1. Eaha te mau aravihi ta Iehova i horoa i te taata?

 I TO Iehova poieteraa i te taata, ua horoa ˈtu oia i te tahi mau aravihi. Ua horoa mai oia i te aravihi ia feruri, o te tauturu mai ia faaafaro i te mau fifi e ia rave i te mau opuaraa no a muri aˈe. (Mas. 2:11) Ua horoa mai oia i te puai ia nehenehe tatou e rave i ta tatou i opua, a naea roa ˈtu ai ta tatou mau fa. (Phil. 2:13) Ua horoa atoa mai oia i te hoê manaˈo haava, te hoê aravihi e ite ai tatou eaha te mea maitai e te mea ino. E tauturu mai to tatou manaˈo haava ia ape i te rave i te hara e ia faaafaro i ta tatou mau hape.—Roma 2:15.

2. Eaha ta Iehova e tiai ra ia faaohipa tatou i to tatou mau aravihi?

² Te tiai ra Iehova ia faaohipa tatou i to tatou mau aravihi ma te maitai. No te aha? No te mea ua here oia ia tatou e ua ite oia e e oaoa tatou ia faaohipa tatou i te mau ô ta ˈna i horoa mai. Ei hiˈoraa, i roto i te mau Papai Hebera, te taio ra  tatou: “E haamanaˈo maitai i te eˈa i haerehia e to avae, e e haapapuhia to oe atoa ra mau haerea,” e “o tei itea ia oe ta to rima e rave ra, a rave ma to puai atoa ra.” (Mas. 4:26; Koh. 9:10) I roto i te mau Papai Heleni, te taio ra tatou: “Te vai nei ta tatou ravea, e hamani maitai tatou i te taata atoa,” e “e horoa te taata atoa i te maitai no te tahi mai tei noaa mai ia ˈna.” (Gal. 6:10; Pet. 1, 4:10) Mea papu, te hinaaro ra Iehova ia rave tatou i tei maraa ia tatou ia faufaahia tatou e o vetahi ê.

3. Eaha te mau taotiaraa o te taata?

³ Te hinaaro ra Iehova ia faaohipa tatou i to tatou mau aravihi, ua ite râ oia e e taotiaraa to tatou. Ei hiˈoraa, eita ta tatou e nehenehe e faaore i te huru taata tia ore, te hara e te pohe. (Arii 1, 8:46) Eita atoa ta tatou e nehenehe e ohipa i nia ia vetahi ê, no te mea e tiamâraa to te taata no te rave i ta ˈna iho mau faaotiraa. E noa ˈtu eaha te faito o to tatou ite e aravihi, eita roa ˈtu te reira e nehenehe e aifaito i to Iehova.—Isa. 55:9.

4. Eaha ta tatou e hiˈopoa mai i roto i teie tumu parau?

⁴ Mea titauhia ia vaiiho noa ia Iehova ia aratai ia tatou, ma te tiaturi e e turu mai oia a rave atoa ˈi i ta tatou e ore e nehenehe e rave ma to tatou iho puai. Tera râ, te hinaaro ra Iehova ia feruri tatou i ta tatou e nehenehe e rave no te faaafaro i te mau fifi e no te tauturu ia vetahi ê. Te faaitoito mai ra te Bibilia: “A tiaturi ia Iehova, a rave ai i te maitai; . . . , e a haa ma te haapao maitai.” (Sal. 37:3, NWT) Mea titauhia ia “tiaturi ia Iehova,  a rave ai i te maitai,” e ia “haa ma te haapao maitai.” E nafea tatou e na reira ˈi? E hiˈopoa mai tatou i te hiˈoraa o Noa, Davida e te tahi atu mau tavini haapao maitai a te Atua o tei tiaturi ia Iehova. E hiˈo mai tatou e te vai ra te mau ohipa ta ratou i ore i nehenehe e rave, tera râ, ua maiti ratou i te tiatonu i te mau ohipa o ta ratou i nehenehe e rave.

5. A faataa na i to Noa tupuraa.

⁵ Ua ora Noa i roto i te hoê ao o tei î i te ino e te mau peu tia ore. (Gen. 6:4, 9-13) Noa ˈtu ua ite oia e e haamou iho â Iehova i tera ao ino, aita e ore e ua inoino oia no ta te taata e rave ra. I roto i tera tupuraa, ua taa ia Noa e te vai ra te mau ohipa ta ˈna i ore i nehenehe e rave, ua taa atoa râ ia ˈna e te vai ra te mau ohipa ta ˈna i nehenehe e rave.

6, 7. (a) Eaha te mau ohipa ta Noa i ore i nehenehe e rave? (b) I roto i teihea auraa tei roto tatou i te hoê â tupuraa e to Noa?

⁶ Te mau ohipa ta Noa i ore i nehenehe e rave: Ua poro Noa i te poroi faaararaa a Iehova ma te haapao maitai, aita râ ta ˈna i nehenehe e faahepo i te taata ia farii i te reira. Aita atoa ta ˈna i nehenehe e faahaere oioi mai te diluvi. Ua tia ia Noa ia tiaturi e e tapea Iehova i ta ˈna parau e faaore i te ino, a tiaturi atoa ˈi e e na reira te Atua i te taime tano.—Gen. 6:17.

⁷ Te ora atoa ra tatou i roto i te hoê ao î i te ino, o ta Iehova i opua i te haamou. (Ioa. 1, 2:17) A tiai noa ˈi, eita tatou e nehenehe e faahepo i te taata ia farii i “te  evanelia” o te Faatereraa arii. Eita ta tatou e nehenehe e faahaere oioi mai te “ati rahi.” (Mat. 24:14, 21) Mai ia Noa, mea titauhia te faaroo puai a tiaturi noa ˈtu ai e e fatata Iehova i te haamou i te ino taatoa. (Sal. 37:10, 11) Ua papu ia tatou e eita Iehova e farii ia vai teie ao ino hoê noa ˈtu â mahana i te maoro.—Hab. 2:3.

8. Ua tiatonu Noa i te aha? (A hiˈo i te hohoˈa matamua.)

⁸ Te mau ohipa ta Noa i nehenehe e rave: Aita oia i faaea noa i mua i ta ˈna i ore i nehenehe e rave, ua tiatonu râ Noa i ta ˈna i nehenehe e rave. Ua poro Noa i te poroi faaararaa a Iehova ma te haapao maitai. (Pet. 2, 2:5) Aita e ore e ua tauturu teie ohipa ia ˈna ia tapea i te hoê faaroo puai. Hau atu â i te pororaa, ua pee oia i ta Iehova mau faaueraa no te hamani i te araka.—A taio i te Hebera 11:7.

9. E nafea tatou e pee ai i te hiˈoraa o Noa?

⁹ Mai ia Noa, e haa rahi tatou i roto i “te ohipa a te Fatu.” (Kor. 1, 15:58) Ei hiˈoraa, e nehenehe ta tatou e tauturu i roto i te ohipa paturaa e i te atuaturaa i ta tatou Piha a te Basileia e te piha tairururaa, e riro ei rima tauturu i te mau tairururaa aore ra e ohipa i te amaa aore ra i te mau piha ohipa huriraa. Te mea faufaa ˈtu â, e haa rahi tatou i roto i te ohipa pororaa o te haapuai i to tatou tiaturiraa no a muri aˈe. Ua parau te hoê tuahine e ia paraparau oia ia vetahi ê no nia i te mau haamaitairaa o te Faatereraa arii a te Atua, e ite oia e aita e tiaturiraa to te taata, e no ratou, eita to ratou mau fifi e ore. Mai ta teie tuahine i faahiti, e tiaturiraa to tatou, e e puai roa mai te reira ia paraparau tatou ia vetahi ê no nia i te reira. E tauturu mai teie tiaturiraa ia vai noa i roto i tera hororaa no te ora.—Kor. 1, 9:24.

10. A faataa i to Davida tupuraa.

¹⁰ E taata haapao maitai o Davida e ua here roa Iehova ia ˈna. (Ohi. 13:22) Ua taoto râ Davida ia Bate-seba, e hara rahi hoi teie. Te mea ino roa ˈtu â, ua tamata oia i te huna i ta ˈna hara ma te opua i te haapohe ia Uria, te tane a Bate-seba, i te tamaˈi. Ua ani atoa Davida ia hopoi Uria i te hoê rata, i roto hoi te papairaahia te mau faaueraa no to ˈna iho pohe! (Sam. 2, 11:1-21) I te pae hopea, ua itehia ta Davida mau hara. (Mar. 4:22) A tupu ai te reira, ua aha Davida?

11, 12. (a) I muri aˈe a hara ˈi oia, eaha ta Davida i ore i nehenehe e rave? (b) Eaha ta Iehova e rave mai te peu e tatarahapa tatou?

¹¹ Te mau ohipa ta Davida i ore i nehenehe e rave: Aita Davida i nehenehe e faaafaro i ta ˈna i rave. Ua faaruru oia i te tahi mau faahopearaa o ta ˈna hara i te toea o to ˈna oraraa. (Sam. 2, 12:10-12, 14) Ua titauhia ia ˈna te faaroo. Ia tiaturi oia e ia tatarahapa mau oia, e faaore Iehova i ta ˈna i rave e e tauturu  oia ia ˈna ia faaoromai i te faahopearaa o ta ˈna mau haaraa.

¹² No to tatou huru tia ore, e hara tatou paatoa. Tera râ, te vai ra te mau hara iino atu â, e i roto i te tahi mau tupuraa, eita paha ta tatou e nehenehe e faaafaro i ta tatou mau hapa. E faaruru atoa paha tatou i te mau faahopearaa o ta tatou mau haaraa. (Gal. 6:7) Te tiaturi nei râ tatou i ta te Atua i fafau, oia hoi, ia tatarahapa tatou, e turu mai oia ia tatou i roto i te mau taime fifi, noa ˈtu o tatou te tumu o to tatou mau fifi.—A taio i te Isaia 1:18, 19; Ohipa 3:19.

13. Mea nafea Davida i faaafaro ai i to ˈna auhoaraa e o Iehova?

¹³ Te mau ohipa ta Davida i nehenehe e rave: Ua hinaaro Davida e faaafaro i to ˈna auhoaraa e o Iehova. Ua aha oia? Ua vaiiho Davida ia tauturu Iehova ia ˈna. Ei hiˈoraa, ua farii oia i te aˈoraa no ǒ mai ia Natana ra, te peropheta a Iehova. (Sam. 2, 12:13) Ua pure atoa Davida ia Iehova e ua faˈi oia i ta ˈna mau hara, tapao faaite teie i to ˈna hinaaro mau e fanaˈo faahou i ta Iehova farii maitai. (Sal. 51:1-17) Aita Davida i faahapahapa noa ia ˈna iho, ua haapii râ oia i ta ˈna mau hapa. Aita roa ˈtu oia i rave faahou i tera mau hara iino. E rave rahi matahiti i muri aˈe, ua pohe oia ei taata haapao maitai e e haamanaˈo Iehova ia ˈna mai tera.—Heb. 11:32-34.

14. Eaha te haapiiraa e huti mai i te hiˈoraa o Davida?

¹⁴ Eaha te haapiiraa e huti mai i te hiˈoraa o Davida? Mai te peu e e rave tatou i te hoê hara ino mau, mea tia ia tatarahapa ma to tatou aau atoa. (Ioa. 1, 1:9) E titau-atoa-hia ia paraparau tatou i te mau matahiapo, no te mea e nehenehe ratou e tauturu ia tatou ia faaafaro i to tatou auhoaraa e o Iehova. (A taio i te Iakobo 5:14-16.) Ia farii tatou i te tauturu a Iehova, e faaite ïa tatou e te tiaturi ra tatou i ta ˈna parau fafau e faaore i ta tatou mau hapa. Hau atu â, mea faufaa ia haapii tatou i ta tatou mau hapa e ia tamau i te tavini ia Iehova ma te tiaturi.—Heb. 12:12, 13.

15. Eaha ta te hiˈoraa o Hana e haapii mai?

¹⁵ E haamanaˈo paha oe i te tahi atu mau tavini haapao maitai i roto i te Bibilia o tei tiaturi ia Iehova a rave ai i tei maraa ia ratou i roto i te mau tupuraa fifi mau. Ei hiˈoraa, te vai ra hoê tau aita ta Hana i nehenehe e fanau i te tamarii. Aita oia i nehenehe e faataui i teie tupuraa. Ua tiaturi râ oia e e tamahanahana Iehova ia ˈna. No reira oia i tamau ai i te haamori i te sekene e i te pure ia Iehova a faaite atu ai ia ˈna i to ˈna huru aau. (Sam. 1, 1:9-11) E hiˈoraa maitai roa teie no tatou! Ia faaruru tatou i te maˈi aore ra i te tahi atu mau fifi o ta tatou e ore e nehenehe e faataui, e huri tatou i to tatou ahoaho i nia ia Iehova ma te tiaturi e te tâuˈa mai ra oia ia tatou. (Pet. 1, 5:6, 7) E e tutava tatou ia faufaahia tatou i te mau putuputuraa  Kerisetiano e te tahi atu mau faanahoraa ta tatou e fanaˈo nei maoti te faanahonahoraa a Iehova.—Heb. 10:24, 25.

16. Eaha te haapiiraa ta te mau metua e huti mai i te hiˈoraa o Samuela?

¹⁶ E no te mau metua haapao maitai ua faaea ta ratou mau tamarii i te tavini ia Iehova? Aita ta te peropheta Samuela i nehenehe e faahepo i ta ˈna na tamaiti paari ia vai taiva ore i te Atua. (Sam. 1, 8:1-3) Ua tia ia ˈna ia vaiiho te reira i roto i te rima o Iehova. Ua tutava râ Samuela ia vai taiva ore oia i te Atua e ia oaoa to ˈna Metua i te raˈi. (Mas. 27:11) I teie mahana, e rave rahi metua Kerisetiano te faaruru ra i te hoê â tupuraa. Te tiaturi ra tatou e mai te metua ta Iesu i faahiti i roto i te faahohoˈaraa o te tamaiti haamâuˈa faufaa, ua ineine noa Iehova no te farii faahou i te feia tei tatarahapa no ta ratou mau hara. (Luka 15:20) E nehenehe atoa te mau metua e tutava i te vai taiva ore noa ia Iehova ma te tiaturi e e turai to ratou hiˈoraa i ta ratou tamarii ia hoˈi mai ia ˈna ra.

17. No te aha mea faaitoito mau te hiˈoraa o te vahine ivi veve?

¹⁷ Te vai ra te tahi atu hiˈoraa maitai i te tau o Iesu: te vahine ivi veve. (A taio i te Luka 21:1-4.) Aita ta ˈna i nehenehe e faataui i te ohipa eiâraa i roto i te hiero oia atoa i to ˈna iho tupuraa ei vahine veve. (Mat. 21:12, 13) Ua turai râ to ˈna tiaturiraa ia Iehova ia turu i te haamoriraa mau. E aau horoa noa to ˈna e ua horoa oia “na lepeta e piti,” tera noa hoi ta ˈna moni. Ua tiaturi papu taua vahine ra ia Iehova. Ua ite o ˈna e ia tuu oia i ta ˈna taviniraa ia Iehova na mua roa, e horoa Iehova i ta ˈna e hinaaro mau ra. Oia atoa, te tiaturi ra tatou e ia tuu tatou i te Faatereraa a te Atua na mua roa, e horoa mai Iehova i ta tatou e hinaaro mau ra.—Mat. 6:33.

18. A horoa i te hoê hiˈoraa o te hoê taeae e haerea tano to ˈna.

¹⁸ E rave rahi o to tatou mau taeae e tuahine i teie mahana o te faaite ra i te hoê â tiaturiraa ia Iehova a tiatonu ai ratou i ta ratou e nehenehe e rave, eiaha râ i ta ratou e ore e nehenehe e rave. A feruri na i te hoê taeae, o Malcom te iˈoa. Ua tavini oia ia Iehova ma te taiva ore e tae roa ˈtu i to ˈna poheraa i 2015. I te roaraa o to raua oraraa e ta ˈna vahine a tavini noa ˈi ia Iehova, ua ite raua i te mau taime oaoa e i te mau taime ino. Ua parau Malcom: “Te tahi taime, e faaruru tatou i te mau tupuraa manaˈo-ore-hia e te fifi atoa. Te haamaitai nei râ Iehova i te feia e tiaturi ra ia ˈna.” Eaha te aˈoraa ta Malcom i vaiiho mai? “A pure ia aravihi e ia itoito atu â i roto i ta Iehova taviniraa. A tiatonu i ta oe e nehenehe e rave, eiaha i ta oe e ore e nehenehe e rave.” *

19. (a) No te aha e tano roa ˈi ta tatou irava matahiti 2017? (b) E nafea oe e faaohipa ˈi i te irava matahiti i roto i to oe oraraa?

¹⁹ Te rahi noa ˈtura te ino na te ao nei, eita ïa e ore e e faaruru tatou hau atu â fifi. (Tim. 2, 3:1, 13) Eiaha roa ˈtu tatou e vaiiho i te mau fifi ia haaparuparu ia tatou. Mea tia râ ia haapuai i to tatou tiaturiraa ia Iehova e ia tiatonu i ta tatou e nehenehe e rave. No reira e tano roa ˈi ta tatou irava matahiti no 2017: “Tiaturi ia Iehova, a rave ai i te . . . maitai.”—Sal. 37:3.