1. We Jiova mek wi, us spɛshal tin dɛn i mek wi ebul fɔ du?

JIOVA mek mɔtalman wan kayn we we mek wi ebul fɔ du spɛshal tin dɛn. I mek wi ebul fɔ tink, ɛn dat de ɛp wi fɔ sɔlv prɔblɛm dɛn ɛn plan fɔ tumara bambay. (Prɔvabs 2:11) I gi wi pawa we de mek wi ebul fɔ du di tin dɛn we wi dɔn plan. (Lɛta Fɔ Filipay 2:13) I gi wi kɔnshɛns bak, we na sɔntin we i put insay wi we de mek wi no wetin gud ɛn wetin bad. Wi kɔnshɛns de ɛp wi fɔ avɔyd sin ɛn fɔ kɔrɛkt wi mistek dɛn.—Lɛta Fɔ Rom 2:15.

2. Aw Jiova want lɛ wi du di tin dɛn we wi ebul fɔ du?

² Jiova want lɛ wi du di tin dɛn we wi ebul fɔ du di rayt we. Wetin mek? Bikɔs i lɛk wi ɛn i no se wi go gladi we wi yuz di gift dɛn we i dɔn gi wi. Fɔ ɛgzampul, insay di Ibru Skripchɔ dɛn, wi rid se: “Wɛn yu tek tɛm plan ɛn wok soba wan, yu de prɔfit,” ɛn “mek shɔ se we yu  de du ɛnitin, yu du am gud wit ɔl yu at.” (Prɔvabs 21:5; Ɛkliziastis 9:10) Insay di Grik Skripchɔ dɛn, wi rid se: “Ɛnitɛm we una gɛt di chans, una fɔ du gud to ɔlman,” ɛn “ɛnitin we Gɔd mek una sabi du, una fɔ du am gud, so dat ɔda pipul go bɛnifit.” (Lɛta Fɔ Galeshya 6:10; Pita In Fɔs Lɛta 4:10) Wi dɔn si klia wan se Jiova want lɛ wi du wetin wi ebul fɔ bɛnifit wisɛf ɛn ɔda pipul dɛn.

3. Wetin mɔtalman nɔ ebul fɔ du?

³ Jiova want mek wi du di tin dɛn we i dɔn mek wi ebul fɔ du, bɔt i no se nɔto ɔltin wi go ebul fɔ du. Fɔ ɛgzampul, wi nɔ go ebul fɔ pul sin, day, ɛn mek wisɛf pafɛkt. (Fɔs Kiŋ 8:46) Dɔn wi nɔ ebul fɔ kɔntrol ɔda pipul dɛn, bikɔs ɔlman fri fɔ du wetin i want fɔ du. Ilɛk wi gɛt sɛns ɔ sabi du tin, wi nɔ go ɛva gɛt sɛns ɔ sabi du tin lɛk Jiova.—Ayzaya 55:9.

4. Wetin wi go tɔk bɔt na dis atikul?

⁴ Wi fɔ alaw Jiova fɔ gayd wi ɔltɛm, ɛn abop se i go sɔpɔt wi ɛn ɛp wi fɔ du wetin wi nɔ ebul fɔ du. Bɔt Jiova want wi fɔ tink bɔt wetin wi go ebul fɔ du fɔ sɔlv wi prɔblɛm dɛn ɛn ɛp ɔda pipul dɛn. (Rid Sam 37:3.) Wi nid fɔ du tu tin, dat na fɔ “abop pan Jiova ɛn du wetin gud.” Wi nid fɔ “du tin fetful wan.” Aw wi go du dis? Lɛ wi tɔk bɔt Noa, Devid, ɛn ɔda fetful savant dɛn we bin abop pan Jiova. Wi go si se sɔm tin dɛn de we dɛn nɔ bin ebul fɔ du,  bɔt dɛn bin put dɛn maynd pan di tin dɛn we dɛn ebul fɔ du.

5. Ɛksplen aw tin bin tan lɛk fɔ Noa?

⁵ Di tɛm we Noa bin de an di wɔl, na soso “fɛt fɛt” bin de apin ɛn pipul dɛn bin de du mami ɛn dadi biznɛs di we aw Gɔd nɔ want. (Jɛnɛsis 6:4, 9-13) Pan ɔl we i bin no se Jiova go wande dɔnawe wit da wikɛd wɔl de, i go mɔs bi se Noa nɔ bin gladi wit di we aw di pipul dɛn bin de du tin. We dɛn kayn tin dɛn de bi de apin, Noa bin kam fɔ no se tin dɛn de we i nɔ go ebul fɔ du, bɔt i bin no bak se tin dɛn de we i ebul fɔ du.

6, 7. (a) Wetin Noa nɔ bin ebul fɔ du? (b) Aw wi yon tɛm tan lɛk Noa in yon?

⁶ Wetin Noa nɔ bin ebul fɔ du: Noa bin de prich bɔt Jiova in mɛsej fɔ wɔn di pipul dɛn, bɔt i nɔ go fos di pipul dɛn fɔ biliv. Ɛn i nɔ bin ebul fɔ mek di Ɛbi Ɛbi Ren kam kwik kwik wan. Noa bin nid fɔ biliv se Jiova go du wetin i dɔn prɔmis ɛn dɔnawe wit di bad pipul dɛn, ɛn i bin nid fɔ biliv se Gɔd go du am di rayt tɛm.—Jɛnɛsis 6:17.

⁷ Di wɔl we wisɛf de tide fulɔp wit pipul dɛn we de du bad, ɛn wi no se Jiova dɔn prɔmis fɔ kam dɔnawe wit dɛn. (Jɔn In Fɔs Lɛta 2:17) Rayt naw, wi nɔ go fos pipul dɛn fɔ lisin to di “Gud Nyuz bɔt wɛn Gɔd go rul di wɔl.” Ɛn wi nɔ go ebul du natin fɔ mek da big  big “trɔbul” bigin bifo di tɛm we i fɔ bi. (Matyu 24:14, 21) Jɔs lɛk Noa, wi nid fɔ gɛt mɔ fet, ɛn biliv se i nɔ go te igen, Gɔd go dɔnawe wit ɔl di bad pipul dɛn. (Sam 37:10, 11) Wi rili biliv se Jiova nɔ go alaw dis wikɛd wɔl fɔ kɔntinyu fɔ de we di tɛm rich fɔ lɛ i dɔn, ilɛksɛf na fɔ wan de.—Abakɔk 2:3.

8. Wetin Noa bin put in maynd pan? (Luk di pikchɔ nia dis atikul in taytul.)

⁸ Wetin Noa bin ebul fɔ du: Noa nɔ bin givɔp fɔseka wetin i nɔ ebul fɔ du, bifo dat, i bin put in maynd pan wetin i ebul fɔ du. Noa bin kɔntinyu fɔ wɔn di pipul dɛn bɔt wetin Jiova go du. (Pita In Sɛkɛn Lɛta 2:5) Dis wok go dɔn ɛp am fɔ gɛt mɔ fet. Apat frɔm we i bin de prich, Noa bin de bil di bot we Jiova tɛl am fɔ bil.—Rid Di Ibru Pipul Dɛn 11:7.

9. Aw wi go falamakata Noa in ɛgzampul?

⁹ Jɔs lɛk Noa, wisɛf bizi de “du Gɔd in wok ɔltɛm.” (Fɔs Lɛta Fɔ Kɔrint 15:58) Fɔ ɛgzampul, wi kin ɛp bil ɛn fɔ mek say dɛn we dɔn pwɛl na wi Kiŋdɔm Ɔl ɛn Asɛmbli Ɔl dɛn, wi kin gi wi nem fɔ ɛp fɔ wok na asɛmbli ɛn kɔnvɛnshɔn dɛn, ɔ wok na branch ɔfis ɔ transleshɔn ɔfis we nɔ de na di branch. Ɛn di wan we impɔtant pas ɔl, wi de kɔntinyu fɔ du di prich wok, we de gi wi mɔ op fɔ tumara bambay. Wan fetful sista bin se we i kin tɔk to ɔda pipul dɛn bɔt di blɛsin dɛn we Gɔd in Kiŋdɔm go kam wit, i kin kam fɔ no se pipul dɛn nɔ gɛt ɛni op atɔl ɛn dɛn kin tink se dɛn prɔblɛm dɛn nɔ go ɛva dɔn. Jɔs lɛk aw dis sista se, wi gɛt op ɛn wi go gɛt mɔ op we wi tɛl ɔda pipul dɛn bɔt Gɔd in Kiŋdɔm. Dis op de ɛp wi fɔ kɔntinyu fɔ rɔn na di res fɔ layf!—Fɔs Lɛta Fɔ Kɔrint 9:24.

10. Ɛksplen wetin bin apin to Devid.

¹⁰ Kiŋ Devid na bin man we fetful, ɛn Jiova bin rili lɛk am. (Di Apɔsul Dɛn Wok [Akt] 13:22) Bɔt pan ɔl dat, Devid bin lidɔm wit Batshiba, ɛn dat na bin siriɔs sin. Di tin we mek i wɔs na we i tray fɔ ayd in sin bay we i plan fɔ mek dɛn kil Batshiba in man, na di wɔ. Devid ivin mek Yuraya kɛr go di lɛta we se dɛn fɔ kil am! (Sɛkɛn Samiɛl 11:1-21) Afta sɔm tɛm, dɛn bin kam fɔ no se Devid dɔn sin. (Mak 4:22) We dat apin, wetin Devid bin du?

11, 12. (a) Afta Devid sin, wetin i nɔ bin ebul fɔ du? (b) Wetin Jiova go du fɔ wi if wi chenj?

¹¹ Wetin Devid nɔ bin ebul fɔ du: Devid nɔ bin ebul fɔ rivas wetin i bin dɔn du. Infakt, sɔm bad tin dɛn bin gɛt fɔ apin to am te i day fɔseka in sin. (Sɛkɛn Samiɛl 12:10-12, 14) So i nid fet. I bin nid fɔ biliv se if i chenj fɔ tru, Jiova go fɔgiv am ɛn ɛp am fɔ bia di bad tin dɛn we go apin to am fɔseka in sin.

 ¹² Bikɔs wi nɔ pafɛkt, wi ɔl de sin. Bɔt sɔm mistek dɛn de we siriɔs pas ɔda mistek dɛn, ɛn sɔntɛnde wi nɔ kin ebul fɔ kɔrɛkt dɛn. Wisɛf go gɛt fɔ sɔfa fɔ wi mistek dɛn. (Lɛta Fɔ Galeshya 6:7) Bɔt wi biliv Gɔd in prɔmis we i se if wi chenj, i go sɔpɔt wi we prɔblɛm mit wi, pan ɔl we i go bi se na wi mek di prɔblɛm mit wi.—Rid Ayzaya 1:18, 19; Di Apɔsul Dɛn Wok [Akt] 3:19.

13. Aw Devid bin mek in ɛn Jiova bi padi bak?

¹³ Wetin Devid bin ebul du: Devid bin want mek in ɛn Jiova bi padi bak. Aw i bin du dat? Devid alaw Jiova fɔ ɛp am. Fɔ ɛgzampul, we Netan, we na Jiova in prɔfɛt tɛl am se i dɔn sin, i bin gri se na tru (Sɛkɛn Samiɛl 12:13) Devid bin pre to Jiova ɛn tɛl am se i dɔn sin, ɛn dis sho se i bin rili want lɛ in ɛn Jiova bi padi bak. (Sam 51:1-17) Devid nɔ bin alaw di bad we aw i de fil fɔ mek i givɔp, bifo dat, i lan frɔm in mistek. Devid nɔ bin ɛva put an pan dɛn siriɔs sin dɛn de igen. Lɛta, Devid bin day as man we fetful, ɛn na da we de Jiova de mɛmba am.—Di Ibru Pipul Dɛn 11:32-34.

14. Wetin wi kin lan frɔm Devid in ɛgzampul?

¹⁴ Wetin wi kin lan frɔm Devid in ɛgzampul? If wi sin siriɔs wan, wi nid fɔ chenj fɔ tru, tɛl Jiova wi sin, ɛn beg am lɛ i fɔgiv wi. (Jɔn In Fɔs Lɛta 1:9) Wi nid fɔ tɔk to di ɛlda dɛn bak bikɔs dɛn go ɛp wi fɔ mek wi ɛn Jiova bi padi bak. (Rid Jems 5:14-16.) We wi gri fɔ mek Jiova ɛp wi, wi de sho se wi biliv am we i prɔmis se i go fɔgiv wi. Apat frɔm dat, wi nid fɔ lan frɔm wi mistek ɛn kɔntinyu fɔ sav Jiova wit kɔnfidɛns.—Di Ibru Pipul Dɛn 12:12, 13.

15. Wetin wi lan frɔm Ana in ɛgzampul?

¹⁵ Sɔntɛm yu go tink bɔt ɔda fetful savant dɛn na di Baybul we bin abop pan Jiova ɛn du wetin dɛn ebul we prɔblɛm bin de mit dɛn. Fɔ ɛgzampul, tɛm bin de we Ana nɔ bin ebul fɔ bɔn pikin. I nɔ bin ebul fɔ chenj wetin bin de apin to am. Bɔt i bin biliv se Jiova go kɔrej am. So i bin kɔntinyu fɔ wɔship na di tabanakul ɛn pre to Jiova ɛn tɛl am aw i de fil. (Fɔs Samiɛl 1:9-11) Dis na fayn ɛgzampul fɔ wi! We wi gɛt wɛlbɔdi prɔblɛm ɔ ɔda prɔblɛm dɛn we wi nɔ ebul fɔ chenj, wi de lɛf ɔltin we de wɔri wi na Jiova in an ɛn abop se i go kia fɔ wi. (Pita In Fɔs Lɛta 5:6, 7) Ɛn wi de du wetin wi ebul fɔ bɛnifit na wi mitin dɛn ɛn ɔda program dɛn we Jiova in ɔganayzeshɔn de mek fɔ wi.—Di Ibru Pipul Dɛn 10:24, 25.

16. Wetin mama ɛn papa dɛn kin lan frɔm Samiɛl?

 ¹⁶ Wetin wi go se bɔt mama ɛn papa dɛn we fetful bɔt we dɛn pikin dɛn dɔn lɛf fɔ sav Jiova? Prɔfɛt Samiɛl nɔ bin ebul fɔ fos in bɔy pikin dɛn fɔ kɔntinyu fɔ de biɛn Jiova. (Fɔs Samiɛl 8:1-3) I bin gɛt fɔ lɛf ɔltin na Jiova in an. Bɔt Samiɛl bin du wetin i ebul fɔ kɔntinyu fɔ de biɛn Gɔd ɛn dat bin mek in Papa we de na ɛvin gladi. (Prɔvabs 27:11) Tide, dis sem tin de apin to bɔku mama ɛn papa dɛn we na Kristian. Dɛn biliv se jɔs lɛk di papa na Jizɔs in parebul bɔt di pikin we west in papa in prɔpati, Jiova rɛdi ɔltɛm fɔ fɔgiv ɛnibɔdi we rɛdi fɔ lɛf di bad tin we i de du ɛn chenj. (Lyuk 15:20) Te da tɛm de, mama ɛn papa dɛn fɔ put dɛn maynd pan di tin dɛn we go mek dɛn kɔntinyu fɔ de biɛn Jiova, ɛn op se dɛn fayn ɛgzampul go mek dɛn pikin dɛn kam bak to Jiova.

17. Wetin mek di po uman in ɛgzampul ɛnkɔrej wi?

¹⁷ Wan ɔda fayn ɛgzampul na wan po uman we i man bin dɔn day. (Rid Lyuk 21:1-4.) Dis uman nɔ bin ebul fɔ du ɛnitin bɔt di kɔrɔpt tin dɛn we bin de apin na di tɛmpul, ɛn i nɔ bin ebul fɔ gɛt mɔni bikɔs i po. (Matyu 21:12, 13) Bɔt bikɔs i abop pan Jiova dat bin ɛp am fɔ sɔpɔt tru wɔship. I bin fri an ɛn gi “tu kɔpɔ” ɔ tu smɔl kɔyn dɛn. Dat na bin in las ɛn las mɔni we i gɛt. Dis fetful uman bin rili sho se i abop pan Jiova. I bin no se if i put wetin Jiova want fɔs na in layf, Jiova go mek shɔ se i gɛt wetin i nid. Semweso tide, wi biliv se if wi put Gɔd in Kiŋdɔm fɔs na wi layf, Jiova go mek shɔ se wi gɛt wetin wi nid.—Matyu 6:33.

18. Gi ɛgzampul bɔt wan brɔda we bin tink di rayt we.

¹⁸ Plɛnti pan wi brɔda ɛn sista dɛn tide de sho se dɛnsɛf abop pan Jiova bay we dɛn nɔ de put dɛn atɛnshɔn pan wetin dɛn nɔ ebul fɔ du, bifo dat dɛn de put dɛn maynd pan wetin dɛn ebul fɔ du. Tink bɔt wan brɔda we nem Malkɔm, we bin fetful to Jiova te i day insay 2015. Insay di tɛm dɛn we in ɛn in wɛf bin de sav Jiova, gud tin ɛn bad tin dɛn bin de apin to dɛn. I bin se: “Sɔntɛnde, yu nɔ kin no wetin go apin to yu na layf, ɛn layf kin tranga, bɔt Jiova de blɛs di wan dɛn we abop pan am.” Us advays Malkɔm bin gi? I bin se: “Pre fɔ mek yu ebul fɔ du mɔ ɛn fɔ mek yu kɔntinyu fɔ sav Jiova as lɔng as yu ebul. Put yu maynd pan wetin yu ebul fɔ du, nɔ put yu maynd pan wetin yu nɔ ebul fɔ du.” *—Luk di futnot.

19. (a) Wetin mek wi iatɛks fɔ 2017 rili fayn? (b) Aw yu go du wetin di iatɛks fɔ 2017 se?

¹⁹ Dis wikɛd wɔl de “wɔs mɔ ɛn mɔ,” so wi go de gɛt mɔ ɛn mɔ prɔblɛm dɛn. (Sɛkɛn Lɛta To Timoti 3:1, 13) Na dat mek i rili impɔtant naw fɔ lɛ wi nɔ alaw wi prɔblɛm dɛn fɔ ambɔg wi. Bifo dat, wi nid fɔ rili abop pan Jiova ɛn put wi maynd pan wetin wi ebul fɔ du. Na dat mek wi iatɛks fɔ 2017 na: “Abop pan Jiova ɛn du wetin gud”! Dis iatɛks rili fayn.—Sam 37:3, NW.