1-3. a) ¿Alkyelo nya bʼaʼn tzaj t-xol Evodia tukʼil Síntique? (Qʼonka twitza tiʼj tnejel tilbʼilal). b) ¿Tiʼ jaku bʼant quʼn tuʼn miʼn kytzaj nya bʼaʼn qxol kyukʼil erman?

NIM toklen Xjan Uʼj toj qwitz tuʼnju ojtzqiʼn quʼn qa atzun Tyol Dios. In qo tzaj kyonin nabʼil ateʼkux toj tuʼntzun miʼn t-xi qqʼoʼn ambʼil tuʼn ttzaj jun nya bʼaʼn qiʼj ex in qo tzaj tkawin aj qel txalpaj. ¿Tiʼ in kubʼ qnaʼn kyuʼn nabʼil lu? Qo ximen tiʼjju ikʼ kyiʼj kabʼe ermana skʼoʼn maj toj tnejel syent abʼqʼi. Evodia ex Síntique kybʼi. In tzaj tqʼamaʼn Tyol Dios qa tzaj jun nya bʼaʼn kyxol, maske mintiʼ in tzaj tqʼamaʼn tiquʼn. Bʼaʼn tuʼn qximen tiʼjju bʼajlo kyxol.

² E tzajlo txkoʼn Evodia junjun erman wal tja, noqtzun tuʼnj, mintiʼ xi tqʼoʼn txokbʼil tiʼj Síntique. Tejtzun tok tbʼiʼn Síntique in che yolintoq erman tbʼanel tiʼj ambʼil aju, kubʼ tnaʼn nya bʼaʼn. Kubʼlo t-ximen jlu: «Kwest tuʼn t-xi nnimane tuʼnju mintiʼ tzaj tqʼoʼn Evodia txokbʼil wiʼje. ¡Kubʼ nximane qa at jun tbʼanel qamiwbʼile tukʼil!». Kubʼ t-ximen Síntique qa at  jun nya bʼaʼn t-ximbʼetz Evodia tiʼj ex qa tajbʼil tuʼn tel tpan tibʼ tiʼj. Tuʼntzunju, xi txkoʼn aʼyex erman wal tja ex mintiʼ xi tqʼoʼn txokbʼil tiʼj Evodia. Nyalo bʼaʼn ela jlu toj kywitz txqantl okslal. In tzaj tqʼamaʼn Tyol Dios qa xi tqʼoʼn apóstol Pablo nabʼil kye ex onin kyiʼj tuʼn t-xi kybʼinchaʼn tiʼj nya bʼaʼn. Qʼuqli qkʼuʼj tiʼj qa xi kybʼiʼn aju nabʼil xi qʼoʼn kye ex kukx e ajbʼen te Jehová (Filipenses 4:2, 3).

³ Ax ikx toj ambʼil jaʼlo, jaku tzaj jun nya bʼaʼn qxol tukʼil jun erman jatumel in nok qchmon qibʼ. Noqtzun tuʼnj, jaku txi qbʼinchaʼn tiʼj, axpe ikx jaku txi qjyoʼn tumel tuʼn miʼn kytzaj nya bʼaʼn. ¿Alkye tten? Aj t-xi qbʼiʼn qeju nabʼil in tzaj tqʼoʼn Tyol Dios. Qa ma bʼant jlu quʼn, in kubʼ qyekʼun qa ax tok nim toklen Tyol Dios toj qwitz (Salmo 27:11).

4, 5. ¿Alkyeqe nabʼil in tzaj tqʼoʼn Tyol Dios tuʼn tok qxqʼuqin aju in kubʼ qnaʼn?

⁴ At maj kwest tuʼn tok qxqʼuqin aju in kubʼ qnaʼn. Jun techel, in kubʼlo qnaʼn nim bʼis moqa qʼoj tuʼnju in nok bʼinchaʼn jun nya bʼaʼn qiʼj tuʼn juntl tuʼnju alkye tten qanqʼibʼil, qiyjil moqa qo keʼyin. Mas jaku kubʼ qnaʼn bʼis qa jun erman in nok bʼinchante nya bʼaʼn jlu qiʼj. ¿Alkyeqe nabʼil in tzaj tqʼoʼn Tyol Dios jaku che onin qiʼj tuʼn qex kywitz nya bʼaʼn lu?

⁵ Ojtzqiʼn tuʼn Jehová tiʼ jaku tzaj qa mintiʼ ma tzʼok qxqʼuqin aju in kubʼ qnaʼn. Qa in kubʼ qnaʼn nya bʼaʼn moqa in tzaj qqʼoj, jaku txi qqʼamaʼn jun qyol moqa jaku kubʼ qbʼinchaʼn jun tiʼ aju kbʼel qnaʼn nya bʼaʼn tuʼn yajxitl. In tzaj tqʼamaʼn Jehová qe toj Tyol tuʼn tok qxqʼuqin aju in kubʼ qnaʼn. In tzaj tqʼamaʼn jlu: «Miʼn taqʼa ambʼil tuʼn ttzaj naj tqʼoja». Qo ximen tiʼj tkyaqilju tbʼanel jaku tzaj qa ma txi qbʼiʼn nabʼil lu ex qa mintiʼ ma tzaj naj qqʼoj (kjawil uʼjit Eclesiastés 7:9 ex Proverbios 16:32). Ax ikx in tzaj tqʼamaʼn Tyol Dios qe tuʼn tkubʼ qnajsaʼn kyil txqantl. Nya oʼkxju, ax ikx tqʼama Jesús qa ma bʼant jlu quʼn, ax ikx kbʼel tnajsaʼn Jehová qil (Mateo 6:14, 15). ¿Ilpe tiʼj tuʼn tten mas qpasens ex tuʼn tkubʼ qnajsaʼn kyil txqantl?

6. ¿Tiʼ jaku bʼaj qa mintiʼ ma tzʼok qxqʼuqin aju in kubʼ qnaʼn?

⁶ Qa mintiʼ ma tzʼok qxqʼuqin aju in kubʼ qnaʼn, kukx jaku kubʼ qnaʼn qʼoj, axpe ikx jaku tzʼel qikʼun juntl erman. Tuʼn jlu jaku kubʼ kynaʼn txqantl erman ik tzeʼn qe in kubʼ qnaʼn. Tnejel, jakulo kubʼ qewin aju qʼoj in kubʼ qnaʼn. Noqtzun tuʼnj, chebʼe kʼelel kynikʼ txqantl qiʼj ex jakulo tzʼel kypan kyibʼ qiʼj (Proverbios 26:24-26). Qa ma bʼaj jlu qiʼj, kʼokel tilil kyuʼn ansyan tuʼn kyonin qiʼj tukʼil Tyol Dios, tuʼntzun tkubʼ kyiʼj qe qximbʼetz quʼn ex tuʼn tkubʼ qnajsaʼn kyil txqantl (Levítico 19:17, 18; Romanos 3:11-18). Qa ma bʼaj jlu qiʼj, ¿kxelpe qbʼiʼn qeju nabʼil in tzaj tqʼoʼn Tyol Dios?

7, 8. a) ¿Alkye tten in tzaj t-xnaqʼtzaʼn Jehová qe tmajen? b) ¿Tiʼ in tzaj tqʼamaʼn Tyol Dios tuʼn tbʼant quʼn ex tiquʼn il tiʼj tuʼn kyxi qnimen?

⁷ Toj ambʼil jaʼlo, a Jehová in tzaj yekʼunte kybʼe tmajen ateʼ tzalu twitz Txʼotxʼ ex in che tzaj t-xnaqʼtzaʼn. ¿Alkye tten in bʼant tuʼn? O jaw t-skʼoʼn Jehová Jesús tuʼn tok te «nejenel kye kykyaqil okslal» (Efesios 5:23). Ex o txi tqʼoʼn Jesús toklen «majen in bʼant taqʼun [...]  ex at tnabʼl» tuʼntzun ttzaj t-xnaqʼtzaʼn qeju tmajen Dios ex tuʼn ttzaj tyekʼun kybʼe (Mateo 24:45-47). In nok tqʼoʼn majen nim toklen Xjan Uʼj, tuʼnju atzun Tyol Dios. Ax jlu bʼant tuʼn kʼloj xjal qʼil twitz aqʼuntl toj tnejel syent abʼqʼi (kjawil uʼjit 1 Tesalonicenses 2:13). ¿Tiʼ in tzaj tqʼamaʼn Tyol Dios tuʼn tbʼant quʼn?

⁸ In tzaj tqʼamaʼn Tyol Dios qa il tiʼj tuʼn tok qchmon qibʼ tkyaqil maj (Hebreos 10:24, 25). In qo tzaj tonin tuʼn tten junx qximbʼetz (1 Corintios 1:10). Ax ikx in tzaj tqʼamaʼn tuʼn qjyon tnejel tiʼj «tkawbʼil Dios» (Mateo 6:33). Nya oʼkxju, ax ikx in tzaj tqʼamaʼn qe tuʼn qxiʼ pakbʼal kyojele ja, jatumel ateʼ nim xjal ex noq jaxku tumel ateʼ (Mateo 28:19, 20; Hechos 5:42; 17:17; 20:20). In tzaj tqʼamaʼn tqanil kye ansyan tuʼn kyten kʼloj okslal saq (1 Corintios 5:1-5, 13; 1 Timoteo 5:19-21). Ex in tzaj tqʼamaʼn qe tuʼn tten qxmilal saq ex tuʼn tel qikʼun qeju ximbʼetz ex qe kostumbr ikʼun tuʼn Jehová (2 Corintios 7:1).

9. ¿Alkye in najbʼen tuʼn Jesús tuʼntzun tonin kyiʼj xjal tuʼn tel kynikʼ tiʼj Tyol Dios?

⁹ Ateʼ junjun xjal in kubʼ kyximen qa nya il tiʼj tuʼn t-xi chikʼbʼaʼn kye aju in tzaj t-xnaqʼtzaʼn Tyol Dios. Noqtzun tuʼnj, atxix toj 1919 in najbʼen «majen in bʼant taqʼun [...] ex at tnabʼl» tuʼn Jesús tuʼntzun tonin tiʼj ttnam Jehová tuʼn tel kynikʼ tiʼj Xjan Uʼj ex tuʼn t-xi kynimen. Aj t-xi qbʼiʼn qeju nabʼil in tzaj tqʼoʼn Tyol Dios, in che ten kʼloj okslal saq ex toj mujbʼabʼil. Bʼaʼn tuʼn tkubʼ qxjelin jlu: «¿Kukxpe kxel nbʼiʼne Jesús ex qeju tqanil in che ul tuʼn majen in bʼant taqʼun?».

10. ¿Alkye tten in kubʼ techlaʼn uʼj te Ezequiel qeju tmajen Jehová ateʼ toj kyaʼj?

¹⁰ In tzaj tqʼamaʼn Xjan Uʼj qa ax ikx nukʼuʼn kyten qeju tmajen Jehová ateʼ toj kyaʼj. Jun techel, ok tqʼoʼn Ezequiel twitz tiʼj Jehová tjax tibʼaj jun kar jun rat in bʼettoq noq jaxku tumel tajbʼil Jehová (Ezequiel 1:4-28). Aju kar lu, in kubʼ techlaʼn qeju tmajen Jehová ateʼ toj kyaʼj. Toj tkyaqil ambʼil bʼantni kyten majen lu tuʼn kyok lepeʼ tiʼjju in tzaj tqʼmaʼn Jehová. Nya oʼkxju, ax ikx in che kubʼ nej kywitz tmajen Jehová ateʼ tzalu twitz Txʼotxʼ. Bʼaʼn tuʼn qximen tiʼj tkyaqil chʼixpubʼil o bʼant tuʼn ttnam Jehová kyoj qeju lajaj abʼqʼi ma che ikʼ. Bʼaʼn tuʼn ttzaj qnaʼn qa a Jehová in tzaj qʼamante kye tmajen tuʼn kybʼant chʼixpubʼil lu. Toj chʼintl ambʼil kbʼel t-xitin Jesús junx kyukʼil qe anjel tkyaqilju nya bʼaʼn at jaʼlo. Iktzun tten kykyaqil che nimel te Jehová, kʼokel kyqʼoʼn toklen tbʼi ex aju toklen tuʼn tkawin.

11, 12. ¿Tiʼ o bʼant tuʼn ttnam Jehová kyoj mankbʼil tqʼijlalil?

¹¹ Qo ximen tiʼj tkyaqilju o bʼant tuʼn ttnam Jehová kyoj mankbʼil tqʼijlalil. Tnejel, aju tuʼn kyjaw bʼinchet ja. Ateʼ  nim syent ermano ex ermana o che aqʼunan nim tuʼn tjaw bʼinchet akʼaj kytxuylal ninja qʼil twitz aqʼuntl kye testigos de Jehová atz Warwick (Nueva York, Estados Unidos). Atzun txqantl mil erman in che aqʼunan noq kukx tuʼn kyjaw bʼinchet Ja te Chmabʼil ex txqantl ninja qʼil twitz aqʼuntl twitz tkyaqil Txʼotxʼ. Aju nejni kywitz kykyaqil erman lu, a Kʼloj xjal Ximel Tzeʼn che Jawil bʼinchet Ja twitz tkyaqil Txʼotxʼ. Ax tok, nim in xi qqʼoʼn chjonte tiʼj tkyaqil aqʼuntl in bʼant kyuʼn erman lu. In che jaw bʼinchet ja lu noq tuʼnju pwaq in xi kyqʼoʼn tmajen Jehová tuʼn tkyaqil kykʼuʼj twitz tkyaqil Txʼotxʼ. In tzaj tkʼiwlaʼn Jehová qe tmajen tuʼnju tbʼanel kyaqʼun in bʼant ex kukx in bʼant jlu kyuʼn (Lucas 21:1-4).

¹² Tkabʼin, qo xnaqʼtzan tiʼj tiʼ o bʼant tiʼjju xnaqʼtzbʼil. Tgan Jehová tuʼn ttzaj t-xnaqʼtzaʼn qeju tmajen (Isaías 2:2, 3). Qo ximen kyiʼj qeju xnaqʼtzbʼil in najbʼen tuʼn tuʼn qtzaj t-xnaqʼtzaʼn. At aju Xnaqʼtzbʼil kye Pakbʼal toj tkyaqil Ambʼil, Xnaqʼtzbʼil kye Pakbʼal tiʼj Tkawbʼil Dios, Xnaqʼtzbʼil te Galaad, Xnaqʼtzbʼil  kye qeju Tzma in che Oktz toj Betel, Xnaqʼtzbʼil kye ansyan in che bʼet kyojele Ja te Chmabʼil kyukʼil Kyxuʼjil, Xnaqʼtzbʼil kye ansyan ateʼ kyxol kʼloj okslal, Xnaqʼtzbʼil kye ansyan ex kye onil kye ansyan ex aju Xnaqʼtzbʼil kye Kʼloj ansyan toj Ninja qʼil twitz aqʼuntl kyukʼil Kyxuʼjil. Ax ikx at aju qtembʼil toj Internet jw.org, jatumel jaku kanet Tyol Dios ex qeju txqantl uʼj quʼn kyoj nim syent yol. Toj tembʼil lu, ax ikx at xnaqʼtzbʼil kye kʼwaʼl, kye ja xjal, ex toj tembʼil toj kastiy in che kubʼ qʼet tqanil. ¿In najbʼenpe qtembʼil toj Internet quʼn aj qpakbʼan ex toj ambʼil in xi qqʼoʼn te Jehová kyukʼil toj qja?

13. ¿Tiʼ il tiʼj tuʼn tbʼant kyuʼn tmajen Jehová?

¹³ Jun tbʼanel oklenj at qe tuʼnju atoʼ toj ttnam Jehová ex tuʼnju in nel qnikʼ tiʼjju tajbʼil tuʼn tbʼant quʼn. Tuʼnju in nel qnikʼ tiʼj tiʼ in tzalaj tiʼj, il tiʼj tuʼn t-xi qbʼiʼn ex tuʼn tkubʼ qbʼinchaʼn qeju tiʼchaq bʼaʼn. Nim xjal kygan tuʼn tkubʼ kybʼinchaʼn nya bʼaʼn, atzun qe il tiʼj tuʼn tel qikʼun ik tzeʼn te Jehová (Salmo 97:10). Mintiʼ tuʼn qok ik tzeʼn qeju in nok kyqʼoʼn «bʼaʼn» te «mya bʼaʼn, ex nnoʼk» kyqʼoʼn «mya bʼaʼn» te «bʼaʼn» (Isaías 5:20). Qaj tuʼn ttzalaj Jehová quʼn ex tuʼntzunju in nok tilil quʼn tuʼn qten saq toj tkyaqil tten qanqʼibʼil (1 Corintios 6:9-11). Ojtzqiʼn quʼn qa aju in tzaj tqʼamaʼn Jehová qe toj Tyol, te qex kʼajbʼel. Nya oʼkxju, kʼujlaʼn Jehová quʼn ex qaj tuʼn kukx qajbʼen te. Tuʼntzunju, in xi qbʼiʼn qe tkawbʼil toj qja, kyukʼil erman, toj aqʼuntl, toj tja xnaqʼtzbʼil ex toj alkyexku juntl lugar (Proverbios 15:3). Qo xnaqʼtzan tiʼj junjun ambʼil jatumel il tiʼj tuʼn kukx qajbʼen te Jehová.

14. ¿Alkye tten in kubʼ kyyekʼun mambʼaj qa kukx in che ajbʼen te Jehová?

¹⁴ Aj kyxi xnaqʼtzet kʼwaʼl. In tzaj tqʼamaʼn Jehová toj Xjan Uʼj alkye tten tuʼn t-xi kyxnaqʼtzaʼn mambʼaj kykʼwaʼl. Il tiʼj tuʼn tok kyxqʼuqin kyibʼ tuʼn miʼn tten kyximbʼetz ik tzeʼn qe xjal mintiʼ kʼujlaʼn Jehová kyuʼn (Efesios 2:2). Jun techel, toj junjun lugar jaku txi tqʼamaʼn jun mambʼaj qa a txubʼaj at toklen tuʼn kyxi xnaqʼtzet kʼwaʼl. Atzunte Tyol Dios in tzaj tchikʼbʼaʼnxix qa a mambʼaj at toklen tuʼn t-xi tqʼoʼn xnaqʼtzbʼil kye tkʼwaʼl tiʼj Jehová (Efesios 6:4). Aqeju mambʼaj ex qeju txubʼaj kʼujlaʼn Jehová kyuʼn, kyaj tuʼn tten jun tbʼanel kyamiwbʼil kykʼwaʼl tukʼil Jehová ik tzeʼn tamiwbʼil Samuel ten tukʼil tej kʼwaʼlxtoq (1 Samuel 3:19).

15. ¿Alkye tten kbʼel qyekʼun te Jehová qa kukx in qo ajbʼen te aj tkubʼ qximen tuʼn tbʼant junjun tiʼchaq nim kyoklen?

¹⁵ Aj tkubʼ qximen tiʼ kbʼantel quʼn. Naʼmxtoq tkubʼ qximen tuʼn tbʼant jun tiʼ nim toklen, il tiʼj tuʼn qximen tiʼ t-ximbʼetz Jehová at tiʼj tuʼntzun kukx qajbʼen te. ¿Tzeʼn jaku bʼant quʼn? Qa ma qo jyon tqanil toj Tyol ex aju in tzaj tqʼamaʼn ttnam. Jun techel, at junjun xjal in cheʼx aqʼunal toj juntl tnam ex in nul itzʼji kykʼwaʼl atztzu. Aj tul itzʼji kykʼwaʼl in kubʼ kyximen tuʼn tajtz kysamaʼn kyukʼil qeju at kyxilen kyukʼil tuʼntzun tjaw kychʼiysaʼn, iktzun tten kukx jaku tzʼaqʼunan mambʼaj moqa txubʼaj toj juntl tnam. Ax tok, teyele junjun kbʼel t-ximen tiʼ kbʼantel tuʼn. Noqtzun tuʼnj, aqeju mambʼaj okslal il tiʼj tuʼn tkubʼ kyximen tiʼ t-ximbʼetz Jehová at tiʼj (kjawil uʼjit Romanos 14:12). Bʼaʼn tuʼn ttzaj qnaʼn qa naʼmxtoq tkubʼ qximen tiʼ kbʼantel quʼn kyiʼj toj qja ex tiʼj aqʼuntl, il tiʼj tuʼn qximen tiʼ in tzaj  tqʼamaʼn Tyol Dios. Qajbʼil tuʼn ttzaj yekʼun qbʼe tuʼn Qtat at toj kyaʼj (Jeremías 10:23).

16. ¿Tiʼ bʼant tuʼn jun txubʼaj tej tul itzʼ jun tal? ¿Tiʼ onin tiʼj tuʼn tjaw tjyoʼn aju mas bʼaʼn?

¹⁶ Xiʼ jun mejebʼleʼn anqʼil toj juntl tnam ex ul itzʼji jun kykʼwaʼl atztzu. Kubʼ kyximen tuʼn tajtz kysamaʼn kʼwaʼl toj kye kytnam kyukʼil kyman. Tojx ambʼil aju, tzyet t-xnaqʼtzan xuʼjilbʼaj tiʼj Tyol Dios tukʼil jun ermana. El tnikʼ xuʼjilbʼaj tiʼj qa at toklen tuʼn t-xi t-xnaqʼtzaʼn tal tiʼj Jehová (Salmo 127:3; Proverbios 22:6). Tuʼntzunju, kubʼ t-ximen qa tuʼn tajtz t-samaʼn tal kyukʼil tman moqa miʼn. Ik tzeʼn in tzaj tqʼamaʼn Tyol Dios, ok ten txubʼaj qanil onbʼil te Jehová tuʼntzun tjaw tjyoʼn aju mas bʼaʼn (Salmo 62:7, 8). Ax ikx xi tqʼamaʼn te ermana in qʼontoq xnaqʼtzbʼil te ex kye erman jatumel in noktoq tchmon tibʼ. E ok ten qeju at kyxilen tukʼil ex qeju tamiw jyol tumel tuʼn tajtz t-samaʼn tal kyukʼil tman. Noqtzun tuʼnj, eltoq tnikʼ tiʼj qa nya bʼaʼn aju. Ok tqʼoʼn twitz tchmil tiʼj qa nim in che onintoq erman tiʼj t-xuʼjil ex tiʼj tkʼwaʼl. Jaw labʼin tiʼj jlu ex ok ten xnaqʼtzal tiʼj Tyol Dios, ex tzyet tbʼet kyoj chmabʼil kyukʼil qeju toj tja. Jaku kubʼ qximen aju tzalajbʼil kubʼ tnaʼn txubʼaj lu tuʼnju tzaj tzaqʼweʼn Jehová tnaʼj Dios.

17. ¿Alkyeqe tqanil il tiʼj tuʼn tbʼant quʼn aj t-xi qqʼoʼn xnaqʼtzbʼil tiʼj Tyol Dios?

¹⁷ Aj kyul tqanil. Jun tten tuʼn tkubʼ qyekʼun qa kukx in qo ajbʼen te Jehová aju qa kukx ma txi qbʼiʼn qeju tqanil in che ul tuʼn ttnam. Jun techel, qo ximen tiʼjju il tiʼj tuʼn tbʼant quʼn aj tikʼ chʼin ambʼil aj t-xi tzyet jun xnaqʼtzbʼil quʼn tiʼj uʼj In tzaj t-xnaqʼtzaʼnxix. O tzaj qʼamaʼn qe tuʼn tel qpaʼn junjun minut aj tkubʼ bʼaj xnaqʼtzbʼil quʼn tukʼil xjal tuʼntzun qonin tiʼj tuʼn tok tojtzqiʼn ttnam Jehová. Jaku qo onin tiʼj aj tajbʼen quʼn aju video ¿Tiʼ in bʼaj toj jun Ja te Chmabʼil? ex aju uʼj ¿Alkyeqe in kubʼ kybʼinchaʼn tajbʼil Jehová toj ambʼil jaʼlo? Ax ikx o tzaj qʼamaʼn qe qa aj tkubʼ bʼaj xnaqʼtzbʼil quʼn tiʼj uʼj In tzaj t-xnaqʼtzaʼnxix tukʼil xjal, ax ikx kbʼel qxnaqʼtzaʼn aju uʼj «Ax che tenkje tuj tkʼujlalil Dios» tukʼil, maske otoq jaw aʼ twiʼ. Iktzun tten qo onil kyiʼj tuʼn kyweʼxix toj kyokslabʼil (Colosenses 2:7). ¿In xipe qbʼiʼn qeju tqanil lu aʼyeju in che ul tuʼn ttnam Jehová?

18, 19. ¿Tiquʼn bʼaʼn tuʼn t-xi qqʼoʼn chjonte te Jehová?

¹⁸ At nim tiquʼn tuʼn t-xi qqʼoʼn chjonte te Jehová. Tnejel, «porque tuʼn Dios itzʼ qoʼ, ex tuʼn in qo yukch, ex tuʼn atoʼ» (Hechos 17:27, 28). Tkabʼ, tuʼnju o tzaj tqʼoʼn Xjan Uʼj qe. Ik tzeʼn bʼant kyuʼn okslal te tnam Tesalónica, ax ikx qe in nok qqʼoʼn toklen aju oyaj lu, aju «tyol Dios» (1 Tesalonicenses 2:13).

¹⁹ Toxin, tuʼnju o tzaj t-xnaqʼtzaʼn qe toj Tyol alkye tten jaku qo ok te tamiw (Santiago 4:8). Ex tkyajin, il tiʼj tuʼn t-xi qqʼoʼn chjonte te tuʼnju in tzaj tqʼoʼn ambʼil qe tuʼn qten toj ttnam. In kubʼ qnaʼn ik tzeʼn kubʼ tnaʼn jun aj tzʼibʼil tiʼj Salmo 136, aju tqʼama jlu: «Kyqʼonxe chjonte te Qman tuʼnju bʼaʼnte, ex kukx kʼujlaʼn qoʼ tuʼn te jumajx» (Salmo 136:1). Teyele junjun versículo toj salmo lu in che ajbʼen yol lu tuʼn, «kukx kʼujlaʼn qoʼ tuʼn te jumajx». Qa kukx ma qo ajbʼen te Jehová ex qa kukx ma txi qbʼiʼn qeju tqanil in tzaj tqʼoʼn ttnam, kukx qo tzalajel tiʼj tkʼujlabʼil te jumajx.