PILAMOCHTSI Génesis kiijtoua toTeotsij kinauatik Abraham uejka ma yaui uan nopaya ma kimaka se tlakajkaualistli. Biblia kiijtoua: “Abraham kikuik nopa kuauitl para nopa tlakajkaualistli uan kitlalik iajkolpa Isaac. Uan kikuik nopa cuchillo uan tlitl uan keja nopa nochi omej yajkej sansejko” (Gén. 22:6).

Biblia amo kiixtoma kenijkatsa tlipitsayayaj maseualmej katli itstoyaj uejkajkia. Uajka, ¿achtoui tlipitskej Abraham uan Isaac uan teipa kiuikakej nopa tlitl? Se tlakatl tlen tlauel momachtia Biblia kiijtoua tlaj kiampa kichijtoskiaj, nopa tlitl sejtoskia pampa tlauel uejka yajkej. Ya kiijtoua uelis kiuikakej nochi tlen monekiyaya uan kiampa uelkej tlipitskej.

Sekinok kiijtouaj ipan nopa tonali tlauel ouij tlipitsayayaj. Yeka kemantika maseualmej kitekiuiyayaj tlikoli tlen nojua xauantoya uan ika nopa sampa tlipitsayayaj. Uelis kitlajtlaniyayaj tlikoli se ininkalnechka. Miakej katli tlauel momachtiaj kiijtouaj Abraham kikuitejki tlikoli uan ya nopa kiuikak. Moiljuiaj uelis kiuikak ipan se olla tlen kipixtoya se cadena kampa kiitskiyayaj (Is. 30:14). Uajka Abraham uelis kitekiuik nopa tlikoli uan pilkuatsitsij kema monekiyaya tlipitsas.