1-3. 1) ¿Kenke uelis mokualanijkej Evodia uan Síntique? 2) ¿Tlake techpaleuis amo timokualanisej o ma tijsenkauakaj kuesoli? (Xikita nopa achtoui tlaixkopinkayotl).

NOCHI tojuantij tlauel tijpatiitaj Biblia pampa tijmatij nopa amochtli iaxka toTeotsij. Tlen techtlajtolmaka techpaleuia amo ma tijpiakaj kuesoli, uan techxitlaua o techtlalnamiktia kema timokuapolouaj. ¿Kenijkatsa tikitaj tlen Biblia techtlajtolmaka? Ma timoiljuikaj ipan tlen kinpanok Evodia uan Síntique, omej toikniuaj siuamej katli nojkia kintlapejpenijkej yasej iluikak. Se tonali inijuantij tlauel mokualanijkej. Maske Biblia amo kiijtoua kenke mokualanijkej, tojuantij uelis timoiljuisej tlake uelis panok.

² Ma timoiljuikaj Evodia kintlanejki se keskij toikniuaj ma tlakuatij ichaj pampa kinekiyaya ma itstokaj iuaya se kentsi. Uan amo kitlanejki Síntique. Teipa, Síntique tlauel kualanki kema kinkajki toikniuaj kiijtouayayaj tlauel kinpaktijtoya nopa tlakualistli uan itstosej iuaya Evodia. Uelis moiljuik: “¿Kenke na amo nechtlanejki? ¡Na nimoiljuiyaya Evodia eliyaya nouampo!”. Uelis Síntique moiljuik Evodia kualantoya iuaya o amo kinekiyaya kiitas. Yeka Síntique nojkia kichijki se tlakualistli uan kintlanejki nopa toikniuaj katli Evodia kintlanejtoya uan ya amo kitlanejki. Ni kuesoli tlen kipixkej kichijki sekinok toikniuaj ipan tlanechikoli nojkia ma mokualanikaj. Biblia kiijtoua Apóstol Pablo kintlajtolmakak  nopa omej toikniuaj uan kiniljuik ma moyoltlalikaj o ma kisenkauakaj nopa kuesoli. Tijmatij inijuantij kichijkej tlen kintlajtolmakakej uan nojua kitekipanojkej Jehová ika pakilistli (Filip. 4:2, 3).

³ Ipan ni tonali, uelis tojuantij nojkia timokualanisej iuaya se toikni katli mosentilia touaya ipan tlanechikoli. Tlaj nochipa tijchiuaj tlen Biblia techtlajtolmaka, techpaleuis amo ma techpano nopa o ma tijmatikaj kenijkatsa uelis tijsenkauasej se kuesoli iuaya se toikni. Tlaj nelia tijpatiitaj toTeotsij iTlajtol, uajka nochipa tijchiuasej tlen techtlajtolmaka uan tijkauasej ma techyakana ipan tonemilis (Sal. 27:11).

4, 5. ¿Tlake textos techpaleuia ma tijmatikaj kenijkatsa tijnextisej tlen tijyolmatij?

⁴ Nochi tojuantij tijmatij tlauel ouij tijnextisej tlen tijyolmatij kej kinamiki. Uelis kemantika tlauel timokuesouaj o tikualanij kema se akajya techyolkokoua, kej kema san tlemach techiljuia o techchiuilia pampa amo techiskaltijtokej sanse kej ya, pampa tichipaktikej o amo, o pampa amo tinesij kej ya. Uan uelis nojua tlauel amo kuali tijyolmatij tlaj katli techyolkokoua eli se akajya katli itstok ipan tlanechikoli. ¿Kenijkatsa tlen Biblia tetlajtolmaka uelis techpaleuis kema techpanos ni?

⁵ Jehová kuali kimati tlake uelis panos tlaj amo tijmatij kenijkatsa tijnextisej tlen tijyolmatij. Tlaj timoyolkokojtokej o tikualantokej, uelis kichiuas ma tikijtokaj o ma tijchiuakaj tlen amo kinamiki uan teipa amo kuali tijyolmatisej. Jehová techiljuia ipan Biblia tlake moneki tijchiuasej: “Amo xikualani nimantsi”. Moneki timoiljuisej kenijkatsa techpaleuis tlaj tijchiuasej tlen Biblia techtlajtolmaka, uan kiampa amo tijpiasej kuesoli uan amo nima tikualanisej (xijpoua Eclesiastés 7:9; Proverbios 16:32). Biblia nojkia techiljuia ma titetlapojpoljuikaj. Uan Jesús kiijtok tlaj amo tijchiuaskiaj, uajka Jehová nojkia amo techtlapojpoljuis (Mat. 6:14, 15). ¿Nojua moneki tijpias moyolo ika sekinok uan nojua tikintlapojpoljuis?

6. ¿Tlake panoskia tlaj amo tijmokuitlauiaj tlen tijyolmatij?

⁶ Tlaj amo tijmokuitlauiaj tlen tijyolmatij, uelis kichiuas nochipa ma tisenkuajkualantokaj uan uelis peuas tijkualankaitasej se akajya. Uan ueliskia tijchiuasej sekinok toikniuaj nojkia kiampa ma kiyolmatikaj. Maske tijchiuasej kampeka amo tijnextisej tikualantokej o titekualankaitaj, teipa sekinok kena kiitasej uan uelis ayokmo kinekisej itstosej touaya o technechkauisej (Prov. 26:24-26). Tlaj se akajya kipanoskia ni, ueuejtlakamej kichiuasej kampeka kipaleuisej uan kitlajtolmakasej ika Biblia, uan kiampa ayokmo moyolkokojtos yon tekualankaitstos, uan nojkia ma tetlapojpoljui (Lev. 19:17, 18; Rom. 3:11-18). Tlaj tojuantij techpanoskia ni, ¿tijchiuasej tlen Biblia techtlajtolmaka?

7, 8. 1) ¿Kenijkatsa Jehová kinyakana itekipanojkauaj? 2) ¿Tlake tlamantli techiljuia Biblia ma tijchiuakaj, uan kenke moneki tijneltokasej?

⁷ Ipan ni tonali, Jehová kinyakana uan kinmachtia itekipanojkauaj katli itstokej ipan Tlaltipaktli. ¿Kenijkatsa kichiua? Kitekimakatok iKone ma “kipia tlanauatili” ipan tlanechikoli. Uan Cristo kitekimakatok nopa “tlalnamijkatlatekipanojketl tlen nelia temachtli” ma kinmachti uan ma kinyakana toTeotsij itekipanojkauaj (Efes. 5:23; Mat. 24:45-47). Uan kej toikniuaj katli kinyakanayayaj Cristo itokilijkauaj ipan achtoui siglo, inijuantij nojkia tlauel kipatiitaj Biblia pampa kiitaj kej toTeotsij iTlajtol (xijpoua 1 Tesalonicenses 2:13). ¿Tlake techiljuia Biblia ma tijchiuakaj?

⁸ Biblia techiljuia nochipa ma timonechikokaj (Heb. 10:24, 25). Nochi ma tijneltokakaj sanse tlamachtili (1 Cor. 1:10). Ma tijnextikaj tijpaleuiaj “itlanauatilis toTeko” (Mat. 6:33). Uan nojkia technauatia ma titlajtolmoyauakaj kajkalpa, kampa nemij miakej maseualmej uan kampa ueli (Mat. 28:19, 20, TNM; Hech. 5:42; 17:17; 20:20). Nojkia kiniljuia ueuejtlakamej tlake moneki kichiuasej uan kiampa ipan tlanechikoli amo mochijtos tlen amo kuali (1 Cor. 5:1-5, 13; 1 Tim. 5:19-21). Uan  techiljuia ma tijpixtokaj totlakayo tlapajpaktik uan amo ma timoiljuikaj yon ma tijchiuakaj yon se kentsi tlen Jehová kikualankaita (2 Cor. 7:1).

9. ¿Ajkia kitekimakatokej ma techpaleui tijkuamachilisej tlen Biblia tlamachtia?

⁹ Sekij moiljuiaj amo moneki ma kinixtomilikaj tlen Biblia tlamachtia pampa ininselti uelis kikuamachilisej. Maske kiampa moiljuiaj, ipan 1919 Jesús pejki kitekiuia nopa “tlalnamijkatlatekipanojketl” ma kinpaleui toTeotsij itekipanojkauaj ma kikuamachilikaj tlen Biblia tlamachtia uan ma kichiuakaj ipan ininnemilis. Uan pampa tijchiuaj tlen Biblia techtlajtolmaka, ipan tlanechikoli nochi kuali timouikaj, tiitstokej ika tlaseuilistli uan amo mochiua tlen amo kuali. Yeka, kinamiki timotlajtlanisej: “¿Nijnextis nijneltoka Jesús uan nijchiuas tlen nopa tlalnamijkatlatekipanojketl techiljuia ma tijchiuakaj?”.

10. ¿Kenijkatsa kinixnextia amochtli Ezequiel nochi Jehová itekipanojkauaj katli itstokej ipan iluikak?

¹⁰ Biblia kiixtoma kenijkatsa Jehová itekipanojkauaj katli itstokej ipan iluikak nojkia mosentikapaleuiaj. Kejuak ipan se temiktli, Ezequiel kiitak kenijkatsa Jehová kinemiltia chikauak kejuak se carro uan kiuika kampa ya kineki (Ezeq. 1:4-28). Nopa carro kinixnextia nochi Jehová itekipanojkauaj katli itstokej ipan iluikak. Inijuantij nimantsi kichiuaj tlen ya kinnauatia. Uan nojkia kinyakana itekipanojkauaj katli itstokej ipan Tlaltipaktli. Ma timoiljuikaj ipan nochi tlen toTeotsij itlanechikol kipatlatok ipan matlaktli xiuitl, uan ma tikilnamiktokaj Jehová kichiua ma mopatla nochi nopa tlamantli. IKone Jesucristo uan iluikaeuanij nechka kitlamiltisej nochi tlen amo kuali ipan Tlaltipaktli, kiampa nochi kitlepanitasej Jehová uan itoka, uan nochi kimatisej san ya kinamiki kinauatis nochi tlen onka.

11, 12. ¿Tlake kichijtok Jehová itlanechikol ipan ni tonali?

¹¹ Jehová itlanechikol kichijtok tlauel miak tlamantli ipan ni tonali. Achtoui ma timoiljuikaj ipan miak kali tlen kichijchijtiualajtokej. Tlauel miakej toikniuaj, siuamej uan tlakamej, chikauak tekititokej kampa kichijchiuaj nopa yankuik ueyi kali Betel ne Warwick (Nueva York, Estados Unidos). Nojkia nopa Departamento Mundial de Diseño y Construcción, kinyakana sekinok miakej toikniuaj ipan nochi Tlaltipaktli katli kichijchiuaj Kali kampa mosentiliaj Jehová itlajtoltemakauaj uan uejueyi kali Betel. ¡Tlauel tikintlaskamatiliaj nochi ni toikniuaj pampa kichijtokej kampeka tlauel chikauak tekititosej! Nochi nopa kali ueli mochijchiua pampa toikniuaj katli kampa ueli euaj tlapaleuiaj ika inintomij. Moneki tikilnamiktosej Jehová tlauel kinteochiua itekipanojkauaj katli amo kitlauelkauaj uan kipaleuiaj ika nochi ininyolo (Luc. 21:1-4).

¹² Nama ma timoiljuikaj kenijkatsa techmachtiaj. Jehová tlauel kipaktia kinmachtis itekipanojkauaj (Is. 2:2, 3). Ya kitekiuia miak escuelas kampa techmachtia. Eltok nopa escuela Kampa kinmachtiaj precursores, Kampa kinmachtiaj tlajtolmoyauanij, Escuela de Galaad, Kampa kinmachtiaj katli namanok asitokej ipan Betel, Kampa kinmachtiaj katli tepaxalouaj chijchikuasej metstli uan ininsiuajuaj, Kampa kinmachtiaj ueuejtlakamej, Kampa kinmachtiaj ueuejtlakamej uan tlapaleuianij uan Kampa kinmachtiaj katli kiyakanaj Betel uan ininsiuajuaj. Nojkia tijpiaj ipan Internet jw.org, nopaya uelis tijpantisej Biblia uan miak amatlajkuiloli tlen eltok ipan miak tlajtoli. Uan nojkia eltok tlen uelis kinpaleuis konemej o nochi tochampoyouaj, uan eltok kampa nesi tlen kinpanotok toikniuaj ipan sekinok altepemej. ¿Tijtekiuiaj jw.org kema titlajtolmoyauaj uan kema timomachtiaj ininuaya tochampoyouaj?

13. ¿Tlake moneki tijchiuasej katli tijtekipanouaj Jehová?

¹³ ¡Nelia se ueyi tlateochiualistli tiitstosej ipan Jehová itlanechikol uan tijmatisej tlen kineki ma tijchiuakaj! Pampa tijmajtokej tlen Jehová kipaktia, kinamiki tijneltokasej uan tijchiuasej  tlen xitlauak. Maske miakej maseualmej kinpaktia kichiuasej tlen amo kuali, tojuantij moneki tijkualankaitasej tlen Jehová kikualankaita (Sal. 97:10). Amo kinamiki timoiljuisej kej “tlakamej tlen kiiljuiaj kuali tlen axkuali, uan tlen axkuali kiiljuiaj kuali” (Is. 5:20). Tojuantij tijnekij tijyolpakiltisej Jehová, yeka timosentlalijtokej nochipa timonejnemiltisej kej ya kineki uan amo tijsokiuisej totlakayo, totlalnamikilis yon totlaneltokilis (1 Cor. 6:9-11). Tijmatij tlen Jehová techiljuia ma tijchiuakaj nochipa techpaleuia. Uan tlauel tikikneliaj Jehová uan amo kema tijnekij tijtlauelkauasej. Yeka nochipa tijchiuaj tlen ya kipaktia ipan tochaj, ipan tlanechikoli, kampa titekitij, kampa timomachtiaj o kampa ueli (Prov. 15:3). Ma tikitakaj kema moneki tijnextisej tijchiuaj tlen Jehová kipaktia.

14. ¿Kenijkatsa tetajmej kinextiaj kichiuaj tlen Jehová kipaktia?

¹⁴ Kema tikiniskaltia mokoneuaj. Ipan Biblia, Jehová kiniljuia tetajmej kenijkatsa kinamiki kiniskaltisej ininkoneuaj. Tetajmej katli kitekipanouaj toTeotsij kinextiaj kichiuaj tlen kipaktia kema kineltokaj tlen kinnauatia. Inijuantij moneki momokuitlauisej uan kiampa amo moiljuisej kej sekinok maseualmej (Efes. 2:2). Se toikni katli moatsonpoliuiltijtok amo kema moiljuiskia ipan ialtepe san siuamej kinamiki kiniskaltisej o kintlalnamiktisej ininkoneuaj. Biblia xitlauak kiijtoua se tetaj moneki kinmachtis ikoneuaj ma kiixmatikaj uan ma kiiknelikaj Jehová (Efes. 6:4). Tetajmej uan tenamej katli kiikneliaj Jehová kinekij ininkoneuaj kuali ma mouampojchiuakaj iuaya, kej Samuel kuali mouampojchijki iuaya toTeotsij kema eliyaya okichpil (1 Sam. 3:19).

15. ¿Kenijkatsa tijnextiaj tijchiuaj tlen Jehová kipaktia kema tijtlapejpeniaj tlake tijchiuasej?

¹⁵ Kema tijtlapejpeniaj tlake tijchiuasej. Kema monekis tijtlapejpenisej tlake tijchiuasej,  achtoui moneki tikitasej tlake moiljuia Jehová. Moneki tikitasej tlake techtlajtolmaka ipan Biblia uan ika itlanechikol. Kiampa tijnextisej tijnekij tijchiuasej tlen kipaktia. ¿Kenke tlauel ipati tijchiuasej ni? Ma tikitakaj se tlamantli tlen tlauel ouij katli moneki kitlapejpenisej miakej tetajmej. Miakej yajtokej tekitij ipan seyok altepetl, uan kema konepiaj, kintitlaniliaj o kinonkauiliaj inintatauaj maske ontlakatkej uan kiniljuiaj ma kiniskaltilikaj uan kiampa inijuantij nojua tekititosej uan kitlantosej tomij. Maske ni san tetajmej kitlapejpeniaj tlake kichiuasej, kinamiki moiljuisej kenijkatsa kiita Jehová tlen kichiuaj (xijpoua Romanos 14:12). Kema tijnekisej tijtlapejpenisej tlen tijchiuasej ika tochampoyouaj o ipan tlake titekitisej, moneki tikitasej tlake kiijtoua Biblia. Tojuantij amo tiuelij timoyakanaj toselti, yeka moneki ma techyakana toTeotsij (Jer. 10:23).

16. 1) ¿Tlake monekiyaya kitlapejpenis se siuatl kema tlakatki ikone? 2) ¿Tlake kipaleuik ma kimati tlake kichiuas?

¹⁶ Se tlakatl iuaya isiua itstoyaj ipan seyok altepetl uan nopaya kipixkej se ininkone. Teipa moiljuijkej kititlaniskiaj kampa itstoyaj inintatauaj, ipan altepetl kampa inijuantij tlakatkej. Nopa siuatl pejki momachtia Biblia iuaya se toikni, uan kiyekok monekiyaya kimachtis ikone ajkia Jehová (Sal. 127:3; Prov. 22:6). Yeka monejki kitlapejpenis tlaj kititlaniskia ikone ika iueyitatauaj o amo. Kej Biblia kiijtoua moneki tijchiuasej, ya momaijtok uan kiiljuik Jehová ma kipaleui kimatis tlake kichiuas (Sal. 62:7, 8). Nojkia kiiljuik nopa tosiuaikni katli kimachtiyaya uan kamanaltik ininuaya sekinok toikniuaj tlen tlanechikoli. Maske iuikaljuaj uan iuampoyouaj kiiljuiyayaj ma kititlani nopa okichpil, ya kimajtoya amo kinamikiyaya kiampa kichiuas. Iueue kiitak toikniuaj katli itstoyaj ipan tlanechikoli tlauel kipaleuiyayaj isiua uan ikone. Uan tlauel kipaktik, yeka nojkia pejki momachtia uan pejki monechikoua. ¡Nopa siuatl nelia tlauel yolpajki kema kiitak kenijkatsa Jehová kipaleuik!

17. ¿Tlake techiljuijtokej ma tijchiuakaj kema tikinmachtisej sekinok?

¹⁷ Kema techiljuiaj tlake moneki tijchiuasej. Nojkia tijnextiaj tijchiuaj tlen Jehová kipaktia kema tijneltokaj tlen itlanechikol techiljuia ma tijchiuakaj. Ma timoiljuikaj tlake techiljuijtokej ma tijchiuakaj se kentsi teipa kema tijpeualtijtokej tijmachtiaj se akajya ika amochtli ¿Tlake nelnelia tlamachtia Biblia? Techiljuijtokej kema titlamisej tijmachtiaj, ma tikixtomilikaj san ipan se keski minutos nochi tlen kichiua Jehová itlanechikol uan kiampa uelis kuali techixmatis. Uelis tijtekiuisej nopa video ¿Tlake tijchiuaj ipan Kali kampa timosentiliaj? uan pilamochtsi ¿Ajkia inijuantij kichiuaj tlen Jehová kineki ipan ni tonali? Uan kema tijtlamiltisej amochtli Tlamachtia Biblia, moneki tikinmachtisej ika amochtli Xijchiuakaj ma inmechiknelijto toTeotsij maske ya moatsonpoliuiltijkej. Kiampa tikinpaleuisej ma itstokaj ‘senkistok temachmej ipan tlen kineltokaj’ (Col. 2:7). ¿Tijchiuaj tlen Jehová itlanechikol techiljuia ma tijchiuakaj?

18, 19. ¿Kenke moneki tijtlaskamatilisej Jehová?

¹⁸ Onka miak tlamantli tlen kichiua ma tijtlaskamatilikaj Jehová. Ya techmakatok tonemilis, pampa “ika itlapaleuil toTeko tiitstokej, tinejnemij uan tijchiuaj nochi tlen tijnekij” (Hech. 17:27, 28). Nojkia techmakatok Biblia. Uan kej Cristo itokilijkauaj katli itstoyaj Tesalónica, tojuantij nojkia tijpatiitaj pampa tijmatij nelia “itlajtol toTeko” (1 Tes. 2:13).

¹⁹ Biblia techpaleuijtok ma timonechkauikaj ika Jehová, uan ya nojkia technechkauijtok (Sant. 4:8). Tlauel tijtlaskamatiliaj pampa techkajtok ma tiitstokaj ipan itlanechikol. Tijyolmatij sanse kej katli kiijkuilok Salmo 136: “Xijtlaskamatikaj toTeko pampa yajaya nelia kuali, pampa iteiknelijkayo axkema tlami” (Sal. 136:1). Kampa tlami sejse versículo tlen ni Salmo, nochipa kiijtoua toTeotsij “iteiknelijkayo axkema tlami”. Tlaj nochipa tijchiuaj tlen Jehová kipaktia uan tijchiuaj tlen itlanechikol techiljuia, uelis tikitasej kenijkatsa tlauel techiknelia, pampa teipa amo kema timikisej.