Mu Gênesis mo kapitulu 22, Ombimbiliya ipopia okuti Huku wapopila Abraiau ende kokule neumbo liae opo akalinge otyilikutila. Ombimbiliya yati: “Abraiau wapola ononkwi embutuiki Isake. Iya Abraiau atyindi otupia nomoko, avaende.”—Gênesis 22:6.

Ombimbiliya kaihangununa oñgeni ovanthu vokohale ankho valinga otupia. Okuti Abraiau na Isake ankho vatyinda otupia tuatema? Omunongo umwe wapopia okuti inkha vatyindile otupia ankho “katupondola okutualako nokutemamokueenda kuoungendi auho valinga.” Ngotyo, Abraiau no mona wae tyafuile ankho vatyinda ovipuka aviho viesukisa opo vakatemese otupia.

Mahi ovanthu vamwe vapopia okuti kohale ankho katyapepukile okutemesa otupia. Omunthu ankho una okukala nekala lina otupia ine okuyuka kumukuavo. Ovanongo ovanyingi vetavela okuti Abraiau watyindile otupia tutema moungendi wae omule. Tyipondola hamwe Abraiau watyindile omakala potyiyo mokueenda kuoungendi wae. (Isaías 30:14) Tyipondola hamwe vatyindile omakala otyo apakapo omakakava opo otupia tuhanyime mokueenda kuoungendi wae.