BA I Moze faza 22, itutunö Sura Ni’amoni’ö wa i’o’ou Gaberahamo Lowalangi we’amöi ba nahia saröu moroi ba nomonia ba wame’e sumange nitunu. Imane, ”Ba ihalö geu andrö, fanunu zumange, ibe’e noro nononia Iza’aki ba ituyu galitö ba si’öli fanaba, ba mofanö ira, darua ira.”—I Moze 22:6.

Lö itutunö Sura Ni’amoni’ö hadia lala nifalua niha me föna ba wamohola galitö. Na simanö, hadia nifalua Gaberahamo hegöi Iza’aki ba wamohola hegöi ba wolohe galitö? Imane samösa niha same’e mbua gera-erania ba Zura Ni’amoni’ö wa lö tola auri manö galitö da’ö ”sagötö wofanö-fanöra saröu sibai”. Börö da’ö, tola manö fakake ni’oguna’ö ba wamohola galitö ni’ohe Gaberahamo hegöi ononia.

Hiza’i, so göi zanguma’ö wa lö aoha ba wamohola galitö me föna. Andrö, so niha sangandrö mbo galitö ba zi fatambai omo khönia moroi na ifohola samösa galitö. Ato sarjana zi faduhu tödö wa ni’ohe Gaberahamo me luo da’ö ya’ia da’ö sambua mbowoa tanö si so tawi-tawi moroi ba rate. Ösinia ya’ia da’ö bo galitö sohola-hola nasa. (Yesaya 30:14) Tola i’oguna’ö mbo galitö ni’ohenia andrö ba wangebua’ö galitö sagötö wofanöra. Ibe’e geu si no mutataba ba dete mbo galitö andrö, irege lö mate.