1-3. Tyafuile oityi tyaendele na Evodia na Sintike? Oñgeni tupondola okulityilika okukala novitateka novakuatate? (Tala olutalatu pefo pahimbikila onthele.)

ONTHUE tupanda unene Ombimbiliya mokonda tutyii okuti Omukanda wa Huku. Mombimbiliya muna onondonga mbutukuatesako okutetulula ovitateka, nokutuviyula tyina tulinga oviponyo. Oñgeni tukala tyina tuviyulwa? Soka kovakai vevali ovalembulwa vo potyita tyotete, Evodia na Sintike. Ombimbiliya ipopia okuti ankho vatuñgunine, mahi kaitupopila omokonda yatyi. Tusokei kuetyi hamwe tyaendelepo.

² Soka ñgeno Evodia wakonga ovakuatate vamwe no nomphange opo vakalie keumbo liae. Mahi ahakongo Sintike. Konyima, etyi Sintike eiva vakuavo vapopia ehambu vakala nalio puetyi vekahi nokulia keumbo lia Evodia, Sintike anumana unene. Asoko okuti: ‘Ame hitavela okuti Evodia kankhongele! Ame ankho ndyisoka okuti tumapanga otyotyili.’ Sintike asoko okuti Evodia kemuhande tupu kahande okukala nae. Pahe Sintike nae akongo ovanthu vamwe opo vakalie keumbo  liae ahakongo Evodia! Otyituwa otyo tupu tyipondola okunumanesa ovanthu ovakuavo vomewaneno. Ombimbiliya ipopia okuti Paulu waviyulile onomphange ombo eveavela ondundo opo vakale nombembwa. Tyafuile vatehelele Paulu mokonda vatuaileko okuumbila Jeova nehambu.​—Filipenses 4:2, 3.

³ Hono momawaneno etu, ovikando vimwe tupondola okukala novitateka novakuatate no nomphange. Mahi inkha tulandula onondonga Mbombimbiliya, tupondola okutetulula ovitateka ovio. Haunene, tupondola okulityilika ovitakeka ovio. Tyina tutavela etyi Ombimbiliya ipopia, tulekesa okuti tyili-tyili tupanda Omukanda wa Jeova.​—Salmo 27:11.

4, 5. Elondolo patyi Ondaka ya Huku ituavela konthele yokuyunga onyengo?

⁴ Katyapepukile okuyunga onyengo. Pamwe tunumana tyina omunthu umwe etupopia omapita ine etulinga onya mokonda yotyilongo tyetu, notyivala ine olupe luetu. Tyituihama vali unene tyina omunthu wetupopia omukuatate wetu ine omphange. Omalondolo patyi tuvasa Mondaka ya Huku apondola okutukuatesako?

⁵ Jeova wii nawa oityi tyipondola okumoneka tyina ovanthu vahayungu omalusoke avo. Tyina tuanumana tupondola okupopia ine okulinga otyipuka tyimwe konyima atulivele. Mombimbiliya, Jeova utupopila opo tuyunge onyengo yetu, utupopila okuti: “Uhakanyauke okunumana.” Soka kovitateka viñgapi tulityilika tyina tutavela elondolo olio iya atuhanumana liwa! (Tanga Eclesiastes 7:9; Provérbios 16:32.) Ombimbiliya tupu itupopila tuevela vakuetu. Tyotyili, Jesus wapopia okuti inkha katuevela vakuetu, tupu na Jeova kemetuevela. (Mateus 6:14, 15) Okuti ove wesukisa okupwa vali elundo nokukala nehando liokuevela vakuenyi?

6. Oityi tyipondola okumoneka inkha katuyungu onyengo yetu?

⁶ Inkha katuyungu nawa onyengo etu, matutualako tyanumana tupu matuhimbika okuyala vakuetu. Ine tupondola okuhongilinya vamwe mewaneno vayembe kuonthue. Inkha tuholeka onyengo, mapakala vala katutu vakuetu mavetyiimbuka. Konyima, ovakuatate vetu no nomphange mavakala kokule nonthue. (Provérbios 26:24-26) Ovakulu vewaneno mavaundapesa Ombimbiliya opo vetukuatesako okuhakala nonyengo nokuevela vakuetu. (Levítico 19:17, 18; Romanos 3:11-18) Tyina ovakulu vewaneno valinga ngotyo, okuti tulandula onondonga mbo Mukanda wa Jeova?

7, 8. (a) Oñgeni Jeova ahongolela ovanthu vae? (b) Onondonga patyi mbumwe tuvasa Mombimbiliya, iya omokonda yatyi tuna yokumbutehelela?

⁷ Jeova hono uhongolela vana vekahi meongano liae pano pohi nokuvelongesa. Ñgeni? Huku waholovona Kristu opo akale “omutwe wewaneno” iya Kristu waholovona “omupika wekolelo nokualunguka” opo alongese nokuhongolela ovanthu va Huku. (Efésios 5:23; Mateus 24:45-47) Ngetyi ankho tyilinga Ononkhalamutwe potyita tyotete, omupika wekolelo upanda Ombimbiliya  mokonda Ondaka ya Huku. (Tanga 1 Tessalonicenses 2:13.) Onondonga patyi Ombimbiliya ituavela?

⁸ Ombimbiliya itupopila okuti tuna okuenda apeho komaliongiyo. (Hebreus 10:24, 25) Omaliongiyo etuavela ondundo opo tutavele omalongeso Ombimbiliya. (1 Coríntios 1:10) Tupu ituavela ondundo opo tutualeko “okuovola tete Ouhamba.” (Mateus 6:33) Ombimbiliya itupopila tuivise umbo na umbo, no momatapalo no po nomphangu ambuho tuvasa ovanthu. (Mateus 28:19, 20; Atos 5:42; 17:17; 20:20) Tupu yavela ondundo ovakulu vomawaneno vatualeko okusukukisa ewaneno. (1 Coríntios 5:1-5, 13; 1 Timóteo 5:19-21) Tupu itupopila okuti tuesukisa okusukuka molutu nokulityilika omalusoke novituwa Jeova eyele.​—2 Coríntios 7:1.

9. Olie Jesus aholovona opo etukuateseko okunoñgonoka Ondaka ya Huku?

⁹ Vamwe vapondola okusoka okuti kavesukisile okukuatesuako opo vanoñgonoke Ombimbiliya. Mahi tunde mo 1919, Jesus ukahi nokuundapesa “omupika wekolelo nokualunguka” opo akuateseko ovanthu va Huku okunoñgonoka omalongeso Ombimbiliya nokulandula etyi Ombimbiliya ipopia. Tyina tutavela ko Mbimbiliya, ewaneno litualako okukala tyasukuka, nombembwa, newaneko. Lipula okuti: ‘Okuti ndyimukuatyili ku Jesus tupu ndyilandula ehongolelo liomupika wekolelo nokualunguka?’

10. Oñgeni omukanda wa Ezekiele upopia konthele yeongano lia Jeova keulu?

¹⁰ Ombimbiliya itulongesa okuti ovaumbili va Jeova keulu vaonganekwa nawa. Mongeleka, memonekelo limwe, Ezekiele wamona Jeova ukahi nokutaha etuku-tuku lihateka unene tupu lilipetela kononthele ambuho Jeova ahanda liende nako. (Ezequiel 1:4-28) Etuku-tuku olio lilekesa eongano lia Huku keulu, iya ovanthu aveho vekahi keulu valandula ehongolelo lia Huku. Ovaumbili va Jeova pano pohi valandula ongeleka oyo. Soka komapiluluko omanyingi ekahi nokulingwa meongano lia Huku momanima ekwi okualamba. Hinangela okuti Jeova oe ukahi nokuhongolela omapiluluko oo. Apa katutu, Kristu no noandyu mavahanyeko ouye uno wovivi. Petupu vali omunthu nawike makala tyihena onthilo na Jeova nenyina liae ine okuanya onkhalelo yae yokutumina!

11, 12. Oityi eongano lia Jeova likahi nokulinga mononthiki mbuno mbonthyulilo?

¹¹ Tala etyi eongano lia Jeova likahi nokulinga mo nonthiki mbuno mbonthyulilo. Okutunga. Ovakuatate ovanyingi no nomphange vaundapa unene opo vatunge Ombala omphe yo Nombangi mba Jeova ko Warwick ko Nova York, Estados Unidos. Ovakuatate ovanyingi mouye auho vekahi movilinga viokutunga Onondyuo mbo Maliongiyo no Mbovionge no nombetele. Ovakuatate ovo aveho valandula onondonga vapewa noseketa yokutunga  Departamento Mundial de Projeto/​Construção. Onthue tupandula unene ononkhono vekahi nokulinga mbo kutunga! Ovaumbili va Jeova mouye auho vaava onombongo opo vakuateseko ovilinga viokutunga. Jeova uyamba ovanthu vae mokonda ovakuatyili nokueliola omutima.​—Lucas 21:1-4.

¹² Elongeso. Jeova utyihole tyokulongesa ovanthu vae. (Isaías 2:2, 3) Soka ko nosikola ononyingi tuna. Kuna Osikola Yovakokoli-ndyila, Nosikola Yovaivisi Vouhamba wa Huku, Nosikola yo Gileade, Nosikola Yovape mo Mbetele, Nosikola Yovatalelipo vo mawaneno no Vakai Vavo, Nosikola Yovakulu Vewaneno, Nosikola Yovilinga Viouhamba, Nosikola yo Komisau Yofiliyale nova Vakai Vavo. Tupu mo site yetu, jw.org, muna Onombimbiliya nomikanda ovikuavo momalaka omanyingi. Tupu mo site omo, muna ononthele mbakolela pala ovana no nombunga nonthele ipopia ovipuka vikahi nokuenda novakuatate vetu mouye auho. Okuti ukahi nokuundapesa o site jw.org movilinga viokuivisa no mefendelo liombunga?

13. Otyilinga patyi ovaumbili va Jeova vena?

¹³ Elao limwe enene okulinga onthele yeongano lia Jeova nokunoñgonoka etyi ahanda kuonthue! Tyotyili, namphila tutyii okuti tukahi nokuhambukiswa Huku, nongotyo tuna otyilinga tyokumutavela nokulinga etyi tyaviuka. Tupu namphila ovanthu ovanyingi vahanda okulinga ovivi, mahi tuna “okuyala ovivi” nga Jeova. (Salmo 97:10) Onthue katupondola okusoka ngovanthu vapopia okuti, “otyiwa otyivi, iya otyivi otyiwa.” (Isaías 5:20) Onthue tuhanda okuhambukiswa Jeova, otyo tutokolela okutualako tyasukuka mononkhalelo ambuho. (1 Coríntios 6:9-11) Etyi Jeova etupopila Mombimbiliya opala ouwa wetu. Onthue tumuhole iya tuhanda okukala ovakuatyili kwe. Otyo tulandulila onondonga etuavela tyilinge tuli meumbo, ine mewaneno, ine okovilinga, ine okosikola no ponomphangu ononkhuavo. (Provérbios 15:3) Soka ko nonkhalelo ononkhuavo tuesukisa okukala ovakuatyili ku Huku.

14. Oñgeni ovohe vapondola okukala ovakuatyili ku Jeova?

¹⁴ Oñgeni matulongesa ovana vetu. Mombimbiliya, Jeova waavela ehongolelo ovohe lio ñgeni vapondola okulongesa ovana vavo. Ovakristau vesukisa okuliyunga opo vahahongilinyue nonkhalelo yokusoka youye uno. (Efésios 2:2) Mongeleka, kovilongo vimwe ovohe vamwe vapondola okusoka okuti: ‘Ovana vena okulongeswa novoina.’ Mahi Ombimbiliya yayandyulula nawa okuti ovana vena okulongeswa na he na ina konthele ya Jeova. (Efésios 6:⁠4) Ovohe no voina vehole Jeova, vahanda ovana vavo vakale noupanga omuwa na Jeova, ngetyi omukuendye Samuele ankho ena oupanga na Jeova.​—1 Samuel 3:19.

15. Oñgeni tupondola okukala ovakuatyili ku Jeova tyina tulinga omatokolo akolela?

¹⁵ Oñgeni matulingi omatokolo. Tyina tuhenelinge omatokolo akolela momuenyo wetu, tete tuesukisa okunoñgonoka oityi Jeova asoka, konyima atulingi etyi tyimuhambukiswa. Ombimbiliya neongano lia Jeova vitukuatesako okulinga ngotyo. Mongeleka, mononthiki mbuno ovalinepi vamwe vailukila kotyilongo otyikuavo opo vakale vali no nombongo, mahi tyina vamakala nomona vemutuma akakale novoina-kulu kotyilongo vatunda. Tyina valinga ngotyo, tyilinge he ine oina vasoka okuti mavetyivili okutualako okuundapa opo vakale vali onombongo. Tyotyili, kese valinepi ovo muene vena okutokola etyi mavalingi, mahi tyina vehenelinge etokolo otyiwa okulipula okuti: ‘Oityi Jeova masoko konthele yetokolo matulingi?’ (Tanga Romanos 14:12.) Otyiwa tete okusoka oityi Ombimbiliya ipopia tyina nkhele tuhenelinge omatokolo akolela konthele yombunga yetu novilinga vietu. Onthue tuesukisa okukuatesiwako na Tate yetu mokonda katutyivili okuhongolela onomphai mbetu.​—Jeremias 10:23.

16. Etokolo patyi ina umwe alinga etyi akala nomona? Oityi tyemukuatesako okulinga etokolo liaviuka?

 ¹⁶ Etyi ovalinepi vamwe vailukila kotyilongo otyikuavo, konyima avakala nomona wo mukuendye, avemutuala kovo inakulu kotyilongo vatunda opo vemutekule. Mahi mokueenda kuomuvo, omukai watyo ehimbika okulilongesa Ombimbiliya Nombangi ya Jeova. Elilongesa okuti otyilinga tyokulongesa omona konthele ya Jeova otyae. (Salmo 127:3; Provérbios 22:6) Omukai oo elikuambela ku Jeova, emuiti emukuateseko okulinga etokolo liaviuka, lielikuata Nombimbiliya. (Salmo 62:7, 8) Apopi otyitateka tyae komphange umulongesa Ombimbiliya no kovakuatate ovakuavo vomewaneno. Namphila ombunga yae nomapanga vemuavela ondundo opo atume omona wae kovo ina kulu, mahi aimbuka okuti okulinga ngotyo katyaviukile. Omulume wae ahuvu unene tyina atala ovakuatate no nomphange vakuatesako omukai wae nomona wae. Omulume wae ahimbika okulilongesa Ombimbiliya nokuenda komaliongiyo nombunga yae. Soka kehambu omukai oo akala nalio etyi anoñgonoka okuti Jeova wakumbulula elikuambelo liae!

17. Tyina tulongesa omunthu umwe Ombimbiliya ehongolelo patyi tuna okulandula?

¹⁷ Oñgeni tulandula ehongolelo. Inkha tuvakuatyili ku Huku, matulandula ehongolelo tuavelwa neongano liae. Mongeleka, tutalei oityi tuesukisa okulinga tyina tuamehimbika okulilongesa nomunthu momukanda Oityi Ombimbiliya Tyilityili Ilongesa? Tuavelwa ondundo opo tuhupisepo onominuto mbumwe opo tumukuateseko okunoñgonoka vali nawa eongano lia Jeova. Tupondola okuundapesa ovideo Oityi Tyilingwa Mondyuo Yomaliongiyo? nombruchula yokuati Ovalie Valinga Ehando lia Jeova Hono? Tyina wamamane okulongesa omukanda Ombimbiliya Ilongesa tupondola okukuatesako omulongwa wetu “okupama mekolelo” putyina tumulongesa momukanda wati: “Tualako Okukala Mohole ya Huku” namphila ambatisaluale. (Colossenses 2:7) Okuti ukahi nokulandula ehongolelo lieongano lia Jeova?

18, 19. Omahunga patyi tuna opo tupandule Jeova?

¹⁸ Tuna omahunga omanyingi okupandula Jeova! Limwe puo, omokonda “tuna omuenyo, tuenda-enda nokukahiko mokonda yae.” (Atos 17:27, 28) Tupu, wetuavela Omukanda wae, Ombimbiliya. Ngo Vakristau voko Tesalonika, nonthue tupanda otyiawa otyo, mokonda tyatunda ku Huku.​—1 Tessalonicenses 2:13.

¹⁹ Ombimbiliya itukuatesako okufuenaina ku Jeova, tupu nae afuene kuonthue. (Tiago 4:8) Tupandula unene mokonda Tate yetu, utukonga opo tukale meongano liae! Tulitehelela ngo omuhoneki wo no salmu, wati: “Tupandulei Jeova mokonda omunthu omuwa; ohole yae yotyotyili itualako.” (Salmo 136:1) Mono versikulu ononyingi mbo salmu, omuhoneki wono salmu wawana-wana onondaka mbokuati: “Ohole yae itualako.” Tyotyili, inkha tuvakuatyili ku Jeova iya tukahi nokulandula ehongolelo etuavela neongano liae, meketuavela omuenyo uhapu tupu akala omukuatyili nonthue apeho, apeho!