1-3. Lelo i bika padi byālongekele pa bukata bwa ba Eodia ne Shintake? I muswelo’ka otubwanya kwepuka ino myanda? (Tala kifwatulo ku ngalwilo.)

TUKWETE Bible na mutyika mwanda tuyukile amba i Dibuku dya Leza mwine. Mu Bible mudi madingi abwanya kwitukwasha twepuke myanda ne kwitulemununa potuluba. Le tuloñanga namani potupebwa madingi? Vuluka bana-bakaji babidi bashingwe māni ba mu myaka katwa kabajinji, ba Eodia ne Shintake. Bible unena’mba bēpotomeje, ino ketulombwelepo mwanda mwine. Leka bidi tufwatakanye bintu byādi bikokeja kulongeka.

² Padi Eodia wāityile batutu bamo ne bakaka ku yandi njibo mwanda wa kudya. Inoko kāityile’kopo Shintake. Kitatyi pa kupita’po, pāimvwene Shintake bantu banena mobadīdile, wāfītwa. Padi ye uno wālangile amba: ‘Nkibwanyapo kwitabija, Eodia waleka kungita! Nadi nanga’mba twi balunda ba pa mutyima.’ Shintake wāmwene amba Eodia kamusenswepo bya bine, ino wamupaluka. O mwanda Shintake nandi wāita ku  bidibwa byandi enka bantu’ba pampikwa kwita’ko Eodia! Uno mwanda ye uno wālobeje bakwabo mu kipwilo. Bible unena’mba Polo wālemunwine bano bakaka babidi ne kwibakankamika bapwane. Padi ye bano bāmutejeje ne kwendelela kwingidila Yehova na nsangaji.​—Fidipai 4:2, 3.

³ Dyalelo nadyo, tubwanya padi kwipya myanda na batutu ne bakaka mu kipwilo kyetu. Ino shi tulonde madingi adi mu Bible, tukapwija ino myanda. Pakwabo tubwanya’nka ne kwiyepuka. Kadi shi tukōkela binena Bible, tubalombola’mba tukwete na mutyika bya binebine Dibuku dya Yehova mwine.​—Ñimbo ya Mitōto 27:11.

4, 5. Le i madingi’ka etupa Kinenwa kya Leza pa muswelo wa kwīfula mu malango?

⁴ Kebipēlangapo nyeke kwīfula mu malango. Tubwanya kwiimvwana bibi nansha kuloba shi muntu wetutuke nansha kwitulongela bintu na bukondame, padi i pa mwanda wa lukoba, bibidiji nansha mumwekelo wetu. Kadi bibwanya kwitusansa bininge shi muntu witutuka nansha witususula’wa i tutu nansha kaka. Le i madingi’ka a mu Kinenwa kya Leza abwanya kwitukwasha?

⁵ Yehova uyukile byobya bibwanya kulongeka shi bantu abaleka kwīfula mu malango. Shi tubafītwa nansha kukalabala, tubwanya padi kunena ne kulonga kintu kyotukealakanya. Yehova witupanga mu Bible bulombodi bwa kwīfula, panena’mba: “Kokapelakanya bukidi mu mushipiditu obe kufuna bulobo.” Bine tubwanya kwepuka musala shi tubalonda ano madingi ne kuleka kukalabala bukidibukidi! (Tanga Musapudi 7:9; Nkindi 16:32.) Kadi Bible witusoñanya tulekele bakwabo. Na bubine, Yesu wānenene amba shi ketulekelapo bakwabo, Yehova nandi kaketulekelapo. (Mateo 6:14, 15) Le ubulwe’po kwikala na kitūkijetyima ne mutyima wa kulekela bakwabo?

6. Lelo i bika bibwanya kulongeka shi tuleke kwīfula mu malango?

⁶ Shi tuleke kwīfula mu malango, tubwanya kwikala ba bukalabale enka ne kushilula kushikwa muntu kampanda. Nansha padi tubwanya kutonona bakwabo mu kipwilo beimvwane uno muswelo. Nansha shi tutompa kufya bukalabale ne mushikwa wetu, ino bakwabo bakajingulula bityebitye mwiimvwanino wetu. Papo batutu ne bakaka baketusonsoloka. (Nkindi 26:24-26) Bakulumpe betukwashanga kupityila ku Bible tufundwile kulampe bukalabale ne mushikwa, ino tulekele bakwabo. (Levi 19:17, 18; Loma 3:11-18) Shi abetukwasha, le tukalonda bwendeji bwa mu Dibuku dya Yehova mwine?

7, 8. (a) Lelo Yehova wendejanga bantu bandi namani? (b) Lelo i bwendeji’ka botutana mu Bible, ne mwanda waka tufwaninwe kwibulonda?

⁷ Dyalelo, Yehova wendejanga boba badi mu kipindi kya pano pa ntanda kya bulongolodi bwandi ne kwibafundija. Muswelo’ka? I mutonge Kidishitu ekale “mutwe wa kipwilo,” Kidishitu nandi i mutonge “umpika mukōkele ne mudyumuke” mwanda wa kufundija ne kuludika bantu ba Leza. (Efisesa 5:23; Mateo 24:45-47) Pamo’nka na kitango kyendeji kya mu myaka katwa kabajinji, uno umpika nandi ukwete Bible na mutyika mwanda i Kinenwa kya Leza. (Tanga 1 Tesalonika 2:13.) Le i bwendeji’ka bumobumo budi mu Bible?

 ⁸ Bible witusoñanya tutanwe kitatyi ne kitatyi ku kupwila. (Bahebelu 10:24, 25) Witukankamika batwe bonso twitabije bufundiji bumo bonka bwa mu Bible. (1 Kodinda 1:10) Kadi witusoñanya’mba “kimbai bidi nyeke Bulopwe.” (Mateo 6:33) Bible witufundija mwa kusapwila ku njibo ne njibo, mu bifuko mudi bantu bavule, ne konso kutanwa bantu. (Mateo 28:19, 20; Bilongwa 5:42; 17:17; 20:20) Usoñanyanga bakulumpe balame butōki bwa kipwilo. (1 Kodinda 5:1-5, 13; 1 Temote 5:19-21) Kadi witusapwila’mba tufwaninwe kulama butōki bwa ku ngitu ne kwepuka milangwe ne bibidiji bishikilwe Yehova.​—2 Kodinda 7:1.

9. Lelo i ani utongelwe na Yesu mwanda wa kwitukwasha twimvwanije Kinenwa kya Leza?

⁹ Bamo balañanga’mba kebasakilwapo muntu wa kwibashintulwila Bible. Ino tamba 1919, Yesu washilwile kwingidija “umpika mukōkele ne mudyumuke” mwanda wa kukwasha bantu ba Leza bemvwanije ne kulonda byobya bifundija Bible. Shi tulonde madingi a mu Bible, nabya tukalama butōki, ndoe ne bumo bwa kipwilo. Wiipangule’po bidi amba, ‘Lelo ndamete kudi Yesu na kulonda bwendeji bwa umpika mukōkele ne mudyumuke?’

10. Lelo mukanda wa Ezekyele ushintulula namani kipindi kya mūlu kya bulongolodi bwa Yehova?

¹⁰ Kupityila ku Bible, twi befunde amba bengidi ba Yehova ba mūlu nabo i balongololwe. Kimfwa, Ezekyele wāmwene mu kimonwa Yehova utentamine pa dikalo dyenda lubilo bininge konso-konso kwādi kusaka Yehova kwenda. (Ezekyele 1:4-28) Dino dikalo dyelekeja kipindi kya mūlu kya bulongolodi bwa Leza, bwine bulonda bukidibukidi bwendeji bwandi. Kadi, budi na lupusa pa kipindi kya pano pa ntanda kya bulongolodi bwandi. Langulukila bidi pa kushinta kuvule kulongelwe mu bulongolodi bwa Leza mu myaka dikumi ipityile’i. Yuka’mba Yehova ye uludikanga kuno kushinta. Panopano ponka Yesu ne bamwikeulu basa konakanya ino ntanda mibi. Kekukekalapo muntu nansha umo ukapela kulēmeka Yehova ne dijina dyandi nansha kufutulula muswelo wandi wa kuludika!

11, 12. Lelo i bika bibwenye kulonga bulongolodi bwa Yehova mu ano mafuku a mfulo?

¹¹ Langa bidi bibwenye kulonga bulongolodi bwa Leza mu ano mafuku a mfulo. Lūbako. Batutu ne bakaka tutwa na tutwa i bengile bikomo mwanda wa kūbaka kité kipya kya Batumoni ba Yehova ku Warwick, mu New York, mu États-Unis. Bakwabo tununu ne tununu kujokoloka ntanda yonso i betume kukōbaka Mobo a Bulopwe ne mabilo a misambo. Bano ba kwituma baludikwanga na Mwingilo Utala Lūbako Ntanda Yonso. Bine tufwijanga’ko bininge bonso bengila bikomo uno mwingilo wa lūbako!  Kadi bengidi ba Yehova kujokoloka ntanda yonso bapānanga byobadi nabyo mwanda wa kupota bino bifuko. Yehova weselanga bantu bandi pobetyepeja ne pobamulamata.​—Luka 21:1-4.

¹² Bufundiji. Yehova usenswe kufundija bantu bandi. (Isaya 2:2, 3) Vuluka buvule bwa masomo otudi nao. Kudi Masomo a Bapania, Masomo a Basapudi ba Bulopwe, Masomo a Ngileade, Masomo a Batwela ku Betele, Masomo a Batadi ba Bipindi ne Bakaji Babo, Masomo a Bakulumpe pa Kipwilo, Masomo a Mwingilo wa Bulopwe, ne Masomo a ba mu Komite ya Musambo ne Bakaji Babo. Kadi pa diteba dyetu dya jw.org, tutana’po Bible ne mabuku makwabo mu ndimi tutwa na tutwa. Kadi pa diteba padi ne myanda ya pa bula itala bana, bisaka ne kipindi kya myanda mipya. Lelo wingidijanga jw.org mu busapudi ne mu butōtyi bwenu bwa kisaka?

13. Lelo i kiselwa’ka kidi na bantu ba Yehova?

¹³ Bine tudi’po na dyese kashā dya kubadilwa mu bulongolodi bwa Yehova ne kuyuka byobya byasaka kotudi! Na bubine twikalanga na kiselwa kya kukōkela Leza ne kulonga byoloke tamba’tu potuyuka byobya byasaka. Nansha bisenswe bantu bavule kulonga bintu bibi, ino batwe tufwaninwe ‘kushikwa bibi’ na mwibishikilwe Yehova. (Ñimbo ya Mitōto 97:10) Ketufwaninwe kwifwana boba batela “kibi amba i kiyampe, ne kiyampe amba i kibi.” (Isaya 5:20) Byotusaka kusangaja Yehova, o mwanda tusumininwe kwikala batōka mu byonso. (1 Kodinda 6:9-11) Byonso bitusapwila Yehova mu Bible i bya kamweno ketu. Tumuswele kadi tusakanga kumulamata. O mwanda mwine tulondanga bwendeji bwandi potudi ku njibo, ku kipwilo, ku kaji, ku masomo ne konso kotubwanya kwenda. (Nkindi 15:3) Tala myanda imo yotusakilwa’mo kulamata Leza.

14. Lelo bambutwile bakalamata namani Yehova?

¹⁴ Muswelo otufundija betu bana. Kupityila ku Bible, Yehova i mupe bambutwile buludiki bwa mwa kufundijija babo bana. Bene Kidishitu bafwaninwe kutadija kutyina bakasambukilwa na mulangilo uvudile mu ino ntanda. (Efisesa 2:2) Kimfwa, mu bifuko bimo shabana ubwanya kulanga’mba, ‘En-en, kuno i bana-bakaji ba kufundija bana.’ Inoko Bible usoñanya patōkelela bashabana kufundija babo bana myanda ya Yehova. (Efisesa 6:4) Ba shabana ne inabana basenswe Yehova bakasaka babo bana bapwane bininge na Yehova na mwālongele Samwele paākidi’tu mwanuke.​—1 Samwele 3:19.

15. I muswelo’ka otubwanya kulamata Yehova potukwata butyibi bukatampe?

¹⁵ Muswelo otukwata butyibi. Kumeso kwa kukwata butyibi bukatampe mu būmi, tukasaka kuyuka mulangila’po bidi Yehova pa kusaka tushale balamate kwadi. Bible ne bulongolodi bwandi bitukwashanga. Kimfwa, bambutwile bamo dyalelo bavilukīle mu matanda angi, bakwatanga butyibi bwa kutuma babo bana batyetye mu yabo ntanda bakebatamije kudi babutule babo. Amba nabya ba shabana ne inabana bamone kyaba kya kwingila ne kuvudija lupeto. Eyo, buno i butyibi butala muntu mwine, inoko ba mulume ne mukaji’ba bafwaninwe kwiipangula’mba, ‘Le Yehova ulanga namani pa buno bwetu butyibi?’ (Tanga Loma 14:12.) I kya tunangu kulangulukila bidi pa  binena Bible kumeso kwa kukwata butyibi bukatampe butala kisaka ne kaji. Tusakilwa bukwashi bwa Tata wetu mwanda ketubwanyapo kwiolwela matabula etu.​—Yelemia 10:23.

16. Lelo lolo umo wakwete butyibi’ka paabutwile wandi mwana? I bika byamukweshe akwate butyibi buyampe?

¹⁶ Ba mulume ne mukaji bamo pa kupwa kuvilukila mu ntanda ya bweni, babutwile mwana ne kukwata mulangwe wa kumutuma mu yabo ntanda amba bakamulele kudi bankambo wandi. Ino mu kitatyi’ka, mukaji washilula kufunda Bible na Kamoni umo wa Yehova. Wefundile amba i aye udi na kiselwa kya kufundija wabo mwana myanda ya Yehova. (Ñimbo ya Mitōto 127:3; Nkindi 22:6) Nsongwakaji’wa walombela Yehova, monka mwitusoñenya Bible, ne kumuzenza amukwashe alonge kyoloke. (Ñimbo ya Mitōto 62:7, 8) Kadi wasapwidile’mo ne kaka obadi befunda nandi Bible ino myanda ne bakwabo mu kipwilo. Nansha babutule ne balunda nandi byobadi bamunena’nka kumunena’mba ufwaninwe kutuma mwana ku bankambo wandi, aye wakwete butyibi bwa kuleka kumutuma. Wandi mulume wajingulwile amba batutu ne bakaka abakwasha bininge wandi mukaji ne wandi mwana. Kadi watengelwe ku mutyima, washilwididila ne kwifunda Bible ne kupwila na kyandi kisaka. Fwatakanya’po nsangaji yaimvwene uno lolo pa kumona’mba Yehova walondolola milombelo yandi!

17. I buludiki’ka botufwaninwe kulonda potwifunda Bible na muntu?

¹⁷ Muswelo otulonda buludiki. Shi tulamete kudi Leza, tukalonda buludiki bonso botupebwa na bulongolodi bwandi. Kimfwa, langulukila pa byotufwaninwe kulonga potukishilula’tu kwifunda na muntu dibuku Lelo I Bika Bine Bifundija Bible? Twi basoñanibwe kwilamija’ko minite mityetye pa kupwa kwa kifundwa ne kifundwa mwanda wa kukwasha mwifundi ayuke myanda mivule itala bulongolodi bwa Yehova. Tubwanya kwingidija video I Bika Biloñwanga ku Njibo ya Bulopwe? ne boloshile Lelo I Bāni Balonga Kiswa-Mutyima kya Yehova Dyalelo? Shi tubapu kwifunda dibuku Bifundija Bible, tubwanya kukwasha mwifundi ‘emanije bininge mu lwitabijo’ na kwifunda nandi dibuku ‘Mwilamei mu Buswe bwa Leza’ nansha shi wabatyijibwe. (Kolose 2:7) Lelo ulondanga buno buludiki butamba ku bulongolodi bwa Yehova?

18, 19. Lelo i bubinga botudi nabo bwa kufwijija’ko Yehova?

¹⁸ Kudi bubinga buvule botufwaninwe kufwijija’ko Yehova! Bumo bidi, “i pa mwanda wa aye potwikele na būmi, tujina ne kwikala’ko.” (Bilongwa 17:27, 28) Kadi i mwitupe dibuku dyandi mwine, ke Bible kadi. Pamo bwa bene Kidishitu ba mu Tesalonika, netu tusenswe kino kyabuntu mwanda i musapu utamba kwadi.​—1 Tesalonika 2:13.

¹⁹ Bible i mwitukwashe tufwene kudi Yehova, nandi i mwitufwene. (Yakoba 4:8) Tufwijanga’ko Tata wetu bikatampe pa kwitwita mu bulongolodi bwandi! Twiivwananga pamo bwa mulembi wa mitōto, wālembele amba: “Banwe fwijaiko Yehova; ke-muntu i muyampe; ke-luntu lusa lwandi i lwa nyeke.” (Ñimbo ya Mitōto 136:1) Mulembi wa mitōto i mupituluke mu vese ne vese bino bishima bya amba “ke-luntu lusa lwandi i lwa nyeke.” Bine, shi tulamate Yehova ne kulonda buludiki bwaetupa kupityila ku bulongolodi bwandi, nabya tukatambula būmi bwa nyeke kadi nandi uketulombola lusa lwandi nyeke!