Nalunngiliuk?
Itsaq inuusut angalanerminni qanoq innermik ikitsisarpat?
MOSESIMIK ALLAKKAT SIULLIIT kapitali 22-mi allassimavoq Guutip Aaperaat angerlarsimaffimminit ungasissumi pilliuteqaqqullugu aallaqqugaa. Ima allassimavoq: “Aaperaap qisussat pilliummut ikikkagassamut atortussat Iisaamut ernerminut nammakkiutitippai namminerlu inneq savillu tigullugit, taakkulu marluullutik aallarput.” – 1 Mos 22:6.
Itsaq inuit qanoq innermik ikitsisarnersut Biibilimi nassuiarneqanngilaq. Taamaattumik Aaperaap Iisaallu innermik ikitseriarlutik naneruaq nassarpaat? Biibilimik misissueqqissaartartoq oqarpoq “ungasissumut angalanermi” nanerussap qaminnani ikumaannarnissaa ilimananngitsoq. Aaperaalli erneratalu innermik ikitsinissamut pisariaqartitatik tamaasa nassarsimasinnaavaat.
Allalli oqartarput taamani innermik ikitsinissaq sapernarmat inuit ajornanngikkaangat ikumatitami, immaqa sanilip ikumatitaanit, aamarmik tiguseriarlutik innermik ikitsisartut. Ilisimatuut amerlasuut isumaqarput Aaperaat aallannginnermini ikumatitamit aamarmik aamaartumik tigusisimassasoq. Qattamut marrarmik sanaamut kalunnernik tigummivilimmut ileriarlugu angalanermini nassarsimasinnaavaa. (Es 30:14) Taamaalilluni aamat aamaartut qisuminerlu panertoq atorlugit innermik ikitsisinnaavoq.