1. ?Jehova i wokem yumi we yumi naf blong mekem wanem?

JEHOVA i wokem yumi we yumi naf blong mekem plante gudfala samting. Hemia wan presen we hem i givim long yumi. Hem i mekem se yumi naf blong yusum tingting blong yumi blong stretem ol problem, mo mekem ol plan blong fiuja. (Ol Proveb 2:11) Hem i givim paoa long yumi, blong yumi save mekem ol samting we yumi plan blong mekem, mo kasem ol mak blong yumi. (Filipae 2:13) Mo tu, hem i mekem se tingting blong yumi i save jajem yumi se yumi mekem samting we i stret no i no stret. Tingting ya i givhan long yumi blong no mekem sin mo blong stretem ol mastik blong yumi.—Rom 2:15.

2. ?Olsem wanem Jehova i wantem se yumi yusum presen we hem i givim?

² Jehova i wantem se yumi yusum gud presen ya we hem i givim. ?From wanem? From we hem lavem yumi, mo hem i save se bambae yumi glad taem yumi yusum gud presen ya. Long Hibru haf blong Baebol, yumi ridim se: “Man we i mekem gudfala plan  mo i stap wok strong long hem, hem i save kasem plante samting,” mo “wanem samting we yumi stap mekem, yumi mas strong long hem long fulpaoa blong yumi.” (Ol Proveb 21:5; Prija 9:10) Long Grik haf blong Baebol, yumi ridim se: “Oltaem, sipos yumi gat janis, yumi mas mekem i gud long olgeta man,” mo “yufala i mas yusum ol paoa ya blong hem blong givgivhan long yufala.” (Galesia 6:10; 1 Pita 4:10) Taswe, Jehova i wantem se yumi traem bes blong yumi blong mekem samting we i givhan long yumi mo long ol narafala.

3. ?Wanem sam samting we yumi no naf blong mekem?

³ Jehova i wantem se yumi mekem ol samting we yumi naf blong mekem, be hem i save tu se i gat sam samting we yumi no naf blong mekem. Eksampol, yumi no naf blong tekemaot sin mo ded, mo mekem bodi blong yumi i kam stret gud olgeta. (1 King 8:46) Mo tu, yumi no naf blong kontrolem ol narafala man, from we yumi evriwan i fri blong mekem desisen blong yumi. Mo nating se yumi gat plante save no ekspiriens, be bambae yumi neva kam olsem Jehova.—Aesea 55:9.

4. ?Bambae yumi tokbaot wanem long stadi ya?

⁴ Oltaem yumi mas letem Jehova i lidim yumi, mo yumi trastem se bambae hem i givhan long yumi mo i mekem samting we yumi no naf blong mekem. Mo tu, Jehova i wantem se yumi tingbaot ol samting we yumi naf blong mekem, blong stretem ol problem blong yumi mo blong givhan long ol narafala. (Ridim Ol Sam 37:3, NW.) Yumi mas “trastem Jehova mo mekem ol  fasin we i gud.” Mo yumi mas ‘mekem ol samting we i soemaot se yumi holemstrong long Jehova.’ ?Yumi save mekem ol samting ya olsem wanem? Bambae yumi luk eksampol blong Noa, Deved, mo sam narafala man blong Jehova we oli dipen long hem. Bambae yumi luk se i gat sam samting we oli no naf blong mekem, be oli putum tingting blong olgeta long ol samting we oli naf blong mekem.

5. Yu tokbaot samting we i hapen long Noa.

⁵ Noa i laef long wan wol we ol man “oli stap faet mo oli stap kilim man i ded,” mo oli mekem ol doti fasin blong seks. (Jenesis 6:4, 9-13) Hem i save se wan dei, Jehova bambae i spolem rabis wol ya. Be nating se i olsem, i sua se hem i harem nogud from ol samting we ol man oli stap mekem. Long taem ya, Noa i kasem save se i gat sam samting we hem i no naf blong mekem, be hem i kasem save tu se i gat sam samting we hem i naf blong mekem.

6, 7. (1) ?Noa i no naf blong mekem wanem? (2) ?Olsem wanem samting we i hapen long yumi i sem mak long taem blong Noa?

⁶ Samting we Noa i no naf blong mekem: Noa i gat strong tingting blong prij mo talemaot woning we Jehova i givim, be hem i no naf blong fosem ol man blong oli akseptem tok blong hem. Mo tu, hem i no naf blong mekem se Bigfala Wota i foldaon kwik. Be hem i trastem Jehova nomo se bambae hem i holemtaet promes ya blong spolem ol nogud man. Mo hem i bilif strong se Jehova bambae i mekem samting ya long stret taem blong hem.—Jenesis 6:17.

⁷ Yumi tu, yumi laef long wan wol we i  fulap long ol nogud fasin, mo Jehova i promes se bambae hem i spolem rabis wol ya. (1 Jon 2:17) Be gogo kasem taem ya, yumi no naf blong fosem ol man blong oli akseptem “gud nius” blong Kingdom. Mo yumi no naf blong mekem se “bigfala trabol” i kam kwik. (Matiu 24:14, 21) Olsem Noa, yumi mas gat strong bilif mo trastem Jehova se i no longtaem, bambae hem i finisim ol fasin nogud. (Ol Sam 37:10, 11) Yumi gat strong tingting se bambae Jehova i no save letem ol rabis fasin blong wol ya oli gohed olsem.—Habakuk 2:3.

8. ?Noa i putum tingting blong hem long wanem? (Yu luk pija long stat blong stadi.)

⁸ Samting we Noa i naf blong mekem: Noa i no naf blong mekem sam samting, be hem i no lego. Hem i putum tingting blong hem long samting we hem i naf blong mekem. Hem i gohed blong talemaot woning long ol man. (2 Pita 2:5) I sua se wok ya i mekem bilif blong hem i strong. Noa i prij mo hem i obei long Jehova, i wokem wan sip.—Ridim Hibrus 11:7.

9. ?Olsem wanem yumi save folem fasin blong Noa?

⁹ Olsem Noa, yumi tu yumi bisi “long ol wok ya blong Masta.” (1 Korin 15:58) Maet yumi stap givhan blong bildim no riperem Haos Kingdom no Haos Asembli, no yumi volontia long taem blong asembli, no yumi wok long branj ofis no long ofis blong translesen. Samting we i moa impoten se yumi bisi long wok blong prij, we i givhan long yumi blong putum tingting blong yumi long nambawan hop blong fiuja. Wan sista i talem se taem hem i tokbaot ol blesing blong Kingdom long ol narafala, hem i faenemaot se plante man oli nogat hop, mo oli luk ol problem blong olgeta olsem wan samting we i blong stap olwe. Olsem sista ya i talem, hop blong yumi i kam strong moa taem yumi talemaot long ol narafala. !Hop ya i givhan long yumi blong yumi gohed long resis blong laef!—1 Korin 9:24.

10. Yu tokbaot samting we i hapen long Deved.

¹⁰ King Deved i wan man we i gat strong bilif, mo Jehova i lavem hem tumas. (Ol Wok 13:22) Nating se i olsem, hem i mekem wan bigfala sin, hem i slip wetem Batseba we i waef blong Uria. Mo samting we i moa nogud se hem i traem blong haedem sin ya, ale hem i raetem wan leta mo i eksplenem plan blong Uria i ded long faet. !Mo hem i givim leta ya long Uria blong i karem i go! (2 Samuel 11:1-21) Biaen sin blong hem i kamaot long klia ples. (Mak 4:22) ?Taem samting ya i hapen, Deved i mekem wanem?

11, 12. (1) ?Afta we Deved i mekem sin, hem i no naf blong mekem wanem? (2) ?Jehova bambae i mekem wanem sipos yumi tanem tingting blong yumi?

¹¹ Samting we Deved i no naf blong mekem: Deved i no naf blong gobak mo ravemaot sin ya. Be long ful laef blong hem, bambae hem i mas safa from ol trabol we oli kamaot from sin ya. (2 Samuel 12:10-12, 14) Taswe hem i nidim bilif. Hem i mas trastem se taem hem i tanem tingting blong hem, Jehova bambae i fogivim hem mo i givhan long hem blong i stanap strong long ol trabol ya.

 ¹² From we yumi no stret gud olgeta, yumi evriwan i mekem sin. Be i gat sam mastik we i bigwan moa long ol narafala mastik, mo sam long olgeta, yumi no naf blong gobak mo ravemaot. Maet yumi tu yumi mas safa from ol trabol we oli kamaot from ol mastik blong yumi. (Galesia 6:7) Be yumi trastem promes blong God se taem yumi tanem tingting blong yumi, bambae hem i givhan long yumi taem yumi kasem trabol, nating se sam long ol trabol ya oli fol blong yumi nomo.—Ridim Aesea 1:18, 19; Ol Wok 3:19.

13. ?Olsem wanem Deved i fren gud bakegen wetem Jehova?

¹³ Samting we Deved i naf blong mekem: Deved i wantem fren gud bakegen wetem Jehova. ?Ale hem i mekem wanem? Hem i letem Jehova i givhan long hem. Hem i letem profet Natan i stretem hem. (2 Samuel 12:13) Mo tu, hem i prea long Jehova mo i talemaot sin blong hem, mo i soemaot se hem i rili wantem fren gud bakegen wetem Jehova. (Sam 51:1-17) Deved i harem nogud from sin blong hem, be hem i no letem samting ya i mekem hem i harem nogud bitim mak. Hem i lanem samting from mastik blong hem. Taswe, hem i neva mekem mastik ya bakegen. Plante yia afta, hem i holemstrong long Jehova go kasem we hem i ded, mo Jehova i tingbaot hem olsem wan gudfala man.—Hibrus 11:32-34.

14. ?Yumi save lanem wanem long eksampol blong Deved?

¹⁴ ?Yumi save lanem wanem long eksampol blong Deved? Sipos yumi mekem wan bigfala sin, yumi mas tanem tingting blong yumi, talemaot sin blong yumi long Jehova, mo askem hem blong i fogivim yumi. (1 Jon 1:9) Mo tu, yumi mas toktok long ol elda blong oli givhan long yumi blong fren gud bakegen wetem Jehova. (Ridim Jemes 5:14-16.) Taem yumi letem Jehova i givhan long yumi, yumi soemaot se yumi trastem promes blong hem se bambae hem i fogivim yumi. Mo tu, yumi mas lanem samting from ol mastik blong yumi mo gohed blong mekem wok blong Jehova wetem strong tingting.—Hibrus 12:12, 13.

15. ?Yumi lanem wanem long eksampol blong Hana?

¹⁵ Yumi save tingbaot ol narafala man long Baebol we oli fesem sam hadtaem, be oli trastem Jehova taem oli mekem samting we oli naf blong mekem. Yumi save tingbaot Hana. Hem i no save gat pikinini. Hemia wan samting we hem i no naf blong jenisim. Be hem i trastem Jehova se bambae i mekem hem i harem gud. Ale hem i gohed blong mekem wosip long Jehova long haos tapolen, mo i prea long hem, i talemaot ol filing blong hem. (1 Samuel 1:9-11) !Hemia wan nambawan eksampol we yumi save folem! Taem yumi gat problem blong helt no sam narafala problem we yumi no naf blong jenisim, i gud yumi putum ol wari blong yumi long han blong Jehova, mo yumi trastem se hem i tingbaot yumi. (1 Pita 5:6, 7) Mo yumi mekem samting we yumi naf blong mekem, blong kasem ol gudfala samting from ol miting mo  ol narafala program we ogenaesesen blong Jehova i givim.—Hibrus 10:24, 25.

16. ?Ol papa mama oli save lanem wanem long eksampol blong Samuel?

¹⁶ ?Olsem wanem long ol papa mama we pikinini blong olgeta i lego Jehova? Profet Samuel i gat ol pikinini we oli bigman finis, be hem i no save fosem olgeta blong oli gohed blong holemstrong long God. (1 Samuel 8:1-3) Hem i mas lego bisnes ya long han blong Jehova. Mo hem i mekem samting we hem i naf blong mekem, blong holemstrong long God mo blong mekem Papa blong hem long heven i glad. (Ol Proveb 27:11) Tede, plante Kristin papa mama oli fesem sem samting. Be oli save se Jehova i olsem papa ya we Jisas i tokbaot, we i lusum boe blong hem. Papa ya i rere eni taem blong welkamem eni sinman we i tanem tingting blong hem. (Luk 15:20) Naoia i gud se ol papa mama oli gohed blong holemstrong long Jehova, mo tingbaot se eksampol blong olgeta i save pulum pikinini blong olgeta blong i kambak long Jehova.

17. ?From wanem eksampol blong wido we i pua i save leftemap tingting blong yumi?

¹⁷ Wan narafala gudfala eksampol, hemia wido woman we i pua. (Ridim Luk 21:1-4.) Hem i no naf blong stopem kruked fasin we i stap gohed long haos tempol, mo hem i no naf blong mekem se hem i no moa pua. (Matiu 21:12, 13) Be hem i trastem Jehova, mo hemia i pulum hem blong sapotem tru wosip. Hem i glad blong givim samting, taswe hem i givim “tu smol mane,” nating se hemia evri mane we hem i gat. Wido ya i soemaot se hem i trastem Jehova fulwan. Hem i save se sipos hem i putum wok blong Jehova long fasples, bambae Jehova i givim samting we hem i nidim. Long sem fasin, yumi trastem se sipos yumi putum Kingdom long fasples, Jehova bambae i givim samting we yumi nidim.—Matiu 6:33.

18. Yu tokbaot eksampol blong wan brata we i gat stret tingting.

¹⁸ Plante brata mo sista tede oli soemaot se oli trastem Jehova, taem oli putum tingting blong olgeta long ol samting we oli naf blong mekem, be i no long samting we oli no naf blong mekem. Traem tingbaot brata Malcolm, we i holemstrong long God kasem we i ded long 2015. Hem mo waef blong hem tufala i mekem wok blong Jehova blong plante yia, mo tufala i gat sam gudfala taem mo sam nogud taem tu. Malcolm i talem se: “Plante taem, yumi no save wanem bambae i kamaot long laef blong yumi, yumi no save sipos plan blong yumi bambae i kamtru, mo samtaem i had blong winim ol trabol we oli kasem yumi. Nating se i olsem, Jehova i blesem olgeta we oli no folem prapa save blong olgeta, be oli dipen long hem nomo.” ?Wanem advaes blong hem? Hem i talem se: “Yu mas prea oltaem blong yu save wok strong mo karem frut long wok blong Jehova. Yu mas strong blong mekem samting we yu yu naf blong mekem, yu no tingbaot tumas ol samting we yu yu no naf blong mekem.”

19. (1)?From wanem vas blong yia 2017 i stret nomo? (2) ?Bambae yu yu folem vas ya olsem?

¹⁹ Rabis wol ya bambae i gohed olsem gogo i kam “mowas olgeta,” taswe yumi save se bambae yumi kasem plante moa trabol. (2 Timoti 3:1, 13) Naoia i rili impoten we yumi no tingting tumas long ol trabol blong yumi. Be yumi mas trastem Jehova fulwan mo mekem samting we yumi naf blong mekem. !Taswe i stret nomo we vas blong yia 2017, i talem se: ‘Trastem Jehova mo mekem ol fasin we oli gud’!—Ol Sam 37:3.