1. Yehova ua tangele vantu na vifua vika via ku lifuila?

YEHOVA ua tangele vantu na vifua via ku lifuila. Ua tu tangele na vuhasi vua ku singanieka, kaha tue ku hasa ku manusula visoti na ku hangula viuma vi tu tonda ku ka linga ku lutue. (Visimo 2:11) Ua tu hana ngolo, linga tu hase ku linga vi tua likuminia na ku puisamo vi tu tonda. (Filipu 2:13) Ua tu hana naua mutima, ni nguetu ngazi ua muntima. Mutima uetu ue ku tu kuasa ku viana ku linga vupi na ku olola ku sevuka cetu.—Loma 2:15.

2. Vati Yehova na lavelela tu pangese vuhasi vua tu hana?

² Yehova ua lavelelela ngueni tu pangese vuhasi vua tu hana mu njila ya cili. Omo lia vika? Muomu ua tu lema kaha a tantekeya ngecize tu kevua ndzolela nga tu pangesa vuana vua tu hana. Ca ku muenako, ku Visoneka via ciHevelu va soneka ngecize: “Visinganieka via mukua ku takama vi tuala ku vuingi,”  kaha “viose vi li ku uana livoko liove mu ku linga, ci linge na ngolo yove.” (Visimo 21:5; Ekelesiaste 9:10) Kaha ku Visoneka via ciNgelengu, va soneka ngecize: “Ngoco vene, omo tu mona vukovelelo, tu pangienu vize via viuka kuli vantu vose,” kaha “ngue ku muntu ku muntu mu na tambula vuana, pangenu navuo ha kati kenu.” (Ngalata 6:10; 1 Petulu 4:10) Mua vusunga, Yehova ua tonda tu vezike mu viuma vi tue ku panga na ku kuasa vakuetu.

3. Viuma vika vantu ka vesi na ngolo ya ku linga?

³ Yehova a tonda tu pangese vuhasi vuetu, vunoni a tantekeya ha lenga ngolo yetu. Ca ku muenako, ka tu hasa ku fumisa ku hona ku tantuluka cetu, vupi na ku-tsa. (1 Vamiangana 8:46) Cikuavo naua, ka tu hasa ku niunga vakuetu vantu, muomu nkala muntu ua kala na vuana vua ku lihanguila via tonda. Kaha cipue tu kala na mangana a engi, ka tu hasa ku hiana Yehova na limo litangua liahi.—Isaya 55:9.

4. Vika tu ka lilongesa mu cilongesa cino?

⁴ Tua pande ku tavesa Yehova a tu tuamenene ntsimbu yose, na ku tsiliela ngecize a ka tu kuasa na ku tu lingila vize ka tu hasa ku linga. Vunoni, Yehova ua tonda tu pue na ku singanieka ha vati tu hasa ku manusula visoti vietu na via vakuetu. (Tandenu Visamo 37:3.) Tua pande ku “tsiliela Yehova na ku linga via cili.” Kaha tua pande ku pua ‘vakua vusunga.’ Vati tu hasa ku lingamo? Tu ci talenu ha lungano lua Noa, Ndaviti, na vakuavo vangamba va Njambi va tsilielele muli Yehova. Tu ka mona ngecize ku li viuma vimo ka va hasele ku linga vunoni va  tualele mana ku viuma vi va hasele ku linga.

5. Lombololenu vati mavu a fuile ku matangua a Noa.

⁵ Noa ua yoyele mu mavu a ‘sulile na luozi’ na vupangala. (Njenisisi 6:4, 9-13) Vutuhu ua tantekeyele ngecize Yehova tangua a ka nongesa mavu a vupi, mua vusunga, Noa ua nienguele cikuma omo lia viuma vi va kele na ku linga vantu. Vunoni ku ntismbu yaco, Noa ua tantekeyele ngecize kua kele viuma ka hasele ku linga vunoni ua muene naua ngecize ku li vimo via hasele ku linga.

6, 7. (a) Vika ka hasele ku linga Noa? (b) Vati tu li mu cifua cimo ngeci mua ca Noa?

⁶ Vize Noa ka hasele ku linga: Noa ua ambuluile ku vantu muzimbu ua Yehova na mutima uose, vunoni ka hasele ku sindiya vantu va tave muzimbu uaco. Kaha ka hasele naua ku zanguisa Livazi lihete vuasi. Noa ua pandele ku tsiliela muli Yehova ngecize a ka puisamo cikulaheso Ceni ca ku manusula vupi, na ku tsiliela ngecize Njambi a ka neha livazi ku ntsimbu yaco.—Njenisisi 6:17.

⁷ Netu naua tu li na ku yoyela mu mavu a ku sula vuhenge, kaha Yehova na likuminia ku a nongesa. (1 Yoano 2:17) Vunoni mu ntismbu ino, ka tu hasa ku sindiya vantu va tave “muzimbu ua cili ua vuangana.” Kaha viahi vi tua pande ku linga mangana “lamba ya kama” i putuke vuasi-vuasi. (Mateo 24:14, 21) Netu tua pande ku kala na lutsilielo lua ku kaniama ngeci mua Noa, na ku tsiliela ngecize Njambi vuovuno a ka manusula vupi vuose. (Visamo 37:10, 11) Tu li na vusunga nguetu Yehova kali ka tavesa ano  mavu a api ku tualelelaho cipue ku tuvakana litangua lia pande ku hua.—Havakuke 2:3.

8. Kulihi Noa ua tualele mana eni? (Talenu cikupulo ca ku vuputukilo.)

⁸ Via hasele ku linga Noa: Ca ku hona ku likela omo lia viuma intsa ka hasele ku linga, Noa ua tualele mana ku viuma via hasele ku linga. Na ku tsiliela cose, Noa ua ambuluile muzimbu ua ku lungula ua Yehova. (2 Petulu 2:5) Mua vusunga, ku linga eci cipanga ca kuasele ku kolesa lutsilielo lueni. Mu ku vueza ku ku ambulula, ua niungile vimamuna via Yehova via ku tunga vuato.—Tandenu VaHevelu 11:7.

9. Vati tu hasa ku kava lungano lua Noa?

⁹ Ngeci mua Noa, netu tua pande ku linga cose mu “vipanga via Muangana.” (1 Kolintu 15:58) Ca ku muenako, halumo tu hasa ku kuasa mu ku tunga na ku vuahesa ku viNdzivo via Vuangana na viNdzivo via Viuano, mu ku lihana ha ntsimbu ya viuano via membo na viuano via mihato, ni co ku ka pangela ku Mbetele ni ku seketa ya ku languluila. Ca seho ya kama, ku linga cose mu cipanga ca ku ambulula, cikeco ce ku kaniamesa lulavelelo luetu ku lutue. Umo ndumbuetu ua ku kaniama mu lutsilielo ua handekele ngueni mue ku lekako vakuavo via vivezikiso via Vuangana vua Njambi, ue ku mona ngecize vantu vavengi ka vesi na lulavelelo kaha ve ku singanieka nguavo visoti viavo via ku miaka yose. Ngue mua handekele uze ndumbuetu, tua kala na lulavelelo, kaha lue ku kaniama nga tu ambuluila vakuetu. Lutsilielo luaco lue ku tu kuasa ku tualelelaho ku tuntila ku muono!—1 Kolintu 9:24.

10. Lombololenu via lihitile navio Ndaviti.

¹⁰ Muangana Ndaviti ua puile yala ua lutsilielo, na Yehova ua mu lemene cikuma. (Vilinga 13:22) Vunoni, ambe ngoco, Ndaviti ua lingile vupangala na Mbate-seva, eci ca puile civulumuna ca kama. Ca ku pihia cikuma, ua setekele ku sueka civulumuna ca lingile mu ku tsihisa yala ya Mbate-seva, Uliya, ku lutue lua civunga ca masualale va luile ndzita linga a ka vetue. Ngeci Ndaviti ua hele Uliya mukanda u va sonekele vitume via ku tsa ceni ivene! (2 Samuele 11:1-21) Kaha, vupi vua Ndaviti vua tsimanene. (Mako 4:22) Vati ua lingile, omo viuma evi via lingikile?

11, 12. (a) Vika Ndaviti ka hasele ku linga mu nima ya ku vulumuna?(b) Vika Yehova a ka tu lingila nga tu liveya?

¹¹ Vize ka hasele ku linga Ndaviti: Ndaviti ka hasele ku zimangana via lingile. Mua vusunga, ikeye ua pandele ku mona ku vindama mu muono ueni uose omo lia vupi vua lingile. (2 Samuele 12:10-12, 14) Ngeci ua tondekele lutsilielo. Ua pandele ku tsiliela ngecize nga a liveya mpundu, Yehova a ka mu ecela na ku mu kuasa ku kolesa mu visoti viezile omo lia vilinga vieni.

 ¹² Mu ku linga ka tua tantulukile, tu vose tue ku vulumuna. Vunoni kua kala vivulumuna via hiana vikuavo, ngeci mu vintsimbu vimo ka tu hasa ku zimangana vipi vietu. Netu halumo tu hasa ku yanda omo lia vilinga vietu. (Ngalata 6:7) Vunoni tua tsiliela mu cikulaheso ca Njambi nguetu nga tu aluluka, ikeye a ka tu kuasa mu vintsimbu via vikalu, vutuhu yetu tua koka visoti viaco.—Tandenu Isaya 1:18, 19; Vilinga 3:19.

13. Vati Ndaviti ua sungamesele vusamba vueni na Yehova?

¹³ Via hasele ku linga Ndaviti: Ndaviti ua tondele ku sungamesa vusamba vueni na Yehova. Vati ua lingilemo? Ndaviti ua tavele vukuasi vua Yehova. Ca ku muenako, ua tavele vimamuna via kapolofeto ua Yehova Natane. (2 Samuele 12:13) Ndaviti ua vundilile naua kuli Yehova a mu konekele ku vipi vieni, mu ku muesa ngecize ua tondele mpundu naua vukuasi vua Yehova. (Visamo 51:1-17) Ca ku hona ku hilukila ku nima omo lia mulonga ua lingile, Ndaviti ua lilongesele ku vivulumuna vieni. Na limo litangua liahi ua lingile naua vivulumuna viaco. Mu nima ya mianka, ua tsile mu vouloke vueni, kaha mukemuo mue ku mu vulukililamo Yehova.—VaHevelu 11:32-34.

14. Vika tu hasa ku lilongesa ku lungano lua Ndaviti?

¹⁴ Vika tu hasa ku lilongesa ku lungano lua Ndaviti? Nga tu na lingi vupi vua kama, tua pande ku liveya mpundu, na ku lekako Yehova vupi vuetu, kaha na ku mu vundila a tu konekele. (1 Yoano 1:9) Tua pande naua ku lekako vakuluntu va cikungulukilo, muomu vakevo va hasa ku tu kuasa linga tu sungamese vusamba vuetu na Yehova. (Tandenu Tiango 5:14-16.) Nga tu tava vukuasi vua Yehova, tu ka muesa ngecize tua tsiliela mu cikulaheso ceni ca ku tu konekela. Cikuavo naua, tua pande ku lilongesaho vimo ku vuzeye vuetu na ku tualelelaho ku pangela Yehova na ku mu kulahela.—VaHevelu 12:12, 13.

15. Vika tu hasa ku lilongesa ku lungano lua Hana?

¹⁵ Ci tava halumo mu vuluka vamo vangamba va vuoloke mu Mbimbiliya vaze va tsilielele muli Yehova omo va hitile mu vintsimbu via vikalu na ku linga vi va hasele ku linga. Ca ku muenako, omo Hana ka hasele ku kala na vana. Ka hasele ku alulula cisoti cize. Ikeye ua tsilielele ngueni Yehova a ka mu lembezieka. Ngeci ua tualeleleho ku mu lemesa mu tavenakulu na ku vundila Yehova, mu ku mu leka vati ua livuile. (1 Samuele 1:9-11) Mua vusunga lua pua lungano lua cili kuli etu! Nga ka tuesi na cihindu ca cili ni visoti vikuavo vintsa ka tu hasa ku alulula, tue ku mbila visoti vietu kuli Yehova na ku kulahela nguetu a ka tu niunga. (1 Petulu 5:6, 7) Kaha tu ka linga cose mu ku uana vivezikiso mu vikungulukilo via Vakua Kilistu kaha na viuma vikuavo vie ku hana Yehova.—VaHevelu 10:24, 25.

16. Vika visemi va hasa ku lilongesa ku lungano lua Samuele?

 ¹⁶ Amba co vaze visemi va kala na vana va seza ku pangela Yehova? Kapolofeto Samuele ka sindiyile vana veni va vakuendze ku tualelelaho ku pangela Njambi. (1 Samuele 8:1-3) Ikeye ua kundikile vimpande viaco mu mavoko a Yehova. Kaha Samuele ua pangele cose mu ku pua mukua vusunga na ku vuisa ndzolela Njambi, Ise ua muilu. (Visimo 27:11) Lelo lino, visemi vavengi navo va li na ku hita mu visoti viaco. Va tsiliela nguavo ngeci mua uze cisemi ua mu cisimo ca tele Yesu ca uze muana ua zimbalele, Yehova kasi a li na cizango ca ku tambula vakua ku linga vupi vunoni va liveya. (Luka 15:20) Mu ntsimbu yaco, visemi va hasa ku tuala mana avo mu ku tualelelaho ku pua va vusunga kuli Yehova, na ku lavelela ngecize lungano luavo lu ka kokueya vana vavo ku hilukila kuli ikeye.

17. Vati lungano lua ntuluue ua cihutu lu tu kaniamesa?

¹⁷ Lungano lukuavo lua cili lua ntuluue ua cihutu ua ku matangua a Yesu. (Tandenu Luka 21:1-4.) Ka hasele ku linga vimo ku tuala ha vuhenge vu va kele na ku linga ku tembele, kaha ka hasele naua ku alulula muono ueni ua vuhutu. (Mateo 21:12, 13) Vunoni ku tsiliela muli Yehova ca mu vuisile cizango ca ku kuatesa ku lemesa ca vusunga. Ua puile cihuanga ngeci ua hele “tumbongo tuvali,” vutuhu tuketuo lika tua kele natuo. Uze mpuevo ua tsilielele muli Yehova na mutima ueni uose. Ikeye ua kele na vusunga ngecize nga a tuameka vipanga via Yehova mu muono, Njambi a ka mu hana via mu kambela. Na vuno vene, tua kala na vusunga nguetu nga tu tuameka Vuangana vua Njambi ha katete, Yehova a ka linga cose mu ku tu hana via tu kambela.—Mateo 6:33.

18. Tumbulenu lungano lua umo muanetu ua kele na ku mona viuma mu njila ya cili.

¹⁸ Cingi ca vamuanetu matangua ano ve ku muesa ku tsiliela caco muli Yehova mu ku tuala mana ku vize vi va hasa kati vize ka va hasa ku linga. Singaniekenu ha lungano lua muanetu ua lizina Malcolm, ua pangelele Yehova mu vusunga na ha ku-tsa ceni mu 2015. Mu miaka ya yingi ya pangelele Yehova ikeye na mpueyeni, va hitile mu vintsimbu via cili na via vipi. Ua handekele ngueni: “Muono ua kala na ndzimba na ku kaluua vintsimbu vimo,” kaha ngueni “Vunoni Yehova ue ku vezikisa vaze va tsiliela muli ikeye.” Muanetu Malcolm ua hana cimamuna eci, “Vundila Yehova a ku hane ngolo ya ku panga via vingi kaha na ku panga na ngolo yose mu cipanga ceni. Tuala mana ove ku viuma vize vi u hasa ku linga, kati ku vize ka u hasa ku linga.” *—Talenu mezi a kuntsi.

19. (a) Omo lia vika mukanda uetu ua muaka ua 2017 ua fuila? (b) Vati mu ka pangesa mukanda ua muaka ua 2017 mu muono uenu?

¹⁹ Ano mavu a api a li na “ku hiana vupi,” ngeci tu hasa ku lavelela ngecize visoti vi ka livuezelela. (2 Timoteo 3:1, 13) Ca pua ca seho ya kama kuli yetu ku likela ku lisosomua cikuma omo lia visoti vietu. Vunoni tua pande ku tsiliela na ngolo yose muli Yehova na ku tuala mana ku vize vi tu hasa ku linga. Ngeci mukemuo mukanda ua muaka ua 2017 u na fuila: “Tsiliela Yehova na ku linga via cili”!—Visamo 37:3.