1-3. Yɛɛ ndoo yɔŋnuŋ yɛ Yuwodiaa tɛɛŋ nda Siŋtike? Vɛɛ naŋ kpakpala yɛ bahawɛila waa naa? (Tofa fotueiyo o peeleŋ ndeŋ choo.)

Ŋ CHUA bɔɔ Baabuiyo nyɛ sɔvɛ bɛndu kanifuule, ŋ sina maa Yau Mɛlɛkaa o cho ni. Baabuiyo nɔ sila mala naa le bahawɛilaŋ kpakpalaa wo, nduyɛ mbo sila naa te ŋ tosa pɛ biondɔŋndaŋ. Lelaŋ, vɛɛ naŋ nɔ yɛ miŋ bii sila Baabuiyo? Yiyaŋndɔ a waŋlaanduaa Kilisiɔŋaa pɔyaŋnda a ŋiɔɔŋ o wɔsiŋ kɛmɛ tasoŋ niŋ, Yuwodiaa nda Siŋtike. Baabuiyo dimi maa ma sɛɛŋgiaŋ, kɛ o chɔm sabu koŋ te. Ŋ yiyaŋndɔ a nyɛ ndoo yɔŋnuŋndo.

² Kɛlɛŋgaa mi Yuwodiaa ndoo veelu puaapiliaa a ndepiliaa o ndulo bɛɛ le nyɛdiaa. Kɛ o veelu Siŋtike le. Mɛɛ Siŋtike tuei waŋnda baltaŋ dɔuwɔɔ a mɛɛ nda tuei nyɛdiaa koŋ yeela yɛ, mbo tuulu kɔl tau. Kɛlɛŋgaa mbo yiyaŋ maa, ‘I kendu le laalaŋ maa mi Yuwodiaa kɛɛ ya veelu o ndulo bɛɛ! I che ko bɛɛ aa chaaŋ ni kɛndɔɔ o cho ni.’ Mi Siŋtike yiyaŋ maa Yuwodiaa kaala ndu le, nduyɛ maa o cho ndu kpakpalaa. Okoŋ, mi Siŋtike bɛɛ veelu wanaa piliaa kaŋ kpe o ndulo bɛɛ, kɛ o veelu Yuwodiaa le! Kɛlɛŋgaa mi suɛi hei tɛɛmbuu acheleŋnda kɔl o kundaa niŋ. Baabuiyo dimi maa mi Pɔɔl sila ndepiliaa ŋiɔɔŋnda haa nduyɛ mbo dɛɛniaa  nda le ma tosa kɔl nyuloo. Kɛlɛŋgaa ma yaŋ ndu nilaŋ, nduyɛ ma hiau lachi a Chɛhowa piɛiyo a kɔl kɛndɛ.​—Filipiaŋnda 4:2, 3.

³ O kundala naalaŋ niŋ hau, lepum, mi naa bɛɛ nɔ bahawɛiyo a puaapilɛnɔɔ ɔɔ ndepilɛnɔɔ. Kɛ te ŋ tol pɛ sila cho o Baabuiyo niŋndo kɔɔli, ŋ nɔla miŋ soli bahawɛilaŋ tau. Ŋ nɔla pɛŋ miŋ kpakpala laŋ. Nduyɛ te ŋ diikuŋ pɛ nyɛ Baabuiyo dimi wo, mɛɛ ŋ chɔm kɛsɛ maa ŋ kaala Yau Chɛhowaa.​—Sam 27:11.

4, 5. Sila yɛɛ Diom Mɛlɛkaa ke yɛ naa le kɔl naa tiuwo ba?

⁴ I cho suɛi bɛɛŋ le kɔl naa tiuwo ba le. Lepum, miŋ tambu kɔl tau ɔɔ miŋ tuulu kɔl te waŋndo dimul naa pɛ suɛi wɔɔŋnde ɔɔ mbo chiee naa biyɔɔ le. Kɛlɛŋgaa le naamu naa ɔɔ kɔɔle naaleŋ, ɔɔ mɛɛ naŋ cho yɛ. Nduyɛ mi kɔllo chɔɔlu naa tambu tau te wana cho naa biyɔɔ wɔɔŋndo ɔɔ diomnde wɔɔŋndeŋ dimullo wo wa pɛ puaapilɛnɔɔ ɔɔ ndepilɛnɔɔ. Sila yɛɛ naŋ saaluŋ yɛ o Diom Mɛlɛkaa niŋ le naa malaa?

⁵ Chɛhowa sina nyɛ yɔŋnuŋndo te waŋchieeya tiu kɔl ndaa ba le. Te ŋ tuulu pɛ kɔl, lepum miŋ dimi ɔɔ miŋ tosa suɛi naŋ ve kɔl te ve, nduyɛ miŋ tambu kɔl. Chɛhowa sila naa o Baabuiyo niŋ le miŋ tiu kɔl naa ba. Mbo dimi aa, “O bɛnda mi wana dɔɔnuŋ tumbe chɔ chɔ le.” Yiyaŋndɔ a bahawɛila naŋ kpakpala laŋ te ŋ diikuŋ pɛ sila koŋ le kiɔɔ tumboo dɔɔnɔŋndo chɔ chɔ! (Nuawɔ Ikilisiaatii 7:​9; Pulɔwaa 16:​32.) Baabuiyo dimul naa vɛlɛ le acheleŋnda malɔɔ haki fasɛi. Chiisu dimul naa pɛŋ maa te ŋ mel acheleŋnda haki le, Chɛhowa mel naa haki le. (Maatiu 6:​14, 15) A cho pa chɔɔlu biuwɔŋ nduyɛ ma chɔɔlu yeemɛi nɔ le acheleŋnda malɔɔ haki fasɛi?

6. Yɛɛ yɔŋnuŋ yɛ lepum te ŋ bumba pɛ kɔl naa baa tiuwo?

⁶ Te ŋ tiu kɔl naa ba le, mi kɔllo hiou lachi a naa ŋolɔɔ suaa, nduyɛ miŋ kandu waŋndo yɛleŋ tullo. Ɔɔ ŋ nɔla miŋ nyindu waŋnda apum o kundaa niŋ le kaa waa lende nɔɔ. Nduyɛ, ŋ kindiŋ bɛɛ le kɔl tuu naa ɔɔ yɛle tulaa le naŋ nɔ leŋ vioŋɔɔ, wanaa cheleŋnda cho sina yiyaŋ naa. Okoŋ, puaapiliaa a ndepiliaa naa cho naa kpakpala. (Pulɔwaa 26:24-26) Bɛnduaa cho Baabuiyo soliŋ kpeku le naa malaa miŋ mal kɔl tuuwo a yɛle tuulaa leŋ, okoŋ, miŋ mal acheleŋnda haki fasɛi. (Lɛvitikɔɔ 19:17, 18; Luomaŋnda 3:11-18) Te bɛnduaa sila naa pɛ, baa ŋ cho nɛi chɔmaa Yau Chɛhowaa tolɔɔ kɔɔli?

7, 8. (a) Vɛɛ Chɛhowa cho yɛ wanaa nduaa nɛiyo chɔmndo? (b) Nɛila chɔmaala kuɛɛ naŋ saaluŋ yɛ lepum o Baabuiyo niŋ, nduyɛ le yɛɛ naŋ nɔ yɛ miŋ diikuŋ ndaŋ?

⁷ Chɛhowa cho hau wanaa cho o kumbuii kɔɔna ndɔ cho o chieeŋndo choo wo nɛiyo chɔmndo, nduyɛ mbo wa nda pɛɛkoo. Vɛɛ o cho yɛ keŋ tosaa? O yulu Kiliti iso le mbo wa “kunda wanaa laalaŋnda” bolleŋ. Nduyɛ mi Kiliti yulu “buɛi cho sakpo, nduyɛ, mbo wa buɛi kɔl kalu wo” iso le mbo pɛɛku nduyɛ mbo chɔm wanaa Mɛlɛkaa nɛiyo. (Ɛfisiaŋnda 5:23; Maatiu 24:45-47) Maa dialii kuumbaŋ choo ve o wɔsiŋ kɛmɛ tasoŋ niŋ, buɛiyo hoo kaala bɔɔ Baabuiyo kanifuule, Diom Mɛlɛkaa o cho ni. (Nuawɔ Tɛsaloniaŋ Tasoo 2:13.) Nɛila chɔmaala kuɛɛ naŋ saaluŋ yɛ lepum o Baabuiyo niŋ?

⁸ Baabuiyo dimul naa le bɔŋaŋnda leKilisiɔŋndaŋ biyɔɔ lɔɔlɔɔ. (Hibuluiya 10:24, 25) O dɛɛniaa naa kpou le pɛɛkula Baabuila pilɛlaŋ kpe chɛlɔɔ. (Kɔliŋtiaŋ Tasoo 1:10) O dimul naa vɛlɛ maa naŋ ‘landuŋ ndɔ fɛlɛŋ kɔl le mi Mɛlɛka wa naa choo masaa.’ (Maatiu 6:33) Baabuiyo dimul naa le yooŋgu kɛndɔɔ dimioo chiɛiyo a chiɛiyo, o fondaŋnda waŋnda wa tau laŋ, a ba o ba fee waŋnda wa pɛ. (Maatiu 28:19, 20; Walta Wanaa Chiisuaa 5:42; 17:17; 20:20) O dimul bɛnduaa le kunda leKilisiɔŋndo kɛsioo  o diandaa. (Kɔliŋtiaŋ Tasoo 5:1-5, 13; Timoti Tasoo 5:19-21) O dimul vɛlɛ naa maa naŋ nɔ miŋ kɛsi dialuŋ naŋ ŋdiandaa, nduyɛ miŋ kpakpala yiyaŋndaŋ a kaala Chɛhowa tul leyɛ laŋ.​—Kɔliŋtiaŋ Diiŋ Ndɔɔ 7:1.

9. Nɛɛ Chiisu ndoo yulu yɛ iso le naa malaa miŋ bii Diom Mɛlɛkaa bila?

⁹ Mi waŋnda apum yiyaŋ maa a yeema mi wana tɛɛsial nda Baabuiyo le. Kɛ kanduŋ a wɔsi 1919, Chiisu cho niŋ “buɛi cho sakpo, nduyɛ, mbo wa buɛi kɔl kalu wo” soliŋndo kpeku le wanaa Mɛlɛkaa malaa ma bii nyɛ Baabuiyo cho pɛɛkoo wo bila nduyɛ ma tol ndu kɔɔli. Te ŋ diikuŋ pɛ nyɛ Baabuiyo pɛɛku wo, kundaa wa o diandaa, o kɔl nyuloo niŋ, a o diompilɔɔ niŋ. Nyunaŋndɔ aa, ‘I cho pa lo lechoo wo chɔm o Chiisu lo nduyɛ mi tol nɛi chɔmaa buɛi cho sakpo wo kɔɔli?’

10. Vɛɛ yau Isikiaa wo o Baabuiyo niŋ tɛɛsiaa yɛ kumbuii kɔɔna Chɛhowaa o choo choo niŋ?

¹⁰ Baabuiyo mala naa le sinaa maa buɛiyaa Chɛhowaa o choo choo niŋ bɛɛ cho a kɔɔnaa. Le tamaseliiyo, mi Isikiaa cha Chɛhowa o yilaŋnde niŋ. O wa kiltaŋ a kandoo kpeekpei, nduyɛ ba o ba ndoo nyumbu kandoo pɛ, loŋ ndoo kua ni. (Isikiaa 1:4-28) Kandoo hoo sim le kumbuii kɔɔna Chɛhowaa o choo choo niŋ. O dounuŋ tamala le nɛi ndɔ chɔmaa tolɔɔ kɔɔli le. O baa pilɔɔ choo, o cho kumbuii kɔɔna Chɛhowaa o lɛŋndeŋ choo nyindɔɔ le tamasi ndɔɔ tolɔɔ kɔɔli. Yiyaŋndɔ a siŋgaŋnda yɔŋnuŋ o kɔɔna Mɛlɛkaa niŋ o wɔsiŋ tɔ laŋga hiou woŋ niŋ. Loonuŋ maa Chɛhowa cho nɛi chɔmaa yɔŋgoo o siŋgaŋndaŋ niŋ ni. Nyɔɔ bendu lɛ le mi Kiliti a maalikɛiya huŋ tɛɛmbuu chieeŋ dɛnɛ wɔɔŋndo hoo. Wana o wana kɛɛ lɛ niŋ Chɛhowa a diola ndɔlaŋ bɛɛleŋ ke, ɔɔ mbo pɛɛsa masale ndɔleŋ te!

11, 12. Yɛɛ kɔɔna Chɛhowaa tiu yɛ niŋ ba le tosaa o palɛi mɛɛlɛi hei niŋ?

¹¹ Ŋ yaasiaŋndɔ sɔɔŋ kɔɔna Chɛhowaa tiuba le tosaa o palɛi mɛɛlɛi hei niŋndo. Taŋgultaŋ. Puaapiliaa a ndepiliaa o kɛmɛlaŋ niŋ tosa niŋ wallo kekelee le fondaŋnda lebolta sɛnɛila Seiyaa Chɛhowaa taŋgullo Wɔɔwik, Niu Yɔk, o Amɛlika niŋ. Puaapiliaa a ndepiliaa yɔŋguŋ o waalaŋ niŋ chieeŋndo balɔɔ silɔ le Toŋgola leMasalaŋ a lɛuwoŋ taŋgullo. Kunda Kɔɔna Taŋgulta Seiyaa Chɛhowaa le Chieeŋndo Kpou Wo cho wanaa yɔŋguŋ haa wa nɛiyo chɔmndo ni. Ŋ cho bɔɔ a kɔl kɛndɛ le wanaa bɔɔbɔɔ cho haa wallo kekelee o wali taŋgulaa hoo niŋnda! Nduyɛ buɛiyaa Chɛhowaa ba o ba fee cho malaa yɔŋgoo a nyɛ nda tiuba wo le fondaŋ ndaŋ taŋgullo. Chɛhowa cho wanaa nduaa salaa dɔuwɔɔ le tuisiŋ ndaa a lo lechoo nda cho ndu chɔmndo wo.​—Luku 21:1-4.

¹² Pɛɛkoo. Chɛhowa kaala wanaa nduaa pɛɛkoo. (Aisaya 2:2, 3) Yiyaŋndɔ a sukuula bɔɔbɔɔ naŋ nɔ laŋ. Sukuu Wali lekɔɔfaa, Sukuuwo le Wanaa Dimi Yooŋgu Kɛndɛ leMasaa Wa, Sukuuwo Kiiliadi, Sukuu Bɛtɛlaitiiya, Sukuuwo le Buɛiyaa Ibuŋgaa a Laandaa Ndaa, Sukuuwo le Bɛnduaa Kundaa, Sukuu Bɛnduaa a Buɛiyaa Malalaŋnda, a Sukuuwo le Wanaa Cho Lɛuve Chilaŋnda a Laandaa Ndaa. Nduyɛ o tɛɛŋgii nɛi jw.org, ŋ nɔ Baabuiyo a yaula cheleŋ o sɔɔŋ maŋgalaŋ o kɛmɛlaŋ niŋ. Tɛɛŋgei hei nɔ vɛlɛ fondaŋnda teŋgeŋndaŋ le chuaambuaa, yuŋgulaŋ, vɛlɛ a fonda lakonaa. Baa a cho pa jw.org soliŋndo kpeku o wali pollo niŋ a o pɛɛku leyuŋgu numndo niŋ?

13. Kalaŋ kuɛɛ wanaa Chɛhowaa nɔ yɛ?

¹³ Bɛɛleŋ pila i cho le waa o kɔɔna Chɛhowaa niŋ ni, nduyɛ le sinaa nyɛ o yeema naa o ba wo! Mi che bɛɛ ŋ sina nyɛ nɛŋi Mɛlɛka kɔllo wo, kɛ ŋ nɔ kalaŋndo le ndu diikɔŋndo a tosaa nyɛ cho o kɛndɔɔ wo. Nduyɛ mi che bɛɛ wanaa bɔɔbɔɔ kaala sɔɔŋ wɔɔŋndoŋ tosaa, kɛ ŋ nɔ miŋ “tul yɔŋ wɔɔŋndo  leyɛ” mɛɛ Chɛhowa tul ndu leyɛ yɛ. (Sam 97:10) Kposoŋ bɛɛ ŋ nɔ miŋ wa maa “wanaa siiŋguu haa sɔɔŋ tonyaŋ maa sɔɔŋ wɔɔŋ, ma siiŋguu sɔɔŋ wɔɔŋndoŋ maa sɔɔŋ tonya wa” le. (Aisaya 5:20) Ŋ yeema miŋ nɛŋi Chɛhowa kɔl. Lelaŋ, ŋ nɔ kɔl sikpaa le waa o diandaa o nɛi o nɛi niŋ. (Kɔliŋtiaŋ Tasoo 6:​9-11) Le ikɛndɛi nɛi sɔɔŋ Chɛhowa dimul naa o Baabuiyo niŋndoŋ cho ni. Ŋ kaala ndu nduyɛ ŋ yeema miŋ chɔm lo lechoo wo o ndulo. Le saboo hoo naŋ tual nɛi chɔmaa ndɔɔ kɔɔli o naalo chiɛiniŋ, o kundaa niŋ, o fondaŋ baalaa, a ba o ba fee naŋ wa pɛ. (Pulɔwaa 15:3) Yiyaŋndɔ a nɛila naŋ nɔ miŋ chɔm lo lechoo wo o Mɛlɛka lo laŋ.

14. Vɛɛ kalaŋ chuauwa chɔm yɛ lo lechoo wo o Chɛhowa lo?

¹⁴ Mɛɛ naŋ manda chuauwaa naa yɛ. Chɛhowa ke kalaŋ chuauwa nɛi chɔmaa o Baabuiyo niŋ mɛɛ nda nɔ ma manda chuauwaa ndaa yɛ. Kilisiɔŋnda nɔ ma wa yekeŋ yɔŋii nda tol yiyaŋ chieeŋndo hoo kɔɔli. (Ɛfisiaŋnda 2:2) Le tamaseliiyo, o fondaŋndaŋ lapum, mi finyaa yiyaŋ aa, ‘Ɛɛ, o fonda naa, waŋlaanduaa nɔ ni ma pɛɛku chuaambuaa.’ Kɛ Baabuiyo dimul finyaa waa kpendekele le chuauwaa ndaa pɛɛkoo a Chɛhowa okɔɔ. (Ɛfisiaŋnda 6:4) Kalaŋ chuauwaa kaala Chɛhowa wa yeema chuauwaa ndaa ma nɔ chaŋyɛi kpɛɛluŋnde a Chɛhowa, nuawɔ ko bɛɛ mɛɛ Saamiɛɛ ndoo tosa chaŋyɛi kpɛɛluŋnde a Chɛhowa teleŋ o wa o pɔmbɔ wo yɛ.​—Saamiɛɛ Tasoo 3:19.

15. Vɛɛ naŋ chɔm yɛ lo lechoo wo o Chɛhowa lo te ŋ wa pɛ kɛɛsiaala bɛndulaŋ tosaa?

¹⁵ Mɛɛ naŋ tosa kɛɛsiaalaŋ yɛ. Tuupa miŋ tosa kɛɛsiaala bɛndulaŋ o yoomoo niŋ, ŋ nɔ fɛŋ miŋ sina mɛɛ Chɛhowa yiyaŋ yɛ, le miŋ sina mɛɛ naŋ chɔm lo lechoo wo o ndulo yɛ. Baabuiyo a kɔɔna Chɛhowaa mala naa le keŋ tosaa. Le tamaseliiyo, mi kalaŋ  chuauwa apum a cho hau o lɛŋnde cheleŋ niŋnda kɛɛsiaa le chɛlɛkpɛ ndaa yɔŋndo o yuŋgu ndaa lo o lɛŋnde ndaleŋ niŋ. O hei niŋ, finyaa a kalaa nɔla ma sɔla teleŋndo le hiouwɔɔ lachi a wallo tosaa le kanioŋ sɔlaa. Tonya i cho ni maa wana pila nɔ ni ma tosa kɛɛsiaa hoo. Kɛ pɔnɔɔ a lanɔɔ nɔ ma nyunaŋ aa, ‘Vɛɛ Chɛhowa cho yɛ yiyaŋ a kɛɛsiaa naa?’ (Nuawɔ Luomaŋnda 14:12.) I wa suɛi taasi le miŋ yiyaŋ fɛŋ a nyɛ Baabuiyo dimi wo tuupa miŋ tosa kɛɛsiaala sɔvɛlaŋ le yuŋgu naa vɛlɛ a wali naa okɔɔ. Ŋ yeema nɛi chɔmaa Finyaa naa kanifuule, ŋ nɔla naapila nɛiyo chɔm te.​—Chɛluimaya 10:23.

16. Kɛɛsiaa yɛ kala chua pilɛ tosa yɛ teleŋ o velu po ndɔɔ wo? Nduyɛ yɛɛ ndoo mala yɛ ndu le kɛɛsiaa sɔviɔɔ tosaa?

¹⁶ Mɛɛ pɔnɔɔ a lanɔ pilɛ kuɛ o lɛŋnde cheleŋ niŋ, ma vialu poombɔɔ. Nduyɛ ma kɛɛsiaa maa a cho poombɔ koŋ yɔŋ o mama ndɔ lo. Kɛ a boondii keŋ, mi lanɔɔ kandu Baabuiyo pɛɛkoo a Chɛhowɛinɔɔ. Mbo pɛɛku maa kalaŋ ndɔɔ i cho le po ndɔɔ pɛɛkoo a Chɛhowa okɔɔ ni. (Sam 127:3; Pulɔwaa 22:6) Mi chua feleŋgɔnɔɔ hoo piɛi o Chɛhowa lo a mɛɛ Baabuiyo dimul naa le tosaa yɛ. Nduyɛ mbo nyɔɔlu Chɛhowa le ndu malaa mbo tosa kɛɛsiaa kɛndɔɔ. (Sam 62:7, 8) Mbo dimul vɛlɛ wana wa ndu Baabuiyo pɛɛkoo wo bahawɛi ndɔɔ a wanaa cheleŋnda o kundaa niŋ. Mi che bɛɛ wanayaŋ a chaŋyaŋ ndɔŋ wa ndu dimullo maa o yɔŋ chɛlɛkpɛ ndɔɔ o mama ndɔ lo, kɛ mbo kɛɛsiaa maa o bɛnda mbo tosa keŋ te. Mi pɔnɔ ndɔ cha mɛɛ puaapiliaa a ndepiliaa mala laa ndɔ a chɛlɛkpɛ ndaa yɛ. Mi hei pilaŋ ndu kɔllo, nduyɛ mbo kandu Baabuiyo pɛɛkoo a bɔŋaŋnda leKilisiɔŋndaŋ biyɔɔ a yuŋgu ndɔɔ. Yiyaŋndɔ mɛɛ kala chuaa hoo wa a kɔl kɛndɛ le sinaa maa Chɛhowa muli piɛile ndɔleŋ yɛ!

17. Te ŋ wa pɛ waŋndo Baabuiyo pɛɛkoo, nɛi chɔmaa kuɛɛ naŋ nɔ yɛ miŋ tol kɔɔli?

¹⁷ Mɛɛ naŋ tual nɛi chɔmaa kɔɔli yɛ. Te ŋ wa pɛ lo lechoo wo chɔmndo o Chɛhowa lo, miŋ tol nɛi chɔmaa kɔɔna ndɔɔ ke naa wo kɔɔli. Le tamaseliiyo, yiyaŋndɔ a nyɛ naŋ nɔ miŋ tosa wo te ŋ kandu dɔɔ pɛ waŋndo yauwo hoo pɛɛkoo Yɛɛ Kpeekpei Baabuiyo Pɛɛku Yɛ? A dimul naa maa lɔɔlɔɔ naŋ chii pɛ pɛɛkoo a waŋndo, ŋ nɔ miŋ soliŋ chemchemndaŋ ma tiŋ kpeku le wana naŋ cho pɛɛkoo wo malaa mbo chɔɔlu sina a kɔɔna Chɛhowaa okɔɔ. Ŋ soliŋ vidueiyo hoo kpeku Yɛɛ Naŋ Tosa Yɛ o Toŋgo Naa leMasaa Niŋ? a yauwo hoo Nɛɛ Yaa Cho yɛ Hɛnaŋ Chɛhowaa Tosaa? Te yau Pɛɛku Baabuiyo chuu pɛ, ŋ nɔ miŋ mala wana koŋ le “waa a dialuŋ kalaŋ o tiindaŋ” ndɔɔ ni. Nduyɛ le dialuŋ kalaŋ waa lende sɔlaa, ŋ nɔ miŋ pɛɛku ndu yauwo hoo “Lo o Kaala Mɛlɛka wo Bɛŋgu” o yɔŋ bɛɛ mbo yiŋ. (Kolosiaŋnda 2:7) Baa a cho pa tolɔɔ nɛi chɔmaa kɔɔna Chɛhowaa hoo kɔɔli?

18, 19. Ɔɔ sabulaŋ lapum le Chɛhowa balikaa mello?

¹⁸ Sabulaŋ la cho tau le Chɛhowa balikaa mello! Saboo opilɛ cho ni, “ndu tosa ni mi ŋ wa yoomu. Ndu tosa ni mi ŋ wa.” (Walta Wanaa Chiisuaa 17:27, 28) O ke naa vɛlɛ Yau ndɔɔ, Baabuiyo. Maa Kilisiɔŋnda o Tɛsalonaika niŋ, bii ke sɔviɔɔ hoo a bala tiɔɔŋ kanifuule, yooŋgu chɛŋ o Mɛlɛka lo wo o cho ni.​—Tɛsaloniaŋ Tasoo 2:13.

¹⁹ Baabuiyo mala naa le sɔɔŋgoo Chɛhowa ikɛi kpɛɛluŋ, nduyɛ ndu bɛɛ sɔɔŋguu naa ikɛi kpɛɛluŋ. (Chemisi 4:8) Ŋ naŋ bɔɔ kɔl le mɛɛ Finya naa veelu naa le waa o kɔɔna ndɔɔ niŋ yɛ! Ŋ nɔ yiyaŋ pilɔɔ maa wana ŋchondu poonyiaa aa, “La mel Mɛlɛka Yaawɛɛ balikaa, kani fondole, o cho wana kɛndɛ. Kaala ndɔ cho le teleŋ o teleŋ ndo, cho le fɛɛŋ a fɛɛŋ.” (Sam 136:1) O bolle Baabuileŋ ndeŋ niŋ kpou, mi wana ŋchondoo miŋgi sondoo o diomndaŋ ndaŋ choo maa “kaala ndɔ cho le teleŋ o teleŋ ndo, cho le fɛɛŋ a fɛɛŋ.” A tonya, te ŋ chɔm pɛ lo lechoo wo o Chɛhowa lo, nduyɛ miŋ tol nɛi chɔmaa o ke naa o kɔɔnaa ndɔɔ niŋndo kɔɔli, o cho naa yoomu fafɛɛŋndo ke, nduyɛ ndu bɛɛ cho naa lo lechoo wo chɔm lefafɛɛŋ!