“Falala Kia Sehova, Pea Mo Fai Te Meʼa ʼAe ʼe Lelei”
“Falala kia Sehova, pea mo fai te meʼa ʼae ʼe lelei . . . pea mo nofo agatonu.” —PESALEMO 37:3, MN.
KATIKO: 133, 63
1. Neʼe fakatupu e Sehova ia te tagata mo te ʼu fealagia fakaofoofo fea?
KO SEHOVA neʼe ina fakatupu te tagata mo te ʼu fealagia fakaofoofo. Ohage la ko te fealagia ʼae ke tou fakakaukau pea ke tou fakatokatoka ʼotatou fihifihia mo teuteuʼi totatou ka haʼu. (Taaga Lea 2:11) Neʼe foaki mai e te ʼAtua ia te malohi ke tou fakahoko ke kaku ʼatatou fakatuʼutuʼu. (Filipe 2:13) Neʼe ina toe foaki mai he leʼo ʼo loto, te iloʼi ʼo te meʼa ʼae ʼe lelei mo te meʼa ʼae ʼe kovi. ʼE tokoni mai totatou leʼo ʼo loto ke tou tekeʼi te fai ʼo te agahala pea ke tou fakatonutonuʼi ʼatatou aga ʼae ʼe kovi.—Loma 2:15.
2. ʼE fakaʼamu e Sehova ke tou fakaʼaogaʼi feafeaʼi ʼotatou fealagia?
2 ʼE fakaʼamu e Sehova ke tou fakaʼaogaʼi lelei ʼotatou fealagia. Kotea tona tupuʼaga? Koteʼuhi ʼe ʼofa ia tatou pea ʼe ina iloʼi, ʼe tou fiafia anai mo kapau ʼe tou fakaʼaogaʼi te ʼu meʼa ʼofa ʼae neʼe ina foaki mai. Ohage la, ʼi te Koga Tohi-Tapu Fakahepeleo, ʼe Ekelesiasi 9:10) ʼI te Koga Tohi-Tapu Fakakeleka, ʼe tou lau fenei ai: “ ʼI te kei maʼu ʼo te temi faigamalie, tou fai te meʼa ʼae ʼe lelei ki te hahaʼi fuli,” pea “ ʼo mulimuli ki te ʼu fealagia ʼae neʼe foaki atu kia koutou takitokotahi, ke kotou fakaʼaogaʼi te ʼu fealagia ʼaia moʼo fetokoniʼaki.” (Kalate 6:10; 1 Petelo 4:10) ʼE ha lelei mai, ʼe loto e Sehova ke tou fai te meʼa ʼae ʼe tou lavaʼi ke fua lelei kia tatou pea mo ʼihi.
tou lau fenei ai: “Ko te ʼu fakatuʼutuʼu ʼa te tagata poto ʼe fua manuʼia moʼoni “ pea “ko te u mea fuli ae e mau e tou nima ke fai, fai ia aki tou malohi.” (Taʼaga Lea 21:5, MN;3. Kotea te ʼu tuʼakoi ʼo te tagata?
3 ʼE loto e Sehova ke tou fakaʼaogaʼi ʼotatou fealagia, kaʼe ʼe toe mahino foki ki ʼotatou tuʼakoi. Ohage la, ʼe mole feala hatatou pulihi totatou ʼuhiga heʼe haohaoa, mo te agahala pea mo te mate. (1 Hau 8:46) Tahi ʼae meʼa, ʼe mole feala ke tou puleʼi te maʼuli ʼo he tahi, koteʼuhi ʼe tou maʼu fuli te fealagia ʼae ke tou tahi toʼo pe tana tonu. Pea tatau aipe pe ʼe lahi totatou poto, kaʼe ʼe laka age pe te poto ʼo Sehova.—Esaia 55:9.
4. Kotea ʼae ka tou vakaʼi anai ʼi te alatike ʼaeni?
4 ʼE tonu ke tou tuku ia Sehova ke ina takitaki tuʼumaʼu tatou, mo tou falala ʼe lagolago mai anai pea ʼe ina fai anai maʼa tatou te meʼa ʼae ʼe mole tou lavaʼi. Kaʼe ʼe toe loto foki e Sehova ke tou fakakaukauʼi pe ʼe feafeaʼi hatatou fakatokatoka ʼotatou fihifihia pea mo tokoni ki ʼihi. ʼE ui fenei ia Pesalemo 37:3, MN: “Falala kia Sehova, pea mo fai te meʼa ʼae ʼe lelei; maʼuli ʼi te kele pea mo nofo agatonu.” ʼE feafeaʼi hatatou fakahoko te ʼu palalau ʼaia? Tou vakaʼi te ʼu faʼifaʼitaki ʼo Noe, mo Tavite pea mo ʼihi kaugana agatonu ʼa te ʼAtua ʼae neʼe falala kia Sehova. ʼE tou iloʼi ai anai neʼe ʼi ai te ʼu faʼahi neʼe mole feala ke natou fai, koia neʼe natou tokakaga tafito ai ki te ʼu faʼahi ʼae neʼe natou lavaʼi.
ʼI TE LOTOLOTOIGA ʼO TE KAU AGAKOVI
5. Kotou fakamatala te aluʼaga ʼae neʼe maʼuli ai ia Noe.
5 Neʼe maʼuli ia Noe ʼi he malama neʼe ʻfonu ʼi te agamalohi’ pea mo te aga heʼe ʼaoga. (Senesi 6:4, 9-13) Logo la neʼe ina iloʼi ʼe pulihi anai e Sehova ia te malama agakovi ʼaia, kaʼe neʼe mamahi tona loto ʼi te aga ʼa te hahaʼi. ʼI te aluʼaga ʼaia, neʼe mahino ai ia Noe neʼe mole feala ke ina fai he meʼa, kaʼe neʼe toe mahino foki neʼe ʼi ai te ʼu faʼahi neʼe feala ke ina fai.
6, 7. (1) Kotea ʼae neʼe mole feala ke fai e Noe? (2) Kotea ʼae ʼe tatau ai totatou temi mo te temi ʼo Noe?
6 Te ʼu faʼahi ʼae neʼe mole feala ke fai e Noe: Neʼe agatonu ia Noe pea neʼe ina fakamafola te ʼu fakatokaga ʼa Sehova, kaʼe neʼe mole feala ke ina fakakinauʼi te hahaʼi. Pea neʼe mole feala ke ina fakaviliviliʼi mai te to ʼo te Tulivio. Neʼe tonu ke falala ia Noe pea mo tui papau ʼe pulihi anai e Sehova te agakovi ʼi tona temi totonu.—Senesi 6:17.
7 ʼE tou toe maʼuʼuli mo tatou ʼi he malama agakovi, pea neʼe fakapapauʼi mai e Sehova ʼe ina pulihi anai. (1 Soane 2:17) Kaʼe ʼi tatatou atalitali ki te ʼaho ʼaia, ʼe mole feala ke tou fakakinauʼi te hahaʼi ke natou tali ia te ʻlogo lelei ʼo te Puleʼaga.’ Pea ʼe mole feala ke tou fai he meʼa ke hoko fakavilivili ai te “mamahi lahi.” (Mateo 24:14, 21) Ohage pe ko Noe, ʼe tonu ke malohi tatatou tui pea mo tou falala kua vave pulihi katoa anai e te ʼAtua ia te agakovi. (Pesalemo 37:10, 11) ʼE tou tui papau ʼe mole tuku anai e Sehova te malama agakovi ʼaeni ke fakalaka atu ʼi he ʼaho ʼe tahi ʼi tona ʼaho totonu.—Hapakuke 2:3.
Ohage pe ko Noe, ʼe tonu ke malohi tatatou tui pea mo tou falala kua vave pulihi katoa anai e te ʼAtua ia te agakovi
8. Kotea ʼae neʼe tokaga tafito ki ai ia Noe? (Vakaʼi te ʼuluaki pāki.)
8 Te ʼu faʼahi ʼae neʼe feala ke fai e Noe: Neʼe mole lotovaivai ia Noe ʼuhi ko te ʼu faʼahi ʼae neʼe mole ina fealagia. Kaʼe neʼe tokaga tafito ki te ʼu faʼahi ʼae neʼe feala ke ina fakahoko. Neʼe agatonu ia Noe ʼo ina fakamafola te ʼu fakatokaga ʼa Sehova. (2 Petelo 2:5) ʼE mahino ia, neʼe tokoni tana gaue faifakamafola ke ina taupau ai he tui ʼe malohi. Pea neʼe fakalogo ia Noe ki te ʼu fakatotonu ʼa Sehova ʼo ʼuhiga mo te faʼu ʼo te aleka.—Lau ia Hepeleo 11:7.
9. ʼE feafeaʼi hatatou faʼifaʼitakiʼi ia Noe?
9 Ohage ko Noe, tou maʼumaʼua ʼi te “gaue ʼi te ʼAliki.” (1 Kolonito 15:58) Ohage la, ʼe feala ke tou tokoni mo tokaga ki te laga ʼo ʼotatou Fale Fono mo ʼotatou Fale Fakatahi Lalahi. Peʼe tou tokoni ki te ʼu gaue ʼi te ʼu fakatahi lalahi peʼe ʼi te ʼu filiale peʼe ʼi te ʼu fale faifakaliliu. Kaʼe ko te faʼahi ʼae ʼe maʼuhiga, ʼe ko tatatou maʼumaʼua ʼi te gaue faifakamafola koteʼuhi ʼe malohi ai totatou ʼamanaki ʼae ki te ka haʼu. Neʼe ui e te tuagaʼane, ka faipalalau mo te hahaʼi ki te ʼu tapuakina ʼo te Puleʼaga ʼo te ʼAtua, ʼe mahino ai ʼe mole ʼi ai honatou ʼamanaki. Pea ki te manatu ʼa te hahaʼi ʼe mole he puleʼaki ʼo ʼonatou faigataʼaʼia. Koia, ka tou palalau ki te hahaʼi ʼo ʼuhiga mo totatou ʼamanaki, pea ʼe ʼasili malohi tuʼumaʼu ai. Pea ʼe tou kau tuʼumaʼu ai anai ʼi te lele ki te maʼuli heʼe gata.—1 Kolonito 9:24.
KA TOU FAI HE AGAHALA
10. Kotou fakamatala te ʼu aluʼaga ʼo Tavite.
10 Ko te Hau ko Tavite neʼe ko he tagata agatonu pea neʼe ʼofa mamahi ia Sehova kia ia. (Gaue 13:22) Logo la te ʼofa ʼaia ʼo te ʼAtua kia Tavite, kaʼe neʼe agahala mamafa ʼi tanā momoe mo Pate-Sepa. Neʼe mole gata ai, koteʼuhi neʼe ina faigaʼi ke ina fufu ia tana agahala ʼaki tana fakatuʼutuʼu ʼae ke mate ia Uli, te ʼohoana ʼo Pate-Sepa ʼi te tau. Pea tahi, neʼe fakatoʼo tonu pe e Tavite kia Uli te tohi ʼae ʼe tuʼu ai te ʼu fakatotonu ʼo ʼuhiga mo tona mate. (2 Samuele 11:1-21) Ki muli age, neʼe ha leva te ʼu agahala ʼa Tavite. (Maleko 4:22) Neʼe ko ʼanafea ʼae neʼe hoko ai, pea neʼe feafeaʼi ia Tavite?
11, 12. (1) Kotea ʼae neʼe mole feala ke fakahoko e Tavite hili tana agahala? (2) Kotea ʼae ka fai anai e Sehova maʼa tatou mo kapau ʼe tou fakahemala?
11 Te ʼu faʼahi ʼae neʼe mole feala ke fai e Tavite: Neʼe mole feala ke toe molehi e Tavite te ʼu aga ʼae neʼe ina fai. Pea neʼe ina utu pe te ʼu nunuʼa kovi ʼo ʼana agahala ʼi tona maʼuli katoa. (2 Samuele 12:10-12, 14) Koia, neʼe ʼaoga ai kia ia ke tui. Neʼe tonu ke fakahemala moʼoni pea mo falala ʼe lotofakamolemole age anai ia Sehova mo tokoni kia ia ke ina katakiʼi te ʼu fua kovi ʼo ʼana agahala.
12 ʼE tou heʼe haohaoa, koia ʼae ʼe tou fai ai te ʼu agahala. Kaʼe ʼe ʼi ai te ʼu agahala ʼe mamafa age ʼi ʼihi, pea ʼi ʼihi aluʼaga ʼe mole feala hatatou molehi ʼatatou hala. Pea ʼe lagi tou maʼuʼuli mamahi ʼuhi ko te ʼu nunuʼa kovi ʼo ʼatatou aga. (Kalate 6:7) Kaʼe ʼe tou falala ki te ʼAtua, koteʼuhi ʼe ina fakapapau mai kapau ʼe tou fakahemala, ʼe lagolago mai anai ʼi te ʼu temi faigataʼa tatau aipe pe ʼe tupu ko tatou totonu.—Lau ia Esaia 1:18, 19; Gaue 3:19.
13. Neʼe toe maʼu feafeaʼi e Tavite ʼana felogoi lelei ʼae mo Sehova?
13 Te ʼu faʼahi ʼae neʼe feala ke fai e Tavite: Neʼe toe fia maʼu e Tavite he ʼu felogoi lelei mo Sehova. Kaʼe neʼe feafeaʼi tana fakahoko te faʼahi ʼaia? Neʼe ina tali te tokoni ʼa Sehova. Ohage la, ko tona fakatonutonuʼi e Sehova ʼaki ia te polofeta ko Natane. (2 Samuele 12:13) Neʼe fakaha e Tavite tana loto moʼoni ʼae ke ina toe maʼu te ʼofa ʼo Sehova ʼi tana faikole ke fakamolemole age ki ʼana agahala. (Pesalemo 51:3-19) Pea neʼe mole ina tukugakoviʼi fau ia ia, kaʼe neʼe ina taʼofi he ʼu ako mai ʼana agahala. Neʼe mole ina toe fakahoko ai te ʼu agahala mamafa ʼaia. Hili ki ai ni taʼu, neʼe mate agatonu ia Tavite pea neʼe ko tona ʼuhiga la ʼaia ʼae neʼe manatuʼi e Sehova.—Hepeleo 11:32-34.
14. Kotea ʼae ʼe tou ako mai te faʼifaʼitaki ʼo Tavite?
14 Kotea ʼae ʼe tou ako mai te faʼifaʼitaki ʼo Tavite? Kapau ʼe tou fai he agahala mamafa, ʼe tonu ke tou fakahemala moʼoni, pea tou fakaha tatatou agahala kia Sehova mo tou kole ke fakamolemole mai. (1 Soane 1:9) ʼE toe ʼaoga foki ke tou olo ʼo fakaha ki te kau tagata ʼafeā, he ʼe feala ke natou tokoni mai ke tou toe maʼu he ʼu felogoi lelei mo Sehova. (Lau ia Sakopo 5:14-16.) Kapau ʼe tou tali te tokoni ʼa Sehova, ʼe tou fakaha ai ʼe tou falala ki tana fakapapau mai ʼae ʼe ina fakamolemole anai ʼatatou agahala. Pea ʼe tonu ke tou taʼofi mai he ʼu ako ʼi ʼatatou agahala mo tou hoko atu tatatou tauhi kia Sehova ʼaki he lotofalala.—Hepeleo 12:12, 13.
ʼI TE TAHI ʼU ALUʼAGA
15. Kotea ʼe tou ako mai te faʼifaʼitaki ʼo Ana?
15 Tou manatuʼi ia te ʼu kaugana agatonu ʼae ʼe palalau ki ai te Tohi-Tapu, ʼae neʼe falala kia Sehova ʼi te ʼu temi neʼe natou katakiʼi ai ʼonatou faigataʼaʼia. Ohage la ko Ana, neʼe mole feala ke maʼu hana fanau. Ko te aluʼaga ʼaia, neʼe mole feala ke ina fetogi. Kaʼe neʼe falala ʼe fakalotofimalieʼi anai e Sehova. Koia neʼe hoko atu tana alu ʼo atolasio ʼi te tapenakulo pea mo fakaha tona lotomamahi kia Sehova ʼi te faikole. (1 Samuele 1:9-11) ʼE ko he faʼifaʼitaki lelei ʼaia kia tatou. Tou tuku ʼotatou tuʼania kia Sehova pea mo tou falala ʼe tokaga mai ʼi te ʼu temi ʼae ʼe tou mahahaki ai pea mo te ʼu aluʼaga ʼae ʼe mole feala ke tou fetogi. (1 Petelo 5:6, 7) Koia tou faiga ke tou maʼu he ʼu fua lelei mai ʼatatou fono mo ʼihi atu fakatuʼutuʼu fakalaumalie ʼo te kautahi ʼo Sehova.—Hepeleo 10:24, 25.
Neʼe falala ia Ana kia Sehova, koia ʼae neʼe ina hoko atu ai tana alu ʼo atolasio ʼi te tapenakulo pea mo fakaha tona lotomamahi kia Sehova ʼi te faikole
16. Kotea te ako ʼe feala ke taʼofi e te ʼu matuʼā mai te faʼifaʼitaki ʼo Samuele?
16 Kaʼe ʼe feafeaʼi te ʼu matuʼā ʼae ʼe mole kei tauhi ʼanatou fanau kia Sehova? Ko te polofeta ko Samuele neʼe mole feala ke ina fakakinauʼi ʼona ʼuluaki foha ke nā nonofo agatonu ki te ʼAtua. (1 Samuele 8:1-3) Kaʼe neʼe ina tuku te aluʼaga ʼaia kia nima ʼo Sehova. Pea neʼe faiga ia Samuele ke nofo agatonu mo fakafiafiaʼi ia tana Tamai ʼae ʼi selo. (Taaga Lea 27:11) Ia ʼaho nei, tokolahi te ʼu matuʼā Kilisitiano ʼe natou tau mo he aluʼaga feia. Pea ʼe natou fakatatau ia Sehova ki te tamai ʼae neʼe talanoa ki ai Sesu ʼi tana lea fakata ʼo ʼuhiga mo te foha maumau koloa. Koteʼuhi ʼe natou falala ʼe lotolelei tuʼumaʼu pe ia Sehova ke ina fakamolemole kia natou ʼae ʼe lotofakahemala. (Luka 15:20) Kaʼe ʼe natou fakaʼamu, ko ʼanatou faiga ʼae ke natou nonofo agatonu kia Sehova, ʼe uga ai ʼanatou fanau ke natou toe liliu mai kia Sehova.
17. He koʼe ʼe fakalotomalohi te faʼifaʼitaki ʼo te fafine vitua masiva?
17 Ko te tahi faʼifaʼitaki lelei, ʼe ko ʼae ʼo te fafine vitua masiva ʼo te temi ʼo Sesu. (Lau ia Luka 21:1-4.) Neʼe mole feala ke ina fetogi ia te ʼu aga fakakaka ʼae neʼe hoko ʼi te fale lotu. Pea neʼe mole feala ke ina fetogi tona maʼuli masiva. (Mateo 21:12, 13) Kaʼe neʼe ko tana falala kia Sehova ʼae neʼe ʼekenaki ʼaki ia ia ke lagolago ki te tauhi moʼoni. Neʼe lotofoaki he neʼe ina ʼai ia tona gataʼaga, ia “kiʼi foʼi piesi ʼe lua.” Ko te fafine agatonu ʼaia neʼe falala katoa kia Sehova. Neʼe ina iloʼi, kapau ʼe ina fakamuʼamuʼa tana tauhi ʼae kia Sehova pea ʼe ina maʼu pe anai ia meʼa fuli ʼae ʼe ʼaoga ki tona maʼuli. ʼO toe feia pe, ʼe tou tui papau ʼe tou maʼu pe anai ia meʼa fuli ʼae ʼe ʼaoga kia tatou mo kapau ʼe tou fakamuʼamuʼa ia te Puleʼaga ʼo te ʼAtua.—Mateo 6:33.
18. Kotou tuku mai te faʼifaʼitaki ʼo he tehina neʼe ina maʼu he manatu ʼe lelei?
18 Ia ʼaho nei, tokolahi ʼi ʼotatou tehina mo tuagaʼane ʼe natou falala kia Sehova ohage pe ko te fafine vitua. ʼE natou tokakaga tafito ki te ʼu faʼahi ʼae ʼe natou fealagia kaʼe mole ki te ʼu faʼahi ʼae ʼe mole natou lavaʼi. Tou vakaʼi te faʼifaʼitaki ʼo te tehina ko Malcolm, ʼae neʼe nofo agatonu ʼo aʼu ki tona mate ʼi te taʼu 2015. Lolotoga te ʼu taʼu ʼae neʼe nā tauhi ai mo tona ʼohoana kia Sehova, neʼe nā tau mo te ʼu aluʼaga fakafiafia pea mo te ʼu aluʼaga fakaʼofaʼofa. Neʼe ina ui fenei: “ ʼI ʼihi temi, ʼe feala ke hoko mai he ʼu aluʼaga fakafokifa pea mo faigataʼa ʼaupito. Kaʼe ʼe tapuakinaʼi e Sehova ia natou ʼae ʼe falala kia te ia.” Pea ʼe fakalotomalohiʼi fenei tatou e Malcolm: “Faikole ke fua lelei pea mo ke faʼafai ʼi tau tauhi ʼae kia Sehova. Tokaga tafito ki te ʼu faʼahi ʼae ʼe feala ke ke fakahoko, kaʼe mole ki te ʼu faʼahi ʼae ʼe mole ke lavaʼi.” *—Vakaʼi te kiʼi nota.
19. (1) He koʼe neʼe lelei te filifili ʼo te vaega ki te taʼu 2017? (2) ʼE kotou maʼuliʼi feafeaʼi anai te vaega ʼo te taʼu ʼaeni?
19 Ko te malama agakovi ʼaeni, ʼe “ ʼaʼasili kovi age anai,” koia ʼae ʼe mole tonu ai ke tou punamaʼuli mo kapau ʼe toe ʼaʼasili kovi age mo ʼotatou faigataʼaʼia. (2 Timoteo 3:1, 13) Pea ʼe mole tonu ke tou tuʼania fau ʼotatou faigataʼaʼia ke tou mafasia ai. Kaʼe ʼe tonu ke malohi tatatou tui ʼae kia Sehova pea mo tou tokakaga tafito ki te ʼu faʼahi ʼae ʼe tou fealagia. Koia ʼae neʼe lelei ai te filifili ʼo te vaega ʼaeni ʼo te taʼu 2017: “Falala kia Sehova, pea mo fai te meʼa ʼae ʼe lelei.”—Pesalemo 37:3, MN.
Te vaega ʼo te taʼu 2017: “Falala Kia Sehova, Pea Mo Fai Te Meʼa ʼAe ʼe Lelei”
^ pal. 18 Vakaʼi Te Tule Leʼo ʼo te ʼaho 15 ʼo Oketopeli 2013, pasina 17-20.