1-3. Hadia zalua ba gotalua Gewodia hegöi Zitikhe? Hewisa lala ba wanimbagö zalua andrö? (Faigi gambara ba wamobörö wamaha’ö.)

TAFOSUMANGE sibai Zura Ni’amoni’ö börö me ta’ila wa da’ö Mbuku moroi khö Lowalangi. Ba Zura Ni’amoni’ö so mene-mene sanolo ya’ita ba wangasiwaisi gabula dödö, ba tola tobali degu-degu da’ö khöda ba ginötö tafalua zala. Andrö, hewisa dödöda ba mene-mene andrö? Angeraigö darua ndra alawe nibayoini ba götö si föföna, Gewodia ba Zitikhe. Itutunö Zura Ni’amoni’ö wa fatiti ira, hiza’i lö itutunö khöda hadia mbörönia. Datakhalaigö hana wa tola alua da’a.

² Tola manö, ikaoni Gewodia ndra talifusö ena’ö fao ira manga ba nomonia. Hiza’i lö ikaoni Zitikhe. Ba gafuriata, mofönu sibai Zitikhe me so zodunö-dunö khönia wa omuso sibai dödöra wefao wemanga. Tola manö imane dödönia, ’Hadia sa’e lö ikaonido Gewodia! Uwalinga si fahuwu ndra’aga.’ Irasoi Zitikhe wa sindruhu-ndruhu lö i’omasi’ö ia Gewodia ba lö omasi fahuwu khönia. Andrö, ikaoni göi  Zitikhe ndra talifusö ena’ö fao ira wemanga ba nomonia, hiza’i lö ikaoni Gewodia! Ba zalua andre, tola manö so watitisa ba mbanua niha Keriso. Iforoma’ö Zura Ni’amoni’ö wa itegu ira Faulo ba ifarou ira ena’ö ifuli atulö ira. Tola manö lafondro-ndrongo niwa’ö Waulo ba lö aetu lafosumange Yehowa si fao fa’omuso dödö.—Filifi 4:2, 3.

³ Iada’a, itaria fatiti ita göi khö ndra talifusöda ba mbanua niha Keriso. Hiza’i, na ta’o’ö mene-mene si so ba Zura Ni’amoni’ö, tola ta’asiwaisi ngawalö gabula dödö. Sindruhunia, tola tatimbagö ena’ö lö alua da’ö. Ba na ta’o’ö niwa’ö Zura Ni’amoni’ö, taforoma’ö wa tafosumange Mbuku moroi khö Yehowa.—Zinunö 27:11.

4, 5. Hadia mene-mene nibe’e Daromali Lowalangi khöda sanandrösa ba wanaha fönu?

⁴ Lö aoha ba wanaha fönu. Tola manö afökhö sibai dödöda mazui mofönu ita na so zango’aya ya’ita mazui na laböbögö khöda zi lö duhu börö zi to’ölö alua ba mbanuada, me fabö’ö gulida, mazui lagu wonukhada. Tola manö abölö afökhö dödöda na ira talifusöda zamalua da’ö khöda. Hadia mene-mene nisöndrada ba Daromali Lowalangi si tola möi fanoloda?

⁵ Aboto ba dödö Yehowa hadia zalua na lö itaha wönunia niha. Ba ginötö afatö dödöda mazui mofönu ita, ba gafuriata tola manö maniasa ita ba niwa’ö mazui ba nifaluada. Ba Zura Ni’amoni’ö, ifaha’ö ita Yehowa ba wanaha fönu ba imane, ”Böi alio-lio abao dödöu.” Angeraigö hawa’oya gabula dödö si tola ötimbagö ba ginötö ta’o’ö mene-mene andrö ba lö alio-lio mofönu ita! (Baso Zangombakha 7:9; Gamaedola 16:32.) Iwa’ö göi khöda Sura Ni’amoni’ö ba wangefa’ö zala niha bö’ö. Sindruhunia, itutunö Yesu wa na lö ta’efa’ö zala niha bö’ö, ba lö i’efa’ö zalada göi Yehowa. (Matai’o 6:14, 15) Hadia moguna öbologö dödömö ba abölö omasi ndra’ugö ba wangefa’ö zala niha bö’ö?

6. Hadia manö zi tola alua na lö tataha wönuda?

⁶ Na lö tataha wönuda, tola manö lö aetu mofönu ita ba ibörögö mangelifi dödöda khönia. Mazui tola manö tadönisi niha bö’ö ba mbanua niha Keriso ena’ö larasoi simane nirasoida. Hewa’ae taforege ba wamini’ö fönu mazui fökhö dödöda, arara manö tola la’ila niha bö’ö hadia nirasoida. Ba lö omasi fahuwu ndra talifusöda khöda. (Gamaedola 26:24-26) La’oguna’ö Zura Ni’amoni’ö ira satua sokubaloi ba wanolo ya’ita woheta fönu mazui fökhö dödöda hegöi ba wangefa’ö zala niha bö’ö. (III Moze 19:17, 18; Roma 3:11-18) Ba ginötö lafalua da’ö, hadia ta’o’ö wanuturu lala moroi ba Mbuku Yehowa?

7, 8. (a) Hewisa wondrönia’ö Yehowa nono mbanuania? (b) Hadia manö wanuturu lala nisöndrada ba Zura Ni’amoni’ö, ba hadia mbörö wa ta’o’ö da’ö?

⁷ Yehowa zondrönia’ö ba samaha’ö niha si fao ba organisasinia ba gulidanö iada’a. Hewisa wa tola? Ibayoini Keriso tobali ”högö mbanua”, ba ibayoini Keriso ”zawuyu andrö, si lö faröi, satua-tua” ba wamaha’ö hegöi ba wame’e fanuturu  lala ba nono mbanua Lowalangi. (Efeso 5:23; Matai’o 24:45-47) Hulö simane mboto solohe me götö si föföna, ira sawuyu andre sindruhu-ndruhu lafosumange Zura Ni’amoni’ö börö me Daromali Lowalangi da’ö. (Baso I Tesalonika 2:13.) Hadia manö wanuturu lala si so ba Zura Ni’amoni’ö?

⁸ Ifarou ita Sura Ni’amoni’ö we’amöi ba gangowuloa ero migu. (Heberai’o 10:24, 25) Da’ö zamarou ya’ita fefu ena’ö faduhu dödöda ba wamaha’ö Zura Ni’amoni’ö si fagölö. (I Korindro 1:10) Ifarou ita göi ena’ö lö aetu ba ”wangalui Banua Lowalangi”. (Matai’o 6:33) Ibe’e wanuturu lala khöda Sura Ni’amoni’ö ba wanuriaigö ba nomo misa, ba nahia sato niha, mazui hezoso manö so niha. (Matai’o 28:19, 20; Halöwö Zinenge 5:42; 17:17; 20:20) Ibe’e wanuturu lala khö ndra satua sokubaloi ba wororogö ena’ö lö ra’iö mbanua niha Keriso. (I Korindro 5:1-5, 13; I Timoteo 5:19-21) Ba ifarou göi ita ba wondrorogö ena’ö lö ra’iö mbotoda ba tatimbagö zasese lafalua niha hegöi fangera-ngera si lö omasi Yehowa.—II Korindro 7:1.

9. Haniha nituyu Yesu ba wanolo ya’ita ena’ö aboto ba dödöda Daromali Lowalangi?

⁹ So zorasoi wa lö moguna latutunö khöra Zura Ni’amoni’ö. Hiza’i, i’otarai 1919 i’oguna’ö Yesu ”zawuyu andrö, si lö faröi, satua-tua” ba wanolo nono mbanua Lowalangi ena’ö aboto ba dödöra hadia nifaha’ö Zura Ni’amoni’ö ba la’o’ö hadia niwa’önia. Na ta’o’ö niwa’ö Zura Ni’amoni’ö, no fao ita ba wororogö ena’ö te’osambua’ö mbanua niha Keriso, lö ra’iö ba afönu fa’atulö. Sofu khöu samösa, ’Hadia lö faröi ndra’o khö Yesu ba u’o’ö wanuturu lala nibe’e ndra sawuyu si lö faröi?’

10. Hewisa wo’amaedolagö mbuku Hezekieli organisasi Yehowa si so ba zorugo?

¹⁰ Ba Zura Ni’amoni’ö, ta’ila wa toföfö göi ndra samosumange Yehowa ba zorugo. Duma-dumania, so gangilata ni’ila Hezekieli, so Yehowa yawa ba gureta, alio sibai wofanönia tefaudu ba zomasi Yehowa. (Hezekieli 1:4-28) Kureta zorugo andrö mu’amaedolagö ia organisasi Lowalangi ba zorugo salio sibai wolo’ö fanuturu lala moroi khönia. Ba molua-lua da’ö ba organisasinia si so ba gulidanö. Angeraigö, oya zi tebulö nifazökhi organisasi Lowalangi ba zi fulu fakhe safuria andre. Törö tödöu wa Yehowa zame’e fanuturu lala ba zi tebulö andrö. Lö aratö, Keriso hegöi ira mala’ika, lahori dania fefu zi lö sökhi ba gulidanö andre. Lö hadöi sa’ae niha si lö mamosumange Yehowa hegöi töinia mazui sango’aya famatörönia!

11, 12. Hadia zi no ifalua organisasi Yehowa ba ngaluo safuria?

¹¹ Fatimbaisi nifalua organisasi Yehowa ba luo safuria andre. Famazökhi omo Yehowa. Ngaotu ndra talifusöda samorege wohalöwö ba wangehaogö gödo  sebua ndra Samaduhu’ö Yehowa si bohou ba Warwick, New York, Amerika Serikat. Ngahönö relawan ba zi sagörö ulidanö fao ira ba wangehaogö Balai Mbanua Lowalangi hegöi gödo ndraha. Ira relawan andre, la’o’ö wanuturu lala moroi ba Departemen Rancang/Bangun Sedunia. Ta’andrö sibai saohagölö börö me ato zamorege wohalöwö ba wangehaogö da’ö! Ira Samaduhu’ö Yehowa ba zi sagörö ulidanö, labe’e dolo-tolo ba wombönökhi zoguna ba halöwö famazökhi nahia andre. Ba ifahowu’ö nono mbanuania Yehowa, sangoroma’ö fangide-ngide’ö hegöi si lö faröi khönia.—Luka 21:1-4.

¹² Famaha’ö. Omasi Yehowa wamaha’ö ono mbanuania. (Yesaya 2:2, 3) Angeraigö ngawalö sekola ni’okhögöda. So Sekolah Dinas Perintis, Sekolah bagi Penginjil Kerajaan, Sekolah Gilead, Sekolah Dinas Betel, Sekolah bagi Pengawas Wilayah dan Istri, Sekolah bagi Penatua Sidang, Sekolah Pelayanan Kerajaan hegöi Sekolah untuk Panitia Cabang dan istri. Ba situs Web jw.org, tola ta’alui Zura Ni’amoni’ö hegöi lektur tanö bö’ö ba  ngawalö li. Ba situs Web da’ö, so göi faosatö nifa’anö ba ndraono, ba nösi nomo hegöi faosatö berita. Hadia ö’oguna’ö jw.org ba wanuriaigö hegöi ba wamaha’ö zi sambua omo?

13. Hadia zi lö tola lö’ö lafalua ono mbanua Yehowa?

¹³ No sambua töi sebua wefao ba organisasi Yehowa hegöi me ta’ila hadia ni’andrönia khöda! Tatu manö, me no ta’ila zi tola mangomusoi’ö dödö Lowalangi, lö tola lö’ö ta’o’ö ia ba tafalua zindruhu. Ba hewa’ae ato niha samalua si lö sökhi, moguna ’ta’ogorofi zi lö sökhi’ simane nifalua Yehowa. (Zinunö 97:10) Böi irai fao dödöda ba niha sanguma’ö ”sökhi si lö sökhi ba samotöi si lö sökhi si sökhi”. (Yesaya 5:20) Omasi ita wangomusoi’ö dödö Yehowa, andrö data’osambua’ö dödöda ena’ö lö ra’iö ita ba ngawalö hadia ia. (I Korindro 6:9-11) Hadia niwa’ö Yehowa khöda ba Zura Ni’amoni’ö, si sökhi khöda samösa da’ö. Ta’omasi’ö ia ba omasi ita lö faröi khönia. Da’ö mbörö wa ta’o’ö wanuturu lala moroi khönia he ba nomo, ba mbanua niha Keriso, ba nahia wohalöwö, ba zekola mazui hezoso manö so ita. (Gamaedola 15:3) Datatutunö hezoso manö tola taforoma’ö wa lö faröi ita khö Lowalangi.

14. Hewisa wa tola lö faröi zatua khö Yehowa?

¹⁴ Lala wamomaha iraonoda. Ba Zura Ni’amoni’ö, ibe’e wanuturu lala Yehowa khö zatua hewisa lala wamomaha iraonora. Moguna mangelama niha Keriso ena’ö lö tedönisi ira ba lala wangera-ngera si to’ölö ba gulidanö andre. (Efeso 2:2) Duma-dumania, ba mbanua-banua bö’ö so samösa ama zanguma’ö, ’Ba da’a, sökhi na ira alawe zamaha’ö iraono.’ Hiza’i, Sura Ni’amoni’ö zango’ou ama ba wamaha’ö iraonora sanandrösa khö Yehowa. (Efeso 6:4) Ira satua sangomasi’ö Yehowa, omasi ira na fahuwu ndraonora khönia, simane nirasoi Samu’eli me ide-ide ia.—I Zamueli 3:19.

15. Hewisa ena’ö lö faröi ita khö Yehowa ba ginötö tahalö gangetula sebua?

¹⁵ Lala wangai angetula. Fatua lö tahalö gangetula sebua ba wa’auri, moguna ta’ila hewisa wangera-ngera Yehowa ena’ö tola lö faröi ita khönia. Tola itolo ita Sura Ni’amoni’ö hegöi organisasinia. Duma-dumania, so ösa zatua iada’a sohalöwö ba mbanua bö’ö, lahalö gangetula ba wame’e nonora sawena tumbu khö dalifusöra ba mbanua. Na lafalua da’a, lö aetu mohalöwö ira ba lasöndra gefe. Atulösa, gangetula samösa-mösa niha da’ö, hiza’i tola lasofu khöra samösa ira satua, ’Hewisa molo’ö Yehowa gangetula nihalöma andre?’ (Baso Roma 14:12.) Sökhi na oföna ta’alui hadia niwa’ö Zura Ni’amoni’ö fatua lö tahalö gangetula sanandrösa ba nösi nomoda hegöi ba halöwöda. Moguna khöda wanolo moroi khö Namada, börö me tebai tatatugöi lalada samösa.—Yeremia 10:23.

16. Hadia gangetula nihalö zi samösa ina ba ginötö tumbu khönia nono matua? Hadia zanolo ya’ia ba wangai angetula satulö?

 ¹⁶ Me no findra zi sambua ngambatö ba mbanua bö’ö, tumbu khöra nono matua, ba la’era-era ba wame’e nonora andre khö ndra nenenia. Hiza’i, ba ginötö da’ö, ibörötaigö ifaha’ö ia fo’omonia ira alawe ba Zura Ni’amoni’ö khö zi samösa Samaduhu’ö Yehowa. Ifaha’ö ia wa no sambua noro dödönia ba wamomaha ononia matua andrö sanandrösa khö Yehowa. (Zinunö 127:3; Gamaedola 22:6) Simane ni’o’ou Zura Ni’amoni’ö, mangandrö ia khö Yehowa, ena’ö ifalua zindruhu. (Zinunö 62:9, 10) Itutunö göi gabula dödönia khö dalifusöda samaha’ö ya’ia ba Zura Ni’amoni’ö hegöi khö dalifusö ba mbanua niha Keriso. Hewa’ae lö aetu lafarou ia ira talifusönia ba mbanua hegöi ndra awönia, ena’ö ibe’e nononia andrö khö ninania, hiza’i ihalö gangetula si sökhi, lö ifalua da’ö. I’ila fo’omonia ira matua hewisa wanolo nibe’e ndra talifusöda khö wo’omonia hegöi khö nonora. Ahöli-höli dödönia ba ibörögö ifaha’ö ia ba Zura Ni’amoni’ö, ba fao ia ba nösi nomonia we’amöi ba gangowuloa. Khalaigö hewisa wa’omuso dödö nirasoi ndra alawe andre me i’ila wa itema li wangandrönia Yehowa!

17. Ba ginötö tafaha’ö zi samösa niha ba Zura Ni’amoni’ö, hadia wanuturu lala sinangea ta’o’ö?

¹⁷ Lala wolo’öda fanuturu lala. Na lö faröi ita khö Lowalangi, tatu ta’o’ö wanuturu lala nitemada moroi ba organisasinia. Duma-dumania, fatimbaisi hadia zinangea tafalua na no aefa tafaha’ö niha ba mbuku Hadia Nifaha’ö Zura Ni’amoni’ö Khöda? Ero na no awai wamaha’ö, moguna ta’oguna’ö ma’ifu ginötö ba wanolo niha nifaha’öda ena’ö abölö oya i’ila sanandrösa ba organisasi Yehowa. Tola ta’oguna’ö video Hadia Manö Nifalua ba Nahia Gorahua Mbanua Lowalangi? hegöi brosur Haniha Zamalua Somasi Yehowa ba Ginötö Andre? Na no awai wamaha’ö ba mbuku Nifaha’ö Khöda, tohugö ba wamaha’ö mbuku ”Tetaplah Berada dalam Kasih Allah” ba wanolo niha nifaha’öda ena’ö abölö ’te’abe’e’ö ba wamati’ hewa’ae no tebayagö ia idanö. (Kolose 2:7) Hadia ö’o’ö wanuturu lala moroi ba organisasi Yehowa?

18, 19. Hadia manö dani wa ta’andrö sibai saohagölö khö Yehowa?

¹⁸ Oya dani hana wa ta’andrö sibai saohagölö khö Yehowa! Duma-dumania manö, börö me ”ba khönia sa auri ita, ba khönia maliŵa-liŵa ita, ba khönia so ita”. (Halöwö Zinenge 17:27, 28) Ibe’e göi khöda Mbukunia, Sura Ni’amoni’ö. Simane niha Keriso ba Desalonika, ta’ame’egö tödö sibai mbuala andre börö me turia moroi khö Lowalangi da’a.—I Tesalonika 2:13.

¹⁹ Itolo ita Sura Ni’amoni’ö ena’ö ahatö ita khö Yehowa ba ahatö ia göi khöda. (Yakobo 4:8) Ta’andrö sibai saohagölö khö Namada börö me no ikaoni ita wefao ba organisasinia! Tarasoi simane nirasoi sanura zinunö me imane, ”Mi’andrö saohagölö khö Yehowa, me si sökhi tödö ia; me no si lö aetu wa’ebua dödönia andrö!” (Zinunö 136:1) Ero-ero ayati andrö, ifuli itutunö sanura zinunö ngawua wehede ”me no si lö aetu wa’ebua dödönia andrö”. Na lö faröi ita khö Yehowa ba ta’o’ö wanuturu lala nibe’enia khöda moroi ba organisasinia, ibe’e khöda wa’auri si lö aetu ba lö faröi ia khöda sagötö fa’ara!