1. Yehova wa lulika omanu lovoloño api a komohĩsa?

YEHOVA wa lulika omanu lovoloño a komohĩsa. Eye wa tu ĩha uloño woku sokolola, oco u tu kuatise oku potolola ovitangi kuenda oku linga esokiyo liatiamẽla kovaso yoloneke. (Olosapo 2:11) Eye wa tu ĩha unene oco tu linge ovina tua sokiya kuenda oku tẽlisa ovimãho vietu. (Va Filipoi 2:13) Yehova wa tu ĩhavo utima, oco tu tepise eci ciwa leci cĩvi. Utima wetu u tu kuatisa oku yuvula oku linga akandu kuenda oku limbuka akulueya etu.​—Va Roma 2:15.

2. Yehova o lavoka okuti tu talavaya ndati lovoloño etu?

² Yehova o yongola okuti, tu talavaya luloño wetu lonjila yimue ya sunguluka. Momo lie? Momo eye o tu kuetele ocisola kuenda wa kũlĩha okuti, tu kuata lika esanju nda tua talavaya ciwa lolombajaile eye a tu ĩha. Ndeci kovisonehua vio Heveru tu tangako ndoco: “Okuliangiliya kukuambili ku muisa elau” kuenda “Cosi eka liove lia kuata ci linga longusu yove.” (Olosapo 21:5; Ukundi 9:10) Kovisonehua vio Helasi tu tangako  ndoco: “Osimbu tu kuete epuluvi tu lingi eci ciwa komanu vosi” kuenda “omo okuti omunu lomunu wa tambula ongavelo yimue, a vumbe layo vakuavo.” (Va Galatia 6:10; 1 Petulu 4:10) Ocili okuti, Yehova o yongola okuti tu linga ovina vi pondola oku tu kuatisa kuenda oku kuatisa omanu vakuavo.

3. Ovina vipi omanu ka va tẽla oku lilnga?

³ Yehova o yongola okuti tu talavaya lovoloño etu, pole, wa kũlĩha okuti ka tu tẽla oku linga ovina viosi tu yongola. Ka tu pondola oku mãlako ekambo lioku lipua, ekandu kuenda olofa. (1 Olosoma 8:46) Handi vali, ka tu pondola oku lava ovisimĩlo viomanu vakuavo, momo omunu lomunu o kuete elianjo lioku nõla ovina a yongola. Ndaño okuti tu kuete ukũlĩhĩso luloño walua, lalimue eteke tu ka kuata uloño ndowu wa Yehova.​—Isaya 55:9.

4. Nye tu konomuisa vocipama cilo?

⁴ Tu sukila oku ecelela okuti, olonjanja viosi tu songuiwa la Yehova, loku kolela okuti eye o tu kuatisa kuenda o ka tu lingila ovina viosi ka tu tẽla oku linga. Pole, Yehova o yongolavo okuti tu sokolola ovina tu sukila oku linga oco tu tetulule ovitangi kuenda oku kuatisa omanu vakuavo. (Tanga Osamo 37:3.) Tu sukila oku ‘kolela Yehova kuenda oku linga esunga.’ Tu sukilavo oku ‘linga ovina viosi lekolelo.’ Tu pondola oku ci linga ndati? Tu konomuisi ovolandu a Noha, a Daviti kuenda afendeli vakuavo vakuekolelo va Yehova. Tu ka lilongisavo ovina ovo ka va tẽlele oku linga pole, va nõlapo oku tiamisila utima wavo kovina va tẽla oku linga.

5. Lombolola ovina via pita la Noha.

⁵ Noha wa kala voluali lumue mua ‘kala ungangala walua’ kuenda evĩho liukahonga. (Efetikilo 6:4, 9-13) Ndaño okuti Noha wa kũlĩhĩle okuti Yehova wa laikele oku nyõla oluali luna lũvi, citava okuti Noha wa sumuile omo liovina vĩvi omanu va kala oku linga. Omo liovina viaco, Noha wa limbukile okuti kua kala ovina ka tẽlele oku linga, pole, eye wa limbukilevo okuti kua kala ovina a tẽlele oku linga.

6, 7. (a) Ovina vipi Noha ka ponduile oku linga? (b) Ekalo lietu li sokisiwa ndati leli lia Noha?

⁶ Ovina ka tẽlele oku linga: Noha wa kunda lekolelo esapulo lielungulo lia Yehova, pole ka ponduile oku kisika omanu oku tava kesapulo liaco. Eye ka ponduilevo oku yayuisa oku iya Kuetande. Noha wa sukilile oku kolela okuti Yehova o ka tẽlisa ohuminyo yaye yoku nyõla olondingaĩvi, loku tava okuti eye o ka ci linga votembo ya sokiyiwa.​—Efetikilo 6:17.

⁷ Etu tu kasivo voluali lumue lueyuka evĩho kuenda tua kũlĩha okuti Yehova wa likuminya oku kundula o luali luaco. (1 Yoano 2:17) Omo liaco, ka tu kisika omanu oku tava “olondaka viwa Viusoma.” Kuenda ka tu tẽla oku linga cimue oco “ohali ya piãla” yi fetike lonjanga. (Mateo 24:14, 21) Ndeci Noha a linga tu sukila oku pamisa ekolelo lietu, loku kolela okuti ndopo Suku o ka mãlako olondingaĩvi viosi. (Osamo 37:10, 11) Tua kolela okuti Yehova ka ka ecelela okuti oluali lulo lua vĩha lua amamako otembo yalua, pole o ka lu nyõla votembo ya sokiyiwa.​—Havakuki 2:3.

8. Kovina vipi Noha a tiamisilile utima? (Tala ociluvialuvia kefetikilo liocipama cilo.)

 ⁸ Ovina Noha a tẽlele oku linga: Noha ka liwekelepo omo liovina ka tẽlele oku linga, pole wa tiamisila utima waye kovina a tẽlele oku linga. Noha wa kunda lekolelo esapulo lielungulo lia Yehova. (2 Petulu 2:5) Upange waco wo kuatisa oku pamisa ekolelo liaye. Eye ka lingile lika upange waco, pole wa pokola kolonumbi vioku tunga ocimbaluku.​—Tanga Va Heveru 11:7.

9. Tu pondola oku setukula ndati ongangu ya Noha?

⁹ Ndeci Noha a linga, tu sukilavo oku kala “vakuambili kupange wa Ñala.” (1 Va Korindo 15:58) Tu pondolavo oku kuatisa kupange woku tunga, woku semũlũla Olonjango Viusoma, Olonjango Violohongele Vinene kuenda oku lieca olumue poku talavaya kolohongele vimbo, kolohongele viofeka, oku talavaya ko Betele ale koseketa yupange woku pongolola alivulu. Pole, eci ca velapo, oku tiamisila utima wetu kupange woku kunda, okuti u pamisa elavoko lietu liatiamẽla kovaso yoloneke. Manji umue ukãi ukuekolelo wa popia hati: Eci a sapela lomanu vakuavo catiamẽla Kusoma wa Suku, eye o limbuka okuti omanu ka va kuete elavoko kuenda va sima okuti ovitangi vi ka amamako otembo yosi. Ndeci manji wa tukuiwa a ci lombolola, ocili okuti tu kuetevo elavoko kuenda eci tu sapela lomanu vakuavo catiamẽla kelavoko liaco, olio li pamisiwa. Elavoko liaco li tu kuatisa oku amamako oku yoloka oco tu tambule omuenyo ko pui!​—1 Va Korindo 9:24.

10. Lombolola ulandu wa Daviti.

¹⁰ Soma Daviti wa kala ulume umue ukuekolelo kuenda Yehova wo solele calua. (Ovilinga 13:22) Pole, Daviti wa linga evĩho liukahonga la Batisieva, okuti lia kala ekandu limue linene. Handi vali, eye wa seteka oku limbika ekandu liaco poku linga esokiyo liokuti, ulume wa Batisieva okuti Uriya o pondiwa kuyaki. Daviti wa eca ku Uriya ukanda mua kala olonumbi violofa viaye! (2 Samuele 11:1-21) Kuenje noke akandu a Daviti eya oku situluiwa. (Marko 4:22) Nye Daviti a yeva vutima eci ovina viaco via situluiwa?

11, 12. (a) Noke lioku linga ekandu nye Daviti ka ponduile oku linga? (b) Nye Yehova a ka tu lingila nda tua likekembela?

¹¹ Ceci Daviti ka tẽlele oku linga: Daviti ka tẽlele oku tetulula ovina eye a linga. Eye wa laikele oku liyaka lovitangi vokuenda kuomuenyo waye omo liekandu a linga. (2 Samuele 12:10-12, 14) Eye wa sukilile ekolelo. Daviti wa kolelele okuti nda wa li kekembela ku Yehova, eye wa laikele oku ecela akandu aye kuenda oku u kuatisa oku pandikisa kovitangi vieyilila kelinga liaye.

¹² Omo okuti ka tua lipuile, vosi yetu tua siata oku lueya. Kuli akandu amue okuti anene, pole akuavo a sule kuenda olonjanja vimue ka tu kuete epondolo lioku tetulula  akulueya etu. Koloneke vilo, tua siatavo oku liyaka lovitangi vi yilila kelinga lietu. (Va Galatia 6:7) Pole, nda tua kolela kohuminyo ya Suku, loku likekembela, eye o ka tu kuatisa poku liyaka lovitangi, ndaño okuti etu tu kuete eko liovitangi viaco.​—Tanga Isaya 1:18, 19; Ovilinga 3:19.

13. Daviti wa tumbulula ndati ukamba waye la Yehova?

¹³ Ceci Daviti a tẽlele oku linga: Daviti wa yonguile oku tumbulula ukamba waye la Yehova. Wa ci linga ndati? Daviti wa tava ekuatiso lia Yehova. Eye wa tava oku lunguiwa luprofeto wa Yehova o tukuiwa hati, Natana. (2 Samuele 12:13) Daviti wa likutililavo ku Yehova kuenda wa likekembela akandu aye oco a lekise okuti wa yonguile oku tumbulula ukamba waye la Yehova. (Osamo 51:1-17) Eye ka tiamisilile utima kakandu aye pole, Daviti wa lilongisa kakulueya aye. Eye lalimue eteke a lingile vali ekandu liaco linene. Noke lianyamo amue wa fa lekolelo, pole Yehova u ivaluka okuti ulume umue ukuekolelo.​—Va Heveru 11:32-34.

14. Nye tu pondola oku lilongisa kongangu ya Daviti?

¹⁴ Nye tu pondola oku lilongisa kongangu ya Daviti? Nda tua linga ekandu limue linene tu sukila oku likekembela lutima wetu wosi kuenda oku li tavela akandu etu ku Yehova loku pinga ongecelo kokuaye. (1 Yoano 1:9) Tu sukilavo oku sapela lakulu vekongelo, momo va pondola oku tu kuatisa oku tumbulula ukamba wetu la Yehova. (Tanga Tiago 5:14-16) Eci tu tava kekuatiso lia Yehova, tu lekisa okuti tua kolela kohuminyo yaye yoku tu ecela. Omo liaco, tu sukila oku lilongisa kakulueya etu kuenda oku amamako oku fendela Yehova lekolelo.​—Va Heveru 12:12, 13.

15. Ulandu wa Hana u tu longisa nye?

¹⁵ Citava okuti, o pondola oku sokolola catiamẽla kafendeli vakuavo vakuekolelo va tukuiwa Vembimbiliya okuti va kolelele ku Yehova oco va linge eci va tẽla poku liyaka lovitangi. Kua kala otembo yimue okuti, Hana ka ponduile oku cita omãla. Eye ka ponduile oku tetulula ocitangi caco. Pole, wa kolelele okuti Yehova wa ponduile oku u lembeleka. Omo liaco, eye wa amamako oku fendela Yehova votavernakulu kuenda oku likutilila loku sapuila kokuaye ovitangi a kala oku liyaka lavio. (1 Samuele 1:9-11) Ocili okuti, Hana wa tu sila ongangu yimue yiwa! Eci tu liyaka locitangi coku vela ale ovitangi vikuavo okuti ka tu tẽla oku vi tetulula, tu sukila oku yeka asakalalo etu ku Yehova loku kolela okuti o pondola oku tu tata. (1 Petulu 5:6, 7) Tu sukila oku likolisilako oco tu kuatisiwe lolohongele Viakristão kuenda aliangiliyo akuavo a siata oku eciwa locisoko ca Yehova.​—Va Heveru 10:24, 25.

16. Nye olonjali vi pondola oku lilongisa kulandu wa Samuele?

¹⁶ Nye ci popiwa catiamẽla kolonjali vakuekolelo okuti omãla vavo va liwekapo oku fendela Yehova? Uprofeto Samuele ka ponduile  oku kisika omãla vaye okuti va kuatele ale utunga, oco va amameko oku lekisa ekolelo ku Suku. (1 Samuele 8:1-3) Eye wa sukilile oku ecelela okuti Yehova o tetulula ocitangi caco. Pole, Samuele wa yonguile oku amamako oku kolela ku Suku kuenda oku sanjuisa Isiaye wokilu. (Olosapo 27:11) Koloneke vilo, olonjali vialua Akristão va siatavo oku liyaka lovitangi vimuamue. Ovo va kolela okuti, ndeci isia wa tukuiwa volusapo lua Yesu wa tiamẽla komõla ocisandui, Yehova o yongola oku tambula omanu vana va linga ekandu okuti va likekembela. (Luka 15:20) Vokuenda kuotembo olonjali vi pondola oku tiamisila utima wavo koku amamako oku kolela ku Yehova okuti, ongangu yavo yiwa yi vetiya omãla vavo oku tiuka kokuaye.

17. Momo lie ulandu wukãi ocimbumba haeye ohukũi, u tu vetiyila?

¹⁷ Ongagu yikuavo yiwa yukãi ocimbumba haeye ohukũi wa kala koloneke via Yesu. (Tanga Luka 21:1-4.) Eye ka tẽlele oku linga cimue omo liovitukiko via enda oku lingiwa vonembele, kuenda eye ka tẽlelevo oku pongolola ekalo liaye lioku kala uhukũi. (Mateo 21:12, 13) Pole, ekolelo a lekisa ku Yehova liovetiya oku kuatisa kefendelo liocili. Eye wa kala ukuacali kuenda wa eca “ovingangu vivali,” okuti ovio lika a kuatele. Ukãi waco ukuekolelo wa lekisa okuti wa kolelele lutima wosi ku Yehova. Eye wa kũlĩhĩle okuti nda wa pitisa kovaso efendelo liaye ku Yehova, eye wa laikele oku wĩha ovina viosi a sukilile. Cimuamue haico ci pondola oku pita letu okuti nda tua pitisa kovaso Usoma wa Suku komuenyo wetu, Yehova o ka tu ĩha ovina viosi tu sukila.​—Mateo 6:33.

18. Tukula ulandu wa manji umue wa kuata ovisimĩlo via sunguluka.

¹⁸ Valua pokati ka vamanjetu koloneke vilo, va siatavo oku lekisa ekolelo ku Yehova poku tiamĩsila utima wavo kovina va tẽla oku linga okuti, kovina ka va tẽla oku linga ci sule. Kũlĩhĩsa ulandu wa manji Malcolm okuti, wa amamako lekolelo toke kolofa viaye kunyamo wo 2015. Vokuenda kuanyamo alua, eye kumue lukãi waye va kuata esanju poku fendela Yehova, ndaño lovitangi. Eye wa popia hati: “Tu pondola oku liyaka lovitangi vialua komuenyo okuti, vimue pokati kavio viya ño kuenda olonjanja vimue ka ca lelukile oku liyaka lavio pole, Yehova o sumũlũhĩsa vana va tiamẽla kokuaye.” Elungulo lipi manji Malcolm a eca? Eye wa popia hati: “Likutilila ku Yehova oco a ku kuatise oku amamako oku linga upange weca esivayo ko kuaye. Tiamisila utima wove kovina o tẽla oku linga pole, ku ka u tiamisile kovina ku tẽla oku linga.” *​—Tala etosi pombuelo yemẽla.

19. (a) Momo lie tu popela okuti ocisonehua cunyamo wo 2017, ca nõliwa ciwa? (b) O pondola oku kapako ndati ocisonehua cunyamo wo 2017 komuenyo wove?

¹⁹ Oluali lulo lua vĩha lu kasi oku “amamako oku linga eci cĩvi,” omo liaco, tu lavoka oku liyaka lovitangi vialua. (2 Timoteo 3:1, 13) Ci kuete esilivilo lia velapo oku yuvula oku tiamisila utima wetu kovitangi tua siata oku liyaka lavio. Pole, tu sukila oku pamisa ukamba wetu la Yehova loku tiamisila utima wetu kovina tu tẽla oku linga. Eli olio esunga lieci kua nõliwila ciwa ocisonehua cunyamo wo 2017 ci popia hati: “Kolela Yehova, linga esunga”!​—Osamo 37:3.