1. Yehova katangile atu ni uhashi uka?

YEHOVA katangile atu ni uhashi weka ni weka. Katwehele uhashi wakunyonga, uze wakutukwasa tuhwise milonga ni kutesa yuma yize mutukalinga kulutwe lia matangwa. (Yishima 2:11) Katwehele ndundo, hanga tuhase kulinga yuma yize hitunatese kulu ni kuyimanununa. (A-Fwilipu 2:13) Hanatwehe nawa shimbi yipema ya mbunge, nyonga lia kunyingika upi ni upeme uze tuli nawo mu mbunge yetu. Shimbi yipema ya mbunge yetu yakutukwasa hanga twehuke kulinga shili ni kuhona kufunyina-funyina upi uze hitunalingi.—A-Roma 2:15.

2. Kuchi Yehova anazange hanga tuzachise uhashi uze hanatwehe?

² Yehova kanazange hanga tuzachise kanawa uhashi uze hanatwehe. Mumu liaka? Mumu kakutuzanga nawa kananyingika ngwenyi, mutuwahilila nyi mutuzachisa kanawa yawana yize hanatwehe. Chakutalilaho, mu Yisoneko ya Hepreu, twakutanga ngwo: “Manyonga a yipalakata katwala ku kulumbama  wika,” nawa ngwo, “cheswacho moko je mawana kulinga, chilinge ni ngolo je jeswe.” (Yishima 21:5; Chilumbununyi 9:10) Mu Yisoneko ya Ngregu twakutanga ngwo: “Shimbu tuchili ni mwaka, tulingenu yipema kuli atu eswe,” nawa ngwo, “mutu mweswe hanatambula chawana cha vumbi, alinge nacho nikulita umwe kuli mukwo.” (A-Ngalashia 6:10; 1 Petulu 4:10) Chochene, Yehova kanazange hanga tulinge yize mutuhasa hanga tuyuke ni kuyukisa akwetu.e

3. Yuma yika yize atu keshi kuhasa kulinga?

³ Yehova kanazange hanga tuzachise uhashi uze hanatwehe, alioze aye kananyingika ngwenyi, tuchi kuhasa kulinga kanawa yuma yeswe. Chakutalilaho, yetu kutuchikuhasa kuhwisa uhenge, shili ni kufwa. (1 Mianangana 8:46) Chikwo nawa, kutuchi kuhasa kusongwela mwono wa atu akwo, mumu mutu ni mutu kali ni ulite wakusakula yize malinga ku mwono wenyi. Nawa chipwe ngwe tukwete yinyingi hanji tunanyingika yuma yinji, nihindu kutuchi kuhiana Yehova.—Izaia 55:9.

4. Yika mutuhengwola ha mutwe uno?

⁴ Twatamba mashimbu eswe kwita kuli Yehova hanga atusongwele, ha kumufuliela ngwetu, matufunga ni kutukwasa kulinga yuma yize yetwene kutuchi kuhasa kulinga. Chikwo nawa, Yehova kanazange hanga tunyonge ha yize mutuhasa kulinga hanga tuhwise milonga yetu ni kukwasa akwetu. (Tanga Samu 37:3.) Kashika twatamba ‘kufuliela muli Yehova ni kulinga yuma yipema.’ Nawa twatamba ‘kwenda mu ululi.’ Kuchi mutuhasa kuchilinga? Tuhengwolenu chilweza cha Noa, Ndawichi ni tuvumbi akwo ashishika a Yehova waze afulielele  muli iye. Yilweza yacho, muyitukwasa kunyingika ngwetu, kwapwile yuma yize ayo kakahashile kulinga, chipwe chocho, yalihulikila ha yuma yize te mahasa kulinga.

5. Lumbununa lusango wa Noa.

⁵ Noa katwamine hashi haze hapwile ha “too ni upupilo” hamwe ni utanji. (Uputukilo 6:4, 9-13) Chipwe ngwe te kananyingika ngwenyi, Yehova manongesa hashi hacho hapi, nihindu Noa te keshi kwivwa kupihia ha yize atu te akulinga. Ha mashimbu jacho Noa yanyingika ngwenyi, kwapwile yuma yize iye te kechi kuhasa kulinga, chipwe chocho, yanyingika nawa ngwenyi, kwapwile yize te mahasa kulinga.

6, 7. (a) Yika Noa te keshi kuhasa kulinga? (b) Kuchi mwono uze tulinawo musono unalifwa ni wa Noa?

⁶ Yuma yize Noa te kechi kuhasa kulinga: Noa nyi ushishiko weswe yambujola sango ja utowezo wa Yehova, chipwe chocho, aye te keshi kushinjila atu hanga ajitayize. Nawa te keshi kuhasa kuneha kawashi-washi Sanga lia Meya. Noa kafulielele ngwenyi Yehova te mamanununa chilakenyo Chenyi cha kuhwisa upi weswe, nawa ngwenyi, te machilinga ha shimbu lialita.—Uputukilo 6:17.

⁷ Ni yetu twatwama hashi ha too ni yuma yipi, yize tunanyingika ngwetu, Yehova hanalakenya kuyinongesa. (1 Yoano 2:17) Chipwe chocho, kutuchi kuhasa kushinjila atu hanga atayize “sango lipema lia Wanangana.” Nawa kutushi kuhasa kulinga nichimwe chize muchineha “luyinda munene” kawashi-washi. (Mateu 24:14, 21) Ngwe Noa, ni yetu twatamba kukolesa ufulielo wetu, ni kujikijila ngwetu, kwasala hakehe Zambi mahwisa upi weswe. (Samu 37:10, 11)  Tukwete shindakenyo ngwetu, Yehova kechi kwecha hano hashi hapi hanga hanunge mashimbu anji kuhiana tangwa lize iye hanatese.—Habakuke 2:3.

8. Ha yika Noa alihulikile? (Tala chizulie ha uputukilo.)

⁸ Yuma yize Noa te mahasa kulinga: Shimbu alihulikile ku yuma yize te kechi kuhasa kulinga, Noa yalihulikila ha yize te mahasa kulinga. Hachino, ni ushishiko weswe Noa yambujola sango ja utowezo wa Yehova. (2 Petulu 2:5) Mulimo uno kota wamukwashile hanga anunge ni kukolesa ufulielo wenyi. Chikwo nawa, aye kakawile kanawa usongwelo wa Yehova ha kutunga ulungu.—Tanga A-Hepreu 11:7.

9. Kuchi mutuhasa kwimbulula chilweza cha Noa?

⁹ Ngwe Noa, tunungenu ni kuhondangana “milimo ya Mwene.” (1 A-Korindu 15:58) Chakutalilaho, mutuhasa kukwasa kutunga ni kululieka Mazuwo a Wanangana ni Mazuwo a Kukunguluka cha mambonge, ni kukwasa ha kukunguluka cha mbonge ni cha mambonge, hanji kukalakala ku mutangu chipwe ku chipatulo cha akwa-kulumbununa. Chuma chahiana, tunungenu ni kwambujola chinji sango lipema, mumu chino muchikolesa kutalatala chetu cha kulutwe lia matangwa. Umwe pangi washishika yamba ngwenyi, muze akuhanjika ni akwo hakutwala ku yiwape ya Wanangana wa Zambi, iye kakumona ngwenyi atu keshi ni kutalatala chingunu, nawa ngwenyi ayo kakunyonga ngwo milonga yo yili ya mutolo. Ngwe chize amba pangi yono, etu tukwete kutalatala, nawa kutalatala chacho chakukola muze mutuchilweza akwetu. Kutalatala chino chakutukwasa hanga tununge mu kuzomboka chize muchikatwaha mwono wa mutolo!—1 A-Korindu 9:24.

10. Lumbununa lusango wa Ndawichi.

¹⁰ Mwanangana Ndawichi kapwile lunga washishika, nawa Yehova te kakumuzanga chinji. (Yilinga 13:22) Chipwe chocho, Ndawichi kalingile utanji ni Bate-Shipa, yino yapwile shili yinene. Chikwo nawa, aye yeseka kusweka shili yenyi ha kutuma kusa lunga lia Bate-Shipa, Uriya kulutwe lia jita hanga amushihe. Ndawichi nawa yatuma Uriya kumbata mukanda uze te uli ni usongwelo wa chize atamba kumushiha. (2 Samuele 11:1-21) Chipwe chocho, shili ya Ndawichi yasolokele. (Marku 4:22) Muze yapwile chocho, mba yika Ndawichi alingile?

11, 12. (a) Muze te havulumuna, yika yize Ndawichi kakahashile kulinga? (b) Yika Yehova malinga hali yetu nyi twalikonyeka ni mbunge yeswe?

¹¹ Yuma yize Ndawichi te kechi kuhasa kulinga: Ndawichi te keshi ni uhashi wakwehuka yuma yize te hanalingi kulu. Kwamba umwenemwene, shili yize alingile te muyimunehena lamba ku mwono wenyi weswe. (2 Samuele 12:10-12, 14) Kashika aye te kanafupiwa ufulielo. Te katamba kufuliela ngwenyi nyi malikonyeka ni mbunge yeswe, Yehova te mamukonekena ni kumukwasa  hanga akumbe yipikalo yize te mamona mumu lia yitanga yenyi.

¹² Yetweswe twakuvuluma mumu tuli akwa-shili. Alioze uhenge umwe uze twakulinga unene kuhiana ukwo, nawa kanji-kanji tushi kuhasa kwalumuna uhenge uze hitunalingi. Kashika, ni yetu mutuhasa kumona lamba mumu lia yitanga yetu. (A-Ngalashia 6:7) Chipwe chocho, tunafuliela mu chilakenyo cha Zambi ngwo, nyi twalikonyeka, aye matukwasa ha matangwa alamba, chipwe ngwe lamba liacho linakatuka ku upi uze twalingile.—Tanga Izaia 1:18, 19; Yilinga 3:19.

13. Kuchi Ndawichi aluliekele usepa wenyi ni Yehova?

¹³ Yuma yize Ndawichi te mahasa kulinga: Ndawichi kazangile chinji kululieka usepa wenyi ni Yehova. Kuchi iye achilingile? Aye kechele hanga Yehova amukwase. Chakutalilaho, yatayiza fumbo lia Yehova kupalikila muli profeta Natane. (2 Samuele 12:13) Ndawichi nawa yalemba kuli Yehova hakumulweza shili yenyi, chino chasolwele pundu ngwenyi, te kanafupu nawa utayizo wa Yehova. (Samu 51:1-17) Shimbu apwe ni manyonga api ha upi uze alingile, Ndawichi yawana fumbo linene ha upi wenyi. Aye kakalingile nawa shili yacho yinene. Hakupalika cha miaka, yafwa ni ushishiko wenyi, kashika Yehova akumwiwuluka.—A-Hepreu 11:32-34.

14. Yika mutuhasa kulilongesa ha chilweza cha Ndawichi?

¹⁴ Yika mutuhasa kulilongesa ha chilweza cha Ndawichi? Twalilongesa ngwetu, nyi twalinga shili yinene, twatamba kulikonyeka ni mbunge yeswe, ni kulweza Yehova shili yetu, ni kumwita hanga atukonekene. (1 Yoano 1:9) Twatamba nawa kuhanjika ni makulwana amu chikungulwila, mumu ayo mahasa kutukwasa hanga tululieke usepa wetu ni Yehova. (Tanga Tiangu 5:14-16.) Nyi twatayiza ukwaso wa Yehova, mutusolola ngwetu tunafuliela ha chilakenyo chenyi cha kutukonekena. Chikwo nawa, twatamba kuwana fumbo ha upi wetu ni kununga kuwayila Yehova ni ushishiko weswe.—A-Hepreu 12:12, 13.

15. Yika mutuhasa kulilongesa ha chilweza cha Hana?

¹⁵ Kota mutuhasa kunyonga hali tuvumbi akwo ashishika mu Mbimbiliya waze afulielele muli Yehova, muze alingile yize te mahasa ha mashimbu akalu ku mwono wo. Chakutalilaho, ha amwe mashimbu Hana te keshi kushita. Alioze aye te keshi ni uhashi wakuhwisa yipikalo yenyi. Chipwe chocho, aye yafuliela ngwenyi, Yehova te mamutakamisa. Kashika anungine ni kuwayila ku tabernakulu ni kulemba kuli Yehova hanga amulweza chize te akwivwa. (1 Samuele 1:9-11) Chino chili chilweza chipema hali yetu! Muze tunayiji hanji yipikalo yikwo yize tuchi kuhasa kuhwisa, twatamba kuhana yipikalo yacho kuli Yehova ni kufuliela ngwetu, matukwasa. (1 Petulu 5:6, 7) Nawa twakusa tachi hanga tuye kukunguluka chetu cha akwa-Kristu ni kukunguluka  cheka ni cheka chize Yehova akutululiekela.—A-Hepreu 10:24, 25.

16. Yika yisemi mahasa kulilongesa kuli Samuele?

¹⁶ Kuchi mutwamba kuli yisemi ashishika waze ana jo haneche kuwayila Yehova? Profeta Samuele kakahashile kushinjila ana jenyi waze te hakola hanga anunge ni kushishika kuli Zambi. (1 Samuele 8:1-3) Aye katambile kukunjika chikuma chacho mu moko ja Yehova. Chipwe chocho, Samuele kasele tachi hanga ashishike kuli Zambi ni kununga kuhalisa Tato wa mu malilu. (Yishima 27:11) Musono, akwa-Kristu anji kali ni kapalia yomwene. Ayo kakufuliela ngwo, ngwe tata wa chishima cha Yesu cha mwana chimwangi, Yehova kakutambula yivulumunyi waze akulikonyeka. (Luka 15:20) Hachino, yisemi mahasa kulihulikila ha ushishiko wo kuli Yehova, ni kushimbwila ngwo yilweza yo muyikwasa ana jo hanga afune kuli Yehova.

17. Mumu liaka chilweza cha tuliwa chiswale chinatukolweza?

¹⁷ Chilweza chikwo chipema chili cha chiswale tuliwa ha matangwa ja Yesu. (Tanga Luka 21:1-4.) Aye te keshi kuhasa kulinga nyichimwe hakutwala ku kalimbalimba yoze wapwile mu tembele, nawa te keshi kuhasa kwalumuna mwono wenyi wa uswale. (Mateu 21:12, 13) Alioze ufulielo wenyi muli Yehova wamulingishile hanga akwase uwayilo wamwenemwene. Kapwile chihanyi, kashika ahanyine “tumbongo tukepe twaali,” tuze wika apwile natwo. Pwo yono washishika kafulielele muli Yehova ni ungunu weswe. Kanyingikine ngwenyi, nyi masa mulimo wa Yehova kulutwe ku mwono wenyi, Yehova mamwaha yeswe yize mafupa. Chizechene nawa, twakufuliela ngwetu, nyi twasa Wanangana wa Zambi kulutwe ku mwono wetu, Yehova kumatwaha yuma yize mutufupa.—Mateu 6:33.

18. Hana chilweza cha umwe ndumbu yoze te ukwete nyonga lialita.

¹⁸ Musono, mandumbu ni mapangi jetu anji, kakusolola ufulielo wowene muli Yehova ha kujikijila ha yize mahasa kulinga, hi ha yize keshi kuhasa kulinga ko. Tutalenu umwe ndumbu avuluka ngwo Malcolm yoze washishikile ndo ha kufwa chenyi ha mwaka 2015. Ha miaka yeswe yize te akuwayila Yehova hamwe ni mukwo-pwo, te kakupwa ha mashimbu apema ni api. Yamba ngwenyi: “Mu mwono mwakusoloka yuma susumuku, yize kuyalitele, nawa yikalu kukinda. Chipwe chocho, Yehova kakuwahisa waze akumujikijila.” Chiyulo chika ndumbu Malcolm anatwehe? “Aye ngwenyi, twitenu mu yilemba yetu hanga tupwe yikilikita ni kukalakala chinji mulimo wa Yehova, ndo haze mutuhashila. Nawa tulihulikilenu ha yize mutuhasa kulinga, hi ha yize kutuchi kuhasa kulinga ko.” *—Tala maliji mushi lia lifwo.

19. (a) Mumu liaka chisoneko chetu cha mwaka 2017 chinalite kanawa? (b) Kuchi mukaula chisoneko cha mwaka 2017 ku mwono we?

¹⁹ Hashi hano hapi kuhanayi ni ‘kupihia kuhiana,’ kashika mutuhasa kushimbwila matangwa akalu chinji kuhiana. (2 Timoteu 3:1, 13) Hachino, kutwatambile kwecha yipikalo yetu hanga yinunge ni kutulemeka ku mbunge. Alioze twatamba kukolesa ufulielo wetu muli Yehova ni kulihulikila ha yuma yize mutuhasa kulinga. Kashika, chisoneko chetu cha mwaka 2017 chinalite kanawa, mumu chinambe ngwo: ‘Fuliela muli Yehova, nawa linga yuma yipema’!—Samu 37:3.