TOJ uʼj te Génesis, in tzaj tqʼamaʼn Xjan Uʼj qa xi tqʼamaʼn Jehová te Abrahán tuʼn t-xiʼ toj jun tbʼe najchaq tuʼntzun t-xi tqʼoʼn jun oyaj te. In tzaj tqʼamaʼn Tyol Dios jlu: «Jawtzun tiʼn Abraham siʼ tuʼn tkubʼ patit oyaj ex jax tqʼoʼn twi t-semil Isaac aju tkyʼajal, atzun te xi tiʼn kchil tukʼix qʼaqʼ. E jeʼxtzun kykabʼil junx» (Génesis 22:6).

Mintiʼ in tzaj tqʼamaʼn Tyol Dios tzeʼn in kʼantoq qʼaqʼ kyuʼn xjal toj ambʼil ojtxi. Qa ikju, ¿tnejelpe kubʼ tqʼoʼn Abrahán ex Isaac qʼaqʼ ex lwey xiʼ kyiʼn? Tqʼama jun xjal in xnaqʼtzan kyiʼj junjun xnaqʼtzbʼil tiʼj Tyol Dios qa mlaytoq bʼant tuʼn tkyaj kʼantoq qʼaqʼ toj nim ambʼil akux in che bʼettoq. Aju te t-ximbʼetz, bʼalo xi tiʼn Abrahán ex tkʼwaʼl tkyaqilju at tajbʼen kye tuʼn tkʼant qʼaqʼ kyuʼn.

Noqtzun tuʼnj, in kyqʼamaʼn txqantl xjal at kyojtzqibʼil qa kwesttoq tuʼn tkʼant qʼaqʼ toj ambʼil ojtxi. Tuʼntzunju, qa jakutoq bʼant, kubʼ kyqʼoʼn xjal qʼaqʼ tukʼil ttxaʼn qʼaqʼ otoq che jaw kʼant. Bʼalo xi kyqanin ttxaʼn qʼaqʼ te juntl xjal in nanqʼintoq nqayin kytxlaj. Nim xjal at kyojtzqibʼil in kubʼ kyximen qa kanet ttxaʼn qʼaqʼ tuʼn Abrahán tej naʼmxtoq t-xi toj tbʼe. In kubʼ kyximen qa xilo tiʼn toj jun tkubʼil ik keʼyin ik tzeʼn jun kʼil tok alambr te taqʼil (Isaías 30:14). Tuʼntzunju, ajbʼenlo ttxaʼn qʼaqʼ tuʼn Abrahán ex junjun piẍ tzeʼ tzqij tuʼn, tuʼntzun tkʼant qʼaqʼ.