GENESIS bung 22 chuan Pathianin Abrahama chu a in aṭanga hla taka zin a, thil hlan hlân tûra a hrilh thu a sawi a. Heti hian a sawi: “Abrahama chuan hâlral thilhlanna thing chu a la a, a fapa Isaaka chu a puttîr a; ani chuan mei leh chemtê a keng a; tichuan an pahnihin an kal dûn ta a.”—Genesis 22:6.

Bible chuan hmân lai mite mei chhêm dân a sawi lo va. Chuti chu, Abrahama leh Isaaka chuan mei an chhêm hnuah meichher an keng a ni thei ang em? Bible lama mi thiam pakhat chuan meichher chu “zin kawng tluana a alh reng” theih chu a rin loh thu a sawi a. Abrahama leh a fapa chuan mei an chhêm theih nâna an mamawh tinrêng an keng a ni zâwk mai thei.

Mahse, mi thiam dangte chuan chûng hun laiin mei chhêm a awl lo tih an sawi a. Chuvângin, thil ni thei chu, mei chhêm sa aṭanga meiling lain mei an chhêm ṭhîn a, chu meiling chu an ṭhenawmte hnên ata an lâk a ni thei. Mithiam tam tak chuan Abrahama’n a zin chhuah hmain mei chhêmsa ata meilingte lain a ken an ring a. Meiling chu khaidiattêa khai theih bêltêah dahin, a zin kawng tluanin a ken zêl a rinawm. (Isaia 30:14) Tichuan, a duh hun apiangah meiling leh thing ṭang ro ṭhenkhat hmangin mei a chhêm thei ang.