1. Fa Yehofa meke libisama?

YEHOFA meke libisama a wan foondoo fasi. Yehofa meke u man denki. A sani ya e yeepi u fu man losi polobelema anga fu denki a fesi fa wi o du sani aini a ten di e kon (Odo 2:11). A gi u kaakiti tu fu man du den sani di u wani du (Filipisama 2:13). Boiti dati a gi u wan kosensi di e yeepi u fu sabi san bun anga san á bun. U kosensi e yeepi u fu luku bun fu wi á sondu. Te u meke wan fowtu, ai yeepi u tu fu du sani di o yeepi u fu toon Yehofa mati baka.—Romesama 2:15.

2. Fa Yehofa wani u wooko anga den sani di a gi wi?

² Yehofa wani u wooko anga den sani di a gi u, a wan bun fasi. Saide? A di a Iobi u. A sabi tu taki efu u wooko a wan bun fasi anga den kado di a gi u, u libi o waka bun. Wi e leisi aini den Hebrew buku fu Beibel taki: „Te wan  sama e wooko taanga, da den sani di a wani du o waka bun.” Wi e leisi tu taki: „Ala san i fende fu du anga yu ana, du en anga ala i kaakiti” (Odo 21:5; Peleikiman 9:10). Wi e leisi aini den Giiki buku fu Beibel taki: „Solanga wi abi a okasi, u mu du bun gi taawan.” Wi e leisi tu taki: „Leti enke fa ala u fende a koni fu man du son sani, a so u mu koboloiki a koni de, fu dini makandaa” (Galasiyasama 6:10; 1 Peitilisi 4:10). Den sani ya e soi taki Yehofa wani u meke moiti fu du sani di o tyai wini gi wi anga taawan.

3. San libisama á poi du?

³ Yehofa wani u wooko anga ala den sani di a gi wi, ma a sabi taki wi á poi du ala sani. Wi á poi puu sondu anga dede (1 Kownu 8:46). Wi á poi meke taawan du sani enke fa u wani tu, bika ala sama abi a okasi fu du sani enke fa a wani. Boiti dati, winsi fa u koni, winsi fa wi abi ondoofeni, toku wi á poi doo Yehofa.—Yesaya 55:9.

4. San wi o luku aini a artikel ya?

⁴ U mu gi Yehofa a okasi fu tii wi ala yuu. U mu e biibi taki a o yeepi u. A poi du sani gi u di useefi á poi du. Winsi fa a poi yeepi u, toku a wani useefi meke moiti fu losi polobelema. A wani u meke moiti fu yeepi taawan tu. (Leisi Psalm 37:3.) U mu ’fitoow Yehofa, da u du bun’. U mu „du sani anga wan kiin-ati”. Fa wi o man du a sani ya? Meke u luku fa Nowa, David anga wantu taa sama di be e dini Yehofa anga  den hii ati, be e fitoow en. Wi o si taki den á be poi du ala sani, ma den be e poti pakisei a den sani di den be poi du.

5. Fa a goontapu be de na a ten fu Nowa?

⁵ Nowa be e tan aini wan goontapu di „be ogii” (Genesesi 6:4, 9-13). Winsi fa a be sabi taki Gadu be o poli a ogii goontapu, toku a fasi fa den sama be e libi be e fooseli en. Nowa be sabi taki a á be poi du son sani, ma a be sabi taki sani de di a be poi du

6, 7. (a) San Nowa á be poi du? (b) Saide u sa taki a sani di be miti Nowa e miti u tu?

⁶ Sani di Nowa á be poi du: Nowa be e taigi den sama san Yehofa be o du anga a goontapu, ma a á be poi dwengi den sama fu daai den libi. A á be poi meke a fuudu kon moo gaw tu. Nowa be mu fitoow Yehofa. A be mu biibi taki Yehofa o kii den ogii sama na a ten di a poti, leti enke fa a be paamisi.—Genesesi 6:17.

⁷ Useefi de a wan goontapu di lai ogii. U sabi taki Yehofa o poli a goontapu ya tu (1 Yohanisi 2:17). Ma winsi fa u sabi a sani de, toku wi á poi dwengi sama fu aliki a „bun nyunsu fu a Kownukondee”. Wi á poi meke a „gaan banowtu” bigin moo gaw tu (Mateyesi 24:14, 21). U mu meke moiti fu taanga u biibi enke fa Nowa biibi be taanga. U mu biibi taki dyonson Gadu o puu ala ogii a goontapu (Psalm 37:10, 11). U sabi taki solanga a dei fu Yehofa doo,  a o poli a ogii goontapu ya.—Habakuk 2:3.

8. San Nowa be e poti pakisei? (Luku a fowtow na a bigin.)

⁸ Sani di Nowa be poi du: Nowa ati á be boon fu di a á be poi du son sani, ma a be e poti pakisei a den sani di a be poi du. A be e paati a bosikopu fu Yehofa gi den sama anga en hii ati (2 Peitilisi 2:5). A sani ya be taanga en biibi. A ná peleiki wawan a be e peleiki, ma a be meke a ark tu enke fa Yehofa be taigi en.—Leisi Hebrewsama 11:7.

9. Fa u sa waka a Nowa baka?

⁹ Wi e „wooko taanga gi Masaa” leti enke fa Nowa be e wooko taanga gi en (1 Korentesama 15:58). Kande wi e yeepi meke efuso seeka Kownukondee zaal anga den peesi pe wi e holi gaan komakandaa. Kande wi e yeepi du son wooko a den gaan komakandaa, wan beikantoo efuso wan kantoo pe den e poti buku go aini taa tongo. Ma a moo pelensipali sani di u mu du na a peleikiwooko, bika a sani ya e yeepi u fu taanga u biibi gi a ten di e kon. Wan sisa taki, te ai taigi taawan sowtu wini a Kownukondee o tyai gi libisama, da ai si taki den sama aini a goontapu ná abi howpu. Den e si enke den polobelema fu den o tan fu teego. Useefi abi wan howpu, leti enke a sisa ya. Te wi e taki anga taawan fu a howpu ya, u biibi e moo taanga. A howpu ya e yeepi u fu holidoo te na a kaba.—1 Korentesama 9:24.

10. Sowtu fowtu David be meke?

¹⁰ Kownu David a wan man di biibi be taanga. Yehofa be lobi en (Toli 13:22). Tokuso a be du wan gaan sondu, bika a be didon anga Batseiba. Ma a du wan moo gaan ogii fu di á be wani kibii a taki. A meke sama kii Uriya, a man fu Batseiba, aini wan feti. David meke Uriya seefi tyai a biifi pe be sikiifi taki Uriya mu dede (2 Samuweli 11:1-21). Toku bakaten sama be kon sabi san David du (Malikisi 4:22). San David du di a sani ya pasa?

11, 12. (a) San David á be poi du anga den sondu fi en? (b) San Yehofa o du efu u kengi a fasi fa u be e libi?

¹¹ Sani di David á be poi du: David á be poi puu den fowtu di a be meke. A be abi fu tan teke den bakapisi fu den sondu fi en, en hii libi (2 Samuweli 12:10-12, 14). Neen meke en biibi be mu taanga. A be mu biibi taki efu a be kengi, Yehofa be o gi en paadon. A be mu biibi tu taki Yehofa o yeepi en fu holidoo, winsi fa a be o go e fii den bakapisi fu den sondu fi en.

 ¹² Wi a sondu libisama, neen meke ala wi e meke fowtu. Ma son wan fu den fowtu di wi e meke, e bigi moo son wan. Son leisi te u du wan sani kaba, wi á poi kengi en moo. Wi abi fu tan teke den bakapisi fi en (Galasiyasama 6:7). Ma wi e biibi taki efu u kengi, Yehofa o yeepi u fu holidoo. A nai luku taki a useefi suku en.—Leisi Yesaya 1:18, 19; Toli 3:19.

13. San David du fu toon Yehofa mati baka?

¹³ Sani di David be poi du: David be wani meke en bun anga Yehofa. Fa a du a sani ya? David be gi Yehofa a okasi fu a yeepi en. Di a polofeiti Natan taki anga en, a aliki (2 Samuweli 12:13). David begi Yehofa, neen a taigi en taki a sondu. A sani ya e soi taki a be wani Yehofa gi en paadon tuutuu (Psalm 51:1-17). A be hati David taki a du wan gaan sondu, ma a sani de á meke a fii booko-saka pasa peesi. A leli wan sani fu den fowtu fi en. Noiti moo a du a gaan sondu de. David dini Yehofa omen yali ete. A dede enke wan man di biibi be taanga. Te anga a dei fu tide Yehofa e si David enke wan sama di biibi be taanga ete.—Hebrewsama 11:32-34.

14. San a toli fu David e leli u?

¹⁴ San a toli fu David e leli u? Efu u meke wan gaan fowtu, u mu kengi. U mu taigi Yehofa kiin taki u sondu, da u begi en fu a gi u paadon (1 Yohanisi 1:9). U mu taigi den owluman tu, bika den poi yeepi u fu toon Yehofa mati baka. (Leisi Yakowbesi 5:14-16.) Efu wi e du sani enke fa Yehofa e soi u, da wi e soi taki wi e biibi taki a o gi u paadon enke fa a paamisi u. Boiti dati u mu kisi koni. Wi á mu meke den fowtu de moo, da u dini Yehofa go doo anga u hii ati.—Hebrewsama 12:12, 13.

15. San a toli fu Hana e leli u?

¹⁵ Kande i sabi taa futuboi fu Yehofa di be e fitoow en. Den sama ya be e du san den be poi di polobelema be e miti den. Wan fu den sama ya a Hana. Wan pisiten a á be poi meke pikin. Enseefi á be poi losi a polobelema ya. Ma a be sabi taki Yehofa be o toosutu en. Neen meke a be e go na a tabernakel ala yuu fu dini Yehofa enke fa a be gwenti. A be e taigi Yehofa ala san de neen ati (1 Samuweli 1:9-11). Hana a wan sama di u sa waka neen baka. Te u siki efuso te wi abi taa polobelema di wi á poi losi, wi e fika en gi Yehofa, bika wi e biibi taki a o yeepi u (1 Peitilisi 5:6, 7). Wi e du ala san u man tu fu fende wini fu den komakandaa anga den  taa sani di a olikanisâsi seeka gi u.—Hebrewsama 10:24, 25.

16. San a toli fu Samuweli e leli mma anga dda?

¹⁶ Fa fu den mma anga dda di abi pikin di nai dini Yehofa moo? Samuweli á be poi dwengi den boi fi en fu dini Gadu (1 Samuweli 8:1-3). A be abi fu fika a toli gi Yehofa. Samuweli be e du ala san a be man fu dini Gadu anga en hii ati. A be du ala san a be man fu meke Yehofa piisii (Odo 27:11). A omen mma anga dda a sani ya e miti aini a ten ya. Ma den e biibi taki Yehofa de kabakaba fu gi den sama di kengi a fasi fa den e libi paadon, leti enke a dda fu a ageisitoli fu a lasi manpikin (Lukasi 15:20). Ma a pisiten di den pikin nai dini Yehofa moo, mma anga dda mu e meke moiti fu denseefi á gwe fika Yehofa. Da kande a fasi fa den e tyai denseefi o yeepi den pikin fu kon dini Yehofa baka.

17. Saide a toli fu a pooti uman e gi u taanga-sikin?

¹⁷ Wan taa sama di u sa waka neen baka, na a pooti uman fu a ten fu Yesesi. (Leisi Lukasi 21:1-4.) A á be poi tapu den sama di be e tyai denseefi a wan fa ná fiti fasi aini a tempel. A á be poi du wan sani fu kon gudu tu (Mateyesi 21:12, 13). Ma a fitoow di a be e fitoow Yehofa yeepi en fu holibaka gi a tuu biibi. A uman ya „poti tu kopoo sensi” aini a moni kedee. Na a moni ya wawan a be abi. A soi taki a be e fitoow Yehofa anga en hii ati. A be sabi taki efu a poti a dini fu Yehofa a fesi, a o yeepi en fu fende den sani di a abi fanowdu. A so useefi e biibi taki efu u poti a Kownukondee a fesi, Yehofa o yeepi u fu fende san wi abi fanowdu.—Mateyesi 6:33.

18. Gi wan toli fu wan baala di be e poti pakisei a den sani di a poi du.

¹⁸ A omen baala anga sisa fu a ten ya e fitoow Yehofa tu. Den nai booko den ede anga san den á poi du, ma den e poti pakisei a san den poi du. Wan baala den e kai Malcolm, holidoo te enke a dede aini 2015. Den somen yali di en anga en uman be e dini Yehofa, a ná ala yuu sani be e waka enke fa den wani. A baala ya taki: „Son leisi a wanboowanboo sani e miti i. Son yuu a libi e taanga. I nai sabi san i mu du, ma Yehofa e belesi den sama di e holidoo.” San be yeepi a baala ya? A taki: „Begi Yehofa fu a yeepi i fu du san i poi gi en. Begi en tu fu a yeepi i fu fende wini fu san yu e du gi en. Poti pakisei a den sani di i poi du, ná poti pakisei a san yu á poi du.” *—Luku a maiki a ondoo.

19. (a) Saide a tekisi fu 2017 e gi u taanga-sikin? (b) Fa yu o wooko anga san sikiifi aini a tekisi ya?

¹⁹ A goontapu ya e ogii namo, neen meke u mu holi a pakisei taki moo polobelema o miti wi (2 Timotiyesi 3:1, 13). Wi á mu meke den sani di e miti u, meke u lasi-ati, moomoo aini den lasiti dei ya. U mu fitoow Yehofa anga u hii ati, da u poti pakisei a san u poi du. Neen meke a tekisi fu 2017 o gi u taanga-sikin. A tekisi ya taki: „Fitoow Yehofa, da i du bun.”—Psalm 37:3.