1-3. Wetin go dɔn apin bitwin Yuodia ɛn Sintiki? Aw wi go ebul fɔ avɔyd dɛn kayn prɔblɛm dɛn de? (Luk di pikchɔ nia dis atikul in taytul.)

WI RILI valyu di Baybul bikɔs wi no se na Gɔd in Buk. Di Baybul gɛt advays dɛn we go ɛp wi fɔ avɔyd prɔblɛm, ɛn i kin kɔrɛkt wi we wi mek mistek. Aw wi kin fil we wi gɛt advays frɔm di Baybul? Lɛ wi tink bɔt tu anɔyntɛd uman dɛn we bin de insay di apɔsul dɛn tɛm, dat na Yuodia ɛn Sintiki. Di Baybul se dɛn bin agyu, bɔt i nɔ tɛl wi wetin mek. Lɛ wi imajin wetin go dɔn apin.

² Sɔntɛm Yuodia bin invayt sɔm brɔda ɛn sista dɛn na in os fɔ lɛ dɛn it. Bɔt i nɔ bin invayt Sintiki. Lɛta, we Sintiki yɛri ɔda brɔda ɛn sista dɛn de tɔk bɔt aw dɛn bin ɛnjɔy di it, i bin rili vɛks. I go dɔn tink se: ‘A nɔ biliv se Yuodia nɔ invayt mi! A bin tink se wi tu na tayt padi.’ Sintiki go dɔn fil se Yuodia nɔ rili lɛk am ɛn i bin de tray fɔ avɔyd am. So Sintiki invayt di sem pipul dɛn fɔ it wit am bɔt i nɔ invayt Yuodia! Dis tin we bin de apin go dɔn ivin mek ɔda pipul dɛn na di kɔngrigeshɔn  fil bad. Di Baybul se Pɔl bin kɔrɛkt dɛn tu sista ya ɛn ɛnkɔrej dɛn fɔ mek pis. I go mɔs bi se dɛn bin lisin to am ɛn kɔntinyu fɔ sav Jiova wit gladi at.—Lɛta Fɔ Filipay 4:​2, 3.

³ Tide insay di kɔngrigeshɔn, wisɛf kin gɛt prɔblɛm dɛn wit wi brɔda ɛn sista dɛn wan wan tɛm. Bɔt if wi fala di advays dɛn we de na di Baybul, wi go ebul fɔ sɔlv dɛn kayn prɔblɛm dɛn de. Infakt, wi kin ivin avɔyd dɛn. Ɛn if wi du wetin di Baybul se, wi de sho se wi rili valyu wetin de insay Jiova in Buk.—Sam 27:​11.

4, 5. Us advays dɛn we Gɔd in Wɔd gi wi bɔt aw wi fɔ kɔntrol di we dɛn aw wi kin fil?

⁴ Nɔto ɔltɛm i kin izi fɔ kɔntrol di we aw wi kin fil. Wi at kin rili pwɛl ɔ wi kin ivin vɛks we sɔmbɔdi tɛl wi wɔd ɔ nɔ trit wi fayn bikɔs wi kɔlchɔ, wi kɔlɔ, ɔ di we aw wi luk difrɛn. Ɛn wi kin fil am mɔ we i bi se di pɔsin we de tɛl wi wɔd ɔ trit wi bad na wi Kristian brɔda ɔ sista. Us advays wi si na Gɔd in Wɔd we go ɛp wi?

⁵ Jiova no wetin kin apin we wi nɔ kɔntrol di we dɛn aw wi kin fil. We wi vɛks, wi kin se ɔ du sɔntin we kin mek wi rigrɛt leta. Insay di Baybul, Jiova tɛl wi fɔ kɔntrol wi wamat ɛn tɔk se: “Nɔ kwik fɔ vɛks.” Jɔs tink bɔt di bɔku prɔblɛm dɛn we wi go avɔyd we wi fala dis advays ɛn nɔ vɛks kwik! (Rid Ɛkliziastis 7:​9; Prɔvabs 16:​32.) Di Baybul tɛl wi bak fɔ fɔgiv ɔda pipul dɛn. Infakt, Jizɔs bin se if wi nɔ fɔgiv ɔda pipul dɛn, Jiova nɔ go fɔgiv wi. (Matyu 6:​14, 15) Yu tink se yu nid fɔ peshɛnt mɔ ɛn rɛdi fɔ fɔgiv ɔda pipul dɛn?

6. Wetin kin apin if wi nɔ kɔntrol di we dɛn aw wi kin fil?

⁶ If wi nɔ kɔntrol di we dɛn aw wi kin fil, wi go kɔntinyu fɔ vɛks ɛn ivin bigin fɔ et sɔmbɔdi. Ɔ wi go mek ɔda pipul dɛn na di kɔngrigeshɔn fil da sem we de. Ivin if wi tray fɔ mek lɛ pɔsin nɔ no se wi vɛks ɔ et sɔmbɔdi, as tɛm de go ɔda pipul dɛn go no aw wi de fil. Dɔn wi brɔda ɛn sista dɛn nɔ go kam nia wi. (Prɔvabs 26:​24-26) Di ɛlda dɛn go yuz di Baybul fɔ ɛp wi fɔ lɛf fɔ vɛks, fɔ lɛf fɔ et ɔda pipul dɛn, ɛn fɔ mek wi fɔgiv ɔda pipul dɛn. (Lɛvitikɔs 19:​17, 18; Lɛta Fɔ Rom 3:​11-18) If dɛn du so, wi go fala di advays we de na Jiova in Buk?

7, 8. (a) Aw Jiova de dayrɛkt in pipul dɛn? (b) Wetin na sɔm tin dɛn we di Baybul tɛl wi fɔ du? Wetin mek wi fɔ du dɛn?

⁷ Tide, na Jiova de dayrɛkt ɛn tich di wan dɛn we de na in ɔganayzeshɔn na dis wɔl. Aw i de du dat? I dɔn pik Jizɔs fɔ “de oba di kɔngrigeshɔn,” ɛn Krays dɔn pik “di slev we fetful ɛn gɛt sɛns” fɔ tich ɛn dayrɛkt Gɔd in pipul dɛn. (Lɛta Fɔ Ɛfisɔs 5:​23, NW; Matyu 24:​45-47, NW) Jɔs lɛk di gɔvnin bɔdi we bin de trade, dis slev rili valyu di Baybul bikɔs na Gɔd in Wɔd. (Rid Fɔs Lɛta Fɔ Tɛsalonayka 2:​13.) Wetin na sɔm tin dɛn we di Baybul tɛl wi fɔ du?

⁸ Di Baybul tɛl wi fɔ go di mitin dɛn ɔltɛm. (Di Ibru Pipul Dɛn 10:​24, 25) I de ɛnkɔrej wi ɔl fɔ biliv di sem tin dɛn we di Baybul de tich. (Fɔs Lɛta Fɔ Kɔrint 1:​10) I tɛl wi bak “fɔ put di Kiŋdɔm fɔs.” (Matyu 6:​33, NW) Di Baybul tɛl wi fɔ de prich frɔm os to os, na say dɛn we pipul dɛn bɔku, ɛn ɛnisay we pipul dɛn de. (Matyu 28:​19, 20; Di Apɔsul Dɛn Wok [Akt] 5:​42;  17:​17; 20:​20) I tɛl di ɛlda dɛn fɔ mek di kɔngrigeshɔn klin. (Fɔs Lɛta Fɔ Kɔrint 5:​1-5, 13; Fɔs Lɛta To Timoti 5:​19-21) Ɛn i tɛl wi fɔ klin wi bɔdi, fɔ avɔyd abit dɛn we Jiova et, ɛn fɔ lɛf fɔ tink bɔt bad tin dɛn.—Sɛkɛn Lɛta Fɔ Kɔrint 7:​1.

9. Udat Jizɔs dɔn pik fɔ ɛp wi ɔndastand Gɔd in Wɔd?

⁹ Sɔm pipul dɛn kin fil se dɛn nɔ nid ɛnibɔdi fɔ ɛksplen di Baybul to dɛn. Bɔt frɔm 1919, Jizɔs dɔn de yuz “di slev we fetful ɛn gɛt sɛns” fɔ ɛp Gɔd in pipul dɛn fɔ ɔndastand wetin di Baybul de tich ɛn fala di advays dɛn we de insay. We wi du wetin di Baybul se, wi go mek di kɔngrigeshɔn klin, ɛn wi go mek pis ɛn wanwɔd de de. Aks yusɛf dis kwɛstyɔn, ‘A go de biɛn Jizɔs ɛn du wetin di slev we fetful de tɛl mi fɔ du?’

10. Wetin di Baybul buk we nem Izikɛl tɔk bɔt di pat pan Jiova in ɔganayzeshɔn we de na ɛvin?

¹⁰ Di Baybul mek wi no se, Jiova in savant dɛn na ɛvin ɔganayz. Fɔ ɛgzampul, Izikɛl bin si wan vishɔn usay Jiova de rayd chariɔt we de muv kwik kwik wan ɛnisay we i want lɛ i go. (Izikɛl 1:​4-28) Di chariɔt tinap fɔ di pat pan Jiova in ɔganayzeshɔn we de na ɛvin, we kwik fɔ du wetin i want. Ɛn dat de afɛkt di pat pan in ɔganayzeshɔn we de na dis wɔl. Tink bɔt di bɔku chenj dɛn we dɛn dɔn mek na Gɔd in ɔganayzeshɔn insay di las tɛn ia we dɔn pas. Mɛmba se Jiova de gayd di wan dɛn we bin de mek dɛn chenj ya. I nɔ go te igen, Krays ɛn in enjɛl dɛn go dɔnawe wit dis wikɛd wɔl. Nɔbɔdi nɔ go ɛva briŋ badnem igen pan Jiova ɔ tɔk bad bɔt di we aw i de rul!

11, 12. Wetin Jiova in ɔganayzeshɔn dɔn ebul fɔ du insay dis las dez?

¹¹ Tink bɔt wetin Jiova in ɔganayzeshɔn dɔn ebul fɔ du insay dis las dez. Bildin. Bɔku bɔku brɔda ɛn sista dɛn dɔn wok tranga wan fɔ bil Jiova Witnɛs dɛn nyu ɛdkwata we de na Wɔwik, insay Nyu Yɔk, na Amɛrika. Plɛnti ɔda wan dɛn arawnd di wɔl de bil Kiŋdɔm Ɔl ɛn branch ɔfis dɛn pan ɔl we dɛn nɔ de pe dɛn. Na di Design/Construction Department de dayrɛkt dɛn pipul ya. Wi rili gladi fɔ ɔl di wan dɛn we de wok tranga wan fɔ bil dɛn ples dɛn ya. Ɛn Jiova in savant dɛn ɔlsay na di wɔl de gi wetin dɛn gɛt fɔ ɛp fɔ bil dɛn ples dɛn ya. Jiova de blɛs in pipul dɛn fɔ we dɛn ɔmbul ɛn we dɛn de sho se dɛn de biɛn am.—Lyuk 21:​1-4.

¹² Lanin. Jiova lɛk fɔ tich in pipul dɛn. (Ayzaya 2:​2, 3) Tink bɔt di difrɛn skul dɛn we wi gɛt. Wi gɛt di Payɔnia Savis Skul, di Skul fɔ Pipul dɛn We De Prich bɔt Gɔd in Kiŋdɔm, Giliad Skul, Bɛtɛl Ɛntrans skul, di Skul fɔ Sakit Ovasia dɛn ɛn Dɛn Wɛf dɛn, di Skul fɔ Ɛlda dɛn, di Kiŋdɔm Ministri Skul, di Skul fɔ Branch Kɔmiti Mɛmba dɛn ɛn Dɛn Wɛf dɛn. Ɛn na wi jw.org Wɛbsayt, wi kin fɛn di Baybul ɛn ɔda buk ɛn magazin dɛn insay bɔku bɔku langwej dɛn. Na wi Wɛbsayt, yu go si say fɔ pikin dɛn, fɔ famili dɛn, ɛn say we na nyus dɛn de de. Yu dɔn de yuz jw.org we yu de prich ɛn we yu de du yu famili wɔship?

13. Us wok we Jiova in pipul dɛn gɛt?

¹³ Na big big ɔnɔ fɔ de na Jiova in ɔganayzeshɔn ɛn fɔ no wetin in want lɛ wi du! Bikɔs wi no wetin de mek Gɔd gladi,  na wi wok fɔ obe am ɛn du wetin rayt. Ɛn pan ɔl we bɔku pipul dɛn lɛk fɔ du bad tin dɛn, wi fɔ “et bad” tin, jɔs lɛk Jiova. (Sam 97:​10) Wi nɔ fɔ ɛva bi lɛk di wan dɛn we de “kɔl bad, gud ɛn gud, bad.” (Ayzaya 5:​20) Wi want fɔ mek Jiova gladi, so wi dɔn mekɔp wi maynd nɔ fɔ put an pan ɛni dɔti tin. (Fɔs Lɛta Fɔ Kɔrint 6:​9-11) Wetin Jiova de tɛl wi na di Baybul na fɔ wi yon bɛtɛ wan. Wi lɛk am ɛn wi want fɔ de biɛn am. Na dat mek wi de fala in advays dɛn we wi de na os, na wi kɔngrigeshɔn, na wi wok ples, na skul, ɔ ɛnisay we wi de. (Prɔvabs 15:​3) Tink bɔt sɔm say dɛn we wi nid fɔ de biɛn Jiova.

14. Aw mama ɛn papa dɛn go de biɛn Jiova?

¹⁴ Di we aw wi de tren wi pikin dɛn. Insay di Baybul, Jiova dɔn sho mama ɛn papa dɛn aw fɔ tren dɛn pikin dɛn. Kristian dɛn fɔ rili tek tɛm fɔ lɛ dɛn nɔ bigin de tink lɛk aw di pipul dɛn na di wɔl de tink. (Lɛta Fɔ Ɛfisɔs 2:​2) Fɔ ɛgzampul, na sɔm ples dɛn, di papa go tink se, ‘Wɛl, ya na di uman dɛn de tich di pikin dɛn.’ Bɔt di Baybul tɛl papa dɛn klia wan se na dɛn fɔ tich dɛn pikin dɛn bɔt Jiova. (Lɛta Fɔ Ɛfisɔs 6:​4) Mama ɛn papa dɛn we lɛk Jiova want lɛ dɛn pikin dɛn gɛt tayt padi biznɛs wit am, jɔs lɛk Samiɛl di tɛm we i bin smɔl.—Fɔs Samiɛl 3:​19.

15. Aw wi go de biɛn Jiova we wi de disayd fɔ du sɔntin we rili siriɔs?

¹⁵ Aw wi de disayd fɔ du sɔntin. Bifo wi disayd fɔ du sɔntin we rili siriɔs, wi fɔ tray fɔ no wetin Jiova tink bɔt da tin de so dat wi nɔ go kɔmɔt biɛn am. Di Baybul ɛn in ɔganayzeshɔn go ɛp wi. Fɔ ɛgzampul,  tide, sɔm mama ɛn papa dɛn we dɔn lɛf dɛn kɔntri, dɔn disayd fɔ sɛn dɛn pikin we dɛn jɔs bɔn bak na dɛn kɔntri fɔ go de wit dɛn fambul dɛn, so dat dɛn go kɔntinyu fɔ wok fɔ gɛt mɔni. Na tru se dis na tin we ɔlman fɔ disayd fɔ insɛf, bɔt mama ɛn papa dɛn fɔ aks dɛnsɛf se, ‘Wetin Jiova go tink bɔt dis tin we wi dɔn disayd fɔ du?’ (Rid Lɛta Fɔ Rom 14:​12.) I go mek sɛns fɔ lɛ wi tink fɔs bɔt wetin di Baybul se bifo wi disayd fɔ du sɔntin na wi famili ɛn bɔt wi wok. Wi nid wi Papa fɔ ɛp wi bikɔs wi nɔ ebul fɔ dayrɛkt wisɛf.—Jɛrimaya 10:​23.

16. We wan mama bɔn in pikin, wetin i bin gɛt fɔ disayd? Wetin bin ɛp am fɔ du di rayt tin?

¹⁶ Afta we wan maredman ɛn in wɛf muf go na ɔda kɔntri, dɛn bin bɔn bɔy pikin, ɛn dɛn plan fɔ sɛn di pikin fɔ go de wit in grani ɛn granpa. Bɔt da tɛm de, di wɛf bigin fɔ stɔdi di Baybul wit wan pan Jiova Witnɛs dɛn. In kam fɔ lan se na in wok fɔ tich in bɔy pikin bɔt Jiova. (Sam 127:​3; Prɔvabs 22:​6) Di uman bin pre to Jiova ɛn beg am fɔ lɛ i ɛp am fɔ du wetin rayt, jɔs lɛk aw di Baybul tɛl wi. (Sam 62:​7, 8) I bin tɛl di sista we de stɔdi am di Baybul ɛn ɔda pipul dɛn na di kɔngrigeshɔn bɔt in prɔblɛm. Pan ɔl we in fambul ɛn padi dɛn bin de tɛl am fɔ sɛn di pikin go to in grani ɛn granpa, i bin disayd se dat nɔto di rayt tin fɔ du. In man kam fɔ si aw di brɔda ɛn sista dɛn dɔn ɛp in wɛf ɛn in pikin. I bin rili gladi ɛn bigin fɔ stɔdi di Baybul ɛn atɛnd di mitin dɛn wit in famili. Jɔs tink bɔt aw dis mama bin fil we i kam fɔ no se Jiova dɔn ansa in prea!

17. We wi de stɔdi di Baybul wit sɔmbɔdi, wetin wi fɔ du?

¹⁷ Wi de du wetin Jiova in ɔganayzeshɔn de tɛl wi? If wi de biɛn Gɔd, wi go du wetin in ɔganayzeshɔn de tɛl wi fɔ du. Fɔ ɛgzampul, tink bɔt wetin wi nid fɔ du we wi jɔs stat fɔ stɔdi sɔmbɔdi di buk we nem Wetin Rili di Baybul De Tich?. Dɛn dɔn tɛl wi fɔ spɛnd smɔl tɛm afta ɛni stɔdi fɔ ɛp di studɛnt fɔ no mɔ bɔt Jiova in ɔganayzeshɔn. Wi kin yuz di fim we gɛt di taytul Wetin Kin Apin na Kiŋdɔm Ɔl? ɛn di buk we nem Udat Dɛn De Du Wetin Jiova Want? We wi dɔn dɔn di Baybul Tich buk wit am, wi go ɛp di studɛnt fɔ gɛt fayn “fawndeshɔn” we wi stɔdi di buk we nem “Kɔntinyu Fɔ Du Wetin Go Mek Gɔd Lɛk Yu”, ilɛksɛf i dɔn baptayz. (Lɛta Fɔ Kɔlɔse 2:​7) Yu de du dɛn tin ya we Jiova in ɔganayzeshɔn de tɛl wi fɔ du?

18, 19. Wetin na sɔm rizin dɛn we mek wi fɔ tɛl Jiova tɛnki?

¹⁸ Bɔku rizin dɛn de we mek wi fɔ tɛl Jiova tɛnki! Wan rizin na dat, “na Gɔd de gi wi layf, nain de mek wi ebul waka ɛn nain de mek wi ebul du ɔltin!” (Di Apɔsul Dɛn Wok [Akt] 17:​27, 28) I dɔn gi wi bak in buk, we na di Baybul. Jɔs lɛk di Kristian dɛn na Tɛsalonayka, wi valyu dis gift bikɔs na mɛsej frɔm Gɔd.—Fɔs Lɛta Fɔ Tɛsalonayka 2:​13.

¹⁹ Di Baybul dɔn ɛp wi fɔ kam nia Jiova, ɛn insɛf dɔn kam nia wi. (Jems 4:​8) Wi rili gladi fɔ we wi Papa dɔn invayt wi fɔ kam de na in ɔganayzeshɔn. Wi de fil lɛk wan pan di man dɛn we rayt na di Sam buk se: “Tɛl Jiova tɛnki, bikɔs i gud; in lɔv go de sote go.” (Sam 136:​1, NW) Na ɔl di vas dɛn na dis Sam, di man we rayt am ripit dɛn wɔd ya “in lɔv go de sote go.” Fɔ tru, if wi de biɛn Jiova ɛn du wetin in ɔganayzeshɔn de tɛl wi, i go gi wi layf we go de sote go ɛn insɛf go de biɛn wi te go!