MU BUKHU la Ciyambo 22, Bibliya limbalewa kuti Mulungu adauza Abalahamu kuti acite ulendo bwakuyenda mbuto inango ya kutali na mui wace kuti akapereke nsembe. Iro limbati: ‘Abalahamu adatenga nkhuni kuti akaperekere nsembe yakupsereresa acisenzesa mwana wace Izaki. Ndipo iye adatenga moto na cisu, aciyenda naye pabodzi.’—Ciyambo 22:6.

Bibliya limbalewa lini momwe wanthu wa nthawe za kale akhagumanira moto. Tsono kodi Abalahamu na Izaki adanyamula cirambirambi ca moto pa ulendo bwawobo? Nyakufufudza winango wa nkhani za m’Bibliya, adalewa kuti cirambirambi ca moto “cingapitirize lini kugaka pa kucita ulendo butali.” M’mbuto mwace, Abalahamu na mwana wace pinango adatenga cinthu ciri-cense comwe cingadawathandiza kukagasira moto.

Koma wanthu winango ambalewa kuti nthawe imweire bzikhali bzakunesa kwene-kwene kugasa moto. Na tenepo, wanthu akhacita ciri-cense comwe angadakwanisa mwa kutenga masimbe ya moto omwe ukhalipo kale ndipo pinango akhagumana moto kwa wanthu omwe akhakhala nawo pafupi. Adziwi azinji ambakhulupira kuti Abalahamu adatenga masimbe ya moto yomwe yakhagaka kale pakucita ulendo bwawobo. Iye pinango adayaikha mu combo ciri-cense comwe cikhana cakuphatira ca tceni ndipo pinango ndico comwe adanyamula pakucita ulendobo. (Zaiya 30:14) Ndipo pinango iye adaphatisira basa masimbe ya moto na tumatabwa tung’ono-tung’ono twakuuma kuti akaphatizire motoyo.