1-3. Ko e heigoa ne liga tupu ki a Evotia mo Sunetuke? Ti maeke fēfē ke kalo kehe he tau lekua pihia? (Kikite fakatino he kamataaga.)

KUA fakalilifu lahi e tautolu e Tohi Tapu ha kua iloa e tautolu ko e Tohi ni he Atua. Ha ha he Tohi Tapu e fakatonuaga ka lagomatai a tautolu ke kalo kehe he tau lekua ti maeke ke fakahako a tautolu ka taute e tautolu e tau hehē. Tali atu fēfē mogoia a tautolu ke he fakatonuaga ia? Manamanatu ke he tau fifine fakauku tokoua he senetenari fakamua ko Evotia mo Sunetuke. Pehē e Tohi Tapu na taufetoko a laua, ka e nakai talahau e kakano. Manamanatu la tautolu ke he mena ne tupu.

² Liga uiina e Evotia falu matakainaga ke he kaina haana ke kai. Ka e nakai uiina e ia a Sunetuke. He logona e Sunetuke he mogo fakamui e falu ne tutala hagaao ke he kai fiafia ha lautolu, ne hogohogo manava lahi a ia. Liga manatu a ia: ‘Ofo lahi au he nakai uiina e Evotia au! Manatu au ko e tau kapitiga uho a maua.’ Logona hifo e Sunetuke kua nakai fiafia mooli a Evotia ki a ia ti fakaheu e Evotia a ia. Ti uiina e Sunetuke e tau tagata ia ni ke kai auloa ka e nakai uiina a Evotia! Ko e tuaga nei ne liga fakaita e  falu he fakapotopotoaga. Fakakite he Tohi Tapu na fakahako e Paulo e tau matakainaga fifine tokoua ti fakamafana a laua ke taute e mafola. Liga fanogonogo a laua ki a ia ti matutaki ke fekafekau fiafia ki a Iehova.​—Filipi 4:2, 3.

³ He tau fakapotopotoaga ha tautolu mogonei, falu magaaho ne liga fai lekua a tautolu mo e matakainaga. Kaeke ke muitua e tautolu e fakatonuaga he Tohi Tapu, maeke a tautolu ke fakamafola e tau lekua pihia. Ti maeke a tautolu ke kalo kehe foki he tau lekua ia. Ka omaoma a tautolu ke he mena ne talahau he Tohi Tapu, kua fakakite e tautolu kua aoga mooli ki a tautolu e Tohi ni ha Iehova.​—Salamo 27:11.

4, 5. Ko e heigoa e fakatonuaga he Kupu he Atua hagaao ke he tautaofi he tau logonaaga ha tautolu?

⁴ Nakai mukamuka tumau ke tautaofi e tau logonaaga ha tautolu. Liga momoko po ke ita lahi a tautolu ka talahau he taha tagata e mena kelea po ke nakai tonu e puhala ne fakafehagai mo tautolu, liga ko e ha tautolu a aga fakamotu, lanu he kili, po ke tau foliga. Liga fakamamahi lahi foki ki a tautolu kaeke ko e matakainaga ha tautolu kua vagahau fakakelea po ke ekefakakelea a tautolu. Ko e heigoa e fakatonuaga kua moua e tautolu he Kupu he Atua ka lagomatai a tautolu?

⁵ Iloa e Iehova e mena ka tupu ka nakai tautaofi he tau tagata e tau logonaaga ha lautolu. Ka hogohogo manava po ke ita a tautolu, liga talahau po ke taute e tautolu taha mena ne tokihala a tautolu he mogo fakamui. He Tohi Tapu, hataki e Iehova a tautolu ke tautaofi e ita ha tautolu ti pehē mai: “Aua neke fakatepetepe hāu a loto ke ita.” Manamanatu la ke he loga he tau lekua ka kalo kehe mai a tautolu i ai ka omaoma a tautolu ke he fakatonuaga mo e nakai mukamuka ke ita! (Totou Fakamatalaaga 7:9; Tau Fakatai 16:32.) Talahau foki he Tohi Tapu ki a tautolu ke fakamagalo e falu. Pehē a Iesu ka nakai fakamagalo e tautolu e falu, to nakai fakamagalo e Iehova a tautolu. (Mataio 6:14, 15) Kua lata nakai a koe ke fakamanava lahi mo e makai lahi ke fakamagalo e falu?

6. Ko e heigoa ka tupu ka nakai tautaofi e tautolu e tau logonaaga ha tautolu?

⁶ Ka nakai tautaofi e tautolu e tau logonaaga ha tautolu, liga logona tumau e tautolu e ita ti liga kamata foki ke logona e vihiatia ke he taha tagata. Po ke liga fakaohooho e tautolu e falu he fakapotopotoaga ke logona pihia. Pete ka lali a tautolu ke fufū e ita po ke vihiatia ha tautolu, to fakahiku ni ke mailoga he falu e logonaaga ha tautolu. Ti liga fakamamao e tau matakainaga ha tautolu mai ia tautolu. (Tau Fakatai 26:24-26) To fakaaoga he tau motua e Tohi Tapu he lali ke lagomatai a tautolu ke utakehe e ita mo e vihiatia ti fakamagalo e falu. (Levitika 19:17, 18; Roma 3:11-18) Ka taute pihia he tau motua, to muitua nakai e tautolu e takitakiaga he Tohi ni ha Iehova?

7, 8. (a) Takitaki fēfē e Iehova haana a tau tagata? (e) Ko e heigoa falu takitakiaga ne moua e tautolu he Tohi Tapu, ti ko e ha kua lata a tautolu ke omaoma ki ai?

⁷ Takitaki e Iehova a lautolu he fakatokatokaaga haana he lalolagi he vahā nei ti fakaako ki a lautolu. Fēfē? Ne kotofa e ia e Keriso ke eke mo “ulu he ekalesia,” ti kotofa he Keriso e “fekafekau fakamoli mo e loto matala” ke fakaako mo e takitaki e tau tagata he Atua. (Efeso 5:23; Mataio 24:45-47) Tuga e kau  fakatufono he senetenari fakamua, kua uho mooli ke he fekafekau nei e Tohi Tapu ha ko e kupu he Atua. (Totou 1 Tesalonia 2:13.) Ko e heigoa falu takitakiaga kua moua e tautolu he Tohi Tapu?

⁸ Kua poaki he Tohi Tapu ki a tautolu ke o atu tumau he tau feleveiaaga. (Heperu 10:24, 25) Kua fakamafana ki a tautolu oti ke talitonu ke he tau fakaakoaga taha ia he Tohi Tapu. (1 Korinito 1:10) Talahau foki ai ki a tautolu ke tumau e “kumikumi fakamua . . . ke he kautu.” (Mataio 6:33) Kua hataki he Tohi Tapu a tautolu ke fakamatala he taha fale ke he taha fale, he tau toloaga, mo e ha mena ni ne ha ha i ai e tau tagata. (Mataio 28:19, 20; Gahua 5:42; 17:17; 20:20) Kua poaki ke he tau motua ke fakameā tumau e tau fakapotopotoaga. (1 Korinito 5:1-5, 13; 1 Timoteo 5:19-21) Ti talahau ai ki a tautolu kua lata a tautolu ke tumau e fakameā e tau tino mo e kalo kehe he tau manatu mo e tau aga ne vihiatia e Iehova.​—2 Korinito 7:1.

9. Ko hai ne kotofa e Iesu ke lagomatai a tautolu ke maama e Kupu he Atua?

⁹ Falu ne liga logona hifo kua nakai lata ha tagata ke fakamaama e Tohi Tapu ki a lautolu. Ka e tali mai he 1919, ne fakaaoga e Iesu e “fekafekau fakamoli mo e loto matala” ke lagomatai e tau tagata he Atua ke maama e mena ne fakaako he Tohi Tapu ti muitua ke he mena ne talahau ai. He omaoma ke he Tohi Tapu, tumau a tautolu ke meā, mafola, mo e kaufakalataha e fakapotopotoaga. Hūhū hifo, ‘To fakamooli nakai au ki a Iesu mo e muitua e takitakiaga he fekafekau fakamoli?’

10. Fakamaama fēfē he tohi a Esekielu e fakatokatokaaga ha Iehova he lagi?

¹⁰ He puhala he Tohi Tapu, na fakaako e tautolu ko e tau fekafekau ha Iehova he lagi kua fakatokatoka foki. Ma e fakatai, ne kitia e Esekielu e fakakiteaga ha Iehova ne heke a Ia he kariota kua maeke ke holo mafiti ke he ha faahi ne fioia a Iehova ke fano ki ai. (Esekielu 1:4-28) Kua hukui he kariota e fakatokatokaaga he Atua he lagi ne kua mafiti ke muitua haana a takitakiaga. Fakahiku ai, kua fakaohooho e fakatokatokaaga haana he lalolagi. Manamanatu ke he loga e tau hikiaga ne kua taute he fakatokatokaaga he Atua ke he tau hogofulu tau kua mole. Manatu ko Iehova ne takitaki e tau hikiaga ia. To nakai leva ti moumou he Keriso mo e tau agelu e lalolagi kelea nei. To nakai liu ha tagata ke ekefakakelea a Iehova mo e haana higoa po ke tuhituhi e puhala ne pule a Ia!

11, 12. Ko e heigoa kua taute he fakatokatokaaga ha Iehova he tau aho fakamui nei?

¹¹ Manamanatu ke he tau mena kua maeke e fakatokatokaaga ha Iehova ke taute he tau aho fakamui nei. Talagaaga. Totou teau e tau matakainaga ne gahua malolō ke talaga e matapatu ofisa foou he Tau Fakamoli a Iehova i Warwick, New York i U.S.A. Totou afe e tau tagata gahua noa he lalolagi katoa hane talaga e tau Fale he Kautu mo e tau la ofisa. Ko lautolu ne gahua noa kua kotofa he Worldwide Design/Construction Department. Ko e fiafia ha ia ha tautolu ha  kua tokologa ne gahua malolō ke talaga e tau fale ia! Ti ko e tau fekafekau ha Iehova he tau matakavi oti ne foaki e tau mena kua maeke ia lautolu ke lagomatai ke totogi e tau fale nei ne kua talaga. Fakamonuina e Iehova e tau tagata haana ha ko e mahani fakatokolalo mo e fakamooli ne fakakite e lautolu.​—Luka 21:1-4.

¹² Fakaakoaga. Fiafia a Iehova ke fakaako e tau tagata haana. (Isaia 2:2, 3) Manamanatu ke he tau aoga kehekehe kua moua e tautolu. Ko e Aoga Fekafekau Paionia, Aoga ma e Tau Tagata Fakamatala, Aoga Kiliata, Aoga he Kamataaga he Peteli, Aoga ma e Tau Leveki Takaiaga mo e ha Lautolu a Tau Hoana, Aoga ma e Tau Motua he Fakapotopotoaga, Aoga Fekafekau he Kautu, mo e Aoga ma e Tau Tagata he La Komiti mo e ha Lautolu a Tau Hoana. He ha tautolu a faahi kupega hila he jw.org, ne moua e tautolu e Tohi Tapu mo e falu tohi ke he tau vagahau loga. Ha ha i ai he kupega hila foki e faahi pauaki ma e tau fanau mo e tau magafaoa ti pihia mo e tau vala tala foou. Kua fakaaoga nakai e koe e jw.org he haau a gahua he fonua mo e haau a tapuakiaga he magafaoa?

13. Ko e heigoa e matagahua kua ha ha he tau tagata ha Iehova?

¹³ Ko e lilifu mooli ke ha ha he fakatokatokaaga ha Iehova mo e iloa e tau mena ne manako a ia ki a tautolu! Mooli, ha kua iloa e tautolu ke fakafiafia e Atua, ha ha ia tautolu e matagahua ke omaoma ki a ia mo e ke taute e mena hako. Ti pete he tokologa e tagata ne fiafia ke taute e tau mena kelea, kua lata a tautolu ke tuga a Iehova ne “fakavihia . . . e tau mena kelea.” (Salamo 97:10) Nakai lata a tautolu ke tuga a lautolu ne manamanatu kua “mitaki e mena kelea, ka e kelea e mena mitaki.” (Isaia 5:20) Manako a tautolu ke fakafiafia a Iehova ti eketaha a tautolu ke meā he tau puhala oti. (1 Korinito 6:9-11) Ko e mena ne talahau e Iehova ki a tautolu he Tohi Tapu ne mitaki ni ma tautolu. Kua fakaalofa a tautolu ki a ia ti manako ke mahani fakamooli ki a ia. Kakano haia ne muitua e tautolu e takitakiaga haana i kaina, he fakapotopotoaga, he gahuaaga, he aoga, po ke mena fe ni ne ha ha i ai a tautolu. (Tau Fakatai 15:3) Manamanatu ke he falu faahi kua lata ia tautolu ke mahani fakamooli ke he Atua.

14. Maeke fēfē e tau matua ke mahani fakamooli ki a Iehova?

¹⁴ Puhala ke fakamahani e tau fanau ha tautolu. He Tohi Tapu, ne tuku age e Iehova ke he tau mamatua e takitakiaga he puhala ke fakamahani e tau fanau ha lautolu. Kua lata e tau Kerisiano ke mataala ke nakai fakaohooho he puhala manamanatu ne mahani mau he lalolagi nei. (Efeso 2:2) Ma e fakatai, he falu matakavi kua liga manamanatu e matua taane, ‘Ko e gahua he tau fifine a ia ke fakaako e tau fanau.’ Ka e poaki fakamaaliali he Tohi Tapu ko e tau matua taane ke fakaako e tau fanau ha lautolu hagaao ki a Iehova. (Efeso 6:4) Ko e tau matua taane mo e tau matua fifine ne fakaalofa ki a Iehova ne manako ke he tau fanau ha lautolu ke tata lahi e fakafetuiaga mo Ia, tuga a Samuela he magaaho ne tote a ia.​—1 Samuela 3:19.

15. Maeke fēfē a tautolu ke mahani fakamooli ki a Iehova ka taute e tau fifiliaga lalahi?

¹⁵ Puhala ke taute e tau fifiliaga. Fakamua to taute e tau fifiliaga lalahi he moui, kua manako a tautolu ke iloa e finagalo ha Iehova ke maeke ke mahani fakamooli ki a Ia. Maeke he Tohi Tapu mo e fakatokatokaaga haana ke lagomatai a tautolu. Ma e fakatai, falu matua he vahā nei ne toka e tau motu ha lautolu, ne fifili ke liuaki e tama mukemuke fanau foou ha lautolu ke he motu ne omai ai, ke nofo mo e tau magafaoa ha lautolu. He puhala nei, ko e matua taane mo e matua fifine kua maeke ke matutaki ke gahua mo e kumi tupe. Mooli, ko e fifiliaga fakatagata anei, ka kua lata e hoa ke hūhū hifo, ‘Ko e heigoa e finagalo ha Iehova ke he fifiliaga ha maua?’ (Totou Roma 14:12.) To pulotu ai fakamua ke manamanatu ke he mena ne talahau he Tohi Tapu ato taute e tau fifiliaga aoga lahi hagaao ke he magafaoa mo e gahua ha tautolu. Kua lata a tautolu ke moua e lagomatai he Matua ha kua  nakai maeke ia tautolu ke takitaki ni ha tautolu a tau puhala.​—Ieremia 10:23.

16. He fanau e tama, ko e heigoa e fifiliaga ne taute he taha matua fifine? Ko e heigoa ne lagomatai a ia ke taute e fifiliaga hako?

¹⁶ He hiki atu taha hoa ke he taha motu, ne fanau e tama mukemuke ha laua ti pulega ke liuaki a ia ke nofo mo e tau matua tupuna haana. Ka e mogoia, ne kamata e hoana ke fakaako e Tohi Tapu mo e taha he Tau Fakamoli a Iehova. Ne fakaako e ia ko e matagahua haana ke fakaako e tama hagaao ki a Iehova. (Salamo 127:3; Tau Fakatai 22:6) Liogi e fifine fuata ki a Iehova tuga ne talahau he Tohi Tapu ki a tautolu ke taute, ti olelalo ki a Ia ke lagomatai a ia ke taute e mena hako. (Salamo 62:7, 8) Ne tutala foki a ia ke he matakainaga fifine ne fakaako e Tohi Tapu mo ia mo e tutala ke he falu he fakapotopotoaga hagaao ke he lekua haana. Pete ni he tala age tumau e magafaoa mo e tau kapitiga haana kua lata a ia ke fakafano e tama ke he tau matua tupuna, ne fifili a ia ke nakai taute pihia. Mailoga he taane haana e lagomatai lahi he tau matakainaga ke he hoana haana mo e tama mukemuke ha laua. Nava lahi a ia ti kamata ke fakaako e Tohi Tapu mo e ō he tau feleveiaaga mo e magafaoa haana. Manamanatu ke he fiafia he matua fifine nei he mailoga e ia kua tali e Iehova e liogi haana!

17. Ka fakaako Tohi Tapu a tautolu mo e taha tagata, ko e heigoa e takitakiaga kua lata ke muitua e tautolu?

¹⁷ Puhala ke muitua e tautolu e takitakiaga. Ka fakamooli a tautolu ke he Atua, to muitua e tautolu e takitakiaga ne moua mai he fakatokatokaaga haana. Ma e fakatai, manamanatu ke he mena kua lata a tautolu ke taute he nakaila leva e kamata ke fakaako a tautolu mo e taha tagata ke he tohi Ko e Heigoa ne Fakaako Mooli he Tohi Tapu? Kua talahau ki a tautolu ke fakaaoga e tau minuti gahoa he mole e tau fakaakoaga takitaha ke lagomatai e tagata fakaako ke iloa fakalaulahi atu hagaao ke he fakatokatokaaga ha Iehova. Maeke a tautolu ke fakaaoga e vitiō Ko e Heigoa ne Tupu he Fale he Kautu? mo e porosua Ko Hai kua Taute e Finagalo ha Iehova he Vahā Nei? Ka oti e tohi Fakaako he Tohi Tapu, maeke a tautolu ke lagomatai e tagata fakaako ke “fakatumau ke he tua” he fakaako mo ia e tohi ‘Kia Fakatumau a Mutolu ke he Fakaalofa he Atua’ pete kua fai magaaho he papatiso a ia. (Kolose 2:7) Kua muitua nakai a koe ke he takitakiaga nei he fakatokatokaaga ha Iehova?

18, 19. Ko e heigoa falu kakano kua lata a tautolu ke fakaaue lahi ki a Iehova?

¹⁸ Loga e tau kakano kua lata ia tautolu ke fakaaue ki a Iehova! Taha e mena, “kua momoui a tautolu ia ia, mo e gahuahua ia ia, ha ha i ai foki a tautolu ia ia.” (Gahua 17:27, 28) Kua tuku mai foki e ia ki a tautolu haana ni a Tohi, ko e Tohi Tapu. Tuga e tau Kerisiano i Tesalonia, kua tokiofa e tautolu e mena fakaalofa nei ha ko e fekau mai ia Ia.​—1 Tesalonia 2:13.

¹⁹ Ne lagomatai he Tohi Tapu a tautolu ke fakatata ki a Iehova, ti kua fakatata mai a ia ki a tautolu. (Iakopo 4:8) Fiafia lahi a tautolu ha kua uiina he Atua a tautolu ke he fakatokatokaaga haana! Logona hifo a tautolu tuga e salamo ne tohi: “Kia fakaheke a mutolu kia Iehova, ha kua mitaki ni a ia; ha ko e mena tukulagi ni hana fakaalofa.” (Salamo 136:1) He tau kupu tohi oti he salamo ia, ne fatiaki ai e tau kupu “ha ko e mena tukulagi ni hana fakaalofa.” Ē, kaeke kua fakamooli a tautolu ki a Iehova mo e muitua e takitakiaga ne foaki mai e ia puhala he haana fakatokatokaaga, to foaki mai e ia ki a tautolu e moui tukulagi mo e to fakamooli tukulagi a ia ki a tautolu!