Süküjüin Génesis kapiitulo 22 nuluwataanüin Abraham nutuma Maleiwa wattamüin sünain aʼajaa mürüt nümüin. Müsü tü Wiwüliakat: «Naapakalaka Abraham tü sikikat nümüin Isaac süpüla nülüʼüjüinjatüin shia, tü siki sükuainjatkat tü naapüinjatkat nümüin Maleiwa. Otta müshia Abraham, eesü nümaʼana wane rüi je wane wushu kaluʼusü sikemechi jotüinjatkat atüma tü sikikat» (Gén. 22:6).

Nnojotsü süküjüin tü Wiwüliakat jamüin suchuwajaaya siki natuma na wayuu namaiwajannuukana. ¿Nuchuwajaainche wanee siki Abraham otta Isaac süpüla nalüʼüjüin shia chuwatüin? Naashin wanee süpüʼüya tü Wiwüliakat, nnojotsü süpüla chuwatüin waneepia tia sikikat süka wattamüinjanain naya. Naashin chia wayuukai, nülüʼüjüin Abraham otta Isaac tü nachuwajaainjatkalü aka tia sikikat nantapa.

Eekajasaʼa naashin waneeinnua süpüʼüya tü Wiwüliakat, kapüleesü achuwajawaa siki soʼu tia. Tü saainjakat wayuu soʼu tia, shia süsaajawalüin sikemechi süpüla suchuwajaain siki jee sujulijüle sikemechi saaʼu wayuu kepiaka pejepünaa sünain. Naashin wainma wayuu, eesüjaʼa nijitüle Abraham suluʼu wanee wayeetachon tü sikemechikat süpülapünaa tü oʼunajawaakat. Jee kaleena süpü tia wayeetachonkot (Isa. 30:14). Müsüjeseʼe eein süpüla nülüʼüjüin Abraham sikemechi jee shiʼipachein siki süpüla nuchuwajaain sikikat.