YAʼ TI Biblia, ti Génesis, miʼ yʌl chaʼan Dios tsiʼ sube Abraham (Abrahán) chaʼan miʼ majlel ti ñajt bʌ xʌmbal chaʼan miʼ yʌqʼuen pulbil bʌ i majtan. Jiñi Biblia miʼ yʌl: «Abraham tsiʼ chʼʌmʌ jini siʼ chaʼan miʼ pulben i majtan Dios. Tsiʼ yʌqʼue i qʼuech Isaac. Tsiʼ chʼʌmʌ xutunteʼ [ñich cʼajc] yicʼot cuchillo tiʼ cʼʌb. Temel tsaʼ majliyob jini chaʼtiquil» (Génesis 22:6).

Jiñi Biblia maʼañic miʼ tsictesan bajcheʼ miʼ tsucʼob cʼajc jiñi wiñicob xʼixicob (quixtañujob) ti wajali. Jin chaʼan, ¿ñaxan ba tsiʼ tsucʼuyob cʼajc jiñi Abraham yicʼot Isaac, i ti wiʼil tsiʼ chʼʌmʌyob majlel? Juntiquil wen yujil bʌ chaʼan Biblia tsiʼ yʌlʌ chaʼan cheʼ miʼ chaʼleñob ñajt bʌ xʌmbal wajali, jiñi cʼajc miʼ mejlel ti yajpel. Tsiʼ yʌlʌ chaʼan Abraham yicʼot i Isaac tajol tsiʼ chʼʌmʌyob majlel muʼ bʌ i cʼʌñob chaʼan miʼ xicʼob.

Yambʌ miʼ yʌlob chaʼan ti jiñi bʌ ora wocolʌch chaʼan miʼ xicʼob cʼajc. Jin chaʼan, jiñi quixtañujob tajol miʼ cʼajtibeñob i ñich i cʼajc yambʌ i piʼʌlob chaʼan miʼ mejlel i tsucʼob i chaʼan. Cabʌl muʼ bʌ i yʌlob chaʼan Abraham tsiʼ ñaxan sʌcla i ñich cʼajc cheʼ maxto i teche xʌmbal. Miʼ ñaʼtañob chaʼan tajol tsiʼ cʼʌñʌ jumpʼejl alʌ pʼejt am bʌ i yalʌ cadenajlel chaʼan miʼ mejlel i chʼʌm majlel (Isaías 30:14). Jin chaʼan, tajol Abraham tsiʼ cʼʌñʌ i ñich cʼajc yicʼot i sajl teʼ tac chaʼan miʼ tsucʼ jiñi cʼajc.