nasakireʼerüle naaʼin sünain tüü: «¿Aneetche noʼuluʼu Jeʼwaa tü waaʼinrajatkat?» (paashajeʼera Roma 14:12, TNM). Waaʼinrajatpa wanee kasa sünainpünaaka sukuwaʼipa wapüshi jee waʼyataain, jülüjeesü waaʼin palajana jamüin sünüiki tü Wiwüliakat süchiki tia. Choʼujaasia maʼin nuʼunirüin Jeʼwaa tü wakuwaʼipakat süka isain wachiki waaʼinrüin tia (Jer. 10:23).

16. ¿Kasa saaʼinrüinjatiaaka wanee wayuu nüka chi süchonkai? ¿Kasa akaaliinjaka shia süpüla saaʼinrüinjatüin tü anasükat?

¹⁶ Eeshi wanee wayuu okolojookai sümaa nuʼwayuuse suluʼumüin wanee mma naatajatü, kachonkalaka tü nuʼwayuusekat nümüin chaʼayaa. Nayasaʼa nayakana, naluwataainjachia chi nachonkai sümaʼanamüin noushu jee nutuushi süpüla nayain epijüin. Mapa, ekirajaasü tia wayuukot sünain tü Wiwüliakat namaa na wawalayuukana otta shikirajaa anainrü shiainjatüin ekirajüin chi süchonkai nüchiki Jeʼwaa (Sal. 127:3; Prov. 22:6). Suʼuraajaka tia wayuukot, achuntashaatasü kaaliinwaa nümüin Jeʼwaa süpüla saaʼinrüin tü anakat noʼuluʼu (Sal. 62:7, 8). Aashajaasü shiaʼaya sümaa tü wawala ekirajakat shia sünain tü Wiwüliakat jee namaa waneeinnua wawalayuu. Mayaapejeʼe ichein na süpüshikana otta na saʼaleewainyuukana süchiirua süjütüin chi süchonkai sümaʼanamüin noushu jee nutuushi, nnojotsü saaʼinrüin tia süka sütüjaain aaʼu nnojoluin anain tia. Niʼrüinjaʼa chi suʼwayuusekai kaaliin shia otta kaaliin chi nachonkai napüla na wawalayuukana. Sutuma ponoshootoin naaʼin tia, ekirajaashi nia sünain tü Wiwüliakat jee oʼunawaishi nia sünain tü outkajawaakat sümaa nuʼwayuuse otta chi nachonkai. Talatashaanasü saaʼin tia wayuukot sutuma shiʼrüin nusouktüin Jeʼwaa shiʼipajee tü suchuntakat nümüin.

17. Wekirajüle wayuu sünain tü Wiwüliakat, ¿jamüinjatü sukuwaʼipa tia watuma saashin nupueulose Jeʼwaa?

¹⁷ Woonoopa sümaa tü münakat wamüin. Waneepiale waya nümaa Maleiwa, waaʼinreerü tü sümakat nupueulose. Jamüshiijaʼa waya, aküjünüsü wamüin tü waaʼinrajatkat wekirajapa wayuu süka tü karalouktakat ¿Kasa shikirajaka maʼin tü Wiwüliakat? Akatalüinjana waya maʼaka jeʼra minuuto süchikijee wekirajüin wayuu süka tia karalouktakat süpüla wekirajüin naya sooʼomüin süchiki tü nupueulosekat Jeʼwaa. Eesü süpüla weeʼiyatüin namüin tü videokot ¿Kasache aainjünaka suluʼu tü Piichi Outkajaaleekat? jee müsia wekirajüinjana naya süka tü poyeetokot ¿Jaralii na aaʼinrakana maaʼulu tü nüchekakat Jeʼwaa? Kettaapa nutuma wanee wayuu tü karalouktakat Kasa shikirajaka, wekirajüinjachi nia süka tü karalouktakat «Ayata alin jüpüla Maleiwa» süpüla ichein nunoula. Wekirajüinjachi nia sünain tia karalouktakat jaʼitaichi woutiisain süpülapünaa najaʼttirüin shia (Col. 2:7, TNM). ¿Eesia paaʼinrüin tü suluwataakalü anain waya tü nupueulosekat Jeʼwaa?

18, 19. ¿Kasa waapüinjatka aaʼujee analuʼut nümüin Jeʼwaa?

¹⁸ Watta saalii kasa waapüinjatka aaʼujee tü analuʼutkat nümüin Jeʼwaa. «Katoʼuchii waya [nutuma Jeʼwaa], waraittüshii waya otta wayuushii waya» (Aluw. 17:27, 28). Nia aapaka wamüin tü Wiwüliakat. Kojutüsü wamüin tü Wiwüliakat maʼaka kojutüin shia namüin na anoujashii chejeʼewaliikana Tesalónica süka nünüikin shia Jeʼwaa (1 Tes. 2:13, TNM).

¹⁹ Sükaaliinjain waya tü Wiwüliakat süpüla warütkaain nünainmüin Jeʼwaa jee süpüla nürütkaain wanainmüin (Sant. 4:8). Waapashaatain analuʼut nümüin Jeʼwaa saaʼujee nüntirüin waya suluʼumüin tü nupueulosekat. Müsü waaʼin maʼaka naaʼin chi salmistakai, müshi nia: «Jaapa analuʼut nümüin Jeʼwaa süka anamiain nia; aisü wayuu nüpüla waneepia» (Sal. 136:1, TNM). Kojuyatua nümüin chi salmistakai suluʼu kapiitulokat tüü: «Aisü wayuu nüpüla waneepia». Shiiʼiyatüin tia kateerüin woʼu waneepia nutuma Jeʼwaa otta waneepieechin nia wamaa waneepiale waya nümaa otta waaʼinrüle tü nümakat wamüin sükajee nupueulose.