1. ¿Jehovakwe ni kä tibienbätä sribebare ye ngwane ni töi keta kabre ütiäte ye meden meden mikani kwe?

JEHOVAKWE ni kä tibienbätä sribebare ye ngwane ni töi keta kabre ütiäte mikani kwe. Ni töi mikani kwe töbikakäre, ye tä ni dimike kukwe tä nemen ni kisete ye ükete aune kukwe ükete nuaindre jai ja känenkäre (Proverbios 2:11). Arato ni töi mikani kwe kukwe ükaninte nikwe nuaindre jai ja känenkäre ye nuainkäre aune mikakäre nemen bare (Filipenses 2:13). Aune ni töi mikani kwe ye tä dre kwin aune dre abokän blo ye mike gare nie. Ni töi ye tä ni dimike ja mika ngite ye tuenmetre aune nita ja mike ngite yebätä tä ni dimike ja töi ükete (Romanos 2:15).

2. ¿Jehovakwe ni töi keta kabre ütiäte mikani yebiti tö ni tuai dre nuainne?

² Jehovakwe ni töi keta kabre ütiäte mikani yebiti tö ni tuai kukwe kwin nuainne ñobätä ñan aune ni tare kwe bätä tö ni tuai nüne kä jutobiti. Ñodre, Kukwe Tikani Hebreore yekänti tä niere nie nita juto biare jondron nuainkäre angwane, kukwe ükateta nikwe nuaindre jai ye rabai bare kwin nie. Tä niere nie arato: “Jondron jökrä mä raba  nuainne kisebiti, ye mäkwe nuain” (Proverbios 21:5; Eclesiastés 9:10). Aune Kukwe Tikani Griegore yekänti kukwe ne nieta mäträkäre nibätä: “Ni di tärä ne ngwane, käre ni tädre biare ni mda mda die mike” aune “Ngöbökwe [...] ja di biani bätäkä ngwarbe munye abkobti munkwe sribidre, ye kwrere munkwe sribi kuin ni mda mdakrä” (Gálatas 6:10; 1 Pedro 4:10). Nibira gare nie ye erere, dre dre raba nemen nuainbare nie ye Jehová tö ni tuai nuainne nitre mada dimikakäre aune ni dimikakäre arato.

3. ¿Ni kä tibienbätä di ñaka tärä dre dre nuainkäre?

³ Erametre Jehová tö ni tuai ni töi keta kabre ütiäte mikani kwe yebiti jondron nuainne, akwa ni di ñaka tärä kukwe jökrä nuainkäre ye gare ie. Ñodre, ni töi ñaka metre, ja mika ngite aune gata ye ni ñaka raba denkä (1 Reyes 8:46). Ne madakäre, nitre mada tä dre dre nuainne ye ni ñaka raba ketebätä, ñobätä ñan aune ni jökrä sribebare kukwe diankäre nuaindre akwle jai. Aune kukwe raba nemen gare krubäte nie, akwa käre Jehová ie kukwe gare bäri ni ngwä (Isaías 55:9).

4. ¿Kukwe ja tötikara nekänti nibike blite nire nirebätä?

⁴ Käre nikwe Jehová tuanemetre ja jie ngwen. Niarakwe ni dimikai aune dre dre ni ñaka raba nuainne akwle ye niarakwe nuaindi yei nikwe tö ngwandre arato. Akwa kukweta nemen ni kisete ye ni raba ükete ño aune ni raba nitre mada dimike ño yebätä nikwe töbikadre yei Jehová tö arato (ñäkädre Salmo 37:3 yebätä). * Ye abokän, nikwe tö ngwandre Jehovai, nikwe kukwe kwin nuaindre aune nikwe Ngöbö mikadre täte metre. Ni raba nuainne ño rabadre gare nie yekäre, kukwe ja tötikara nekänti nibike blite Noé, David aune nitre mada Ngöbö mikaka täte metre käkwe tö ngwani Jehovai yebätä. Kukwe ruäre ñaka nuainbare kwetre, akwa kukwe  mada abokän nuainbare kwetre yebätä ja töi mikani kwatibe kwetre ye nibike mike gare jai.

5. Nitre töi ño näire Noé nünanbare ye mä raba mike gare.

⁵ Biblia tä niere Noé nünanbare nitre brukwä käme krubäte aune nämene nemen kämekäme ni madabe ye näire (Génesis 6:4, 9-13). Kä rükai angwane Jehovakwe nitre brukwä käme krubäte ye gaite nämene gare ie. Akwa köbö ye rükadre ngüba nämene Noekwe ye ngwane, nitre nämene kukwe blo nuainne ye nämene mike ulire krubäte raba ruin nie. Kä ye näire Noé nünanbare ye ngwane, nükani gare ie kukwe ruäre niara ñaka raba nuainne, akwa kukwe mada abokän niara raba nuainne ye nükani gare ie arato.

6, 7. a) ¿Dre dre abokän Noé ñaka nuainbare? b) ¿Noé nünanbare ye näire nitre nämene ja ngwen käme ye erere näire nita nüne o ñakare?

⁶ Kukwe ruäre abokän Noekwe ñaka nuainbare. Kukwe Ngöbökwe nitre mikakäre mokre ye Noekwe driebare metre. Akwa niarakwe ñaka nitre mikani ja dibiti kukwe drie nämene kwe ye kukwe nuin. Aune ñaka Ñü Kri ye mikani näkäin tibien kwe köböi rükadre ye känenkri. Nitre kukwe käme krubäte nuainkä ye Jehovakwe gaite käbämikani kwe ye mikai nemen bare metre kwe aune nuaindi kwe kä debe näre te yei Noekwe tö ngwandre ie (Génesis 6:17).

⁷ Nitre brukwä käme tä kwati krubäte ye näire nita nüne arato aune Jehovakwe nitre ye gaite käbämikani kwe ye gare nie (1 Juan 2:17, TNM). Akwa ni ñaka raba nitre mike ja dibiti “kukwe [kwin] Ngöbö Gobrainbätä” ye kain ngäbiti. Aune “ja tare nikadi krubäte” ye ni ñaka raba kömike köböi rükadre ye känenkri arato (Mateo 24:14, 21, Ngöbö Täräe [NGT], tärä okwä ükaninte). Noé ye erere, nikwe tödekadre bäri aune kukwe blo nuainta ye gwäune Ngöbökwe diainkä yei nikwe tö ngwandre (Salmo 37:10, 11). Nitre töi  käme krubäte ye Jehovakwe gaite aune ñaka mikai nüne bäri raire kwe ye gare kwin nie (Habacuc 2:3).

8. ¿Drebätä Noekwe ja töi mikani kwatibe? (Üai bämikani kena mikadre ñärärä).

⁸ Kukwe ruäre abokän Noekwe nuainbare. Kukwe ruäre Noé ñaka nuainbare yebätä ñaka ja di ngwani nekä kwe, ñakare aune kukwe meden niara raba nuainne yebätä ja töi mikani kwatibe kwe. Ñodre, niara nämene tödeke ye ererebätä Jehová kukwei nitre mikakäre mokre ye driebare kwe (2 Pedro 2:5). Erametre, ye käkwe tödeka kwe mikani dite. Aune Noé kukwe driebare, akwa ye ñan aibe nuainbare kwe, ñakare aune niarakwe arka sribedre ño niebare Jehovakwe ie ye erere nuainbare kwe (ñäkädre Hebreos 11:7 yebätä).

9. ¿Ni raba ja ngwen ño Noé erere?

⁹ Noé ye erere, nita “sribi ni Dänkienkwe” ye nuainne krubäte arato (1 Corintios 15:58). Ñodre, ni ruäre tä ja mräkätre dimike Ju Ja Ükarakrö aune Ju Gätä Kri Nuainkäre ye sribere. Ni mada abokän tä niken ja töi jeñebiti sribire gätä krikri yekänti, sukursal yete o Oficina Kukwe Kwitakäre ye ruäre känti. Akwa metrere nita jankunu kukwe driere krubäte, abokän tä ni dimike bäri tö ngwen kukwe ja känenkäre yei. Meri Testiko tä Ngöbö mike täte metre käkwe niebare, Gobran Ngöbökwe köböire kukwe kwin keta kabre rabai bare yebätä tä blite nitre madabe ye ngwane, tä nüke gare ie kukweta niaratre kisete ye ñaka raba nemen ükaninte tätre nütüre, yebätä niaratre ñaka tö ngwen jire kukwe ja känenkäre yei. Akwa ni abokän tä tö ngwen kukwe ja känenkäre yei aune nita kukwe driere ye ngwane nita tö ngwen bäri kukwe yei. Nita tö ngwen kukwe ja känenkäre ie ye tä ni dimike nen jankunu ja nire kärekäre kokwäre (1 Corintios 9:24).

10. David dre nuainbare ye mä raba mike gare.

¹⁰ Rei David nämene tödeke ye bämikani kwe, yebätä Jehová nämene tarere krubäte (Hechos 13:22). Akwa yebiti ta, meri gure kädeka nämene Bat-seba ben David namani ye ngwane ja mikani ngite krubäte kwe. Aune ja mikani ngite kwe ye ükakäre kukwe ükaninte kwe Urías Bat-seba muko ye murie ketakäre rübätä ye ngwane, ja mikani bäri ngite kwe. David tärä tikani juandre Urías murie ketakäre ye Urías arabe juani kwe bien Joab ie (2 Samuel 11:1-21). David ja mikani ngite ye namani gare ja känenkäre (Marcos 4:22, NGT). ¿Ye ngwane David dre nuainbare?

11, 12. a) ¿David ja mikani ngite ye bitikäre dre abokän ñaka nuainbare kwe? b) ¿Nikwe ja töi kwitai kukwe blo yebätä angwane Jehovakwe dre nuaindi ni kräke?

¹¹ Kukwe ruäre abokän David ñaka nuainbare. David ja mikani ngite ye ngwane ñaka dianinkä jabiti kwe. Ñakare aune ja tare nikabare krubäte kwe kukwe ruäre kisete (2 Samuel 12:10-12, 14). Ye medenbätä rabadre tödeke ye nämene ribere jai. Niarakwe ja brukwä tätebiti ja töi kwitai angwane, Jehovakwe ngite juain tabiti aune ja mikani ngite kwe ye köböite nämene ja tuin kukwe tare ben yebätä Jehovakwe dimikai kä ngwen nüke jai yei niarakwe tö ngwandre.

¹² Ni töi ñaka metre yebätä ni jökrä tä ja mike  ngite. Akwa ja mika ngite ye ruäre bäri blo krubäte. Kukwe ruärebätä nikwe ja mikani ngite ye ni ñaka raba denkä. Ñakare aune nikwe ja mikani ngite yebätä ni raba ja tuin kukwe tare keta kabre ben raba ruin nie (Gálatas 6:7). Akwa nikwe ja töi kwitai kukwe blo yebätä angwane, kukwe tare ben nikwe ja tuai ye ngwane Ngöbökwe ni dimikai käbämikata kwe nie yei nita tö ngwen. Nikwe ja mikani ngite yebätä nita ja tuin kukwe tare ben akwa niarakwe ni dimikai (ñäkädre Isaías 1:18, 19 * aune Hechos 3:19 yebätä).

13. ¿David dre nuainbare ja ketakäreta kwin Jehovabe?

¹³ David kukwe ruäre abokän nuainbare. David tö namani ja ketaita kwin Jehovabe, yebätä Jehová tuanimetre kwe ja dimike. Ñodre, ni Jehová kukwei niekä kädeka nämene Natán käkwe mäträbarebätä ye kani ngäbiti kwe (2 Samuel 12:13). David ja mikani ngite ye mikani gare kwe Jehovai arato. Yebiti bämikani kwe Jehovakwe niara kadre ngäbitita yei tö namani (Salmo 51:1-17). Niarakwe ja mikani ngite ye namani ja töi kräke ie aune ñaka ja tuanimetre kwe nemen ulire krubäte ja namani ruin ngite ie yebätä. Aune ñaka ja mikaninta ngite kwe kukwe ye arabebätä. Kä nikani ta ye bitikäre krütani, akwa tödekabare krubäte kwe yebätä Jehová täbe ngwen törö jai (Hebreos 11:32-34).

14. ¿David kukwe kwin bämikani ye tä dre driere nie?

¹⁴ ¿David kukwe kwin bämikani ye tä dre driere nie? Nikwe ja mikadre ngite krubäte angwane, nikwe ja töi kwitadre ja brukwä tätebiti kukwe blo yebätä, nikwe mikadre gare Jehovai aune ngite juandre ta kwe nibiti ye nikwe ribedre ie (1 Juan 1:9). Nikwe blitadre nitre umbre ji ngwanka konkrekasionte yebe arato, ñobätä ñan aune niaratre raba ni dimike ja keteta kwin Jehovabe (ñäkädre Santiago 5:14-16 yebätä). Jehová tä ni dimike ye nikwe kadre ngäbiti. Yebiti nikwe bämikai niarakwe ngite juain ta nibiti käbämikata kwe nie yei nita tö ngwen. Nita ja mike ngite ye rabadre ja töi kräke nie aune nikwe tö ngwandre Jehovai niara mikakäre täte jankunu (Hebreos 12:12, 13).

15. ¿Ana kukwe kwin bämikani ye tä dre driere nie?

¹⁵ Nitre mada mada Ngöbö mikaka täte mekerabe käkwe tö ngwani Jehovai aune kukwe tare ben ja tuani kwetre akwa dre dre raba nemen nuainbare ietre ye erere nuainbare kwetre ye törö nie. Ani blite Ana yebätä. Kä nikani ruäre ta yete niara monsoi ñaka namani nemen. Niarakwe ñaka kukwe ye ükaninte, akwa Jehovakwe niara töi mikaita jäme yei nämene tö ngwen. Ye medenbätä nämene niken jankunu tabernáculo yete Jehová mikakäre täte aune ja nämene ruin ño ie ye mikakäre gare ie (1 Samuel 1:9-11). Ana kukwe kwin krubäte bämikani ni kräke. Ni tärä bren o kukwe madabe ni tärä ja tuin abokän ni ñaka raba ükete raba ruin nie. Akwa ¿ni raba dre nuainne? Nikwe kukwe ye jökrä mikadre gare Jehovai aune niara töita nibätä yei nikwe tö ngwandre (1 Pedro 5:6, 7). Nikwe ja di ngwandre ñaka gätä juen ja bäre aune juta ükaninte Jehovakwe tä kukwe mada mada  bien nie ni dimikakäre ye nikwe kadre ngäbiti (Hebreos 10:24, 25).

16. ¿Samuel kukwe kwin bämikani ye raba dre mike gare nitre rüne aune meyere ie?

¹⁶ Nitre rüne aune meyere tätre Ngöbö mike metre täte akwa monsotre kwetre ñaka niena Jehová mike täte, ¿yebätä raba dre nuainne? Samuel ni Ngöbö kukwei niekä käkwe kukwe kwin bämikani ye raba niaratre dimike. Samuel ñaka monsotre kwe namanina ünä ye mikani ja dibiti ja ngwen metre Ngöböi (1 Samuel 8:1-3). Aisete kukwe ye mikani kwe Jehová kisete. Akwa niarakwe ja di ngwani ja ngwen metre Jehovai aune kukwe kwin nuainne Rün kä kwinbiti kräke (Proverbios 27:11). Nitre rüne aune meyere kukwebätä ye kwati krubäte tä ja tuin kukwe ye erere ben. ¿Niaratre tä dre nuainne? Nitre ja mikaka ngite ye Jehová tä juto biare ka ngäbitikäreta yei tätre tö ngwen, ni rünebätä monso kwe kämikaninkä kädriebare Jesukwe ye erere (Lucas 15:20). Kukwe yei tätre tö ngwen ye ngwane, tätre ja töi mike kwatibe ja ngwankäre metre Jehovai aune niaratre tä kukwe kwin bämike yekwe monsotre kwetre töi mikadre kiteta konkrekasionte yei tätre tö ngwen.

17. Meri bobre kän muko krütani yekwe kukwe kwin bämikani, ¿ye ñobätä tä ni dimike?

¹⁷ Jesús näire meri bobre kän muko krütani yekwe kukwe kwin bämikani arato (ñäkädre Lucas 21:1-4 yebätä). Niarakwe ñaka nitre töi käme krubäte nämene templote ye töi kwitani. Aune ñaka namani dre nuaindre ie nünankäre bäri kwin (Mateo 21:12, 13). Akwa nämene tö ngwen Jehovai yekwe töi mikani Ngöbö mike täte metre. Ja ngwani mantiame kwe aune “ngwian sentabo kwrere kitani kubube” kajate kwe ye abokän ngwian ngöräbe nämene kwe. ¡Niara nämene tö ngwen krubäte Jehovai! Niara sribi Jehovakwe mikadre nuaindre käne jai angwane, dre dre ribe nämene kwe nünankäre jai ye Jehovakwe biain ie nämene gare ie. Meri kän muko krütani ye erere, nita Gobran Ngöbökwe mike käne ye ngwane, nita dre dre ribere jai ye Jehovakwe biain nie yei nita tö ngwen (Mateo 6:33, TNM).

18. Ja mräkä iti töi nämene kwin abokän käkwe kukwe kwin bämikani ye mä raba mike gare.

¹⁸ Kä nengwane ja mräkätre aune ja ngwaitre kwati krubäte ye tätre tö ngwen Jehovai arato bätä niaratre raba kukwe meden nuainne yebätä tätre ja töi mike metrere aune kukwe meden abokän ñaka raba nuainne yebätä ñaka tätre ja töi mike. Ja mräkä kädeka nämene Malcolm käkwe Jehová mikani täte metre abokän krütani kä 2015 yete yebätä ani blite. Kä kwati krubäte nikani ta yete niara aune muko kwe käkwe Jehová mikani täte ye ngwane, kukwe kwin namani bare kräketre aune kukwe tare namani bare bätätre. Niarakwe niebare: “Dre rabai bare nibätä ye ñaka gare metre nie. Ruäre ngwane kukwe tare raba nemen ni kisete. Akwa nire tä tö ngwen Jehovai [...] ye kräke tä kukwe kwin mike nemen bare”. ¿Malcolm kukwe niebare ye tä dre mike gare nie? “Ngöbökwe ni tuanemetre sribire käre niara kräke ye nikwe ribedre ie. Dre raba nemen bare nie ye ererebätä ja töi mikadre, aune ñaka ja töi mikadre jondron meden ñaka raba nemen bare nie yebätä” * (nota mikadre ñärärä).

19. a) ¿Salmo 37:3 dianinkä kä 2017 kräke ye ñobätä ütiäte krubäte? b) ¿Texto dianinkä kä 2017 kräke ye ni raba mike täte ño?

¹⁹ Nitre kä nebätä tä “näin kukwe nuene bäri kämekäme mda”, yebätä kukwe kri rabai bäri ni kisete (2 Timoteo 3:1, 13). Ütiäte krubäte kä nengwane nikwe ñaka kukwe kri tä nemen ni kisete ye tuanemetre ja ganaine. Ñakare aune, nikwe tö ngwandre täte Jehovai aune ni raba kukwe meden nuainne yebätä nikwe ja töi mikadre metrere. Ye medenbätä ütiäte krubäte Salmo 37:3 ye dianinkä kä 2017 kräke, texto ye tä niere: “Mäkwe tö ngwan Jehovai aune mäkwe kukwe kwin nuain”.