1. Jmé xi kitsjoaná je Jeobá kʼianga kisindaná.

JE Jeobá nʼio ndasʼin kisindaná. Kʼoasʼin kisindaná nga ma nikjaʼaitsjeen kʼoa kui xi basenkaoná nga ma bʼendajiaan je kjoa xi sʼená. Kʼoati kui xi basenkaoná nga tongini nikjaʼaitsjeen jmeni xi sʼiaan nichxin xi nroaján (Proverbios 2:11). Kʼoasʼin kisindaná nga ma kʼoanʼia jmeni xi kanikjaʼaitsjeen kʼoa nga bichotjenngiaa jmeni xi mená (Filipenses 2:13). Kʼoati kitsjoaná tokoán nga ʼyaa jmeni xi ndatjín kʼoa jmeni xi chʼaotjín. Je tokoán basenkaoná nga tsín jée tsaojiaan kʼoa nga nindayaa yaoná tsa jme xi kanʼia (Romanos 2:15).

2. Jósʼin mele Jeobá nga si̱chjén jme xi kitsjoaná.

² Je Jeobá kui xi mele nga ndasʼin si̱chjén jmeni xi kitsjoaná. Ánni. Kuinga tsjoakená kʼoa mele nga ndasʼin kuiyoaa. Tobʼelañá, ya Biblia itso: “Jngo chjota xi tongini nda bʼéndajin jme xi sʼín, nʼio ndasʼin bichótsjoá”. Kʼoati i̱ tsoná: “Ngayeje  jmeni xi koa̱nle kʼoasʼin ndsai, kʼoatʼiain kao ngayeje nganʼioli” (Proverbios 21:5; Eclesiastés 9:10). Itsosa kjoafaʼaitsjen xi tsjoáná: “Tje̱n nga sʼe̱saná ʼnde, nda si̱xá tʼatsʼe ngatsʼi” kʼoa je “kjoanda [xi] tsakʼaile, nga jngójngó katasíchjén tʼatsʼe xi kjaʼaí” (Gálatas 6:10; 1 Pedro 4:10). Tojosʼin tiʼyaa, je Jeobá kui xi mele nga kui xi ndatjín kʼoasʼiaan kʼoa nga kʼoati kuinyakoaa xi kjaʼaí.

3. Jméni xi tsín maná kʼoanʼia.

³ Je Jeobá mele nga si̱chjén jme xi kitsjoaná tonga kʼoati be nga tsín kʼoakoa̱nná kʼoasʼiaan ngayeje. Tobʼelañá, likui koa̱nná nga chja̱ʼaxian je jée kao kjoabiya (1 Reyes 8:46). Kʼoati likui koa̱nná nga ñá kʼoakʼuínlee jmeni xi sʼin je chjota, nga̱ tjínná kjoandái ngatsʼiaa nga chjoéjiaan jmeni xi mená sʼiaan. Ninga choa kʼoa ninga tse kjoafaʼaitsjen tjínná, je Jeobá ngisaa nʼio ngʼa tíjna kjoafaʼaitsjenle (Isaías 55:9).

4. Jméni xi chótʼayá i̱ kjoaʼmiya jebi.

⁴ Tjínnele kʼoaiʼndelee je Jeobá nga katabándiaaná kʼoa kʼoakʼoé tokoán nga je tsjoánganʼioná kʼoa nga je kʼoasʼin jmeni xi tsín koa̱nná kʼoasʼiaan. Tonga kʼoati kui xi mele nga ñá si̱kjaʼaitsjeen josʼin kʼoéndajiaan kjoa xi tjínná kʼoa nga kuinyakoaa xi ngikʼa (tʼexkiai Salmo 37:3). * Tjínnele nga si̱nʼiotʼaa je Jeobá kʼoa kʼoasʼiaan jmeni xi ndatjín kʼoa kixi koaan. Nga jchaa josʼiaan, i̱ kjoaʼmiya jebi kui chótʼayá jme xi kisʼin je Noé, David kʼoa kao xi ngikʼa choʼndale Niná xi je kisinʼiotʼa. Jchañá nga tjín jmeni xi tsín  koan nga je kʼoakisʼin tonga kui kuenta kisʼin jmeni xi koan kʼoakisʼin.

5. Jmé kjoa xi jaʼatojin je Noé.

⁵ Je Noé kʼiaa tsakʼejna nga kisʼejnakitse kjoatsʼen kao kjoachajngi i̱ Sonʼnde (Génesis 6:4, 9-13). Ningalani be je Noé nga sikjeson Jeobá je chjotatsʼen nʼiojin koankjáojinle jmeni xi kisʼin je chjota. Je Noé tsabee nga tjín jmeni xi tsín koa̱nle kʼoasʼin tonga kʼoati koanjinle nga tjín jmeni xi koa̱nle kʼoasʼin.

6, 7. 1) Jméni xi tsín kʼoakoanle Noé nga kisʼin. 2) Jósʼin mangóson nichxin xi tiyoaa ndʼaibi kao jokoanchon nga tsakʼejna je Noé.

⁶ Jmeni xi tsín koan kʼoakisʼin je Noé. Kitsoyasonle chjota jmeni xi kitso Niná nga sʼin, tonga alikui kʼoakoanle nga tsakʼéne kjoanʼiole je chjota nga katanrʼoé. Kʼoati tsín koan nga je kʼoakitso nga katafaʼai ndi̱to̱n je Jtsínʼio. Tjínnele nga je Jeobá kisinʼiotʼa nga sikjeson je xi chʼaotjín kʼoa nga kʼia kʼoasʼin nga kuicho choa̱le (Génesis 6:17).

⁷ Kʼoati ñaki to kjoatsʼen kijnakitse sonʼnde ndʼaibi kʼoa ʼyañá nga sikjeson je Jeobá (1 Juan 2:17). Tonga alikui kʼoakoa̱nná nga kjoanʼio kʼoénelee chjota nga katanrʼoé je “énnda xi tʼatsʼe je kjoatéxomale ngʼajmi”. Kʼoati tsín koa̱nná nga ñá kʼoakuixoán nga jekatafitsʼia kjoañʼai xi nʼio tse (Mateo 24:14, 21). Tojo kisʼin je Noé, kʼoati tjínnele nga nʼio katasʼejna kjoamakjainná kʼoa kʼoakʼoé tokoán nga jeme kjoaʼaxin Jeobá je kjoatsʼen xi tjín (Salmo 37:10, 11). ʼYañá nga tokʼoakji tjen tsjoáʼnde je Jeobá jokji tjen  tíjna choa̱le kʼoa tsín tsjoáʼnde nga tsesa kʼoakoa̱n (Habacuc 2:3).

8. Jméni xi kuenta kisʼin je Noé (chótsenlai sén xi fitsʼiani kjoaʼmiya jebi).

⁸ Jmeni xi koan kʼoakisʼin je Noé. ʼNdele nga kui sikjaʼaitsjen je Noé jmeni xi tsín je kʼoakoa̱nle sʼin, tosaa kui kuenta kisʼin jmeni xi koa̱n sʼin. Tobʼelañá, tsakájinkon je chjota nga Jtsínʼio kjoaʼaíkao je Jeobá (2 Pedro 2:5). Nga kʼoakisʼin kuijin xi tsakasenkao nga nʼio kisʼejna kjoamakjainle. Tonga ali tsa tokitsoyasonjin, kʼoati ñaki kʼoasʼin kitjenngi jme xi kitsole Jeobá nga tsakʼénda je arca (tʼexkiai Hebreos 11:7). *

9. Jósʼin koa̱n chjénngilee je Noé.

⁹ Tojo kisʼin je Noé, ñá kʼoati kui xále Niná tinʼia (1 Corintios 15:58). Tobʼelañá, tjínkʼa xi ya tsjoánganʼio nga sʼenda je Ndʼia jña chotʼayá kao jña satío kjoajtíntse. Kʼoa tjínkʼa xi ya tsjoánganʼio ya jña tjío sucursal kʼoa tsa yaje̱ jña tjío ndʼia jña faʼatoya Énle Niná. Kʼoa tjínkʼa xi tsjoánganʼio nga satío kjoajtíntse. Tonga je xi ngisa nʼia kuinga ʼmiyasoán, kʼoa kui xi ngisa sítaja kjoamakjainná tʼatsʼe kjoachoya xi tjínná. Jngo tichjaa xi kʼoakitso nga kʼianga fákaoni je chjota tʼatsʼe kjoanichikontʼain xi kjoaʼaíkao je Chjotaxále Niná, bení nga tsín jme kjoachoya tjínle chjota nga̱ kʼoasʼin síkjaʼaitsjen nga tsínkʼia sʼe̱ndajin kjoa xi tjínle. Tonga ñá tjínná kjoachoya kʼoa tosi tonda mataja kjoamakjainná nga ʼmiyasoán. Je kjoachoya xi tjínná kui xi basenkaoná nga tosi tonda bʼenelee yaoná saʼnda nga tjoéná kjoabijnachon xi tsínkʼia fetʼa (1 Corintios 9:24).

10. Tʼeyanajmí jméni xi kisʼin je David.

¹⁰ Je rey David nʼio kisʼele kjoamakjain kʼoa je Jeobá nʼio tsjoake koan (Hechos 13:22). Ninga kʼoalani, je David jngo jée xi nʼio ai tsakajngi kʼianga je kisichajngikao Bat-seba, jngo chjoón xi jechixan. Kʼoa ngisaa tichʼao kisʼinngáni kʼianga koanmele tsakʼéʼma je jéele, kʼianga kʼoasʼin tsakʼéne nga katanikʼien ya kjoajchán je Urías, xʼinle Bat-seba. Saʼnda tijé Urías kisikasénkaoni David je xo̱n xi kʼoatso nga katanikʼien (2 Samuel 11:1-21). Kʼianga jeki nichxin chan tsaʼyale jéele David (Marcos 4:22). Jmé xi kisʼin David kʼianga jetsaʼyale jéele.

11, 12. 1) Jméni xi tsín koan kisʼin je David kʼianga jetsakajngijée. 2) Jósʼin koasenkaoná je Jeobá kʼiatsa kʼoakoa̱nniná je jée xi kabijnyaa.

¹¹ Jmeni xi tsín koan kʼoakisʼin je David. Alikui tikoanni nga tsakjaʼáxin je jée xi tsakajngi je David. Saʼnda kʼoatsakʼinle nga tse kjoa kuichomani jme xi kisʼin (2 Samuel 12:10-12, 14). Kuinga koanchjénnile kjoamakjain. Tjínnele nga kʼoatsakʼé kon nga sichatʼale je Jeobá kʼiatsa kʼoakoa̱nnile jéele  kʼoa nga je koasenkao nga chókjoajinle kjoa xi sʼe̱le nga kʼoasʼin tsakajngijée.

¹² Sokójéená ngatsʼiaa nga̱ chjotajée maa. Tonga tjín jée xi ngisa ai tjío. Tsakui nichxin likui kʼoakoa̱nná nga chja̱ʼaxian je jée xi kabijnyaa. Tsakui nichxin kjoa kuiyojiaan xi totʼatsʼe jme xi kanʼia (Gálatas 6:7). Tonga ʼyañá nga je Niná koasenkaoná kʼiatsa kʼoakoa̱nniná je jéená. Koasenkaoná ninga totʼatsʼe jéená nga kjoa tjínniná (tʼexkiai Isaías 1:18, 19; * Hechos 3:19 *).

13. Jmé xi kisʼin David nga nda tsakʼejna ijngokʼani ngixko̱n Jeobá.

¹³ Jmeni xi koan kʼoakisʼin je David. Nga kui xi koanmele je David nga ndasʼin kʼoéjna ijngokʼani ngixko̱n Jeobá, kitsjoaʼnde nga je tsakasenkao. Tobʼelañá, kinrʼoé kʼianga tsakatekjáyale je profeta Natán (2 Samuel 12:13). Je David kʼoati tsakʼéyanajmíle Jeobá je jéele. Kʼoasʼin tsakakóni nga mele ijngokʼa nda kʼoéjnani ngixko̱n (Salmo 51:1-17). ʼNdele nga sikʼajen kon nga tsakajngijée, tosa kui kisikjaʼaitsjen nga tsín tikʼoasʼinni. Alikui tikui jée tsakajngini. Nga koanskanni, kʼianga kʼien, tojo kʼoasʼin tsaʼyale David nga nʼio kisʼele kjoamakjain kʼoa kʼoasʼin bekon je Jeobá (Hebreos 11:32-34).

14. Jmé xi bakóyaná choa̱le David.

¹⁴ Jmé xi bakóyaná choa̱le David. Tsa jngo jée xi nʼio ai so̱koná, tjínnele kʼoakoa̱nniná jéená kʼoa kʼoakʼuínlee je Jeobá nga katasíchatʼaná (1 Juan 1:9). Kʼoati tjínnele kʼoéyanajmílee je xi chjotajchínga sʼin tjío ánni nga kuinyakaosíniná nga nda kuiyo ijngokʼa ngixko̱n Jeobá (tʼexkiai Santiago 5:14-16). * Kʼoaiʼndee nga katabasenkaoná je Jeobá. Kʼoasʼin koakonilee nga ʼyaa nga sichatʼaná. Alikui tikʼoaiʼndenilee yaoná nga kuijnyíjée kʼoa tosi tonda si̱xálee Jeobá (Hebreos 12:12, 13).

15. Jmé xi bakóyaná choa̱le Ana.

¹⁵ Faʼaitsjenjinná je chjota xi Niná kisinʼiotʼa yaole kʼoa kʼoakisʼin jmeni xi kʼoakoanle kʼianga kjoa xi ñʼai tjío jaʼatojin. Tobʼelañá je Ana. Tse kʼianga chjoónʼndi̱ koan. Ninga tsín koan kisikʼantjaiya jebi, bení nga je Jeobá tsjoánganʼiole. Kuinga tosi tonda kini ya ndʼianajño jña ʼyaxkón je Jeobá, kʼoa kʼoakitsole jotjín kon (1 Samuel 1:9-11). Nʼio nda choa̱ tsakʼéjnaná je Ana. Kʼiatsa chʼin tjínná kʼoa tsa jmesa kjoani xi tsín ñá kʼoakoa̱nná kʼoéndajiaan, jméni xi sʼiaan.  Je Jeobá si̱kʼamiaa ngayeje nga̱ mandosinle xi tʼatsaan (1 Pedro 5:6, 7). Kʼoénelee yaoná nga kjuian je kjoajtín xi satíoná kʼoa si̱chjén jmesani xi tsjoáná je naxinandále Niná (Hebreos 10:24, 25).

16. Jmé xi bakóyale choa̱le Samuel je xijchá xi jekisikjinle Jeobá je xtile.

¹⁶ Jméni xi koa̱n sʼin je xijchá xi tsín ti Jeobá síxánile je xtile. Koasenkao je choa̱le profeta Samuel. Je Samuel alikui kjoanʼio tsakʼénele je xtile nga jejchínga kjoan nga kixi katafitʼale Jeobá (1 Samuel 8:1-3). Kuinga je Jeobá kisikʼamini ngayeje kjoa xi jaʼatojin. Tonga tsakʼénele yaole nga kixi kitʼale Jeobá kʼoa nga nda tsakʼejna ngixko̱n (Proverbios 27:11). Nʼio nkjín xijchá xi kʼoati kui kjoa tjíofaʼatojin je kjoa xi jaʼatojin Samuel. Xijchá jebi kui síkjaʼaitsjen nga tíjnanda je Jeobá nga skoéya ijngokʼa je xi kʼoakoa̱nnile jéele, tojo kitso je Jesús nga tsakʼéjna je choa̱le ti xi ki kʼoa skan kʼoakoannile jéele (Lucas 15:20). Je xijchá jebi tosi tonda kixi fitʼale Jeobá kʼoa koyale nga kui choa̱le xosikao je xtile nga kuicho ijngokʼani ya jinjtín.

17. Ánni nga tsjoánganʼioniná je choa̱le ʼndíchjoónkʼan.

¹⁷ Je choa̱ xi ijngo tíjnaná kui tsʼe ʼndíchjoónkʼan xi ma tíjna xi kisikʼaxki̱ Jesús (tʼexkiai Lucas 21:1-4). * Ninga tsín kixi jme xi tjíosʼín chjota xi tjío ya yo̱ngo̱, je ʼndíchjoón jebi alikui jme xi koan kisʼin. Kʼoati tsín koan jokisʼin nga tsín tima̱ sijcháni yaole (Mateo 21:12, 13). Tonga kisinʼiotʼa je Jeobá kʼoa kuinga kitsjoanganʼioni tʼatsʼe xále Niná. Kitjotʼaa jme xi kisʼele kʼoa kitsjoa ngayeje ʼndítao̱n xi tjínle. Nʼio kisinʼiotʼa je Jeobá. Bení nga je tsjoále jme xi machjénle kʼiatsa kui xále Niná títjon sikʼéjna. Joni je ʼndíchjoónkʼan jebi, ñá kʼoati ʼyaa nga je Jeobá tsjoáná jme xi machjénná kʼiatsa kui títjon si̱kʼéjnaa xá xi tsʼe (Mateo 6:33).

18. Tikʼaxki̱ jokitso jngo ndsʼee.

¹⁸ Nichxin xi tiyoaa ndʼaibi, nʼio nkjín ndsʼee kao tichjaa xi je Jeobá sínʼiotʼa kʼoa kʼoasʼín jokji tjen bichó nganʼiole nga síxále ʼndele nga kui sikjaʼaitsjen jmeni xi tsín koa̱nle kʼoasʼin. Si̱kjaʼaitsjenla je ndsʼee xi Malcolm ʼmi, xi kʼia kʼien nga nó 2015. Jokji tse nga kisixále Jeobá kao chjoónle sakʼoaa kjoa jaʼatojin. Je ndsʼee i kitso: “Sakʼoaa likui ñá tjínjinná jmeni xi koa̱ntʼeen, tonga je Jeobá síchikontʼain ʼyani xi je sínʼiotʼa”. Jmé kjoafaʼaitsjen kitsjoa je ndsʼee. Kitso: “Si̱jélee Niná nga katabasenkaoná nga nʼio si̱xálee. Kui si̱kjaʼaitsjeen jmeni xi koa̱n kʼoasʼiaan kʼoa tsínkui kuenta sʼiaan jmeni xi tsín kʼoakoa̱nná”. *

19. 1) Ánni nga nʼio koasenkaoniná je testo xi tsʼe nó 2017. 2) Jósʼin si̱chjáin je testo xi tsʼe nó 2017.

¹⁹ Nga sa chʼao sa chʼao kjimachon sonʼnde, sa tse sa tsee kjoa sʼe̱ná (2 Timoteo 3:1, 13). Kʼoa nʼio machjén nga tsín kʼoaiʼndee nga kui kjoa kuinyaxkónná. Tosa je Jeobá si̱nʼiotʼaa kʼoa kui si̱kjaʼaitsjeen jmeni xi kʼoakoa̱nná sʼiaan. Kuinga nʼio koasenkaoniná jme xi tso Salmo 37:3, je testo xi tsʼe nó 2017. Itso: “Tinʼiotʼai je Jeobá kʼoa kui kʼoatʼiain xi ndatjín”.