ITECH Génesis, Biblia kijtoua ke Dios kinauatij Abrahán maj uejka yani uan maj ompa kitemakani se netetayokolil. Tajkuilol kijtoua: “Abrahán kikuik kouit tein ika kitemakaskia nemaktil tachichinol uan kitalij itech ikonetsin, Isaac. Ompa kitalij imako tit uan cuchillo, uan omen senojtokakej” (Gén. 22:6).

Biblia amo kimelaua keniuj taxotaltiayaj ne uejkauj. Komo ijkon, ¿kixotaltijkej tit Abrahán uan Isaac uan satepan kiuikakej? Se taixmatkej ika Biblia kijtoj ke tit xa amo ueliskia xotatos itech nochi ojti. Yejua kijtoua ke Abrahán uan ikonetsin xa kiuikakej nochi tein monekia tein ika ueliskia taxotaltiskej.

Sayoj ke okseki taixmatinij kijtouaj ke itech nejon tonalmej semi teouijmakaya se taxotaltis. Yejua ika keman uelia, taltikpakneminij taxotaltiayaj ika tekol oso tekolxochit tein ipa xotatoyaya. Xa kikuiaj tekol tein ika taxotaltijtoya aksa. Miakej taixmatinij kinemiliaj ke Abrahán kitemoj tekol achto ke peuaskiaj ojtokaskej. Kinemiliaj ke xa kiuikaya itech se tapalkat tein tamati kemej se komit tein kiilpiliayaj se cadena (Is. 30:14). Yejua ika Abrahán xa kikuik tekol uan koujkotolmej tein uakik keman monekik taxotaltis.