1-3. ¿Iman pasanman karan Evodiawan Sintiquepiwan? ¿Iman yanapawasun chhayna problemakuna mana pasawananchispaq? (Kay paginapi dibujota qhaway.)

BIBLIAQA Diospa qowasqanchis qelqapunin, chaymi chayta ancha allinpaq qhawarinanchis. Biblian yachachin imaynapis imamantapas cuidakusunman chayta, chaymantapas ima ruwaypipas pantaruqtinchisqa Biblian niwanchis imatachus ruwananchista. ¿Kasukushanchischu Bibliaq nisqanta? Chaypaq apostolkunaq tiemponpi iskay hermanakunamanta yachasunchis. Paykunan karanku Evodia Sintiquepiwan. Paykunaqa phiñachinakusqakun, ichaqa manan Biblia willanchu imamantas phiñachinakuranku chayta.

² Yaqapaschá Evodia wakin hermanokunata wasinman mijuqta invitanman karan, Sintiquetan ichaqa mana invitanmanchu karan. Chaywanpaschá Sintiqueqa phiñakunman karan, jinaspa piensanman karan: “¿Imanaqtintaq Evodiari mana invitawanchu? Amiganmá riki kashani”, nispa.  Sintiqueqa piensaranchá Evodia payta mana munakunanpaq. Chaymantaqa yaqapaschá paypas Evodiaq invitasqan hermanokunata invitallanmantaq karan, Evodiatan ichaqa mana invitanmanchu karan. Chayta rikuspaqa yaqapaschá juj hermanokunapas phiñakunkuman karan. Apóstol Pabloqa uyariranmi chay iskay hermanakunawan imachus pasasqanmanta, chaymi iskayninta kallpacharan allipunakapunankupaq. Paykunaqa kasukurankuchá Pabloq nisqanta, kusisqachá Jehová Diostapas serviranku chaymantaqa (Filip. 4:2, 3).

³ Kay tiempopipas iñiq t’aqanchispiqa kanmanmi chhayna phiñachinakuykuna. Bibliaq nisqanta kasukuspan ichaqa ima problematapas allichallasun. Chaymantapas Bibliaqa yanapawasunmanmi ama ima problemamanpas jaykunanchispaq. Bibliaq nisqanta kasukuspan rikuchisunchis maytukuytachus Diospa palabranta munakunchis chayta (Sal. 27:11).

4, 5. ¿Ima ninmi Biblia usqhaylla phiñakuymanta?

⁴ Yaqapaschá pipas jayk’aqllapas mana allinta ruwarasunki otaq millayta rimapayarasunki may llaqtayoq kasqaykimanta, ima colorniyoq kasqaykimanta otaq imayna uyayoq kasqaykimanta. Chay pasawaqtinchisqa llakikusunmanmi ¿riki?, otaq phiñakusunmanpas. Juj iñiqmasinchis chhaynata ruwawasunman chayri, astawanraqmi llakikusunman ¿riki? Chhaynapi tarikuqtinchisqa Bibliaq imachus yachachisqanmi yanapawasun.

⁵ Imamantapas sintisqa kaspaqa jawan ukhuntan imatapas rimarusunman, chaymantataq chay rimasqanchismanta ñakapakushasunman. Chayta yachaspan Jehová Diosqa kamachiwanchis: ‘Ama sonqoykichispi usqhaylla phiñakuychischu’, nispa. Chayta kasukusunchis chayqa, askha nanaykunamantan librakusunchis (leey Eclesiastés 7:9; Proverbios 16:32). Bibliaqa kamachiwallanchistaqmi jujkunata perdonananchispaqpas. Jesuspas niranmi: ‘Manachus jujkunata perdonankichis chayqa, Diospas manan perdonasunkichischu’, nispa (Mat. 6:14, 15). ¿Kallpachakushanchischu pacienciakuq kanapaq, perdonakuq kanapaqpas?

6. ¿Iman pasanman phiñakuyninchista mana controlaqtinchis?

⁶ Phiñakuyninchista mana controlasunchu chayqa, tukuy tiempon sintisqalla kasunman, jinaspa phiñachiwaqninchis hermanota cheqnikuyta qallarisunman, jujkunatapas tanqaykusunmanmi payta cheqnikunankupaq. Qallariypi manaña reparachikusunmanchu sintisqa kasqanchista chaypas, tiempowanqa alayrin chayqa kanqa. Chay jawan jujkunapas noqanchismanta karunchakunkuman (Prov. 26:24-26). Sichus chhaynapi tarikuqtinchis umalliqkuna Bibliawan kallpachawasunman sintipakuyta wijch’uspa perdonakuq kananchispaq chayri, ¿kasukusunchu chay niwasqanchista? (Lev. 19:17, 18; Rom. 3:11-18.)

7, 8. a) ¿Imaynatan Jehová Dios llaqtanta pusashan? b) ¿Imakunatan Biblia kamachiwanchis? ¿Imanaqtinmi kasukunanchis?

⁷ Jehová Diosmi kay pachapi llaqtanta  pusarishan yachachishan ima. Chaytan payqa ruwan Cristota “iñiq t’aqaq uman” kananpaq churaspa, Cristotaq Diospa llaqtanta yachachin ‘allin yuyayniyoq junt’aq kamachiwan’ (Efes. 5:23; Mat. 24:45-47). Chay kamachiqa ñaupa tiempopi umalliq t’aqa jinan Diospa siminta jinapuni Bibliata qhawarin (leey 1 Tesalonicenses 2:13). ¿Imakunatan Biblia kamachiwanchis?

⁸ Kamachiwanchismi mana faltayta juñunakunanchispaq, kaq yachachikuykunapi iñinanchispaq, Diospa gobiernontapas ñaupaqta maskhananchispaq (Mat. 6:33; 1 Cor. 1:10; Heb. 10:24, 25). Kamachiwallanchistaqmi wasin-wasinta rispa, callekunaman lloqsispa, maypiña kashaspapas predicananchispaq (Mat. 28:19, 20; Hech. 5:42; 17:17; 20:20). Chaymantapas umalliqkunatan kamachin iñiq t’aqata mana juchayoqta jap’inankupaq (1 Cor. 5:1-5, 13; 1 Tim. 5:19-21). Llapanchistataq kamachiwanchis cuerponchispi, yuyayninchispi, ima ruwayninchispipas Diospaq jina limpio kananchispaq (2 Cor. 7:1).

9. ¿Piwanmi Jesús yachachishan Diospa siminta?

⁹ Wakin runakunan ninku: “Noqaqa yachaniñan llapanta, manan pipas Bibliamanta yachachiwanmanchu”, nispa. Jesusmi ichaqa 1919 watamantapacha ‘allin yuyayniyoq junt’aq kamachiwan’ Diospa llaqtanta yanapashan Bibliata entiendenankupaq, chayman jina kausanankupaqwan. Sichus Bibliaq nisqanta kasukusunchis chayqa, iñiq t’aqapin kanqa ch’uya kausay, sumaq kausay, juj sonqolla kausay ima. Chayrayku, ¿kasukushanchischu allin yuyayniyoq junt’aq kamachita, chhaynapi Jesuspaq junt’aq kanapaq?

10. ¿Imatan Ezequielpa rikusqan yachachiwanchis janaq pachapi Diosta serviqkunamanta?

¹⁰ Bibliaq nisqanman jinaqa, janaq pachapi Diosta serviqkunaqa allin organizasqan kashanku. Juj kutinmi profeta Ezequiel juj rijuriypi rikusqa Jehová Diosta juj carropi tiyashaqta, chay carroqa usqhayllas Diospa may munasqanmanpas puriq kasqa (Ezeq. 1:4-28). Chay carroqa representan janaq pachapi Diospa lliu serviqninkunatan, paykunaqa usqhayllan kasukunku Diospa ima nisqantapas. Chayraykun kay pachapi Diosta serviqkunapas paypa munayninman jina imaymana cambiokunata ruwashanku. Kay chunka watallapin imaymana cambiokuna karan Diospa llaqtanpi. Chaykunataqa Jehová Diosmi ruwachishan. Chaymantapas pisi tiempollamantan Cristowan angelkunawanqa kay pachapi lliu mana allin kaqta chinkachipunqaku, chhaynapin manaña pipas Dios contra imatapas ninqañachu.

11, 12. ¿Imakunatan Jehová Diospa llaqtan ruwashan kay tiempopi?

¹¹ ¿Imakunatan Jehová Diospa llaqtan ruwashan kay tukukuy p’unchaykunapi? Diosta servinapaq wasikunatan ruwashan. Pachajninpi iñiqmasinchiskunan llank’aranku Estados Unidos nacionpi mosoq Betel wasita ruwanankupaq. Pachantinpipas waranqa-waranqa iñiqmasinchiskunan juñunakuy wasikuna ruwaypi, sucursalkuna ruwaypi ima yanapakushanku. Paykunataqa “Departamento  Mundial de Diseño y Construcción” nisqan organizan. Anchatan agradecekunanchis chay wasikuna ruwaypi llapa llank’aqkunata. Chaymi llapanchis chay wasikuna ruwakushanallanpaq atisqanchisman jina donacionkunata churananchis. Pisillataña qosunman chaypas, Jehová Diosqa anchatan bendeciwasunchis tukuy sonqowan qoqtinchisqa (Luc. 21:1-4).

¹² Chaymantapas Diospa llaqtanqa Diosmantan yachachishan. Jehová Diosmanqa gustanmi serviqninkunata yachachiy (Is. 2:2, 3). Chaymi askha escuelakuna kan paykunata yachachinapaq. Kanmi precursorkunapaq escuela, Diospa gobiernonmanta willaqkunapaq escuela, “Galaad” nisqa escuela, Betelman jaykuqkunapaq escuela, watukuq umalliqkunapaq esposankupaqwan escuela, iñiq t’aqapi umalliqkunapaq escuela, nombrasqa qharikunapaq escuela, sucursalmanta encargakuqkunapaq esposankupaqwan escuela ima. Chaymantapas jw.org nisqapin tarikun pachaj-pachaj simikunapi qelqanchiskuna, Biblia ima. Chaypiqa kashallantaqmi wawakunapaq familiakunapaq partekuna, wakin noticiakunata churana partepas. Chayrayku, ¿predicacionpi, familiantin  Diosta adorananchis horapipas utilizashanchischu jw.org nisqata?

13. Yachanchistaq Diospa munayninta chayqa, ¿imatan ruwananchis?

¹³ ¡Ima munaymi Jehová Diospa llaqtanpi kayqa, paypa munayninmanta yachaypas! Yachanchistaq paypa munayninta chayqa, tukuy imapin payta kasukunanchis allin kaqta ruwaspa. Wakin runakunamanqa gustanmi mana allinkuna ruway, chaymi mana allin kaqta “allinmi” ninku, allin kaqtataq “manan allinchu” ninku, noqanchismi ichaqa cheqnikunanchis mana allin kaqta (Is. 5:20; Sal. 97:10). Limpion kananchis, chhaynapi Jehová Diosta kusichinanchispaq (1 Cor. 6:9-11). Jehová Diospa ima yachachiwasqanchispas allinninchispaqmi, chaymi paytaqa tukuy sonqo munakunanchis, kasukunanchis ima. Wasipi kashaspa, juñunakuypi kashaspa, llank’anapi kashaspa, escuelapi kashaspa, maypiña kashaspapas paypaq jinan kausananchis (Prov. 15:3). Chaymi qatiqninpi yuyarisunchis Diospaq wakin ruwananchiskunata.

14. ¿Imaynatan tayta-mamakuna rikuchinkuman Jehová Diosta munakusqankuta?

¹⁴ ¿Imaynatan wawakunata yachachina? Bibliapin Jehová Diosqa allinta kamachin imaynatachus wawakunata yachachina chayta. Chaytan noqanchisqa kasukunanchis, manataq runakunaq piensasqanman jinachu piensananchis (Efes. 2:2). Wakin llaqtakunapi qharikunaqa ninkun: “Wawakunataqa warmikunan yachachinanku, chayqa manan qharikunapaqchu”, nispa. Biblian ichaqa qharikunata kamachin wawankuman Jehová Diosmanta yachachinankupaq (Efes. 6:4). Jehová Diosta munakuq tayta-mamakunaqa tukuy atisqankutan ruwananku wawanku Diosta munakunanpaq, imaynan Samuelpas wawallaraq kashaspa Diosta munakuran jinata (1 Sam. 3:19).

15. ¿Imaynatan Diospaq junt’aq kasunman importante decisionkunata ruwananchis kaqtin?

¹⁵ ¿Imatan ruwana imatapas decidinapaq? Ima ruwananchispaqpas Diospa yanapaynintan maskhananchis, chhaynapi paypaq junt’aq kananchispaq. Chaypaqmi Biblia, Diospa llaqtan ima yanapawasun. Piensasunchis waj lado nacionman ripuq warmi-qharikunamanta. Wakinqa chay nacionpi kashaspankun wawayoq kapunku, jinaspa llank’anankuta mana saqenankurayku chay wawankuta llaqtankupi tiyaq familiankunaman apachipunku. Paykunaña chayta decidinanku chaypas, tayta-mamakunaqa tapukunankun: “¿Ima ninmi Jehová Dios chaymanta?”, nispa (leey Romanos 14:12). Chhaynatapunin lliupas tapukunanchis familianchiswan otaq llank’ananchiswan ima ruwaytapas decidinanchispaqqa.  Manan noqallanchisqa atisunmanchu allin kaqta decidiytaqa (Jer. 10:23).

16. ¿Iman pasaran juj sipaswan? ¿Iman yanaparan allin kaqta decidinanpaq?

¹⁶ Yachasunchis waj lado nacionman qosanwan ripuq sipasmanta. Chay nacionpi kashaspan payqa wawayoq kapuran, chaymi qosanpiwan piensasharanku chay wawankuta tayta-mamankuman apachiyta. Jinan chay sipasqa Jehová Diospa testigonkunawan Biblia estudiayta qallariran. Chaypin payqa yacharan paypuni wawanmanqa Diosmanta yachachinan kasqanta (Sal. 127:3; Prov. 22:6). Chaymi payqa Jehová Diosmanta mañakuran, chhaynapi allin kaqta ruwananpaq (Sal. 62:7, 8). Chaymantataq estudiachiqnin hermanaman juj hermanokunamanwan willaran imatachus piensashasqanta. Paytaqa wakin familiankuna amigonkuna iman mat’ipayasharanku wawanta tayta-mamanman apachipunanpaq. Paymi ichaqa reparakuran chay ruway mana allinchu kasqanta. Jinan qosanpas hermanokunaq sumaq yanapasqanta rikuspa decidikuran Biblia estudiayta. Chhaynapin llapanku juñunakuyman riyta qallariranku. Chay sipasqa anchatan kusikuran Jehová Dios chhaynata yanapasqanmanta.

17. ¿Imaynatan estudiokunata qonanchis?

¹⁷ ¿Kasukushanchischu Diospa llaqtanpi kamachikuykunata? Diospaq junt’aq kananchispaqqa kasukunanchismi chay kamachikuykunata. Ejemplopaq, Imatapunin nisqa librowan yachachishanchis chayqa, t’aqananchismi wakin minutokunata estudianteman Jehová Diospa llaqtanmanta yachachinanchispaq. Chaypaqmi utilizasunman ¿Imaynatan huñunakuyniyku aparikun? nisqa videota, ¿Pikunan Jehová Diospa munayninta ruwashanku? nisqa folletotawan. Imatapunin nisqa librota estudiachiyta tukuspari, ¿imatan ruwananchis? ‘Diospa munakuynin’ nisqa librowanñataqmi estudiachinanchis, chhaynapi iñiyninpi allinta kallpachakunanpaq. Chaytan ruwananchis estudiantenchis bautizasqaña kashanman chaypas (Col. 2:7). ¿Kasukushanchischu chay kamachikuykunata?

18, 19. ¿Imanaqtinmi Jehová Diosta anchata agradecekunanchis?

¹⁸ Jehová Diosqa imaymana bendicionkunatan qowaranchis, chaymi paytaqa agradecekunanchis. Pay kaqtinmi “kausanchis, purinchis, kaypipas kashanchis” (Hech. 17:27, 28). Chaymantapas payqa Bibliatan qowaranchis, chaymi Tesalónica llaqtapi cristianokuna jina ancha allinpaq chay librota qhawarinanchis (1 Tes. 2:13).

¹⁹ Chaymantapas Biblian yanapawaranchis Jehová Diosman achhuykunanchispaq, chhaynapin paypas noqanchisman achhuykamuwaranchis (Sant. 4:8). Paymi llaqtanman pusamuwaranchis, chaymi 136 salmo takita qelqaq jina ninanchis: “Señor Diosta agradecekuychis, payqa allinmi, khuyapayakuyninqa [cheqaq munakuyninqa] wiñaypaqmi”, nispa (Sal. 136:1). Chay salmopiqa sapa versículo tukuypin nin: “Cheqaq munakuyninqa wiñaypaqmi”, nispa. Chhaynaqa, sichus cheqaqtapuni Jehová Diosta munakusun, paypa llaqtanpi kamachikuykunatapas kasukusunchis chayqa, wiñay kausaytan payqa qowasun, wiñaypaqtaqmi munakuwasunpas.