1. Jehova’n mihringte chu eng ang theihna danglam bîk tak neiin nge a siam?

JEHOVA’N mihringte chu theihna danglam bîk tak neiin a siam a. Ngaihtuah theihna min pe a, chu chuan buainate chingfel tûr leh nakin hun atâna inruahman thei tûrin min ṭanpui a ni. (Thufingte 2:11) Kan ruahmannate puitlin thei tûr leh kan thiltumte hlen thei tûrin thiltihtheihna min pe bawk. (Philippi 2:13) A dik leh dik lo hriat theihna—chhia leh ṭha hriatna—pawh min pe a. Chu chuan thil sual ti lo tûr leh kan thil tihsualte siam ṭha tûrin min ṭanpui a ni.—Rom 2:13-16.

2. Jehova’n kan theihna chu engtianga hmang tûrin nge min beisei?

² Jehova chuan kan theihnate chu a ṭha zâwnga hmang tûrin min beisei a. Engvângin nge? Min hmangaih vâng leh chûng theihna min pêkte kan hman hunah kan hlim dâwn tih a hriat  vâng a ni. Entîr nân, Hebrai Pathian Lehkha Thuah: “Mi taima ngaihtuahna chuan neihnunna lam chauh a pan a,” tiin leh “i kutin tih tûr a hmuh apiang chu theihtâwpin ti rawh,” tiin kan chhiar a. (Thufingte 21:5; Thuhriltu 9:10) Grik Pathian Lehkha Thuah: “Remchâng hun kan neihzia ang zêlin mi zawng zawng chungah thil ṭha i ti ang u,” tiin leh “mi tinin thilpêk in hmuh ang zêlin . . . rawng inbâwl tawn ṭheuh rawh u,” tiin kan chhiar leh a ni. (Galatia 6:10; 1 Petera 4:10) Jehova’n kan tân leh mi dangte tân thil ṭha ti tûrin min duh tih a chiang hle.

3. Engtin nge mihringte theihna chuan chin tâwk a neih?

³ Jehova chuan kan theihnate hmang tûrin min duh a; mahse, tihtheih chin kan nei tih erawh a hria. Entîr nân, ṭhat famkim lohna, leh sual leh thihna te chu kan ti bo thei lo va. (1 Lalte 8:46) Mi tinte hian duh thlan theihna an neih avângin mi dangte chu kan thunun thei lo bawk. Engtiang khawpa hriatna leh thiltawn ngah pawh ni ila, Jehova chu kan tluk ngai lo vang.—Isaia 55:9.

4. He thuziakah hian eng nge kan ngaihtuah ang?

⁴ Jehova chuan min ṭanpui ang a, kan tih theih lohte min tihsak ang tih ring tlatin kan inkaihhruaitîr reng tûr a ni. Mahse, ani chuan buaina chingfel tûra ka tihtheihte leh mi dangte kan ṭanpui theih dânte ngaituah tûrin min duh a. (Sâm 37:3 chhiar rawh.) ‘Jehova chu kan rin a, thil ṭha kan tih,’ a ngai a. Chu bâkah, “Rinawm  taka kan tih,” a ngai bawk. Chu chu engtin nge kan tih theih? Nova, Davida leh Jehova rinchhantu chhiahhlawh rinawm dangte entawn tûr siam chu i lo ngaihtuah ang u. Tih theih lohte nei mah se, an tih theihte an ngaihtuah tlat tih kan hmu ang.

5. Nova dinhmun chu sawi rawh.

⁵ Nova chu ‘inpâwng nêknaa khat’ leh nungchang bawlhhlawhnaa khat khawvêlah a awm a. (Genesis 6:4, 9-13) Chu khawvêl suaksual tak chu a tâwpah Jehova’n a tiboral dâwn tih hre mah se, mite thiltih avângin a rilru a na ngei ang. Chu dinhmunah, Nova chuan a tih theih lohte leh a tih theihte a awm tih a hria a ni.

6, 7. (a) Nova’n eng nge a tih theih loh? (b) Engtin nge Nova dinhmun leh kan dinhmun chu a inan?

⁶ Nova tih theih lohte: Nova chuan Jehova vaukhânna thuchah chu rinawm takin a puang a; mahse, mite chu pawm tûrin a tilui thei lo. Tuilêt thleng thuai tûrin tihtheih a nei lo bawk. Jehova’n suahsualna titâwp tûra A thutiam chu a hun takah a thlentîr ang tih a rin a ngai a ni.—Genesis 6:17.

⁷ Keini pawh, Jehova’n tiboral tûra a tiam sualsualnaa khat khawvêlah kan awm a. (1 Johana 2:17) Amaherawhchu, “Ram chanchin ṭha” pawm tûrin mite chu kan tilui thei lo. “Hrehawm nasa tak” chu thleng thuai tûrin tihtheih engmah kan nei lo bawk. (Matthaia 24:14, 21) Pathianin suahsualna zawng zawng a titâwp thuai  ang tih ring tlatin Nova anga rinna nghet tak kan neih a ngai a. (Sâm 37:10, 11) Jehova’n he khawvêl suaksual titâwp tûra a hun ruat chu ni khattê pawhin a ti tlai lo vang tih kan ring nghet tlat a ni.—Habakuka 2:3.

8. Nova’n eng nge a ngaihtuah tlat? (A thupui chunga milem en rawh.)

⁸ Nova tih theihte: A tih theih lohte avânga beidawng mai lovin, Nova’n a tih theihte chu a ngaihtuah tlat a. Jehova vaukhânna thuchah chu rinawm takin a puang a ni. (2 Petera 2:5) He hna hian a rinna tinghet reng tûrin a ṭanpui ngei ang. Thu a hrilh bâkah, lawng tuk tûra Jehova kaihhruainate chu a zâwm a ni.—Hebrai 11:7 chhiar rawh.

9. Nova entawn tûr siam chu engtin nge kan entawn theih?

⁹ Nova ang bawkin, ‘Lalpa hna ṭhahnemngai taka thawhnaah,’ kan buai hle a. (1 Korinth 15:58) Entîr nân, kan Kingdom Hall leh Assembly Hall saknaah leh vawn ṭhatnaah te, inkhâwmpui leh regional inkhâwmpuiahte tlâwmngaia inpein, branch office, a nih loh leh remote translation office-ahte kan ṭanpui thei a ni. Thil pawimawh ber chu, nakin hun kan beiseina tinghet thei thu hrilh rawngbâwlnaah kan buai reng hi a ni. Unaunu rinawm tak pakhatin Pathian Ram malsâwmna chungchâng mi dangte hnêna a hrilh chuan, mite’n beiseina rêng nei lovin an buainate chu a awm reng tûrah an ngai tih a hmuh chhuah thu a sawi. Unaunu sawi angin, keini chuan beiseina kan nei a, mi dangte hnêna kan hrilh hunah kan beiseina chu a nghet lehzual a. He beiseina hian nun intlânsiaknaa tlân reng tûrin min ṭanpui thei a ni!—1 Korinth 9:24.

10. Davida dinhmun chu sawi rawh.

¹⁰ Lal Davida chu mi rinawm tak a nih avângin Jehova’n a hmangaih hle a. (Tirhkohte 13:22) Chuti chung pawhin, Davida’n Bath-sebi chu mutpuiin, sual lian tak a ti a ni. Chu aia pawi zâwk chu, indonaah Bath-sebi pasal Uria tihhlum a nih theih nân ruahmanna siamin a thil sual tih chu thup a tum a. Davida chuan Uria ngei chu a thihna tûr kaihhruaina lehkha a kentîr a ni! (2 Samuela 11:1-21) A tâwpah, Davida thil sual tih chu hriat chhuah a ni ta. (Marka 4:22) Chu chu Davida’n engtin nge a chhân lêt?

11, 12. (a) Thil sual a tih hnuah, Davida’n eng nge a tih theih loh? (b) Kan inchhîr a nih chuan Jehova’n eng nge min tihsak ang?

¹¹ Davida tihtheih lohte: Davida chuan a thiltih tawhte chu a sût lêt thei lo va. Dik tak chuan, a thil sual tih sawhkhâwkte chu a dam chhûngin a tawrh a ngai ngei ang. (2 Samuela 12:10-12, 14) Chuvângin rinna a neih a ngai a. A inchhîr tak zet chuan, Jehova’n a ngaidam ang tih leh a thiltih  sawhkhâwkte tuar chhuak thei tûrin a ṭanpui ang tih a rin a ngai a ni.

¹² Ṭha famkim lo kan nih avângin, thil sual kan ti ṭheuh va. Mahse, thiltih sual ṭhenkhat chu a dang aiin a pawi zâwk mai thei a, dinhmun ṭhenkhatah kan thiltih sualte chu kan sût lêt leh thei tawh lo. Chumi sawhkhâwkte pawh kan tawrh a ngai ngei ang. (Galatia 6:7) Mahse, kan inchhîr chuan thiltih sual avânga harsatna kan tawh hunah pawh min ṭanpui ang tih Pathian thutiam chu kan ring thei a ni.—Isaia 1:18, 19; Tirhkohte 3:19 chhiar rawh.

13. Engtin nge Davida chuan Jehova nêna an inlaichînna chu a siam ṭhat?

¹³ Davida tih theihte: Davida chuan Jehova nêna an inlaichînna chu siam ṭhat leh a duh a. Engtin nge a tih? Jehova ṭanpuina chu a pawm a. Entîr nân, Jehova zâwlnei Nathana zilhna chu a pawm a ni. (2 Samuela 12:13) A thil sual tih chu pawmin Jehova hnênah a ṭawngṭai a, Jehova duhsakna dawn leh a duhzia a târ lang bawk a ni. (Sâm 51:1-17) A thil sual tih avânga rilru hrehawm taka awm reng lovin, chuta ṭangin a inzir zâwk a. Chutiang sual pawi tak chu a tinawn leh tawh ngai lo. Kum tam tak hnuah, mi rinawm niin a thi a. Jehova’n mi rinawm niin a hre reng a ni.—Hebrai 11:32-34.

14. Davida entawn tûr siam aṭangin eng nge kan zir theih?

¹⁴ Davida entawn tûr siam aṭangin eng nge kan zir theih? Sual pawi tak kan tih chuan, tih tak zeta inchhîr a ngai a, Jehova hnênah kan sualte puangin, a ngaihdamna kan dîl tûr a ni. (1 Johana 1:9) Jehova nêna kan inlaichînna siam ṭha tûra min ṭanpui theitu upate pawh kan hriattîr tûr a ni. (Jakoba 5:14-16 chhiar rawh.) Jehova ṭanpuina kan pawm hian, min ngaidam ang tih a thutiam kan rinzia kan târ lang a. Chu bâkah, kan thiltih sual aṭanga inzirin, rinawm takin Jehova rawng kan bâwl zawm tûr a ni.—Hebrai 12:12, 13.

15. Hani entawn tûr siam aṭangin eng nge kan zir theih?

¹⁵ Dinhmun khirh tak kârah pawh an tihtheihte tia Jehova rinchhan tlattu Bible-a chhiahhlawh rinawm dangte pawh i hre chhuak ngei ang. Entîr nân, Hani chuan fa a nei thei lo va. Chu dinhmun chu a thlâk danglam thei lo. Mahse, Jehova’n a thlamuan ang tih a ring tlat a. Chuvângin, biak bûkah kal ziahin Jehova hnênah a ṭawngṭai a, a rilru a phawrh a ni. (1 Samuela 1:9-11) Kan tân entawn tûr ṭha a va ni tak em! Natnate leh kan thlâk danglam theih loh harsatna dangte kan hmachhawn hunah, kan manganna chu Jehova hnênah nghatin min ngaihsak ang tih kan ring a ni. (1 Petera 5:6, 7) Chu bâkah, Kristian inkhâwmnate leh Jehova inawpna pâwlin a pêk ruahmanna dang aṭanga kan hlâwkpui theihte chu kan ti a ni.—Hebrai 10:24, 25.

16. Nu leh pate’n Samuela hnên aṭangin eng nge an zir theih?

 ¹⁶ An fate’n Jehova rawngbâwl an bânsan chung pawha rinawm tlat nu leh pate chungchâng chu eng nge ni ve? Zâwlnei Samuela chuan a fapate chu Pathian chunga rinawm reng tûrin a tilui thei lo va. (1 Samuela 8:1-3) Chu chu Jehova kuta a nghah a ngai a ni. Mahse, Samuela chuan Pathian chunga rinawm reng tûra a tih theihte chu tiin vâna a Pa chu a tilâwm a ni. (Thufingte 27:11) Tûn laia Kristian nu leh pa tam tak pawh chutiang dinhmunah an awm a. Isua tehkhin thua fapa tlân bova pa ang chiah khân, Jehova’n thil sual ti inchhîrte chu lo lawm a inpeih reng tih an ring a ni. (Luka 15:20) Chutih rualin, nu leh pate chuan Jehova chunga rinawm reng an tum tlat thei a, an entawn tûr siam chuan an fate chu Jehova hnêna kîr leh tûrin a chêttîr ang tih an beisei a ni.

17. Hmeithai rethei entawn tûr siam chuan engvângin nge min tihchak?

¹⁷ Entawn tûr ṭha dang leh chu Isua hun laia hmeithai rethei kha a ni a. (Luka 21:1-4 chhiar rawh.) Ani chuan biak ina thiltih dik lote chu a ti danglam thei lo va, a retheihna pawh a thlâk danglam thei hek lo. (Matthaia 21:12, 13) Mahse, Jehova a rinchhanna chuan biakna dik thlâwp tlat tûrin a chêttîr a. A thil phalin a neih zawng zawng “dâr tangka dere pahnih” chu a pe a ni. Chu hmeichhe rinawm tak chuan Pathian Jehova a rinchhan pumhlûm a. Jehova rawngbâwlna a dah hmasak chuan a mamawhte A pe ang tih a hria a ni. Chutiang bawkin, keini pawh Pathian Ram kan dah hmasak chuan kan mamawhte Jehova’n min pe ang tih kan ring a ni.—Matthaia 6:33.

18. Rilru put hmang dik neitu unaupa thiltawn chu sawi rawh.

¹⁸ Tûn laia kan unau tam takte pawhin, an tih theih lohte ngaihtuah aiin an tih theihte chu ngaihtuahin Jehova an rinchhanzia an lantîr bawk a. Unau Malcolm-a chungchâng hi han ngaihtuah teh. Ani chu kum 2015-a a boral nî thlenga rinawm a ni a. A nupui nên kum tam tak Jehova rawng an bâwl hun chhûngin hun hlimawm leh harsate pawh an tawng a. Ani chuan, “Nun hi duh anga a kal tluan loh châng a awm a, sawi lâwk theih pawh a ni lo, hmachhawn a harsa thei hle. Mahse, Jehova’n amah rinchhantute chu mal a sâwm a ni,” tiin a sawi. Malcolm-a’n eng thurâwn nge a pêk? “Jehova rawngbâwlnaa rah ṭha tak chhuahtu nia, thawk zawm zêl thei tûrin ṭawngṭai la. I tih theih lohte ni lovin, i tih theihte chu ngaihtuah ang che.” *—Footnote en rawh.

19. (a) Engvângin nge kum 2017 kum châng thlan hi inâwm tak a nih? (b) Engtin nge kum 2017 kum châng hi i nunpui theih?

¹⁹ He khawvêl suaksual hi a “sual zual deuh deuh” avângin harsatnate pawh a pung zual deuh deuh vang tih kan beisei thei a. (2 Timothea 3:1, 13) Kan harsatnate ngaihtuah hah loh hi tûn hma zawng aiin a pawimawh lehzual a ni. Jehova chunga rinna nghet tak kan neih a ngai a, kan tih theihte kan ngaihtuah tlat tûr a ni. Chuvângin, kum 2017 atâna: “Jehova chu ring la, thil ṭha ti rawh” tih kum châng thlan hi a inâwm hle a ni!—Sâm 37:3, NW.