1. Engkai maka beda kal manusia ras tinepa Jahwe si debanna?

BEDA kal manusia ras tinepa Jahwe si debanna. Kita banci rukur, e erban kita banci ndungi masalahta ras erban rencana man wari si pepagi. (Kuan-kuanen 2:11) Ibereken Jahwe kita gegeh, alu bage banci silakoken kai si nggo sirencanaken ras mpeseh sura-suranta. (Pilipi 2:13) IberekenNa ka pusuh peraten, gelah banci sibedaken si benar ras si salah. Pusuh peratenta nampati kita mpedauh dosa ras mere persinget adi lit kesalahenta.—Roma 2:15.

2. Kai si iarapken Jahwe i bas kita nari kerna kiningasupenta?

² Iarapken Jahwe gelah sigunaken kengasupenta e alu cara si mehuli. Engkai? Erkiteken keleng ateNa kita janah ietehNa adi sigunaken alu mehuli banci kita ermeriah ukur. Contohna, i bas Kitab-Kitab Heber,  sioge, ”Rencana si megermet maba keuntungen”, janah ”dahikenlah dahinndu asa gegehndu”. (Kuan-kuanen 21:5; Pengerana 9:10) I bas Kitab-Kitab Junani, sioge, ”E maka i bas tep-tep kesempaten, sibahanlah si mehuli man kerina manusia”, janah ”sekalak-sekalak, selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, arus nggunaken pemere e guna kiniulin kalak si deban”. (Galati 6:10; 1 Petrus 4:10) Jelas me, ate Jahwe silakoken kai si banci erguna man banta bage pe man kalak si deban.

3. Kai keterbatasen manusia?

³ Ate Jahwe sigunaken kengasupenta, tapi ietehNa lit keterbatasenta. Contohna, la banci simasapken kinilasertanta, dosa ras kematen. (1 Raja-Raja 8:46) La ka banci sikuasai kalak si deban, erkiteken kerina kalak bebas erban keputusen. La soal asa kai buena pemeteh ntah pengalamenta, la pernah kita banci bagi Jahwe.—Jesaya 55:9.

4. Kai kari sibahas i bas artikel enda?

⁴ Arus lalap sipediat Jahwe negu-negu kita, tek maka pasti idukungNa kita janah ilakokenNa kai si la banci silakoken. Tapi, iarapken Jahwe gelah siukuri kai si banci silakoken guna ndungi masalahta ras nampati kalak si deban. (Oge Masmur 37:3.) Perlu kita ’ernalem man [Jahwe], dingen ngelakoken si mehuli’.  Uga kita banci ngelakokenca? Mari sibahas contoh Nuah, Daud, ras juak-juak Dibata si setia si debanna si ernalem man Jahwe. Sinen kari maka lit hal-hal si la banci ilakoken kalak e tapi si iutamakenna eme ngelakoken kai si banci ilakokenna.

5. Turiken keadan Nuah?

⁵ Nuah tading i bas doni si ”i japa pe terjadi kejahaten” ras perbahanen erlagu la mehuli. (Kejadin 6:4, 9-13) Aminna pe ietehna maka pasti ikernepken Jahwe doni si jahat e pasti kitik kal ukur Nuah ngidah kerina si terjadi. I bas keadan si bage isedari Nuah lit hal-hal si la banci ilakokenna, tapi ietehna ka nge lit hal-hal si banci ilakokenna.

6, 7. (a) Kai si la banci ilakoken Nuah? (b) Uga keadanta seri ras Nuah?

⁶ Si la banci ilakoken Nuah: Iberitaken Nuah persinget i bas Jahwe nari, tapi la banci ipaksana kalak megikenca. La banci ibanna gelah meter reh banjir si mbelin. Nuah arus tek maka pasti itepati Jahwe janjiNa guna ngkernepken kejahaten, tek ia maka pasti ilakoken Dibata i bas waktu si tepat.—Kejadin 6:17.

⁷ Kita pe nggeluh i bas doni si dem alu kejahaten, janah sieteh maka pasti nge ikernepken Jahwe kari. (1 Johanes 2:17) Asum si e la banci sipaksa kalak ngaloken ”berita si meriah  kerna Kinirajan”. Janah la banci siban gelah meter reh ”kiniseran” si mbelin. (Matius 24:14, 21) Bagi Nuah, perlu megegeh kinitekenta, tek maka lanai ndekah ikernepken Dibata kerina kejahaten. (Masmur 37:10, 11) Tek kita maka la ipediat Jahwe sada wari pe terdekahen umur doni si jahat enda.—Habakuk 2:3.

8. Kai si iutamaken Nuah? (Nehen gambar i bas pemena artikel.)

⁸ Si banci ilakoken Nuah: Aminna gia lit si la banci ilakokenna la ia nerah, si iutamaken Nuah eme ngelakoken kai si banci ilakokenna. Terus iberitaken Nuah persinget bas Jahwe nari. (2 Petrus 2:5) Pendahin enda pasti nampati ia gelah tetap paguh kinitekenna. Selain erberita, idalankenna petunjuk Jahwe guna mbangun bahtera.—Oge Heber 11:7.

9. Uga kita banci ngusih Nuah?

⁹ Bagi Nuah, tetap kita sibuk i bas ”dahin Tuhan”. (1 Korinti 15:58) Contohna, banci kita nampati i bas pembangunen ras ngurus Bale Kinirajan ras Bale Kebaktinta, sukarelawan i bas kebaktin ntah pe erdahin i bas kantor cabang bage pe i bas kantor penerjemahen. Si pentingna, tetap kita sibuk erberita, si banci mpegegehi kinitekenta kerna wari si pepagi. Sekalak turang senina si setia ngataken maka sanga iturikenna kerna pasu-pasu Kinirajan Dibata man kalak si deban, isedarina maka tuhu-tuhu la lit arapen kalak e janah iakapna la lit dalan keluar man masalahna. Bagi si ikataken turang seninanta e, lit arapenta janah reh paguna e adi situriken man kalak si deban. Arapen enda nampati kita tetap i bas perlumban kegeluhen!—1 Korinti 9:24.

10. Turiken keadan Daud.

¹⁰ Raja Daud eme dilaki si setia, janah keleng kal ate Jahwe ia. (Perbahanen Rasul-Rasul 13:22) Tapi, ilakokenna dosa si mbelin, erlua-lua ia ras Batseba. Janah, iusahakenna ka nutupi dosana e alu erban rencana gelah Uria, perbulangen Batseba terbunuh i bas peperangen. Isuruh Daud gelah Uria si mpeseh surat kerna rencana kematenna sendiri! (2 Samuel 11:1-21) Dungna tereteh me dosa Daud e. (Markus 4:22) Sanga e terjadi uga tanggapen Daud?

11, 12. (a) Kenca erdosa Daud, kai si la banci ilakokenna? (b) Kai si banci ilakoken Jahwe man banta adi kita robah?

¹¹ Si la banci ilakoken Daud: La banci ipekena Daud kai si nggo ilakokenna. Inanamina pagi kiniseran akibat dosana e segedang geluhna. (2 Samuel 12:10-12, 14) Emaka, perlu ia  erkiniteken. Arus ia tek adi tuhu-tuhu ia robah, banci ialemi Jahwe janah isampatiNa gelah megenggeng ngadapi akibat perbahanenna e.

¹² Erkiteken la serta, kerina kita erdosa. Tapi piga-piga kesalahenta belinen asangken si deban, janah piga-piga la banci sipekena. Mungkin sinanami ka akibat perbahanenta e. (Galati 6:7) Tapi tek kita man janji Jahwe, adi robah kita pasti idukungNa i bas masa-masa si sulit, aminna pe e akibat kesalahenta sendiri.—Oge Jesaya 1:18, 19; Perbahanen Rasul-Rasul 3:19.

13. Uga Daud mpekena hubungenna ras Jahwe?

¹³ Si banci ilakoken Daud: Ipekena Daud atena hubungenna ras Jahwe. Uga carana? Ialokenna penampat Jahwe. Contohna, ialokenna persinget i bas nabi Jahwe nari, Natan. (2 Samuel 12:13) Iakui Daud ka dosana i bas toto, icidahkenna maka merhat kal ia ndatken ngena ate Jahwe mulihi. (Masmur 51:1-19) Asangken terus salah iakapna bana, erlajar Daud i bas kesalahenna nari. Lanai pernah iulihina dosa si mbelin e. Ertahun-tahun kenca si e, mate ia selaku dilaki si setia, bage me Jahwe nginget ia.—Heber 11:32-34.

14. Kai si banci sipelajari i bas contoh Daud nari?

¹⁴ Kai si banci sipelajari i bas contoh Daud nari? Adi silakoken dosa si mbelin, perlu kita tuhu-tuhu robah, siakuken dosanta man Jahwe, janah sipindo pengalemenNa. (1 Johnanes 1:9) Perlu ka sikataken man pertua, erkiteken banci isampatina kita mpekena hubungenta ras Jahwe. (Oge Jakup 5:14-16.) Adi sialoken penampat Jahwe, sicidahken maka tek kita man janjiNa guna ngalemi kita. Selain si e, perlu kita erlajar i bas kesalahenta nari janah terus ngelayani Jahwe alu pusuh peraten si bersih.—Heber 12:12, 13.

15. Kai si banci sipelajari i bas contoh Hanna nari?

¹⁵ Banci ka iukurindu kerna juak-juak si deban si lit i bas Pustaka si tek man Jahwe asum ilakokenna kai si banci ilakokenna i bas masa si sulit. Contohna Hanna, bas sada paksa la banci ia mupus. La banci iubahna keadanna e. Tek ia maka Jahwe banci ngapuli ia. Emaka terus ia reh nembah ku tabernakel janah ertoto man Jahwe nuriken perasanna. (1 Samuel 1:9-11) Tuhu-tuhu usihen si luar biasa! Adi lit penakitta ntah pe perbeben si deban si la banci siubah, siampekenlah kearunatenta man Jahwe janah tek maka ia ermediate man banta. (1 Petrus 5:6, 7) Janah silakoken kai si  banci gelah sidat manfaat i bas perpulungen Kristen nari bage pe acara si deban si isikapken organisasi Jahwe.—Heber 10:24, 25.

16. Kai si banci ipelajari orang tua i bas Samuel nari?

¹⁶ Uga kerna orang tua si setia si anakna lanai ngelayani Jahwe? La banci ipaksa nabi Samuel anak-anakna si nggo mbelin gelah tetap setia man Dibata. (1 Samuel 8:1-3) Iendeskenna masalahna man Jahwe. Tapi, ilakokenna kai si banci ilakokenna gelah tetap setia ras erban meriah ukur Bapana si i surga. (Kuan-kuanen 27:11) Gundari, lit orang tua Kristen si bage keadanna. Tek kalak e maka bagi bapa i bas perumpaman Jesus kerna anak si bene, lalap Jahwe nggit ngalo-ngalo kalak si erdosa si nggo robah. (Lukas 15:20) Asum si e, iutamaken orang tua tetap setia man Jahwe, ngarap maka usihenna banci erban anakna nggit mulihken man Jahwe.

17. Engkai contoh balu-balu si musil mpegegehi kita?

¹⁷ Contoh si mehuli si deban eme balu-balu si musil i bas jaman Jesus. (Oge Lukas 21:1-4.) La banci ilakokenna kai pe kerna korupsi si lit bas rumah pertoton, janah la banci iubahna kegeluhenna si musil. (Matius 21:12, 13) Tapi kinitekenna man Jahwe erban ia ndukung ibadat si tuhu-tuhu. Ia melumbar janah iberekenna ”dua peser”, e nari ngenca sen si tading i bas ia. Diberu si setia e tek kal man Jahwe. Ietehna maka adi ipelebena Jahwe pasti ibereken Dibata kai si iperlukenna. Kita pe tek, adi sipelebe Kinirajan Dibata, pasti ibereken Jahwe keperlunta.—Matius 6:33.

18. Bereken contoh kerna turang senina si mehuli carana rukur.

¹⁸ Gundari nterem turang seninanta ncidahken kiniteken si seri man Jahwe, alu ngutamaken kai si banci ilakokenna labo kai si la banci. Perdiateken turang senina Malcolm, si terus setia ngayak mate i bas tahun 2015. Ertahun-tahun dekahna ia ras ndeharana ngelayani Jahwe i bas masa si senang bage pe si mesera. Nina, ”Maun-maun kegeluhen enda la banci si duga-duga, la pasti, janah la menukah idalani. Tapi, ipasu-pasu Jahwe kalak si ernalem baNa.” Kai pedah Malcolm? ”Ertotolah gelah banci melala si ilakokenndu janah terus ngelayani Jahwe asa ngasupndu. Utamaken kai si banci ilakokenndu, labo si la banci.” *—Nehen Penjelasen tambahen.

19. (a) Engkai Masmur 37:3 ipilih jadi ayat tahunen 2017? (b) Uga kam makeken ayat tahunen 2017 e i bas geluhndu?

¹⁹ Doni si jahat enda ”reh dekahna reh jahatna”, emaka uga pa pe reh serana nari nge. (2 Timotius 3:1, 13) Asangken si nggo-nggona, ula sipediat perbebenta ngkuasai kita. Sebalikna, perlu sipegegehi kinitekenta man Jahwe janah siutamaken kai si banci silakoken. Eme alasenna ayat tahunenta 2017 iban: ”Ernalemlah man [Jahwe], dingen lakokenlah si mehuli”!—Masmur 37:3.