1. Yehova mwahira omwa bandu mo maaka wahi?

YEHOVA mwahira omwa bandu mw’amaaka malebe w’embaghane. Mwathuha amaaka w’erilengekania, ekikathuwathikaya eriminya eky’erikolha hamabya ekitsibu, n’erithoka eritheghekera obuthuku bw’embere. (Emisyo 2:11) Mwathuha obuthoki obwanga thuthokesya erikolha ebya thwabirithegheka n’eriberererya ebilhubirirwa byethu. (Abanya Filipi 2:13) Mwathuha n’obunyamuthima-thima, amaaka aw’athulimu aw’eriminya ekitholere n’ekithatholere. Obunyamuthima-thima bwethu bukathuwathikaya eriyihighulha okw’ikolha erilholho n’erihengulha ebisobyo byethu.—Abanya Roma 2:15.

2. Yehova anzire ithwakolesya thuthi amaaka awethu?

² Yehova anzire ithwakolesya amaaka wethu ayo wa ndeke. Busana naki? Kundi athwanzire kandi anasi ngoku ithukendi tsema thwamakolesya ebihembo eby’abirithuha. Ng’eky’erileberyako, omwa Masako w’Ekihebrania, e Biblia yikabugha yithi:  “Amalengekania w’ab’omuhwa akaletha bingyi,” kandi yithi, “ekinduki ekyo ebyalha byawu bikabana erikolha, wukikole n’amaaka wawu wosi.” (Emisyo 21:5; Omugambuli 9:10) N’omwa Masako w’Ekigiriki, yikabugha yithi: “Neryo oko mighulhu yosi thukabana akathambi, thukole ebibuya oko bandu bosi,” kandi yithi, “obuli mundu abiribana olhusunzo olhukalhua oku Nyamuhanga. Mukolerane omo lhusunzo olho.” (Abanya Galatia 6:10; 1 Petero 4:10) Ebi bikakanganaya ngoku Yehova akanza ithwalengaho ngoku thwanga thoka, erikolha ekyanga thughasira n’erighasira abandi.

3. Abandu bawithe bulemwaki?

³ Yehova anzire ithwakolesya amaaka wethu agho abirithuhererya, aliwe kandi anasi ku hane ebikathulema. Ng’eky’erileberyako, sithwanga lhusyaho obuthahikana bwethu, ekibi, n’olhuholho. (1 Abami 8:46) Kandi sithwanga thoka erikakirya abandi okwa byabanzire erikolha, kundi obuli mundu awithe obughabe bw’erithwamu eky’anzire. Kandi nomuthwangabya ithwasi bingahi, sihali kiro thwanga syaminya bingaha n’ebya Yehova.—Isaya 55:9.

4. Omwa mwatsi ono thukendi kania okuki?

⁴ Ambi mughulhu wosi ithwalighira Yehova erithusondolha, ithunayikethere ngoku akendi thusighika n’erithukolera ebya thuthe thwangathoka ahabwethu. Aliwe Yehova akanza ithwabya ithunemulengekania okwa kya thwanga kolha erirwanisya ebitsibu n’eriwathikya abandi. (Soma Esyonyimbo 37:3.) Thutholere ithwakolha bindu bibiri, ebyosi haghuma, eriyikethera Yehova n’erikolha  ebibuya. Ekyo thwanga kikolha thuthi? Thuthakania okwa ky’erileberyako kya Noa, Dawudi, n’abandi baghombe ba Nyamuhanga abathaleghulha abamuyikethera. Thukendi lhangira nabu ngoku hanabya ebyo babya isibanga thoka aliwe ngoku mubathwamu eritsomana ebyo banga thoka.

5. Soborera emibere eya Noa abyamu.

⁵ N’omwa mughulhu wa Noa, ekihugho kyabya kyuswire mw’omwagha n’obusingiri. (Enzuko 6:4, 9-13) Nomwakine indi abya inianasi ngoku endambi yikendi syahika Yehova iniathoghothya omughulhu mubi oyo, Noa angabya imwahithana busana n’ebya bandu babya bakakolha. N’omwa mibere eyo, Noa abya inianasi ngoku hane eby’angathoka aliwe kandi ngoku hane n’eby’athe angathoka.

6, 7. (a) Ni kyahi ekya Noa abya isyanga thoka erikolha? (b) Nethu thuli thuthi omwa mibere ng’eya Noa?

⁶ Ebya Noa abya isyangathoka: Noa mwathulira abandu buthaleghulha omwatsi w’erisuyira lya Nyamuhanga, aliwe abya isyanga thoka eribakaka erilighagho. Kandi abya isyanga thoka eryanguhya erihika ly’erighunga ly’amaghetse. Noa abya atholere iniayikethera ngoku Yehova akendiberererya eriyilhagha liwe ery’erighunzaho obubi, n’erikirirya ngoku Nyamuhanga akendi kikolha okwa buthuku obutholere.—Enzuko 6:17.

⁷ Nethu thuli omwa kihugho ekyuswire mw’obubi, obwa thunasi ngoku Yehova abiriyilhagha erighunzaho. (1 Yoane 2:17) Omughulhu thulindirire ekyo, sithwanga kaka abandu eriligha “engulhu yuwene y’Obwami.” Kandi sithwang’anguhya eryasa  ‘ly’obulighe bunene.’ (Matayo 24:14, 21) Nga Noa, thutholere ithwabya n’erikirirya erighumire, n’eriyikethera ngoku Yehova akendi ghunzaho obubi omwa buthuku obuthe bw’ahali. (Esyonyimbo 37:10, 11) Thuyikethere ngoku obuthuku bw’erikolha ekyo bukendi syabya bwahika, Yehova syendi syalhabiryamu kiro na kighuma.—Habakuki 2:3.

8. Ni kyahi ekya Noa athwamu eritsomana? (Lebaya ekisasani ekiri okw’itsuka.)

⁸ Ekya Noa abya iniangana thoka erikolha: Omwakanya k’erilhuhirira busana n’ebyabya isyangathoka, Noa mwatsomana eby’angathoka erikolha. Buthaleghulha, Noa mwathulha omwatsi w’erikunga lya Nyamuhanga. (2 Petero 2:5) Omubiiri oyo angabya imwamuwathikya eribya iniane n’erikirirya erighumire. Eryongera okw’ithulira, mwahimba obwathu ngoku Yehova anamubwira.—Soma Abaebrania 11:7.

9. Thwanga gherererya thuthi Noa?

⁹ Nethu, nga Noa, thukayihweraya “omwa mubiiri w’Omukama.” (1 Abanya Korinto 15:58) Ng’eky’erileberyako, ithwangana wathikya okwa buhimbe kutse erisugha Ebisenge by’Obwami, n’eby’Emihindano eminene-minene, eriyihayo eriwathikya omughulhu w’olhuhindano, eriwathikya okwa kyaghanda ky’omuthahulha kutse okwa ofisi y’erihindulirako. Aliwe ekikulhu kutsibu, thukasangira kutsibu omwa mubiiri w’erithulira, ow’akaghumaya amaha wethu okwa by’omwa buthuku bw’embere. Mwali wethu mughuma akabugha athi, omughulhu akakanaya n’abandu okwa mighisa y’Obwami, akalhangira abandu isibawithe maha kandi ibasi bathi ebitsibu byabu sibyendi syahwaho. Nga mwali wethu oyo kw’anabugha, ithwe thuwithe amaha, kandi akayongera erighuma omughulhu thukabwira kugho kw’abandu. Amaha aya akaleka ithwabya ithune omwa mathangwa w’engebe!—1 Abanya Korinto 9:24.

10. Soborera ebyahika oku Dawudi.

¹⁰ Omwami Dawudi abya mulhume muthaleghulha, neryo Yehova mwamwanza kutsibu. (Emibiri 13:22) Nomubyanabya bithya, Dawudi mwasingira na Batiseba, eryabya ilholho erikalire. Ibbwa erithasyongera eribikalya, mwanza eribisa ekibi kiwe omw’iya embitha y’er’ithisya Uria, mwira wa Batiseba. Ebaruha eyabya mw’embitha y’er’ithisya Uria, Dawudi mwahekyayo Uria iyuwene-wene! (2 Samweli 11:1-21) Erighunzerera, amalholho wa Dawudi mwaminyikalha. (Mariko 4:22) Ekyo kyabere kyabya, Dawudi mwakolhaki?

11, 12. (a) Dawudi abere abirisobya, abya isyanga thoka erikolhaki? (b) Yehova iniakendi thukoleraki thwamayisubamu ndeke?

¹¹ Ebya Dawudi abya isyangathoka: Dawudi abya isyanga sangulha eby’abirikolha. N’ebindi bitsibu ebyanga lhwiririremu byanga mubereko engebe yiwe yosi. (2 Samweli 12:10-12, 14) Neryo abya atholere eribya n’erikirirya. Abya atholere iniabya n’eriyikethera ngoku amayisubamu ndeke, Yehova  iniakendi mughanyira n’erimuwathikya erighumira ebya lhwiririra omwa by’akolha.

¹² Busana n’eribya isithuhikene, ithwe bosi thukasobaya. Aliwe ebisobyo bikira-kirene, kandi okwa bundi buthuku thukanabya isithwanga thoka eriyisangulha byoko. Ihanganayira obundi isithwanga yibisa okwa byanga lhwiririra omwa bya thwakolha. (Abanya Galatia 6:7) Aliwe thuyikethere eriyilhagha lya Nyamuhanga ngoku thwamayisubamu ndeke, iniakendi thuwathikya omwa kitsibu ekyo, nomukyangabya indi thwayiletherakyo.— Soma Isaya 1:18, 19; Emibiri 3:19.

13. Dawudi mwasubya athi obughuma bwiwe na Yehova?

¹³ Ekya Dawudi abya iniangana thoka erikolha: Dawudi mwanza asubaye obughuma bwiwe na Yehova. Ekyo mwakikolha athi? Mwaligha Yehova amuwathikaye. Ng’eky’erileberyako, mwaligha erihabulha lya Natana, omuminyereri wa Yehova. (2 Samweli 12:13) Kandi Dawudi mwasaba Yehova n’erimubwira ebibi biwe byosi, erikangania ngoku kwenene anzire erithasyasimwa na Yehova. (Esyonyimbo 51:1-17) Omwakanya k’eriyibika omwa malighe busana n’ekibi, Dawudi mw’ighira okwa bisobyo biwe. Mwathasubira ebibi ebyo. Endambi muyahika amaholha iniane muthaleghulha, kandi Yehova ekyo ky’abya atsomene.—Abaebrania 11:32-34.

14. Thuk’ighiraki oku Dawudi?

¹⁴ Eky’erileberyako kya Dawudi kikathweghesayaki? Thwamawa omw’ilholho erikalire, thutholere ithwayisubamu ndeke, n’eribikulira Yehova y’ekibi kyethu, kandi ithwamusaba ekighanyiro. (1 Yoane 1:9) N’ekindi, thutholere ithwabwira abasyakulhu, kundi bangana thuwathikya erisubya obughuma bwethu na Yehova. (Soma Yakobo 5:14-16.) Thukabya thwamaligha obuwathikya bwa Yehova, thukabya ithwamakangania ngoku thuyikethere eky’abiriyilhagha athi iniakendi thughanyira. Kandi ambi ithw’ighira okwa bisobyo byethu, n’erilholha embere erikolera Yehova ithunasikire.—Abaebrania 12:12, 13.

15. Eky’erileberyako kya Hana kikathweghesayaki?

¹⁵ Iwangana lengekania okwa bandi baghombe bathaleghulha ba Yehova abamuyikethera ibanemulhaba omwa bitsibu ebikalire. Ng’eky’erileberyako, Hana mwabya ngumba. Ekitsibu ekyo abya isyawithe eky’erikikolera. Aliwe mwayikethera ngoku Yehova akendi muhumulikania. Neryo mwalholha embere eriyaramya okwa hema, erisaba Yehova n’erimubwira eriyowa liwe. (1 Samweli 1:9-11) Ekyo ka ni ky’erileberyako kibuya okw’ithwe! Thwamabya n’amakoni kutse ebindi bitsibu ebikalire ebya thuthe thwanga y’ihako, thukaghusira Yehova y’amalighe wethu n’eriyikethera ngoku athutsomene. (1 Petero 5:6, 7) Kandi ambi ithwalengaho kutsibu erilhangira thuthi thukaghasirawa omwa mihindano yethu n’esindi ndegheka esiri omwa kithunga kya Yehova.—Abaebrania 10:24, 25.

16. Ababuthi bak’ighaki omwa ky’erileberyako kya Samweli?

 ¹⁶ Kandi ibbwa ababuthi abathaleghulha abawithe abaana ababirighana erikolera Yehova? Omuminyereri Samweli abya isyangakaka baghalha biwe abakulire erikolera Nyamuhanga. (1 Samweli 8:1-3) Ebyo mwabirekera Yehova. Aliwe, Samweli iyo mwalhangira athi akabya iniane muthaleghulha oku Nyamuhanga n’eritsemesya Thatha wiwe w’elhubulha. (Emisyo 27:11) Munabwire, ababuthi bangyi bane omwa mibere ng’eyo. Banayikethere ngoku Yehova ali nga thatha w’omwana oyuwatsaha, akabya inianayitheghekire erighanyira abakolha-nabi abakayisubamu. (Luka 15:20) Omughulhu omwana abiriyisamambulha oku Yehova, ababuthi batholere ibo ibalengaho erighumya obuthaleghulha bwabu oku Yehova, ibanawithe amaha ngoku eky’erileberyako kyabu kyangana hira omwa baana babu mw’omuhwa w’erisuba oku Yehova.

17. Omukwakali akaleka athi ithwaghuma?

¹⁷ Ekindi ky’erileberyako ekyuwene y’omukwakali omwera ow’omwa mughulhu wa Yesu. (Soma Luka 21:1-4.) Abya isyawithe kw’angahindulha obulibathangania obwabya okwa hekalu, kandi isyawithe kw’angahindulha eky’eribya ini munakwa. (Matayo 21:12, 13) Aliwe eriyikethera Yehova liwe mulyamuhira mw’omuhwa w’erisighika eriramya ly’okwenene. Abya n’omuthima w’erihithya, mwahayo “esyosengi ibiri,” kandi iko kasente kasa awithe. Omukali muthaleghulha oyo mwakangania kw’ayikethere ndeke Yehova. Abya inianasi ngoku amahira erikolera Yehova ly’embere, nayu iniakendilhangira athi akamuha eby’akayithagha. Kuthya nethu, thuyikethere ngoku thwamahira Obwami bwa Yehova bw’embere, Yehova iniakendi lhangira athi thukabana ebya thukayithagha.—Matayo 6:33.

18. Thaha eky’erileberyako ekya mughalha wethu oyuwabya n’amalengekania awuwene.

¹⁸ Balikyethu bangyi munabwire abakabana ebitsibu ng’ebyo, nabu bakakanganaya eriyikethera Yehova omw’itsomana ebya banga thoka erikolha butsira ebya bathe banga thoka. Thalengekania oku mughalha wethu oyukahulhawa mwa Malcolm, oyuwasighalha muthaleghulha erihika aho aholera omwa 2015. Omwa myaka mingyi oyo aghunza na mukali wiwe ibanemukolera Yehova, mubabana etseme n’ebitsibu. Mwabugha athi: “Hakanayira ikyakalha eriminya ebyanga kubyako omwa ngebe, kandi engebe yikanakalha. Aliwe Yehova akatsumulha abakamuyikethera.” Wunasi Malcolm ng’akahabulha athiki? Athi, “Saba Yehova erikuha omuhwa n’omuthima w’erikolha bingyi omwa mubiiri wiwe. Tsomana ebya wanga thoka, butsira ebya wuthe wanga thoka.” *—Lebaya omwatsi ahikwa.

19. (a) Busana naki erisako lyethu ly’omwa owa 2017 lyuwene? (b) Wukendi kolesya wuthi erisako ly’omwaka wa 2017 omwa ngebe yawu?

¹⁹ Ekihugho kibi kino kikayongera eribya kibi. Neryo thukaminya ngoku thukendi yongera eribana ebitsibu. (2 Timoteo 3:1, 13) Omughulhu owa thulimu ono, sithutholere thukahwerya amalengekania wethu w’okwa bitsibu byethu. Omwakanya k’ekyo, thutholere ithwaghumya erikirirya lyethu omu Yehova n’eritsomana ebyanga thokekakana. Ekyo ky’ekilekire kwesi erisako lyethu ly’omwaka owa 2017 iryabya iryuwene, lithi: ‘Wuyikethere Yehova, wukole ebibuya’!—Esyonyimbo 37:3.