1-3. Penei eaa tei tupu i rotopu ia Euodia e Sunetuke? Akapeea tatou me kopae atu i teia au manamanata? (Akara i te tutu mua.)

TE AKAPEREPERE maata nei tatou i te Pipiria no te mea e Puka te reira na te Atua. Te oronga maira te Pipiria i te ako te ka tauturu ia tatou kia kopae i te manamanata, e ka akatikatika ia tatou me rave i te tarevake. No reira akapeea tatou me ariu atu ki tana akoanga? Akamanako ana i tetai nga vaine akatainuia i te anere mataiti mua, ko Euodia e Sunetuke. Te karanga ra te Pipiria e kua karo raua, inara kare i akakite mai i te tumu. Ka akamanako ua ana tatou eaa tei tupu.

² Penei kua pati a Euodia i tetai au taeake e te au tuaine ki tona kainga no te kai manga. Inara kare aia i pati ana ia Sunetuke. I muri mai, te rongo anga a Sunetuke i tetai pae te tuatua anga e e mataora tikai te kai manga, kua manata tikai aia. Penei kua manako aia: ‘Kare roa au i kite eaa a Euodia ka kore ei e pati mai iaku! Manako au e oa piri tikai maua.’ Kua manako a Sunetuke e kare a Euodia e reka ana iaia e kua kopae  iaia. No reira kua pati a Sunetuke i taua aronga rai no te kai manga kare ra aia i pati ana ia Euodia! Penei kua riro teia turanga ei mamae anga ki tetai pae i roto i te putuputuanga. Te akaari maira te Pipiria e kua akatikatika a Paulo i te nga tuaine e kua akamaroiroi ia raua kia akatupu i te au. Penei kua akarongo raua kiaia e kua tavini ua atu ia Iehova ma te mataora.​—Philipi 4:2, 3.

³ I roto i ta tatou putuputuanga i teia tuatau, tetai taime ka tupu te manamanata i rotopu ia tatou e tetai taeake me kore tuaine. Inara, me aru tatou i te ako a te Pipiria, ka akatikatika tatou i te manamanata. Te tika, ka rauka ia tatou i te kopae atu i te reira. Me akono tatou i ta te Pipiria e karanga ra, te akaari ra e te akaperepere ra tatou i ta Iehova Puka.​—Salamo 27:11.

4, 5. Eaa te akoanga ta te Tuatua a te Atua e oronga maira no te akatere i to tatou manako ngakau?

⁴ Kare i te mea māmā ua kia akatere i to tatou uaorai manako ngakau. Penei ka maromaroa tikai tatou me kore ka riri me tuatua akakino e me akono tau kore tetai ia tatou, penei no ta tatou peu, te kara o te pakiri, me kore to tatou tutu mata. E penei ka mamae roa atu tatou me na tetai taeake me kore tuaine i tuatua akakino e te akono tau kore mai ia tatou. Eaa te akoanga i roto i te Tuatua a te Atua te ka tauturu ia tatou?

⁵ Kua kite a Iehova eaa te ka tupu me kare te tangata e akatere i to ratou au manako ngakau. Me manata e me riri tatou, penei ka tuatua me kore ka rave tatou i tetai mea ka tataraapa tatou i muri mai. I roto i te Pipiria, te ikuiku maira Iehova ia tatou kia akatere i to tatou riri e te akakite ra e: “Auraka kia rapurapu ua to ngakau i te riri.” Ka akamanako ana mei teaa te maata o te au manamanata ka kopae tatou me akono i teia ako, auraka e riri vave! (E tatau ia Koheleta 7:9; Maseli 16:32.) Te akakite katoa ra te Pipiria kia akakore tatou i te ara a tetai ke. Te tika, karanga a Iesu me kare tatou e akakore i ta tetai ara, kare katoa a Iehova e akakore i ta tatou ara. (Mataio 6:14, 15) Ka anoanoia ainei koe kia akakoromaki marie e kia puareinga ua i te akakore i te ara a tetai ke?

6. Eaa te ka tupu me kare tatou e akatere i to tatou manako ngakau?

⁶ Me kare tatou e akatere i to tatou uaorai manako ngakau, penei ka riri ua rai tatou e ka akamata i te makitakita i tetai. Me kore penei ka akakeu tatou i tetai pae i roto i te putuputuanga kia manako akapera. Noatu e ka tauta tatou i te uuna i to tatou riri me kore makitakita, kare e roa ka kite mai te katoatoa i te reira i muri mai. E oti ka akamamao atu te au taeake e te au tuaine mei ia tatou. (Maseli 26:24-26) Ka taangaanga te aronga pakari i te Pipiria kia tauta i te tauturu ia tatou kia kopae i te riri e te makitakita no te akakore i te ara a tetai ke. (Levitiku 19:17, 18; Roma 3:11-18) Me akapera ratou, ka aru ainei tatou i te aratakianga o ta Iehova Puka?

7, 8. (a) Akapeea a Iehova te aratakianga i tona iti tangata? (e) Eaa tetai aratakianga ta tatou ka kite mai i roto i te Pipiria, e no teaa ra tatou ka akono ei i te reira?

⁷ I teia tuatau, te arataki nei a Iehova i te aronga i roto i tana akaaerenga i te enua nei e te apii ra ia ratou. Akapeea ra? Kua akataoonga aia ia Iesu ei “upoko ïa i te ekalesia,”  e kua akanoo a Iesu i “te tavini akono meitaki e te pakari” ei apii e te arataki i te iti tangata o te Atua. (Ephesia 5:23; Mataio 24:45-47) Mei te pupu akaaere o te anere mataiti mua, te akaperepere maata ra teia tavini i te Pipiria no te mea ko te Tuatua ïa a te Atua. (E tatau ia 1 Tesalonia 2:13.) Eaa tetai aratakianga ta tatou ka kite mai i roto i te Pipiria?

⁸ Te arataki ra te Pipiria ia tatou kia aere putuputu ki te au uipaanga. (Ebera 10:24, 25) E akamaroiroi ra ia tatou katoatoa kia aiteite te irinaki i te au apiianga Pipiria. (1 Korinetia 1:10) Te akakite katoa ra te reira “e na mua ra kotou i te kimi i te basileia o te Atua.” (Mataio 6:33) Te ikuiku ra te Pipiria ia tatou kia tutu aere mei tera are ki tera are, i te ngai tangata, e te ngai e tangata tetai. (Mataio 28:19, 20; Angaanga 5:42; 17:17; 20:20) Te arataki ra te reira i te aronga pakari kia akono i te putuputuanga kia vai mā ua. (1 Korinetia 5:1-5, 13; 1 Timoteo 5:19-21) Te akakite katoa ra te reira kia mā to tatou kopapa e kia kopae i te au manako kino e te au peu ta Iehova e rikarika ra.​—2 Korinetia 7:1.

9. Koai ta Iesu i akanoo ei tauturu ia tatou kia mārama i te Tuatua a te Atua?

⁹ Penei ka manako tetai pae e kare e anoanoia tetai tangata kia akamārama i te Pipiria kia ratou. Inara mei te 1919, kua taangaanga a Iesu i “te tavini akono meitaki e te pakari” ei tauturu i te iti tangata o te Atua kia mārama i ta te Pipiria e apii maira e kia aru i te reira. Me akarongo ki te Pipiria, ka vai mā ua te putuputuanga, ma te au e te taokotai. E ui kia koe uaorai, ‘Ka tiratiratu ainei au kia Iesu e ka aru i te aratakianga a te tavini akono meitaki?’

10. Akapeea te puka a Ezekiela te akataka anga i ta Iehova akaaerenga i te rangi?

¹⁰ Na roto i te Pipiria, ka apii tatou e kua akaaere katoaia to Iehova au tavini i te rangi. Ei akaraanga, kua kite a Ezekiela i tetai orama no Iehova e akaoro ra i te kariota tei neke viviki i tetai ua atu ngai ta Iehova i inangaro kia aere. (Ezekiela 1:4-28) Te akatutu ra te kariota i ta te Atua akaaerenga i te rangi, tei viviki i te aru i tana aratakianga. Aru mai, ka akakeu te reira i tana akaaerenga i te enua nei. E akamanako ana i te au taui anga e manganui tei raveia i roto i te akaaerenga a te Atua i te tai ngauru mataiti i topa akenei. E akamaara na Iehova e arataki ana i teia au taui anga. Kare e roa atu ana, na Karaiti e te au angera e takore i teia ao kino. Kare tetai ua atu e akakino akaou ia Iehova e tona ingoa me kore e akaapa i tana tutara anga!

11, 12 Eaa ta te akaaerenga a Iehova i rave i teia tuatau openga?

¹¹ Akamanako ana i ta te akaaerenga a Iehova i rave i teia tuatau openga. Angaanga Patu Are. E anere ua atu au taeake e te au tuaine tei angaanga pakari i te akatu i te are ou no te opati maata o te Au Kite o Iehova i Warwick, New York, Marike. E tauatini ua atu aronga tauturu takapini i teianei ao tei  patu i te Are Uipaanga Patireia e te au opati Betela. Kua aratakiia teia aronga tauturu e te Worldwide Design/Construction Department. Mei teaa tikai to tatou rekareka i te manganui tei angaanga pakari i te patu i teia au are! Te oronga nei te au tavini o Iehova i te au ngai ravarai i ta ratou i rauka kia tauturu i te tutaki i te patu i teia au are. Te akameitaki ra a Iehova i tona iti tangata no to ratou tu akaaka e te tiratiratu.​—Luka 21:1-4.

¹² Au Apii. E reka ana a Iehova i te apii i tona iti tangata. (Isaia 2:2, 3) E akamanako ana i te au apii tukeke. Te vaira te Apii Angaanga Painia, te Apii no te Aronga Tutu Evangeria o te Patireia, Apii Gileada, Apii na te au Mema ou o Betela, te Apii na te Au Akaaere Kotinga e ta Ratou Vaine, te Apii na te Aronga Pakari o te Putuputuanga, te Apii na te Aronga Pakari e te au Tavini Tauturu, e te Apii na te Au Mema o te Kumiti Manga e ta Ratou Vaine. E i runga i ta tatou website, jw.org, ka kite tatou i te Pipiria e te au puka i roto i te anere ua atu reo. E tuanga takake to te website no te tamariki e te ngutuare tangata pera katoa tetai tuanga no te au nuti. Te taangaanga ra ainei koe i te jw.org i roto  i taau angaanga tutu aere e te akamorianga a te ngutuare?

13. Eaa te apainga a te iti tangata o Iehova?

¹³ E mea ngateitei kia riro ei tuanga no ta Iehova akaaerenga e kia kite i tana e umuumu ra ia tatou! E tika, i te mea kua kite tatou eaa te akamareka ra i te Atua, e apainga ta tatou kia akarongo kiaia e te rave i te mea tika. E noatu e maata te tangata e reka ana i te rave i te kino, ka anoanoia tatou “kia rikarika i te kino” mei ia Iehova rai. (Salamo 97:10) Auraka rava tatou e riro mei te aronga tei manako “i te kino ra e meitaki, e te meitaki ra e kino.” (Isaia 5:20) Ka inangaro tatou i te akamareka ia Iehova, no reira ka tauta tatou kia vai mā ua rai. (1 Korinetia 6:9-11) Ko ta Iehova e akakite ra kia tatou i roto i te Pipiria, ei meitaki no tatou uaorai. Te inangaro ra tatou iaia e kia vai tiratiratu kiaia. Ko te tumu teia ka aru tatou i tana aratakianga i te kainga, te putuputuanga, te ngai angaanga, te apii, e tetai ua atu ngai. (Maseli 15:3) E akamanako ana i tetai au ngai ka anoanoia kia vai tiratiratu ki te Atua.

14. Akapeea te au metua me vai tiratiratu kia Iehova?

¹⁴ Me tereni i ta tatou tamariki. I roto i te Pipiria, kua oronga a Iehova i te aratakianga ki te au metua akapeea me tereni i ta ratou tamariki. Ka anoanoia te au Kerititiano kia matakite auraka kia akakeuia e te aerenga manako o teianei ao. (Ephesia 2:2) Ei akaraanga, i tetai au ngai penei ka manako te metua tane, ‘I konei, na te vaine e apii i te tamariki.’ Inara te akaue taka meitaki ra te Pipiria e na te au metua tane e apii i ta ratou tamariki no runga ia Iehova. (Ephesia 6:4) Te au metua tane e te au metua vaine tei inangaro ia Iehova, ka inangaro katoa i ta ratou tamariki kia rauka te pirianga oa vaitata kiaia, mei ia Samuela rai i tona tamariki anga.​—1 Samuela 3:19.

15. Akapeea tatou me vai tiratiratu kia Iehova me rave i te au ikianga puapinga?

¹⁵ Me rave i te au ikianga. I mua ake ka rave ei i te au ikianga puapinga o te oraanga, ka inangaro tatou kia kite i to Iehova manako e rauka ai ia tatou kia vai tiratiratu kiaia. Ka tauturu te Pipiria e tana akaaerenga ia tatou. Ei akaraanga, tetai au metua tei akaruke i to ratou enua anau, kua iki i te tuku i ta ratou pepe ki te enua e noo ra to ratou kopu tangata. Na teia tu, ka rauka i te metua tane e te metua vaine i te angaanga ua atu i te kimi moni. Tika rai, na tatou uaorai teia ikianga, inara ka tau tetai nga tokorua kia ui kia raua uaorai: ‘Eaa to Iehova manako i teia ikianga?’ (E tatau ia Roma 14:12.) E mea meitaki kia akamanako na mua eaa ta te Pipiria e karanga ra i mua ake ka rave ei i te au ikianga puapinga no te ngutuare tangata e te ngai angaanga. Ka anoano tatou i te tauturu a to tatou Metua no te mea kare e rauka ia tatou i te akatere  i to tatou uaorai takainga tapuae.​—Ieremia 10:23.

16. Te anau anga tana pepe tamaroa, eaa te ikianga ta tetai metua vaine i rave? Eaa tei tauturu iaia kia rave i te ikianga tau?

¹⁶ I muri ake i te neke anga tetai nga tokorua ki te enua ke, kua anau ta raua pepe tamaroa, e kua parani raua i te tuku iaia kia noo ki tona nga metua ruau. Inara i te reira taime, te akamata ra te vaine i te apii i te Pipiria ki tetai o te Au Kite o Iehova. Kua kite aia i tana apainga kia apii i tana tamaiti no runga ia Iehova. (Salamo 127:3; Maseli 22:6) Kua pure te vaine mapu kia Iehova, mei ta te Pipiria e akakite ra kia tatou, e kua pati akatenga kiaia no te tauturu kia rave i te mea tika. (Salamo 62:7, 8) Kua tuatua katoa aia no runga i te manamanata ki te tuaine e apii ra i te Pipiria kiaia e tetai pae i roto i te putuputuanga. Noatu e kua akakite tona kopu tangata e te au oa kia tuku aia i te pepe ki te nga metua ruau, kua manako aia kare te reira i te mea tau kia rave. Kua kite tana tane i te tauturu maata a te au taeake e te au tuaine tei orongaia ki tana vaine e ta raua pepe. Kua umere tikai aia e kua akamata i te apii i te Pipiria e kua aere ki te au uipaanga te aru i tona ngutuare tangata. E akamanako ana mei teaa te rekareka maata o teia metua vaine i te kite e kua pau mai a Iehova i tana pure!

17. Me apii tatou i te Pipiria ki tetai tangata, eaa te aratakianga ka tau tatou kia aru?

¹⁷ Me aru tatou i te aratakianga. Me vai tiratiratu tatou ki te Atua, ka aru tatou i te aratakianga no ko mai i tana akaaerenga. Ei akaraanga, e akamanako ana eaa ta tatou ka anoanoia kia rave me akamata i te apii i te puka Eaa Tikai ta te Pipiria e Apii Maira? ki tetai tangata. Kua akakiteia kia tatou kia akapou i tetai nga miniti i muri ake i te apii ei tauturu iaia kia kite maata atu no runga i ta Iehova akaaerenga. Ka rauka i te akaari i te vitio Eaa te Raveia Ana i ko i te Are Uipaanga Patireia? e te poroutia Koai ma te Rave ra i to Iehova Anoano i Teia Tuatau? Me pou te puka Pipiria e Apii Maira, kia tauturu tatou i te tangata apii ‘kia akatinamouia i te akarongo’ na te apiianga i te puka Kia Noo Tamou Kotou i Roto i te Aroa o te Atua, noatu e kua papetitoia aia. (Kolosa 2:7) Te aru ra ainei koe i te aratakianga no ko mai i te akaaerenga a Iehova?

18, 19 Eaa tetai au tumu ka akameitaki tatou ia Iehova?

¹⁸ E maata te tumu kia akameitaki tatou ia Iehova! Tetai tumu, “nona oki to tatou ora, e i aaere ei, e i noo ei oki.” (Angaanga 17:27, 28) Kua oronga katoa aia i tana Puka, te Pipiria. Mei te au Kerititiano i Tesalonia, te akaperepere nei tatou i teia apinga aroa no te mea e karere no ko mai iaia.​—1 Tesalonia 2:13.

¹⁹ Kua tauturu te Pipiria ia tatou kia akavaitata kia Iehova, e kua akavaitata mai aia kia tatou. (Iakobo 4:8) E ākā rekareka tikai to tatou e kua pati mai to tatou Metua ia tatou kia riro ei tuanga no tana akaaerenga! Aite rai to tatou manako ki te tata salamo tei karanga e: “E akameitaki ia Iehova, e meitaki oki tona: ka tu oki tona aroa e rimua.” (Salamo 136:1) I te au irava o teia salamo, kua ripiti te tata salamo i te au tuatua “ka tu oki tona aroa e rimua.” Ae, me vai tiratiratu tatou kia Iehova e me aru i te aratakianga tana i oronga mai na roto i tana akaaerenga, ka oronga aia i te ora mutu kore kia tatou e ka vai tiratiratu kia tatou e tuatau ua atu!