1-3. Nama engka udah nyadi entara Eudia enggau Sintike? Baka ni kitai ulih nyeliahka penanggul nya? (Peda gambar ba pun artikel.)

KITAI bebasa bendar ke Bup Kudus laban kitai nemu iya Jaku Petara. Bup Kudus ngundan jaku ajar ke ulih nulung kitai nyeliahka penanggul, lalu iya ulih ngerara kitai lebuh kitai ngereja penyalah. Nya alai, baka ni kitai nerima jaku ajar nya? Pikirka pasal Eudia enggau Sintike, dua iku menyadi Kristian indu ke diiri ngena roh kudus ba kurun keterubah. Bup Kudus madahka seduai iya bekelikuh, tang Bup Kudus nadai madahka kebuah iya. Aram kitai ngambarka utai ke engka udah nyadi.

² Eudia engka mai sekeda bala menyadi Kristian makai ba rumah iya. Tang iya enda mai Sintike. Udah nya, lebuh Sintike ninga orang bukai madahka sida gaga amat begulai makai ba rumah Eudia, iya balat pedis ati. Iya engka berunding: ‘Aku enda nyangka Eudia enda mai aku! Aku ngumbai kami duai kawan rapat.’ Sintike ngasaika Eudia enda amat rinduka iya, lalu Eudia nyeliahka diri ari iya. Nya alai Sintike mai orang ti sama makai ba rumah iya tang enda mai Eudia! Pekara tu mega engka udah ngasuh orang bukai ba gempuru berasai irau ati. Bup Kudus nunjukka Paul ngerara seduai iya,  lalu meransang seduai iya bebaik. Seduai iya tentu mendingka jaku Paul sereta terus nyembah Jehovah enggau lantang ati.—Plp. 4:2, 3.

³ Ba gempuru kitai kemaya hari tu, kekadang kitai mega napi penanggul enggau bala menyadi Kristian. Tang enti kitai nitihka jaku ajar ba Bup Kudus, kitai ulih mutarka penanggul nya. Amat, kitai mega ulih nyeliahka penanggul nya. Lalu enti kitai ngasika utai ke dipadah Bup Kudus, kitai nunjukka diri bebasa bendar ke Jaku Jehovah.—Mas. 27:11.

4, 5. Nama jaku ajar ke diberi Bup Kudus ngagai kitai pasal nagang asai ati diri?

⁴ Endang enda seruran senang nagang asai ati diri. Kitai engka berasai balat tusah ati tauka pedis ati, enti orang nyebut utai ke enda manah ngagai kitai tauka bechiping enggau kitai, engka ketegal gaya pengidup kitai, chura kulit tauka gamal enggau tubuh kitai. Lalu kitai engka balat agi pedis ati enti orang ke nyebut utai ti enda manah tauka bechiping nya, seiku ari bala menyadi Kristian kitai. Nama jaku ajar ba Bup Kudus ke ulih nulung kitai?

⁵ Jehovah nemu utai ke ulih nyadi enti mensia enda tetagangka asai ati sida. Lebuh kitai berasai pedis ati tauka ringat, kitai engka nyebut tauka ngereja utai ke ulih ngasuh kitai nesal ati dudi hari. Ba Bup Kudus, Jehovah ngasuh kitai nagang pemangah diri, lalu ku Iya: “Anang lengkar.” Uji pikirka pemayuh penanggul ke ulih diseliahka enti kitai ngasika jaku ajar nya sereta enda jampat pedis ati! (Bacha Pengajar 7:9; Jaku Dalam 16:32.) Bup Kudus mega ngasuh kitai ngampun orang bukai. Amat, Jesus madahka enti kitai enggai ngampun orang bukai, Jehovah mega enggai ngampun kitai. (Mat. 6:14, 15) Kati nuan patut agi liat ati sereta deka agi ngampun orang bukai?

6. Nama engka nyadi enti kitai enda tetagangka asai ati diri?

⁶ Enti kitai enda tetagangka asai ati diri, kitai engka majak pedis ati sereta berengkah bisi asai ati ti begedika orang. Tauka engka ngasuh sekeda orang ba gempuru bisi asai ati ti sama. Taja pan kitai nguji ngelalaika asai ati ti pedis tauka begedi, nyau kelama orang bukai deka nemu asai ati kitai. Udah nya sida engka ngenyauhka diri ari kitai. (J-lam. 26:24-26) Bala tuai gempuru deka ngena Bup Kudus nguji nulung kitai muai asai ati ti pedis tauka begedi, lalu ngampun orang bukai. (Lew. 19:17, 18; Rom. 3:11-18) Enti sida ngereja nya, kati kitai deka nitihka iring ari Jaku Petara?

7, 8. (a) Baka ni Jehovah ngiring nembiak Iya? (b) Nama sekeda iring ke bisi ba Bup Kudus, lalu nama kebuah kitai patut ngasika iring nya?

⁷ Jehovah ngiring sereta ngajar orang ke enggau gerempung Iya ba dunya kemaya hari tu. Baka ni? Iya udah milih Kristus nyadi “kepala” gempuru, lalu Kristus udah milih “ulun ke tetap ati sereta bepenemu-dalam” ngambika ngajar sereta ngiring nembiak Petara. (Eps. 5:23; Mat. 24:45-47) Sama baka raban ti megai ba kurun keterubah, ulun tu bebasa bendar ke Bup Kudus laban nya Jaku Petara. (Bacha 1 Tesalonika 2:13.) Nama sekeda iring ke bisi ba Bup Kudus?

⁸ Bup Kudus ngasuh kitai datai begempuru enggau tetap. (Heb. 10:24, 25) Jaku Iya meransang semua kitai pechayaka ajar Bup Kudus ti sama. (1 Kor. 1:10) Bup Kudus mega ngasuh kitai terus ‘ngiga dulu Perintah Petara.’ (Mat. 6:33) Bup Kudus ngasuh kitai nginjil ari rumah ke rumah, ba endur orang mayuh, tauka ba sebarang endur ke bisi orang. (Mat. 28:19, 20; SKR. 5:42; 17:17;  20:20) Iya ngasuh bala tuai gempuru ngintu gempuru ngambika tuchi. (1 Kor. 5:1-5, 13; 1 Tim. 5:19-21) Lalu iya madahka, kitai patut nyaga pemeresi tubuh sereta nyeliahka runding enggau pendiau ti dipegedika Jehovah.—2 Kor. 7:1.

9. Sapa dipilih Jesus kena nulung kitai meretika Bup Kudus?

⁹ Sekeda orang engka ngasaika diri enda begunaka orang bukai nerangka Bup Kudus ngagai sida. Tang kenyau ari taun 1919, Jesus udah ngena “ulun ke tetap ati sereta bepenemu-dalam” nulung nembiak Petara meretika utai ti diajar sereta nitihka utai ti dipadah Bup Kudus. Enti kitai ngasika Bup Kudus, tu ulih nulung gempuru mengkang tuchi, bisi pemaik sereta beserakup. Tanya diri empu, ‘Kati aku deka taluk ngagai Jesus sereta nitihka iring ari ulun ke tetap ati?’

10. Baka ni bup Esekiel nerangka gerempung Jehovah ti di serega?

¹⁰ Nengah Bup Kudus, kitai nemu nembiak Jehovah ti di serega mega teratur. Ngambika chunto, dalam siti genera, Esekiel meda Jehovah nepan kerita ke ulih bejalai laju ngagai sebarang tunga ti dikedekaka Jehovah. (Esk. 1:4-28) Kerita nya ngambarka gerempung Jehovah ti di serega, ke jampat nitihka iring Iya. Lalu gerempung Iya ti di serega nya bekaul enggau gerempung Iya ti di dunya. Pikirka pemayuh ubah ke udah digaga ba gerempung Iya dalam sepuluh taun ti udah. Anang enda ingat, Jehovah ke ngaga semua ubah nya. Enda lama agi Kristus enggau bala melikat iya deka ngerusak dunya ti jai tu. Nadai agi orang deka bejai Jehovah sereta nama Iya tauka ngutuk chara Iya merintah!

11, 12. Nama utai ke ulih dikereja gerempung Jehovah ba hari ti penudi tu?

¹¹ Peratika utai ke ulih dikereja gerempung Jehovah ba hari ti penudi tu. Pengawa nirika bengunan. Beratus iku bala menyadi Kristian udah bebendar nirika indu opis Saksi-Saksi Jehovah ti baru ba Warwick, New York, U.S.A. Beribu iku menyadi Kristian di serata dunya enggau sukarela nirika Palan Gempuru sereta pampang opis. Sida ke sukarela tu di baruh Opis Ngaga Pelan/Nirika Bengunan ba Serata Dunya. Kitai amat beterima kasih ngagai sida ke bebendar gawa ba pengawa nirika bengunan! Lalu nembiak Jehovah ke bisi ba dini-dini endur meri duit pemeri kena nirika semua bengunan nya. Jehovah merekatka nembiak Iya ketegal pemaruh ati sereta penaluk sida.—Luk. 21:1-4.

¹² Bidang pelajar. Jehovah rindu ngajar nembiak Iya. (Isa. 2:2, 3) Pikirka mayuh bengkah sekula ke dikemisi kitai. Kitai bisi Sekula Pengerintis, Sekula Penginjil Perintah Petara, Sekula Gilead, Sekula Tama Betel, Sekula ke Tuai ti Ngabas enggau Bini Sida, Sekula ke Tuai Gempuru, Sekula Bup Kudus ke Menyadi ti Dipilih, sereta Sekula ke Raban Komiti Pampang Opis enggau Bini Sida. Lalu ba laman web kitai, jw.org, kitai bisi Bup Kudus sereta litaricha bukai dalam beratus bengkah bansa jaku. Laman web nya mega bisi begian ke diungkupka ngagai bala nembiak aja sereta ke ruang bilik, nyengkaum siti begian berita pasal gerempung kitai. Kala nuan ngena jw.org ba pengawa nginjil sereta ba pengawa belajarka Bup Kudus ba diri sebilik?

13. Nama utai ke patut digaga nembiak Jehovah?

¹³ Endang basa ti besai ulih enggau gerempung Jehovah sereta nemu utai ti diguna Iya ari kitai! Endang amat, ketegal kitai nemu utai ti ngelantangka ati Petara, kitai patut ngasika Iya sereta ngereja utai ti  ngena. Lalu taja pan mayuh orang rindu ngereja utai ti jai, kitai enda tau enda baka Jehovah ke “begedika penyai.” (Mas. 97:10) Kitai enda tau baka orang ke ngumbai “utai ti jai manah, lalu utai ti manah jai.” (Isa. 5:20) Kitai deka ngelantangka ati Jehovah, nya alai kitai keran deka tuchi dalam semua pekara. (1 Kor. 6:9-11) Utai ke dipadah Jehovah dalam Bup Kudus pulai ke pemanah kitai empu. Kitai rinduka Iya lalu deka taluk ngagai Iya. Nya kebuah kitai nitihka iring Iya ba rumah, ba gempuru, ba endur gawa, ba sekula tauka ba dini-dini endur. (J-lam. 15:3) Pikirka ba sekeda pekara ni kitai patut taluk ngagai Petara.

14. Baka ni apai indai ulih taluk ngagai Jehovah?

¹⁴ Chara ngelatih bala anak kitai. Ba Bup Kudus, Jehovah udah meri apai indai iring kena ngelatih bala anak sida. Orang Kristian patut bejimat ngambika enda nitihka chara berunding ke bisi ba dunya tu. (Eps. 2:2) Ngambika chunto, ba sekeda endur bala apai engka berunding, ‘Ditu, bala indu ke ngajar bala anak.’ Tang Bup Kudus enggau terang ngasuh bala apai ngajar bala anak sida pasal Jehovah. (Eps. 6:4) Bala apai indai ke rinduka Jehovah deka bala anak sida ngembuan kaul ti rapat enggau Iya, baka Samuel lebuh iya agi mit.—1 Sam. 3:19.

15. Baka ni kitai ulih taluk ngagai Jehovah lebuh ngaga pemutus ti besai?

¹⁵ Chara kitai ngaga pemutus. Sebedau kitai ngaga pemutus ti besai ba pengidup, kitai patut nemu runding Jehovah ngambika kitai ulih taluk ngagai Iya. Bup Kudus enggau gerempung Iya ulih nulung kitai. Ngambika chunto, sekeda apai indai kemaya hari tu ke diau ba menua bukai mutuska runding deka nganjung anak sida ke baru ada pulai ngagai menua asal sida ngambika  diibun kaban belayan sida. Enggau tu, kedua-dua apai indai nya ulih terus gawa sereta ngiga duit. Amat, tu pemutus diri empu. Tang laki bini patut nanya diri empu, ‘Nama runding Jehovah pasal pemutus kami duai?’ (Bacha Rome 14:12.) Endang manah enti berunding dulu pasal utai ti dipadah Bup Kudus sebedau kitai ngaga pemutus ti besai pasal diri sebilik sereta kereja. Kitai begunaka tulung ari Apai kitai laban kitai enda ulih ngatur pengidup diri.—Jer. 10:23.

16. Nama pemutus ke patut digaga seiku indai pengudah anak lelaki iya ada? Nama nulung iya ngaga pemutus ti betul?

¹⁶ Pengudah sepasang laki bini pindah ngagai menua bukai, anak lelaki seduai iya pan ada. Lalu seduai iya berunding deka nganjung anak seduai iya pulai ke menua diri ngambika diibun aki ini iya. Tang maya nya, bini iya berengkah belajarka Bup Kudus enggau seiku ari Saksi-Saksi Jehovah. Iya nemu, endang tanggung pengawa iya ngajar anak iya pasal Jehovah. (Mas. 127:3; J-lam. 22:6) Baka ke diasuh Bup Kudus, indu nya besampi ngagai Jehovah lalu minta Jehovah nulung iya ngereja utai ti ngena. (Mas. 62:7, 8) Iya mega bejaku pasal penanggul iya enggau menyadi Kristian indu ke ngajar iya Bup Kudus sereta berandau enggau orang bukai ba gempuru. Taja pan bala kaban belayan sereta bala kawan majak ngansak iya nganjung anak iya ngagai aki ini, tang iya ngumbai nya ukai pemutus ti ngena. Laki iya beratika bala menyadi Kristian udah mayuh nulung bini enggau anak seduai iya. Ati iya berasai ditegu, nya alai iya berengkah belajarka Bup Kudus sereta datai begempuru enggau ruang bilik iya. Uji gambarka pengaga ati bini iya lebuh nemu Jehovah udah nyaut sampi iya!

17. Lebuh kitai belajarka Bup Kudus enggau orang, nama atur ke patut dititihka kitai?

¹⁷ Chara kitai nitihka atur. Enti kitai taluk ngagai Petara, kitai deka nitihka iring ke diterima kitai ari gerempung Iya. Ngambika chunto, peratika utai ke patut dikereja kitai enda lama pengudah kitai berengkah belajarka bup Nama Utai ti Bendar Diajar Bup Kudus? enggau orang. Kitai udah diasuh ngena beberapa minit pengudah tiap kali sesi belajar kena nulung pelajar ngelala gerempung Jehovah enggau mayuh agi. Kitai ulih ngena video Nama Nyadi ba Palan Gempuru? enggau brosur Sapa Orang ti Ngereja Peneka Jehovah Kemaya Hari Tu? Pengudah abis belajarka bup Ajar Bup Kudus, kitai ulih nulung pelajar nyadi “tegap dalam pengarap” enggau belajarka bup “Meruan Dalam Pengerindu Petara,” taja pan iya udah dibaptisa. (Kol. 2:7) Kati nuan nitihka atur ke baka tu ari gerempung Jehovah?

18, 19. Nama sekeda kebuah kitai patut beterima kasih ngagai Jehovah?

¹⁸ Bisi mayuh kebuah kitai patut beterima kasih ngagai Jehovah! Siti kebuah nya, “kitai idup, engkebut,” sereta bisi ketegal Iya. (SKR. 17:27, 28) Iya mega udah meri kitai Jaku Iya, Bup Kudus. Baka orang Kristian ba Tesalonika, kitai beterima kasih ke pemeri tu laban iya ngembuan pesan ari Petara.—1 Tes. 2:13.

¹⁹ Bup Kudus udah nulung kitai semak ngagai Jehovah, lalu Iya deka semak ngagai kitai. (Jas. 4:8) Kitai amat beterima kasih laban Apai kitai udah mai kitai nyadi sebegian ari gerempung Iya! Kitai ngasaika utai ti diasaika pemasmur ke nulis: ‘Beri terima kasih ngagai Jehovah, laban Iya endang badas; laban pengerindu Iya meruan belama iya.’ (Mas. 136:1) Ba tiap iti ayat masmur nya, pemasmur ngulang rambai jaku “pengerindu Iya meruan belama iya.” Amat, enti kitai taluk ngagai Jehovah sereta nitihka iring ke diberi Iya nengah gerempung Iya, Iya deka meri kitai pengidup ti meruan belama iya sereta deka taluk ngagai kitai belama iya!