1. A suiliŋnda sɔvɛ sɔvɛla kuɛɛ Chɛhowa toosiaa yɛ waŋchieeya?

CHƐHOWA toosiaa waŋchieeya a suiliŋnda sɔvɛ sɔvɛlaŋ. O ke naa suiliŋndo le yiyaŋndo. Hoo mala naa le bahawɛilaŋ solioo nduyɛ miŋ tuu le chilaŋ. (Pulɔwaa 2:11) O ke naa kpaayaa le halikpeŋ miŋ tosa sɔɔŋ naŋ tuu woŋ nduyɛ miŋ komal kpeleŋnda naalaŋ. (Filipiaŋnda 2:13) O ke naa vɛlɛ kɔl iyamaa, nyɛ mala naa le sinaa ikɛndɛi a iwɔɔŋnde wo. Kɔl iyama naa mala naa le kiɔɔ balaŋ lueiyo o hakioo niŋ a biondɔŋnda naalaŋ siɛɛndoo.—Luomaŋnda 2:15.

2. Vɛɛ Chɛhowa yeema yɛ miŋ soliŋ suiliŋnda naalaŋ kpeku?

² Chɛhowa yeema miŋ soliŋ suiliŋnda naalaŋ kpeku o nɛi kɛndɔɔ choo. Le sabu yɛɛ? Kanifuule o kaala naa, nduyɛ o sina maa ŋ cho wa a kɔl kɛndɛ te ŋ soliŋ pɛ suiliŋnda o ke naalaŋ kpeku nyɛkɛndɛi. Le tamaseliiyo, Baabuiyo dimi o yaula maHibuluilaŋ niŋ aa, ‘Te wana chaa kɛɛsiaa pɛ, a sɔla batiuwaa.’ Nduyɛ “kpeku o kpeku  ŋ nɔla pɛ le tosaa o chieeŋndo hoo choo, tosa ndu a kpaaya numndo kpou.” (Pulɔwaa 21:5; Ikilisiaatii 9:10) Baabuiyo dimi o yaula maKilikiilaŋ niŋ aa, “Boondii naa ŋ nɔ hei fondaa ve, ŋ tosaŋ tonyaa naa waŋnda chua.” Nduyɛ “Mɛlɛka tosal nya pilɛŋ pilɛŋnda kɛndɛi nduɛi le mi la nɔla mi la tosa walta yɛ yɛlaŋ.” (Kaleesiaŋnda 6:10; Pitɛ Tasoo 4:10) A tonya, Chɛhowa yeema miŋ tosa nyɛ naŋ tiuba wo le tɔnɔ naa a wanaa cheleŋnda.

3. Yɛɛ waŋchieeya tiu yɛ ba tosa le?

³ Chɛhowa yeema miŋ soliŋ suiliŋnda naalaŋ kpeku. Kɛ o sina maa ŋ tiuba le sɔɔŋ pum tosaa le. Le tamaseliiyo, ŋ nɔla miŋ kuuna biondɔŋnda naŋ tosalaŋ, hakioo, a piɔmndo le. (Masaa Bɛnduaa Tasiaa 8:46) Vɛlɛ ŋ nɔla miŋ chɔm acheleŋnda nɛiyo le. Kanifuule, wana o wana nɔ dioo le nyɛ o hɛnaŋndo tosaa. Nduyɛ mɛɛ mɛɛ naŋ nɔ sinapɛŋgoo, o fuuluu a o Chɛhowaa le.—Aisaya 55:9.

4. Yɛɛ naŋ cho yɛ yaasiaa o buŋgɛi hei niŋ?

⁴ Ŋ nɔ miŋ chɛl lɔɔlɔɔ le mi Chɛhowa chɔm naa nɛiyo, nduyɛ miŋ nɔ tiindaŋndo maa o cho naa mala. Nduyɛ maa o cho naa tosal nyɛ naŋ tiuba tosa le naapila le wo. Kɛ, Chɛhowa yeema naa miŋ yiyaŋ a nyɛ naŋ nɔ miŋ tosa le bahawɛila naalaŋ solioo, nduyɛ miŋ mala acheleŋnda wo. (Nuawɔ Sam 37:3, NW.) Ŋ nɔ miŋ ‘dɔu tiindaŋndo o Chɛhowa niŋ, nduyɛ miŋ tosa o kɛndɔɔ.’ Ŋ nɔ vɛlɛ ‘miŋ chɔm tiindaŋ naa o nyɛ naŋ tosa wo niŋ.’ Vɛɛ naŋ tosa yɛ hei? Ŋ yaasiaŋndɔ tamaselii Nuuwa, Deeve, a buɛiyaa laalaŋaa cheleŋ ndaa dɔu tiindaŋndo o Chɛhowa  niŋnda. Ŋ cho chɔ maa ndaa tiuba le sɔɔŋ pum tosaa le. Kɛ ma muli hɔlla o sɔɔŋ ndaa tiuba le tosaa woŋ choo.

5. Tɛɛsiaawɔ boondii Nuuwa ve.

⁵ O boondii Nuuwa ve niŋ, “dɛnɛ wɔɔŋndo wa o pia o chieeŋndo choo” a kaala nɔɔlɛilaŋ. (Chɛnɛsee 6:4, 9-13) Mi che bɛɛ Nuuwa ndoo sina maa Chɛhowa nɔ mbo tɛɛmbuu chieeŋ dɛnɛ wɔɔŋ koŋ, kɛ mi Nuuwa tambu kɔl le sɔɔŋ waŋnda wa tosaa woŋ. O boondii keŋ bɛŋgu, Nuuwa ndoo sina nyɛ o tiuba le tosa le wo. Kɛ ndoo nɔ vɛlɛ sinapɛŋgoo maa o tiuba le sɔɔŋ pum tosaa.

6, 7. (a) Yɛɛ Nuuwa ndoo tiu yɛ ba le tosaa le? (b) Vɛɛ naa bɛɛ cho yɛ o boondii Nuuwa wa ve niŋ?

⁶ Nyɛ Nuuwa ndoo tiuba tosa le wo: Mi Nuuwa dimi yooŋgu kɛndɔɔ le waŋnda silaa, kɛ o beŋ nda le ndu chɛlɔɔ le. Nduyɛ ndoo tiuba mbo keŋela Piɔɔ Mɛŋma Koŋgi Bɛnduaŋ tuisi le. Nuuwa ndoo nɔ mbo dɔu tiindaŋndo o Chɛhowa niŋ maa O cho diomnde o mɛi le dɛnɛ wɔɔŋndo faŋaa wo peelu. Ndoo nɔ laalaŋndo maa Chɛhowa cho keŋ tosa a teleŋ bɛnda wo.—Chɛnɛsee 6:17.

⁷ Naa bɛɛ cho o chieeŋ dɛnɛ wɔɔŋndo cho o piaa cha wo niŋ, nduyɛ ŋ sina maa Chɛhowa dimi le ndu tɛɛmboo. (Chɔŋ Tasoo 2:17) Kɛ le suŋ suŋ ndɔ, ŋ nɔla miŋ baŋ waŋnda le ma chɛl “yooŋgu kɛndɔɔ . . . a masale Mɛlɛkaleŋ okɔɔ” le. Nduyɛ ŋ tiuba le nyɛ o nyɛ tosa le mi “nyɛ palaa” bɛndoo keŋela hunɔɔ le. (Maatiu 24:14, 21) Maa Nuuwa, ŋ nɔ tiindaŋndo o Mɛlɛka niŋ maa o cho suŋ dɛnɛ wɔɔŋ kɛ kɛ faŋa. (Sam 37:10, 11) Ŋ laalaŋ  maa Chɛhowa cho chɛlɔɔ mi chieeŋ dɛnɛ wɔɔŋndo hoo chɔɔlu hiouwɔɔ lachi le paaleŋ lepilɛ bɛɛ le.—Habakuku 2:3.

8. O yɛɛ choo Nuuwa ndoo muli yɛ hɔlla? (Tofa fotueiyo o peele naŋ kandu leŋ choo.)

⁸ Nyɛ Nuuwa ndoo tiuba tosaa wo: Tuupa mi Nuuwa ndoo tambu kɔl le sɔɔŋ ndoo tiuba tosa le woŋ, mbo muli hɔlla o sɔɔŋ ndoo tiuba le tosaa woŋ choo. Mi Nuuwa dimi yooŋgu kɛndɔɔ a tiindaŋndo le waŋnda silaa. (Pitɛ Diiŋ Ndɔɔ 2:5) Wallo hoo ndoo mala ndu ni le tiindaŋ ndɔɔ kɛsioo o kala poŋ. Le handɔɔ lechoo, mbo tual nyɛ Chɛhowa dimul ndu wo kɔɔli le dɛndɔɔ baŋɔɔ.—Nuawɔ Hibuluiya 11:7.

9. Vɛɛ naŋ tuallɛ tamasi Nuuwa wo kɔɔli?

⁹ Maa Nuuwa, ŋ nɔ miŋ “hiou lachi lɔɔ lɔɔ a wallo tosaa o kala kala, le Masanɔɔ Mɛlɛka.” (Kɔliŋtiaŋ Tasoo 15:58) Le tamaseliiyo, ŋ nɔ miŋ mala le Toŋgola leMasalaŋ a Toŋgola Bɔŋaŋnda Bɛndaŋ taŋgullo a toosiaa, miŋ yɔŋguŋ le wallo tosaa o bɔŋaŋnda ibuŋgalaŋ, la bɛndaŋ, o lɛuve, ɔɔ o fonda hivioo cho landaŋ a lɛuve wo. I hiou kpou ve cho ni, ŋ nɔ miŋ wa wali dimiaa yooŋgu kɛndɔɔ tosaa kekelee. Nduyɛ hei nɔla mii kindi tiindaŋ naa le chilaŋ. Mi ndepilɛnɔ pilɛ dimi maa te o dimul pɛ acheleŋnda a tɔnɔla Masale Mɛlɛkaleŋ okɔɔ, mbo saaluŋ maa waŋnda nɔ tiindaŋ kposoŋ te, nduyɛ maa bahawɛila ndalaŋ la feŋaŋ niŋ te. A mɛɛ ndepilɛnɔ koŋ dimi yɛ, ŋ nɔ tiindaŋndo, nduyɛ mbo simnuŋ o kala poŋ te ŋ dimul pɛ acheleŋnda a ndu okɔɔ. Tiindaŋndo hoo mala naa o nyaanɔŋ naŋ cho le yoomoo sɔlaa wo niŋ.—Kɔliŋtiaŋ Tasoo 9:24.

10. Tɛɛsiaawɔ haki Deeve ndoo tosa wo.

¹⁰ Wana ndoo dɔu tiindaŋndo o Chɛhowa niŋndo Masaa Deeve wa ni. Nduyɛ Chɛhowa ndoo kaala ndu bɔɔ. (Walta Wanaa Chiisuaa 13:22) Kɛ a koŋ kpou, mi Deeve tosa kaa ihini nɔɔlɛiyo a Baasiɛba. Haki wɔɔŋ wɔɔŋndo pila wa koŋ ni. Nduyɛ iwɔɔŋ wɔɔŋnde wa ni, mbo tuu le Yulaya, pɔnɔɔ Baasiɛba diyɔɔ o chɔuwo. Mi Deeve dimul pɛŋ Yulaya le mbo yɛɛ yau o poonyiaa le ma dii ndu wo o wana wa chɔuwo chilaŋndo lo! (Saamiɛɛ Diiŋ Ndɔɔ 11:1-21) O mɛɛlulaŋ kpɔŋ, mi haki Deeve tosa wo fula o bɛɛ. (Maki 4:22) Mɛɛ keŋ yɔŋnuŋ, yɛɛ Deeve ndoo tosa yɛ?

11, 12. (a) Mɛɛ Deeve tosa hakioo, yɛɛ ndoo tiu yɛ ba tosa le? (b) Yɛɛ Chɛhowa tosallɛ naa te ŋ mulul pɛ yɔŋ naa wɔɔŋndo kɔɔ?

¹¹ Nyɛ Deeve ndoo tiuba tosa le wo: Deeve ndoo nɔla lɛ mbo siŋga nyɛ ndoo tosa wo le. Ndoo nɔ pɛŋ le saŋgaa tei a yoomu ndɔɔ mɛɛlulaŋ le haki o tosa koŋndo. (Saamiɛɛ Diiŋ Ndɔɔ 12:10-12, 14) Lelaŋ, ndoo yeema tiindaŋndo. Ndoo nɔ mbo tiindaŋ maa te o mulul pɛ yɔŋ ndɔ wɔɔŋndo kɔɔ, Chɛhowa cho ndu malɔɔ haki nduyɛ mbo biunuŋ saŋga o wa sɔla le haki o tosa wo.

¹² Miŋ tosa biondɔŋndaŋ le mɛɛ naŋ cho wanaa lahakiaa yɛ. Kɛ mi biondɔŋndaŋ lapum la wɔu tau mbo hiou la cheleŋndaŋ. Nduyɛ teleŋndaŋ lapum, ŋ nɔla miŋ faŋa biondɔŋnda naŋ tosalaŋ  te. Naa bɛɛ miŋ saŋga lepum le sɔɔŋ naŋ tosa woŋ. (Kaleesiaŋnda 6:7) Kɛ ŋ nɔ tiindaŋndo o nyɛ Mɛlɛka dimi wo niŋ maa te ŋ mulul pɛ haki naŋ tosa wo kɔɔ, o cho naa mala o teleŋnda nyɛpalaa bɛŋgu. O yɔŋ bɛɛ aa naapila tosa ni mi nyɛpalaa koŋ wa naa choo.—Nuawɔ Aisaya 1:18, 19; Walta Wanaa Chiisuaa 3:19.

13. Vɛɛ Deeve ndoo miŋgi yɛ chaŋyɛi nduɛi taŋgul nda Chɛhowa tɛɛŋ?

¹³ Nyɛ Deeve ndoo tiuba tosaa wo: Deeve ndoo yeema le chaŋyɛi nduɛi miŋgioo taŋgullo nda Chɛhowa tɛɛŋ. Vɛɛ ndoo tosa yɛ keŋ? Mi Deeve chɛl le mi Chɛhowa mala ndu. Le tamaseliiyo, mbo chɛl nɛi chɔmaa Netaŋ, wana ndoo suaa le Chɛhowa wo ke ndu wo. (Saamiɛɛ Diiŋ Ndɔɔ 12:13) Mi Deeve piɛi vɛlɛ o Chɛhowa lo nduyɛ mbo chɔɔmuu hakila ndɔlaŋ. Mbo chɔm maa o yeema vɛlɛ le mi sala Chɛhowaa wa ndu choo. (Sam 51:1-17) Tuupa mi ndoo wa yiyaŋndo maa haki o tosa wo hiou ndu mayoomu, mbo pɛɛku nyɛ o biondɔŋnda o tosalaŋ niŋ. Nduyɛ kposoŋ bɛɛ o tosa lɛ hakila wɔɔŋ wɔɔŋnda laŋ te. Mbo viau yoomu tau okoŋ kɔɔli, nduyɛ mbo wu a tiindaŋndo. A tiindaŋndo Chɛhowa loonuŋ ndu ni.—Hibuluiya 11:32-34.

14. Yɛɛ tamasi Deevioo pɛɛku yɛ naa?

¹⁴ Yɛɛ tamasi Deevioo pɛɛku yɛ naa? Maa te ŋ tosa pɛ haki wɔɔŋ wɔɔŋndo, ŋ nɔ miŋ mulul yɔŋ wɔɔŋ koŋ kɔɔ a kɔllo kpou, miŋ dimul Chɛhowa yɔŋ wɔɔŋ naŋ tosa wo, nduyɛ miŋ nyuna ndu le malɔɔ hakioo. (Chɔŋ Tasoo 1:9) Ŋ nɔ vɛlɛ miŋ dimul wanaa chua chilaŋ o kunda leKilisiɔŋndo niŋnda, kanifuule, a nɔla ma mala naa le chaŋyɛi nɛi taŋgullo a Chɛhowa. (Nuawɔ Chemisi 5:14-16.) Te ŋ chɛl pɛ mala Chɛhowaa, koŋ chɔm maa ŋ tiindaŋ diomnde o mɛi le naa malɔɔ haki leŋ. Le handɔɔ lechoo, ŋ nɔ miŋ pɛɛku nyɛ o biondɔŋnda naŋ tosalaŋ niŋ, nduyɛ miŋ hiou lachi a Chɛhowa piɛiyo a kɔl naa kpou.—Hibuluiya 12:12, 13.

15. Yɛɛ tamasi Hana wo pɛɛku yɛ naa?

¹⁵ Kɛlɛŋgaa ma yiyaŋ dɔɔ a buɛiyaa laalaŋnda o Baabuiyo niŋ a ndaa dɔu tiindaŋndo o Chɛhowa niŋ, nduyɛ ma wa kindiŋndo le tosaa nyɛ nda tiuba o teleŋ nyɛ palaa bɛŋgu wo. Le tamaseliiyo, le teleŋndo opum, Hana ndoo nɔ chua le. Ndoo nɔla mbo siŋga keŋ a ba ndɔ le. Kɛ mbo duau tiindaŋ ndɔɔ o Chɛhowa niŋ maa o cho ndu kɔllo dɛɛniaa. Okoŋ, mbo hiau lachi a kɔlaŋ lɔɔlɔɔ o chiɛi Chɛhowaa niŋ le ndu piɛiyo, nduyɛ mbo wa ndu yiyaŋ ndɔɔ dimullo. (Saamiɛɛ Tasoo 1:9-11) Tamaselii kɛndɔɔ pila cho hoo le naa ni! Te ŋ nɔ pɛ kɛndiaa lepɛŋndo ɔɔ bahawɛila cheleŋ naŋ nɔla siŋga le laŋ, ŋ nɔ miŋ nyindu laŋ o Chɛhowa lo, a tiindaŋndo maa o cho naa mala. (Pitɛ Tasoo 5:6, 7) Ŋ nɔ vɛlɛ miŋ kindiŋ o nɛi o nɛi niŋ le tɔnɔɔ sɔlaa o bɔŋaŋnda naala leKilisiɔŋndaŋ, a kɛɛsiaala cheleŋnda cho o kɔɔna Chɛhowaa niŋ le naa malaa laŋ.—Hibuluiya 10:24, 25.

16. Yɛɛ tamasi Saamiɛɛ wo pɛɛku yɛ kalaŋ chuauwa?

 ¹⁶ Ɔɔ kalaŋ chuauwaa dɔu tiindaŋndo o Chɛhowa niŋ kɛ mi chuauwaa ndaa mal Chɛhowa piɛiyo wa? Wana ndoo suaa le Mɛlɛka wo Saamiɛɛ, beŋ puaa nduaa sulaa le ma chɔm lo lechoo ndaa o Mɛlɛka lo le. (Saamiɛɛ Tasoo 8:1-3) Mi Saamiɛɛ mal Chɛhowa keŋ o ba. Kɛ mbo hiau lachi a kindiŋndo le lo lechoo wo chɔmndo o Mɛlɛka lo, nduyɛ mbo tosa nyɛ nɛŋi Finya ndɔ o choo choo niŋ kɔllo wo. (Pulɔwaa 27:11) Hau, simul pilɔɔ kpe kalaŋ chuauwaa Kilisiɔŋaa bɔɔbɔɔ cho le bɛŋgu ni. Maa finya poombɔ nila kaloo o tale Chiisoo niŋ, kalaŋ chuauwa haa nɔ tiindaŋndo maa, Chɛhowa cho lɔɔlɔɔ a balaŋ la kumbiaa le demullo wanaa mulul yɔŋ nda wɔɔŋndo kɔɔ wa. (Luku 15:20) Le suŋ suŋ ndɔ, kalaŋ chuauwa nɔ ma muli hɔlla le lo lechoo ndaa chɔmndo o Chɛhowa lo. Nduyɛ ma nɔ tiindaŋndo maa tamasi ndaa cho chuauwaa ndaa mala le miiŋgoo Chɛhowa o ibuŋ.

17. Kɔl dɛɛniaa yɛɛ naŋ sɔla yɛ chua tambɛi ndoo vii pɔnɔɔ wo o ba?

¹⁷ Tamasi kɛndɛ cheleŋ cho chua tambɛi ndoo vii pɔnɔɔ o palɛi Chiisu ve niŋndo ni. (Nuawɔ Luku 21:1-4.) Chuaa hoo ndoo nɔla mbo siŋga kafala waŋnda wa tosaa o maaŋndo niŋndaŋ te. Nduyɛ ndoo nɔla mbo siŋga tambii o wa niŋnde le. (Maatiu 21:12, 13) Kɛ tiindaŋ ndoo dɔu o Chɛhowa niŋndo nyindu ndu ni le piɛile tonyaleŋ tooloo. Wana ikɛndɔɔ chuaa hoo wa ni. Nduyɛ mbo duau “kaniŋ pɔmbɔŋ ŋ muuŋ” o kɔfu chuuŋgiaa niŋ. Kanioŋ muŋ koni wa ndu o ba ni. Mi chuaa hoo chɔm maa o Chɛhowa niŋ o dɔu tiindaŋ ndɔɔ kpou ni. Nduyɛ mbo sina maa te o kɛsi pɛ Chɛhowa piɛiyo nyɛ tase peŋ o yoomu ndɔɔ niŋ, Chɛhowa cho tosa a sabu mbo sɔla nyɛm o hau ba woŋ. Naa bɛɛ nɔ tiindaŋndo maa te ŋ kɛsi pɛ Masale Mɛlɛkaleŋ nyɛ tase peŋ o yoomu naa niŋ, Chɛhowa cho tosa a sabu miŋ sɔla nyɛm naŋ hau ba woŋ.—Maatiu 6:33.

18. Chɔmndɔ tamaselii puaapilɛnɔ ndoo nɔ yiyaŋ kɛndɔɔ wo.

¹⁸ Puaapiliaa a ndepiliaa naa bɔɔbɔɔ nɔ tiindaŋ pilɔɔ kpe o Chɛhowa niŋ. Nduyɛ a cho hɔlla mulioo o sɔɔŋ nda tiuba le tosaa woŋ choo, kɛ o cho ŋ nda tiuba le tosa le woŋ te. Ŋ yaasiaŋndɔ tamaselii puaapilɛnɔɔ diolaŋ Malkɔm. Mbo lo tiindaŋndo dɔuwɔɔ o Chɛhowa niŋ tei a piɔm ndɔɔ o wɔsi 2015 niŋ. O wɔsila bɔɔbɔɔ ndu nda laa ndɔ wa Chɛhowa piɛiyo laŋ niŋ, ndaa nɔ boonduŋ kɛndɔŋ a ŋ wɔɔŋndoŋ. Mbo dimi aa, “Mi yoomoo siŋgaŋ o lepilɔɔ niŋ kpe, nduyɛ lepum, mi sɔɔŋ kendu tau. Kɛ mi Chɛhowa dɔu wanaa tiindaŋ o ndu niŋnda sala.” Sila yɛɛ Malkɔm ndoo yɔŋgu yɛ? “Piɛi le ma tosa tau nduyɛ le waa feenda feenda o wali Chɛhowa niŋ a mɛɛ ŋ tiuba yɛ. Muli hɔlla o sɔɔŋ ŋ tiuba tosaa woŋ choo, kɛ o cho sɔɔŋ ŋ tiuba tosa le woŋ te.” *—Tofa tɛɛsiaa amatou.

19. (a) Le yɛɛ bolle Baabuile naaleŋ le wɔsi 2017 le bɛnda yɛ tau? (b) Vɛɛ ŋ cho yɛ dɔuwɔɔ bolle Baabuileŋ le wɔsi 2017 o wali niŋ?

¹⁹ Dɛnɛ wɔɔŋndo cho o Chieeŋndo hoo niŋ ‘mbo hiau maa paandu.’ Lelaŋ, ŋ nɔ miŋ wa kɔl maa nyɛ palaa cho chɔɔlu kui. (Timoti Diiŋ Ndɔɔ 3:1, 13) I cho suɛi sɔvɛ le sinaa maa ŋ nɔ miŋ chɛl mi bahawɛilaŋ la hiou naa mayoomu le. Kɛ tiindaŋ naa nɔ mbo wa o kala poŋ o Chɛhowa niŋ, nduyɛ miŋ muli hɔlla o sɔɔŋ naŋ tiuba tosaa woŋ choo. Lelaŋ, bolle Baabuile naaleŋ le wɔsi 2017 le bɛnda tau ni. Le dimi aa, “Dɔu tiindaŋndo o Chɛhowa niŋ, ma tosa o kɛndɔɔ”!—Sam 37:3.