1. Ngu wuhi wusikoti wo xamalisa awu Jehovha a nga hi ninga?

JEHOVHA a vangile vathu va di ni wusikoti wo xamalisa. Ene a hi ningile wusikoti wo pimisa. Wona wa hi vhuna ku txhatxha sikarato ni ku tivekela makungo a mbimo yi yi tako. (Mavingwa 2:11) Ene a hi ningile mtamo ti to hi kota ku hetisisa makungo athu. (Vafilipiya 2:13) A tshumete e hi ninga livhalo ali li ku mndani kwathu ti to li hi khumbutisa ka ta tinene ni to biha. Livhalo lathu la hi vhuna ti to hi vayilela txiwonho ni ku hi kawuka ka tiphazamo tathu.—Varoma 2:15.

2. Jehovha a lava ti to hi wu thumisa ngu nzila yihi wusikoti wathu?

² Jehovha a lava ti to hi thumisa wusikoti wathu ngu nzila ya yinene. Ngu ku txani? Nguko ene wa hi dhunda ni ku wa tiziva ti to hi na tsaka ngako hi txi yi thumisa ningo yoneyo. Ngu txikombiso ka mibhalo ya Txihebheru hi gonda tiya: “Makungo a  m’thu wa mapimo a manene ma veleka silo so tala” ni ku “totshe ti dianza dako di sikotako ku ti thuma, ti thume ngu wotshe mtamo wako”. (Mavingwa 21:5; Eklesiaste 9:10) Ka mibhalo ya Txigriki hi gonda tiya: “Ngu konaho, he maheni wunene ka votshe vathu,” ni ku “mmwane ni mmwane kwanu a na vhune vakwawe ngu txiningo txi a nga hiwa”. (Vagalatiya 6:10; 1 Pedro 4:10) Ngu ditshuri Jehovha a lava ti to hi maha ati ti no wuyelisa athu ni vamwane.

3. Ngu tihi ati athu hi si ti kotiko ku timaha?

³ Jehovha a lava ti to hi thumisa wusikoti wathu, kambe ene wa ku ziva aha hi tandekako kona. Ngu txikombiso, hi nge sikoti kuthavisa kwa mbi hetiseka, txiwonho, ni lifo. (1 Vafumeli 8:46) Ni ku kha hi na ku sikota kukongomisa wutomi wa vamwane nguko mmwane ni mmwane a fanete ku tisawulela. Ti singa ni mhaka ni ti to hi ni wusikoti mwendo wuzivi wo tala, kha hi na ku sikota kudingana ni Jehovha.—Isaya 55:9.

4. Hi na xolisisa txani ka msungo mhaka wuwa?

⁴ Mbimo yotshe hi fanete kutumelela Jehovha e hi kongomisa, e hi vhuna ka ti hi tandekako ku timaha. Jehovha a lava hi alakanya ngu nzila yo lulamisa sikarato sathu ni kuvhuna vamwane. (Lera Masalmu 37:3.) Ti lava hi “themba Jehovha ni kumaha ta tinene”. Ni ku hi “hanya ngu kuthembeka”. Hi nga ti mahisa ku txani toneto? He xolisiseni txikombiso txa Nowa, Dhavhidha, ni malanda mamwane o thembeka a Jehovha. Hi na wona ati va nga ti sa fanela ku timaha ni ti va nga ti fanete ku timaha.

5. Txhamusela txiemo txa Nowa.

⁵ Nowa a ti hanya ka ditiko di di nga ti “tate ngu wubihi” ni wubhemba. (Genesisi 6:4, 9-13) Hambiku ene a nga txi tiziva ti to Jehovha a na lovisa ditiko dile, Nowa kha tsakiswa ngu ti vathu va nga txi timaha. Ka txiemo txonetxo, ene a txi ti ziva ati a nga ti fanete ku timaha ni ti a nga ti sa fanela ku timaha.

6, 7. a) Ngu tihi ti Nowa a nga ti sa fanela ku timaha? b) Txiemo txhathu txi fana ni txa Nowa ngu nzila yihi?

⁶ Ati Nowa a nga ti sa fanela ku ti maha: Nowa ngu kuthembeka a txhumayete didungula da Jehovha do tisa ndambi, kambe kha sinzisa vathu ti to ve di amukela. Ni ku ene a si na ku tikota kumaha ti to ndambi yi hoka ngu txikuluveta. Nowa a ti fanete kuthemba txithembiso txa Jehovha txo heta wubihi, ni ku a ti kholwa ti to Jehova a ndina maha ta tinene ngu mbimo ya kona.—Genesisi 6:17.

⁷ Nanathu hi hanya ka mafu o tala ngu wubihi, futhi ha ti ziva ti to Jehovha a na ma lovisa. (1 Johane 2:17) Ngu mbimo kha hi na ku sikota kusinzisa vathu ti to ve tumela “mahungu a manene a Mfumo.” Ni ku kha hi na ku sikota kumaha ti to “kuxaniseka ka hombe” kuhoka ngu txikuluveta. (Matewu 24:14, 21) Kufana ni Nowa, hi fanete hi tsanisa likholo lathu, hi themba ti to Jehovha i singa kale a na heta wubihi. (Masalmu 37:10, 11) Ha kholwa ti to Jehovha kha na mbi leka mafu awa o biha me zumba mbimo yo lapha.—Habhakuki 2:3.

8. Nowa a ti ti vekisete ka txani? (Wona mfota wu wu ku makhatoni.)

 ⁸ Ati Nowa a nga ti fanete ku timaha: Hahanze ko e ti vekisela ka ti a nga ti sa fanela ku timaha, Nowa a ti ti vekisete ka ti a nga ti fanete ku timaha. Ngu kuthembeka Nowa a txhumayete didungula da Jehovha do wuyisa ndambi. (2 Pedro 2:5) Mthumo wonewo wu vhuni Nowa ti to e tsanisa likholo lakwe. I singeto dwe, ene a londisete txileletelo txa Jehovha e aka ngalava.—Lera Vahebheru 11:7.

9. Hi nga txi etetela ngu nzila yihi txikombiso txa Nowa?

⁹ Kufana ni Nowa, nathu hi ñolekile ngu “mthumo wa Mkoma”. (1 Vakorinto 15:58) Ngu txikombiso, nathu ha vhuneta ka ku aka ni kulungisa Tinyumba tathu ta Mfumo, kuvhuneta ka mitshangano ya txigava, ya m’ganga, kuya thuma Bhetele, mwendo kuthuma ka tihofisi ta wuhunduluxeli. Kambe txa lisima ngutu hi ñolekile ka mthumo wo txhumayela, awu wu tsanisako themba yathu ya mbimo yi yi tako. Mwanathu mmwane wa txisikati a wombile ti to mbimo yi a gelako vamwane ngu ta makatekwa a Mfumo wa Txizimu, a wona ti to vathu kha va nga ni themba ni ku va wona nga sikarato sawe si na mbi guma. Kufana ni mwanathu wuwa hi gela vathu ngu themba yi hi ku nayo. Themba yoneyo yi na hi vhuna kusimama hi emela wutomi wa mbimo yi yi tako!—1 Vakorinto 9:24.

10. Txhamusela txiemo txa Dhavhidha.

¹⁰ Mkoma Dhavhidha i ti wamwamna wo thembeka ni ku a ti mu dhunda ngutu Jehovha. (Mithumo 13:22) Hambi ti di ngeto, Dhavhidha a mahile wugango ni Bhetixebha, etxo i ti txiwonho txa hombe. I singeto basi, ene a zamile kusisa txiwonho txakwe ngu kumaha makungo ya ti to mwamna wa Bhetixebha i ku Uriya eya dawa yimbini. A tshumete e bhala dipapilo da nzila yi Uriya a nga ti fanete kudawa ngu yona! (2 Samueli 11:1-21) Ngu kutsimbila ka mbimo siwonho sa Dhavhidha si humelete ha kubasani. (Marku 4:22) Dhavhidha a angute ngu nzila yihi?

11, 12. a) Ngu tihi ti Dhavhidha a nga ti sa fanela ku timaha msana kova a di wonhile? b) Jehovha a na maha txani ngako hi txi tisola?

¹¹ Ati Dhavhidha a nga ti sa fanela ku timaha: Dhavhidha a sa fanela kusisa ati a nga ti maha. Ene ati fanete kumana wuyelo yo biha ya txiwonho txakwe ka wutomi wakwe wotshe. (2 Samueli 12:10-12, 14) Ti txi lava e va ni likholo. A ti fanete kuthemba ti to ngako a txi tisola, Jehovha a ndina mu divalela ni ku m’vhuna kutsanisela wuyelo ya simaho sakwe.

¹² Hotshethu ha wonha ngu mhaka ya kwa mbi hetiseka. Simwane siwonho i nga va i di sa hombe kupinda sa vamwane, ni ku ka timhaka timwane kha hi na ku sikota kuolela mati ya ma nga thekela. Ngu kufana ti  nga lava hi xaniseka ngu wuyelo ya simaho sathu. (Vagalatiya 6:7) Kambe hi txi themba txithembiso txa Txizimu hi hunduka, txona txi na hi khatalela ti to hi tsanisela timbimo to karata.—Lera Isaya 1:18, 19; Mithumo 3:19.

13. Dhavhidha a mahile txani ti to e wuyisela wuxaka wakwe ni Jehovha?

¹³ Ati Dhavhidha a nga ti fanete ku timaha: Dhavhidha ati fanete ku wuyisela wuxaka wakwe ni Jehovha. Ati mahisile ku txani toneto? Dhavhidha a tumelete Jehovha ti to e m’vhuna. Ngu txikombiso ene a tumete ku kawukwa ngu Jehovha ngu kuthumisa mprofeti Natani. (2 Samueli 12:13) Dhavhidha a kombete ka Jehovha ni ku a wombile siwonho sakwe na a txi kombisa ti to a lava wuxinji wa Jehovha. (Masalmu 51:1-17, Tradução do Novo Mundo) Hahanze ko zumbela ku tipfa mnando ngu mhaka ya siwonho sakwe, ene a gondile to kari. Ene kha tshumela e maha siwonho so fana ni soneso. Msana ka malembe ene a fite a di thembekile, ngu toneto Jehovha a ku ngadi e mu khumbula.—Vahebheru 11:32-34.

14. Hi nga gonda txani ka txikombiso txa Dhavhidha?

¹⁴ Hi nga gonda txani ka txikombiso txa Dhavhidha? I di ti to hi mahile siwonho sa hombe, hi fanete hi hunduka ngu ditshuri, hi womba siwonho sathu ka Jehovha ni kukombela ku divalelwa. (1 Johane 1:9) Ti lava hi ya gela madhota, nguko ona ma nga hi vhuna ti to hi wuyisela wuxaka wathu ni Jehovha. (Lera Jakobe 5:14-16.) Mbimo yi hi amukelako txivhuno txa Jehovha hi kombisa ti to ha txi themba txithembiso txakwe txo hi divalela. I singeto dwe, ti lava hi gonda ngu ka siwonho sathu ni kusimama hi thumela Jehovha ngu kuthembeka.—Vahebheru 12:12, 13.

15. Hi gonda txani ka txikombiso txa Ana?

¹⁵ Ti nga maheka u txi khumbula malanda mamwane o thembeka aya ma ku mu ka Bhiblia aya ma nga themba Jehovha ni kumaha ati ma nga ti kota hambi ma di ka siemo so nemela. Alakanya ngu txikombiso txa Ana awu a nga ti singa ni mwanana. Ene a si na ku sikota kutxitxa txiemo txakwe. Ana a ti themba ti to Jehovha a na m’vhuna. Ene a simamile e khozela dithepeleni ni kumaha mkombelo ka Jehovha e mu gela txikarato txakwe. (1 Samueli 1:9-11) Hi nga wona txikombiso txa txinene kwathu! Txikombiso txiya txi hi gondisa ti to mbimo yi hi ku ni txikarato txa malwati mwendo simwane asi hi tandekako ku si txitxa, hi nga si veka masoni ka Jehovha ni ku ene a na hi khatalela. (1 Pedro 5:6, 7) Ni ku hi nga maha ti hi nga ti kotako ti to hi va ho ka mitshangano ya wukristu ni yimwane mitshangano ayi sengeletano ya Jehovha yi hi ningako yona.—Vahebheru 10:24, 25.

16. Vaveleki va nga gonda txani ka txikombiso txa Samueli?

 ¹⁶ Ku wombwa txani ngu vaveleki ava va ku ni vanana va va nga leka kuthumela Jehovha? Mprofeti Samueli kha sinzisa vanana vakwe va hombe ti to ve simama ve thembeka ka Txizimu. (1 Samueli 8:1-3) Ene a ti lekile manzani ka Jehovha. Samueli a mahile ati a nga tikota ti to e simama e thembeka ka Txizimu ni ku txi tsakisa kota Tate wakwe wa nzumani. (Mavingwa 27:11) Vaveleki vo tala va i ku makritstu nyamsi va ka txiemo txi txi fanako. Kufana ni Samueli vona va thembeka kufana ni tate awu Jesu a nga wombawomba ngu ngene ka txidinganiso txakwe txa mwanana wo mwalala. Jehovha mbimo yotshe a tiemisete kuhoyozela avale va lekako siwonho sawe ve hunduka. (Luka 15:20) Mbimo yotshe vaveleki va ti vekisela ko simama ve thembeka ka Jehovha, va di ni themba ya ti to txikombiso txawe txi nga kuzeta vanana vawe ti to ve tshumelela ka Jehovha.

17. Txikombiso txa noni txi hi kuzeta ngu nzila yihi?

¹⁷ Txikombiso tximwane txa txinene nja noni ya txisiwana ya mbimoni ya Jesu. (Lera Luka 21:1-4.) Yona kha ya maha wukanganyisi wu wu nga ti mahwa dithepeleni, ni ku kha ya txitxa txiemo txa yona txa wusiwana. (Matewu 21:12, 13) Kambe kuthembeka ka yona ka Jehovha ku yi kuzetile ti to yi seketela wukhozeli wa ditshuri. Yona yi ti ni wuha ni ku yi ningete “simaleana simbidi” i ku yona male yi yi nga ti nayo basi. Wamsikati wuwa wo thembeka a kombisile ngu ditshuri ti to a ti themba Jehovha. A txi ti ziva ti to atxi veka Jehovha ka wukhalo wo khata, ene a ndina enelisa silaveko sakwe. Nathu hi nga tsaniseka ti to hi txi veka Mfumo wa Txizimu ka wukhalo wo khata Jehovha a na enelisa silaveko sathu.—Matewu 6:33.

18. Ngu wuhi wusungukati wa Malcolm?

¹⁸ Wungi wa vanathu ni tindiyathu nyamsi va kombisa ti to va themba Jehovha ngu ku tivekisela ka ti va nga ti kotako kumaha i singa ka ti va si ti kotiko. He bhule ngu txikombiso txa mwanathu wu a dhanwako ku i Malcolm, awu a nga simama e thembeka kala kuza a txi fa ngu 2015. Kudingana mbimo yo lapha ene ni msikati wakwe va thumete Jehovha ni ku va wonisanile ni timbimo ta tinene ni to biha. Ene a wombile tiya: “Mbimo yimwane wutomi wu txi hi nemelela,” a tshumete a txi khene “Kambe Jehovha wa katekisa avale va thembekako kwakwe”. Ngu wuhi wusungukati wa Malcolm? Akhene: “Maha mkombelo ti to u kota kumaha ti u nga ti kotako ka mthumo wa Jehovha. Ti vekisele ka ti u ti kotako i singa ka ti u si tikotiko.” *—Wona txhamuselo ya hahatshi.

19. a) Ngu ku txani ndimana yathu ya dilembe ya 2017 i di ya yinene? b) U nga yi thumisa ngu nzila yihi ndimana ya dilembe ya 2017 ka wutomi wako?

¹⁹ Ditiko diya do biha diya di txi “karata ngutu.” Sikarato ni sona siya si txi engeteleka. (2 Timoti 3:1, 13) Txa lisima ngutu ngu kuva hi si tumeleli ti to sikarato sathu si hi godholisa. Konkuwa i mbimo yo hi va ni themba yo tsana ka Jehovha ni ku tivekisela ka ti hi ti kotako kumaha. Ngu toneto ndimana yathu ya dilembe ya 2017 yi hi kuzetako yi txi: “Themba MKOMA u txi maha ta tinene”!—Masalmu 37:3.