1-3. Ki kapav finn arive ant Evodi ek Sintish? Kouma eski nou kapav evit sa bann kalite problem-la? (Get zimaz dan koumansman lartik.)

LABIB ena enn gran valer pou nou parski nou kone ki se Parol Bondie. Labib donn nou bann konsey ki kapav ed nou pou evit bann problem, ek li kapav koriz nou kan nou fer bann erer. Alor, kouma nou reazir kan nou gagn sa bann konsey-la? Anou get lexanp Evodi ek Sintish, de ser dan premie siek ki ti ena lesperans pou al dan lesiel. Labib dir nou ki zot ti diskite, me li pa dir nou kifer. Anou esey imazine seki ti arive kitfwa.

² Kitfwa Evodi ti invit sertin frer ek ser kot li pou manze. Me li pa ti invit Sintish. Plitar, kan Sintish ti tann lezot rakonte kouma zot ti bien apresie sa manze-la, sa ti bien bles li. Kitfwa li’nn dir limem: ‘To kapav krwar! Evodi pa’nn invit mwa. Mo ti panse nou ti de bon kamarad.’ Sintish ti ena santiman ki Evodi pa ti vremem kontan li ek ti  pe evit li. Alor, Sintish ti invit bann mem dimounn pou vinn manze kot li, me li pa ti invit Evodi! Li posib ki sertin dan kongregasion ti trouble par sa sitiasion-la. Labib dir ki Pol ti repran sa de ser-la ek ti ankouraz zot pou fer lape. Kitfwa apre zot finn ekout Pol ek zot finn kontign servi Zeova dan lazwa.​—Filipien 4:2, 3.

³ Azordi, kitfwa nou osi dan nou kongregasion nou ena enn problem avek enn frer ouswa enn ser. Me si nou swiv bann konsey ki ena dan Labib, nou kapav rezoud sa bann problem-la. Ofet, nou kapav mem evit zot. Ek kan nou obeir bann konsey ki ena dan Labib, nou montre ki Parol Zeova ena enn gran valer pou nou.​—Psom 27:11.

4, 5. Ki konsey Parol Bondie donn nou pou kontrol nou bann santiman?

⁴ Li pa touzour fasil pou kontrol nou bann santiman. Si enn kikenn ofans nou ouswa tret nou dan enn fason inzis, kitfwa akoz nou kiltir, nou kouler, ouswa nou laparans, sa kapav bles nou ouswa fer nou ankoler. Ek sa kapav fer nou plis dimal si sa dimounn ki’nn ofans nou la se nou frer ouswa nou ser. Ki konsey Labib kapav ed nou dan sa sitiasion-la?

⁵ Zeova kone ki kapav arive si enn dimounn pa kontrol so bann santiman. Kan nou santi nou blese ouswa nou ankoler, nou kapav dir ouswa fer bann kitsoz ki nou regrete apre. Dan Labib, Zeova ansegn nou pou kontrol noumem kan Li dir: “Pa ofanse vit.” Mazine ki kantite problem nou kapav evite kan nou obeir sa konsey-la ek nou pa ofans vit! (Lir Ekleziast 7:9 *; Proverb 16:32. *) Labib dir osi ki nou bizin pardonn lezot. Ofet, Zezi ti dir ki si nou pa pardonn lezot, Zeova osi pa pou pardonn nou. (Matie 6:14, 15) Eski to bizin ena plis pasians ek pli dispoze pou pardonn lezot?

6. Ki kapav arive si nou pa kontrol nou bann santiman?

⁶ Si nou pa kontrol nou bann santiman, nou kapav kontign res ankoler ek koumans ena laenn pou enn kikenn. Kitfwa nou kapav mem inflians sertin dan kongregasion pou ena mem santiman ki nou. Mem si nou esey kasiet nou koler ouswa nou laenn, avek letan, lezot pou remarke ki nou ena sa bann santiman-la. Lerla, nou bann frer ek ser kitfwa pou res lwin ar nou. (Proverb 26:24-26) Bann ansien pou servi Labib pou esey ed nou pou nepli ankoler ek tir laenn dan nou leker pou ki nou kapav pardonn lezot. (Levitik 19:17, 18; Romin 3:11-18) Kan zot fer sa, eski nou pou swiv sa bann konsey ki sorti dan Parol Bondie la?

7, 8. (a) Kouma eski Zeova gid so pep? (b) Ki sertin linstriksion nou trouve dan Labib, ek kifer nou bizin obeir sa bann linstriksion-la?

⁷ Zeova pe gid ek pe ansegn bann  dimounn ki dan parti so lorganizasion ki lor later. Kouma? Li finn etabli Zezi Kris kouma “sef kongregasion,” ek Zezi Kris finn etabli “lesklav fidel ek saz” pou ansegn ek gid pep Bondie. (Efezien 5:23; Matie 24:45-47, NW.) Parey kouma pou komite santral dan premie siek, pou sa esklav-la osi Labib ena enn gran valer parski se Parol Bondie. (Lir 1 Tesalonisien 2:13, NW.) Anou get sertin linstriksion ki ena dan Labib.

⁸ Labib ankouraz nou pou asiste renion regilierman. (Ebre 10:24, 25) Li ankouraz nou tou pou krwar dan bann mem lansegnman ki ena dan Labib. (1 Korintien 1:10) Li osi dir nou: “Avan tou kitsoz, kontign rod Rwayom Bondie.” (Matie 6:33, NW.) Labib dir nou ki nou bizin al prese lakaz-lakaz, dan bann landrwa piblik, ek ninport kotsa ena dimounn. (Matie 28:19, 20; Zistwar Bann Apot 5:42; 17:17; 20:20) Li donn lord bann ansien pou gard kongregasion pir. (1 Korintien 5:1-5, 13; 1 Timote 5:19-21) Ek li ansegn nou ki nou bizin gard nou lekor prop lor plan fizik ek moral, ek rezet bann panse ek bann pratik ki Zeova deteste.​—2 Korintien 7:1.

9. Kisannla Zezi pe servi pou ed nou konpran Parol Bondie?

⁹ Sertin dimounn panse ki zot pa bizin personn pou explik zot seki ena dan Labib. Me depi 1919, Zezi pe servi “lesklav fidel ek saz” pou ed pep Bondie konpran bann lansegnman Biblik ek pou aplik sa bann lansegnman-la. Kan nou obeir bann konsey ki ena dan Labib, nou gard kongregasion pir, ini, ek dan lape. Poz tomem sa kestion-la: ‘Eski mo pou res fidel anver Zezi ek swiv bann instriksion ki lesklav fidel ek saz done?’

10. Kouma liv Ezekiel dekrir parti lorganizasion Zeova ki dan lesiel?

¹⁰ Gras-a Labib, nou aprann ki bann serviter Zeova ki dan lesiel osi zot organize. Par exanp, dan enn vizion, Ezekiel ti trouv Zeova lor enn kales ki ti kapav al bien vit dan ninport ki direksion ki Zeova ti anvi. (Ezekiel 1:4-28) Kales-la reprezant parti lorganizasion Bondie ki dan lesiel. Li pa tarde pou swiv bann direksion ki Zeova done ek sa ena enn linflians lor parti lorganizasion Zeova ki lor later. Reflesi lor tou bann sanzman ki finn ena dan lorganizasion Bondie sa dis dernie lane-la. Pa bliye ki se Zeova ki deryer sa bann sanzman-la. Biento Zezi Kris ek so bann anz pou detrir sa move lemond-la. Lerla, personn pa pou zet dezoner lor Zeova ek lor so nom, ni mem kritik so fason dirize!

11, 12. Ki lorganizasion Zeova finn fer dan sa bann dernie zour-la?

¹¹ Reflesi lor seki lorganizasion Zeova finn kapav fer pandan sa bann dernie zour-la. Konstriksion. Plizir santenn  frer ek ser finn travay dir pou konstrir nouvo biro mondial bann Temwin Zeova ki trouv Warwick, dan New York, l’États-Unis. Plizir milie lezot volonter dan lemond antie pe konstrir bann Lasal kot fer renion ek bann biro nasional. Sa bann volonter-la travay anba direksion Departman Devlopman/Kontriksion Mondial. Nou bien rekonesan anver tou bann ki pe travay bien dir pou konstrir sa bann batiman-la! Ek bann serviter Zeova partou lor later pe donn seki zot kapav pou finans sa bann travay-la. Zeova beni so pep pou limilite ek fidelite ki zot manifeste.​—Lik 21:1-4.

¹² Lansegnman. Zeova kontan ansegn so pep. (Izai 2:2, 3) Reflesi lor diferan lekol ki nou ena. Ena Lekol Pionie, Lekol pou Bann Evanzelizater Rwayom Bondie, Lekol Biblik Guiléad, Lekol pou Bann Nouvo Betelit, Lekol pou Bann Sirveyan Sirkonskripsion ek Zot Madam, Lekol pou Bann Ansien, Lekol pou Bann Frer Nome, ek Lekol pou Bann Manb Komite Biro Nasional ek Zot Madam. Ek lor nou sit Internet  jw.org, Labib ek boukou lezot piblikasion disponib dan plizir santenn lang. Lor sa sit-la ena osi bann seksion ki sirtou pou bann zanfan ek bann fami ek ena osi enn seksion kot ena bann nouvote. Eski to servi jw.org dan to minister ek dan to ladorasion an fami?

13. Ki responsabilite pep Zeova ena?

¹³ Se vremem enn gran loner pou form parti dan lorganizasion Zeova ek pou kone seki Zeova atann nou fer! Biensir, parski nou kone ki kitsoz fer Bondie plezir, nou ena responsabilite pou obeir Li ek pou fer seki bon. Ek mem si boukou dimounn kontan fer seki move, nou, nou bizin “deteste lemal,” parey kouma Zeova. (Psom 97:10) Fode zame nou resanble bann ki panse ki “seki bon, li move ek seki move, li bon.” (Izai 5:20) Nou anvi fer Zeova plezir, alor nou determine pou res pir dan tou domenn nou lavi. (1 Korintien 6:9-11) Seki Zeova dir nou dan Labib se pou nou prop bien. Nou kontan Li ek nou anvi res fidel ar Li. Se pou sa rezon-la ki nou aplik So bann konsey kan nou kot nou, dan kongregasion, dan travay, dan lekol, ouswa ninport kotsa nou ete. (Proverb 15:3) Reflesi dan ki lezot domenn nou bizin res fidel ar Bondie.

14. Kouma eski bann paran kapav res fidel ar Zeova?

¹⁴ Kan nou ansegn nou bann zanfan. Dan Labib, Zeova finn donn bann paran bann konsey kouma pou ansegn zot bann zanfan. Bann Kretien bizin fer bien atansion ki zot pa les zot inflianse par fason panse ki ena dan sa lemond-la. (Efezien 2:2) Par exanp, dan sertin landrwa, enn papa kapav panse: ‘Isi, se bann mama ki ansegn bann zanfan.’ Me dan enn fason bien kler, Labib donn lord bann papa pou ansegn zot zanfan lor Zeova. (Efezien 6:4) Bann papa ek bann mama ki kontan Zeova anvi ki zot zanfan ena enn lamitie bien pros avek Li, parey kouma Samiel ti bien pros avek Zeova kan li ti tipti.​—1 Samiel 3:19.

15. Kouma nou kapav res fidel anver Zeova kan nou pran bann desizion ki inportan?

¹⁵ Kan nou pran bann desizion. Avan ki nou pran bann desizion inportan dan nou lavi, nou anvi kone ki Zeova panse lor la pou ki nou kapav res fidel anver Li. So Parol Labib ek so lorganizasion kapav ed nou. Par exanp, azordi sertin koup finn kit zot pei pou al travay dan enn lot pei. Kan zot finn gagn zanfan, zot finn desid pou avoy zanfan-la ar zot fami dan zot pei. Koumsa, zot kapav kontign travay pou gagn larzan. Li vre ki se enn desizion personel, me enn koup bizin demann limem: ‘Ki Zeova pou panse lor nou desizion?’ (Lir Romin 14:12.) Nou pou montre ki nou ena sazes kan nou reflesi  lor seki Labib dir avan ki nou pran bann desizion inportan ki konsern nou fami ek nou travay. Nou bizin led nou Papa ki dan lesiel parski nou pa kapav diriz nou bann pa.​—Zeremi 10:23.

16. Ki desizion enn mama ti bizin pran kan so garson inn ne? Ki finn ed li pou pran enn bon desizion?

¹⁶ Apre ki enn koup ti al dan enn lot pei, zot ti gagn enn ti garson. Zot ti prevwar pou avoy tibaba-la kot zot paran dan zot pei. Me sa mem lepok-la, mama-la ti koumans etidie Labib avek enn Temwin Zeova. Li ti aprann ki se so responsabilite pou ansegn so zanfan lor Zeova. (Psom 127:3; Proverb 22:6) Alor, parey kouma Labib ankouraz nou pou fer, li ti priye Zeova ek ti sipliy Li pou ed li fer seki bizin. (Psom 62:7, 8) Li ti osi explik sa sitiasion-la ar ser ki ti pe fer so letid ek li ti koz sa avek lezot dan kongregasion. Mem si so fami ek so bann kamarad ti pe met presion lor li pou avoy so tibaba kot so bann paran, li ti sir ki sa pa ti enn bon desizion. So mari ti remarke ki kantite bann frer ek ser ti ed li ek zot ti baba. Sa ti telman inpresionn mari-la ki li’nn koumans etidie Labib ek asiste bann renion ansam avek so fami. Esey imazine ki kantite sa mama-la ti kontan kan li’nn trouv Zeova reponn so lapriyer!

17. Kan nou pe fer letid enn kikenn, ki linstriksion nou bizin swiv?

¹⁷ Kan nou swiv bann instriksion. Si nou fidel anver Bondie, nou pou swiv bann instriksion ki nou gagne ar so lorganizasion. Par exanp, anou gete ki nou bizin fer zis apre ki nou’nn fek koumans etidie liv Ki la Bible enseigné vrai-mem? ar enn kikenn. Apre sak letid, nou ankouraze pou rezerv inpe letan pou ed nou etidian konn inpe plis lor lorganizasion Zeova. Pou fer sa, nou kapav servi video Ki Pase dan Lasal Bann Temwin Zeova? ek brosir Kisannla Pe Fer Volonte Jéhovah Zordi? Apre ki nou’nn fini liv Ki la Bible enseigné?, nou kapav ed nou etidian pou vinn pli “stab dan lafwa” kan nou kontign so letid dan liv “Reste dan l’amour Bondié,” mem si antretan li’nn fini pran batem. (Kolosien 2:7, NW.) Eski to pe swiv sa instriksion ki lorganizasion Zeova done la?

18, 19. Ki bann rezon nou ena pou remersie Zeova?

¹⁸ Nou ena boukou rezon pou remersie Zeova! Par exanp, “se par Li ki nou ena lavi, nou bouze ek nou existe.” (Zistwar Bann Apot 17:27, 28, NW.) Li finn osi donn nou so Parol Labib. Parey kouma bann Kretien dan Tesalonik, nou bien apresie sa kado-la parski se enn mesaz ki sorti kot Zeova.​—1 Tesalonisien 2:13.

¹⁹ Labib finn ed nou pou vinn pros ar Zeova, ek Li osi Li’nn vinn pros ar nou. (Zak 4:8) Nou bien rekonesan ki nou Papa finn invit nou pou form parti dan so lorganizasion! Nou ena mem santiman ki sa ekrivin Psom ki ti ekrir: “Remersie Zeova, parski Li bon, ek so lamour fidel dir pou touletan.” (Psom 136:1, NW.) Dan sak verse sa Psom-la, ekrivin-la finn repet “so lamour fidel dir pou touletan.” Wi, si nou res fidel ar Zeova ek si nou swiv bann linstriksion ki Li donn nou atraver so lorganizasion, Li pou donn nou lavi pou touletan ek Li pou res fidel ar nou pou touletan!