1. Samambraḇ rosai monda Yahwe ḇyuk ḇe snonkaku sya?

YAHWE ḇyuk ḇeko samambraḇ ḇebor ḇepyum kaku. Ḇyuk ḇeko samambraḇ fa kokara, ḇefnoḇek ko fa kofrurmnis samswen ma rosai kofrur ro fafisu iyama. (Amsal 2:11) Ḇyuk ḇeko samambraḇ fa kofrur roi oso, inja bisa kofrurna fa koyawuser rosai kosewarna. (Filipi 2:13) Ḇyuk kako sneuser, isoine roi ḇesambraḇ fa ḇemambir rosai ḇekaku ma ḇesasarna. Inja, bisa koḇinkwanbur sasar ma kofrurmnis kaḇer sasar koḇena.—Roma 2:15.

2. Rariso koḇuk samambraḇ koḇena kuker nyan ḇepyum imnis Yahwe marisen ḇyedi?

² Yahwe imarisen insa koḇuk samambraḇ koḇena kuker nyan ḇepyum. Sai ḇefnai ya? Snaro iswar ko ma fyawi nari koḇeaski rofyor koḇuk pyum fakamaman ine. Imnis raris, kowasya ro Syap-Syap Ibrani, ”fararur  ro snonkaku ḇemyaren na nun fainda” ma ”rosai imbe wafrur ido, wafrurna ḇeri kuker samambraḇ bedi ḇesiper”. (Amsal 21:5; Pengkhotbah 9:10) Ro Syap-Syap Yunani neḇefas, ”rofyor kosma fafisu ine, mkorama kofrur roi ḇeḇye faro snonkakusya kam” ma ”mkuffarmyanyae mko, imnis raris fakamaman snonkaku oser-oser isma kwar”. (Galatia 6:10; 1 Petrus 4:10) Kakuya, Yahwe imarisen kofrur roi ḇepyum faro payamyum mankunko ma snonkaku ḇesesya.

3. Rosai monda snonkaku sya sipok fa sifrurḇa na?

³ Yahwe imarisen koḇuk samambraḇ koḇena, ḇape fyawi kona ḇaḇeraryarḇa kako. Imnis raris, ḇaḇemnisḇa, sasar koḇena, ma marmarya kopok fa kopyosna ḇa. (1 Raja-Raja 8:46) Ma ko kako kopok fa kofara kankenem snonkaku ḇesesyaḇa, snar snonkaku oser-oser sna ḇaḇemkei fa sifrur snemuk ro mankunsi. Ma, fawawi ma pengalaman koḇena nabor raris Yahwe I ḇa.—Yesaya 55:9.

4. Rosai nari kawos ro knik ine?

⁴ Komarisen Yahwe fyarkin ko ḇesya kwar. Kokyar nari isaramper ko ma ifrur faro ko roi kopok fa kofrur ro mankunko ḇa. Ḇape, Yahwe imarisen ko kako kokara rosai monda bisa kofrur fa kofrurmnis samswen koḇena ma kofnoḇek snonkaku ḇesesya. (Wasya Mazmur 37:3.) Fandun  kaku fa ’kokyar faro Yahwe ma kofrur roi ḇeḇye ya’. Fandun kako ”kofasnai soasuser”. Rariso kofrurna rai? Mkorama komam farari ro Nuh, Daud, ma Allah manfamyan ḇesesya ḇekyar faro Yahwe I. Nari kofarkor rosai monda jadi fa sifrurna ḇa. Ḇape, smam monda faro rosai nari bisa sifrurna.

5. Fawar rosai Nuh ismaina.

⁵ Nuh ikenem ro dunya ”ḇefo kuker mamamun” ma amoralitas. (Kejadian 6:4, 9-13) Nuh Ifawi Yahwe na imkok dunya ḇeḇarḇor ani. Ḇape, Nuh fyafayaf kaku myam kenem ro snonkaku sya. Fyawi snar jadi fa ifrur roi oso ḇa, ḇape fyawi kako rosai nari bisa ifrurna.

6, 7. (a) Rosai jadi fa Nuh ifrurḇa na? (b) Rariso kosya ro fafisu ḇemnis kuker Nuh i?

⁶ Rosai Nuh jadi fa ifrurḇa na: Ipok idafdifer snonkaku syaḇa insama srower Yahwe swarapepen ḇyena ro rosai ikofenna. Ma ikako ipok fa ifrur Fabrub Ḇeba ryama fasaw. Fandun kaku fa ikyar faro Yahwe snar nari ifrur asas ḇyena ma ikyar Allah nari ipyosbur ḇaḇeḇarḇor ro fafisu ḇemnis.—Kejadian 6:17.

⁷ Ko kako kokenem ro dunya ḇefo kuker ḇaḇeḇarḇor. Ma, kofawi Yahwe ḇyeasas nari ipyos ḇaḇeḇarḇor. (1 Yohanes 2:17) Ḇape, na kodif snonkaku sya fa srower ”ankankinem ḇeḇye ro  ḇaḇesasoser” ine ḇa. Ma na kofrur royoḇa insa ḇaḇekandera ḇeba ryama fasaw. (Matius 24:14, 21) Imnis Nuh i, kofandun kakyar ḇesambraḇ, kokyar fafisu kermkun monda Allah nari ipyos ḇaḇeḇarḇor nakam. (Mazmur 37:10, 11) Kokyar snar fafisu ani nari ryama fasaw ma ḇyekawawur ḇa.—Habakuk 2:3.

8. Rosai Nuh bisa ifrurna? (Mam sonin ro randak artikel ine.)

⁸ Rosai Nuh bisa ifrurna: Roi ḇeḇeso jadi fa Nuh ifrurna ḇa raryano, isusu ḇa. Mḇoi myam monda faro rosai bisa ifrurna. Byaryas pdef swarapepen ḇerama ro Yahwe. (2 Petrus 2:5) Fararur ine nafnoḇek i fa syambraḇser kakyar ḇyedi. Ikako isouser Yahwe akurfasna ḇyena fa ḇyawes wai ḇeba oso.—Wasya Ibrani 11:7.

9. Rariso kosofarari Nuh i?

⁹ Imnis Nuh i, fandun fa komyaren ’kofararur pdef kaku ḇeri faro Manseren’. (1 Korintus 15:58) Imnis raris, kofnoḇek fararur kontruksi, kofaduru Balai Karajan ma Balai Kebaktian koḇedi. Koḇerelawan ro kebaktian, ḇaido kofararur ro kantor cabang ḇaido kantor penerjemahan. Ḇape, ḇefandun syadi iso, komyaren ro fararur ḇaḇebaryas. Ine nari nsambraḇser saneraro koḇena faro fafisu iyama. Srar oso ikofen rofyor dawos barakas ro Allah Karajan Byedi ḇe ḇesesya ido, fyawi snar snonkaku sna saneraro ḇa ma smam rosai sismaina na nandebur si ḇa. Ḇape, koma kona saneraro, ma nari nasnaibos rofyor kokofenḇairna ḇe snonkaku ḇesesya. Saneraro ine nafnoḇek ko fa kosya pdef ro fanandi kankenem!—1 Korintus 9:24.

10. Fawar rosai sasar ḇeba Daud ifrurna.

¹⁰ Raja Daud ima snon ḇesoasuser, ma Yahwe iswar kaku i. (Farfyar ro Manwawansya [Kisah] 13:22) Ḇape, fafisu oso Daud ifrur sasar ḇeba kaku, isoine denfus Bat-syeba i. Ḇeḇyeḇa syadi ya, ḇyensewar fa iyokef sasar ḇyena kuker fyasos insama Uria, Bat-syeba swari smuni ro mamamun ya. Ibasyadiwer, Daud dor Uria dun syapram ḇeser aw faro marmar ḇyeja! (2 Samuel 11:1-21) Ḇape ḇarpur ya, Daud sasar ḇyena sifawina. (Markus 4:22) Inja, rosai Daud ifrurya?

11, 12. (a) Rofyor ifrur sasar, rosai jadi fa Daud ifrurḇa na? (b) Rosai nari Yahwe ifrur faro ko rofyor komḇror?

¹¹ Rosai Daud jadi fa ifrurḇa na: Daud ipok fa fyarwe rosai ifrur kwarna ḇa. Ḇape, ḇyekandera kaku snar sasar ifrurna ro kankenem ḇyena ḇesiper. (2 Samuel 12:10-12, 14) Inja, fyandun kaku kakyar ya. Fandun fa, ikyar  rofyor imbror kaku ro sasar ḇyena, Yahwe nari ḇyuk ampun ḇe i ma ifnoḇek i fa fyarmku pdef faro sasar ifrurna.

¹² Snar koine snonkaku ḇemnisḇa, kokame na kofrur sasar. Ḇape, imbude na kofrur sasar ḇeba kaku. Ma, fyorno ido jadi fa kofrurmnis kaḇer sasar koḇenaḇa inja na kosmai kandera faro sasar kofrurna. (Galatia 6:7) Ḇape, kokyar faro Allah asas ḇyena snar kombror ido, nari ifnoḇek ko ro fafisu ḇesamswenna, ibasyadiwer roi anna nḇejadi snar sasar mankun koḇena.—Wasya Yesaya 1:18, 19; Farfyar 3:19.

13. Rariso Daud fyanam kaḇer ḇe Yahwe I?

¹³ Rosai Daud bisa ifrurna: Daud imarisen fyanam kaḇer ḇe Yahwe I. Rariso na ifrurna rai? Daud imarisen Yahwe ifnoḇek i, imnis raris, imarisen Yahwe isonek i roro nabi Natan. (2 Samuel 12:13) ) Daud ikako ḇyenadi faro Yahwe ma ikofenbadir sasar ḇyena. Ine fyasnaḇair imarisen kaku fyanam ḇe Yahwe I wer. (Mazmur 51:1-17) Daud kyara ker sasar ḇyena ḇa, ḇape fyarkor ro sasar ifrurna. Ifrur sasar ḇeba ani werḇa. Taun-taun ḇenande ramnai, Daud isoasuser pdef isof imar, ma iso ḇefnai fa Yahwe iswarepen i.—Ibrani 11:32-34.

14. Rosai na kofarkor ro Daud i?

¹⁴ Rosai kofarkor ro Daud i? Rofyor kofrur sasar ḇeba oso ido, fandun fa kombror kuker kakaku, kokofen sasar koḇena faro Yahwe, ma kor ampun ro I. (1 Yohanes 1:9) Fandun kako kawos ḇe penatua sya, snar na sifnoḇek ko fa kofanam kaḇer kuker Yahwe I. (Wasya Yakobus 5:14-16.) Komarisen Yahwe ifnoḇek ko ido, ine kyurfasna kokyar nari ḇyuk ampun faro ko imnis asas ḇyena. Osower ido, fandun kofarkor ro sasar koḇena, kofarmyan pdef ḇe Yahwe I, ma komam ḇe ḇarpur ḇa.—Ibrani 12:12, 13.

15. Rosai na kofarkor ro Hana i?

¹⁵ Imbude kwara manfamyan ḇesouser ḇese ro Refo ḇekyar faro Yahwe sifrur rosai bisa sifrurna ro fafisu ḇesamswen. Imnis raris, Hana jadi fa nya romawa ḇa, Na ipok fyadwer fafisu ḇyedi ḇa. Ḇape, ikyar nari Yahwe ḇyuk sneprei ḇe i. Inja ḇyuk farsamsyom pdef ro tabernakel ma ḇyenadi ḇe Yahwe ikofenḇair rosai ḇyaḇirna. (1 Samuel 1:9-11) Ima farari ḇepyum kaku! Rofyor koduf ḇaido samswen ḇesena kopok kofadwerna ḇa. Fandun koḇuk makakwarek koḇena ḇe Yahwe ma kokyar iso ḇefaduru ko. (1 Petrus 5:6, 7) Ramnai, koḇensewar fa  kosmai fainda ro fananjur ma roi ḇesena ro Yahwe organisasi ḇyeja.—Ibrani 10:24, 25.

16. Rosai sinan sya sfarkor ro Samuel i?

¹⁶ Sinan Kristen ono sisya ḇena romawa ḇefarmyan faro Yahwe I werḇa. Bisa sifarkor ro nabi Samuel. Rofyor romawa ḇyesi siba kwar, ipok idif siḇa fa sisoasuser ḇe Allah I. (1 Samuel 8:1-3) Ryir samswen ḇyeja ḇe Yahwe I. Samuel bisa ifrurya iso isoasuser pdef ḇe Allah ma ifrur Kmari ro nanki imarisen. (Amsal 27:11) Baboine, sinan Kristen ḇebor sya sna fafisu ḇemnis radine. Sikyar snar Yahwe imnis Kma ḇero Yesus sararḇer ḇyedi kuker romawa ḇeḇoḇ farfnak nana ḇyena. Yahwe ima imarisen ḇyuk ampun faro snonkaku ḇembror sya. (Lukas 15:20) Inja, roi sinan sya bisa sifrurna isoine sisoasuser ḇe Yahwe I, ma sikyar farari ḇepyum sena nari nadif romawa sesya fa skaḇer ḇe Yahwe I.

17. Sai ḇefnai fa fawar ro bin kabom ḇesabarar ani farari ḇepyum?

¹⁷ Farari ḇepyum ḇese iso bin kabom ḇesaḇarar ro Yesus fafisu ḇyedi. (Wasya Lukas 21:1-4.) Ḇape, ikyar faro Yahwe, imarisen isonem farsamsyom ḇekaku ya. Nya snemura inja ḇyuk ”remis risuru”, isoine kumpan ḇyenakam. Bin kabom ani ikyar kaku faro Yahwe I. Fyawi fyakapon fararmyan ḇyedi ḇe Yahwe ido, Yahwe nari ḇyuk fandandun ḇyena. Rarirya kako, kokyar rofyor kofakapon Allah Karajan Ḇyedi ido, nari Yahwe ḇyuk rosai kofandun na.—Matius 6:33.

18. Fawar contoh ro naek oso ḇena kakara ḇepyum.

¹⁸ Baboine naek srar ḇebor si kako sikyar faro Yahwe. Smam monda faro rosai bisa sifrurna ḇardiḇur rosai nari jadi fa sifrurḇa na. Imnis raris, naek oso ḇenir ḇe Malcolm, isoasuser pdef isof imar ro taun 2015. Roro taun ḇe taun, i kuker swari sufarmyan ḇe Yahwe I ro fafisu ḇepyum ma fafisu ḇesamswen. Fyawar, doḇe ”osoḇaḇeri ḇefawi rariso kankenem ine rai, kofawi ḇe barpon ḇa, ma kosmai fafisu ḇesamswen. Ḇape, Yahwe ḇyuk barakas faro mansei ḇekyar faro I.” Anun rosai Malcolm ḇyukna? ”Koḇenadi ro ras ḇe ras insama komyaren pdef ma kankenem koḇena nḇefainda ḇe Yahwe I. Komam monda faro rosai bisa kofrurna, ḇape komam awer rosai na jadi fa kofrurḇa na.” *—Mam fasfas kasun ro sop.

19. (a) Sai ḇefnai fa ayat tahunan 2017 ima isrow kaku? (b) Rariso na wafasnai wafrur ayat tahunan 2017 ro kankenem Bedi?

¹⁹ Dunya ḇeḇarḇor ine nari ’ḇyarḇor syadi’, inja kokyar na kosmai samswen nabor kaku wer. (2 Timotius 3:1, 13) Inja, fandun kaku kofrur roi ḇefandun syadi ḇardibur kokara ker samswen kosmaina. Ipyum ya, kokyar kuker sne ḇesiper faro Yahwe ma komam monda faro rosai bisa kofrurna. Iso ḇefnai fa, ayat tahunan 2017 ima isrow kaku, isoine ”Wakyar faro Yahwe ma wafrur roi ḇeḇye”!—Mazmur 37:3.