GENESIS dal 22 ah Pathian nih Abraham kha an inn in a hlatnak hmun ah raithawi dingin a fial tiah Baibal nih a ti. Hitin a ti: “Abraham nih khanghthawinak ca ding thing cu Isak kha a phorhter i amah nih mei le nam kha a put hna. Cuticun hmunkhat ah an pahnih cun an kal.”—Gen. 22:6.

Hlanlio chan ah mei zeitindah an rak kau ti kha Baibal nih a chim lo. Cu a si ah Abraham le Isak nih mei kaunak caah a alhmi mei kha an i put maw? Baibal lei mifim pakhat nih “an khuallam thluangthluan mei alh peng dingin tuah cu a si kho lomi a si” tiah a ti. Cucaah Abraham le a fapa nih mei kaunak caah a herhmi thil an i kenmi tu a si men lai.

Asinain mi cheukhat nih hlanlio chan ah mei kau cu a fawimi a si lo tiah an ti. Anmah tein mei kau nakin an innpa sinah meiṭil hal cu a fawi deuh. Cucaah Abraham nih aa putmi cu kut tlaihnak hri aa telmi um a si kho men tiah mifim pawl nih an zumh. Mah um chungah meiṭil a um. (Isa. 30:14) Cuticun an khuallam i khoika hmun paohah an i putmi meiṭil kha hmangin fawi tein mei an kau khawh.