GÉNESIS 22 capitulopi nisqan jina, Diosmi Abrahanta kamachiran sacrificiota jaywananpaq. Chaypaqmi Abrahanqa karuta viajanan karan, Biblian nin: “Jinan Abrahanqa ruphachina sacrificiopaq llant’ata oqarispa churin Isaacman q’epichiran, paytaq ninata cuchillotawan makinpi aparikuran, iskayninkutaq kuska riranku”, nispa (Gén. 22:6).

¿Imaynatan ninata jap’ichiranku? ¿Wasinkupi ninata jap’ichispachu apankuman karan? Bibliaqa manan sut’intapunichu chaytaqa willan. Bibliamanta allinta yachaq runan nin: “Ninata jap’ichispa apankuman karan chayqa, ñanpin wañurapunman karan. Paykunaqa yaqapaschá ninata jap’ichinapaq tukuy ima necesitakusqanta aparanku”, nispa.

Bibliamanta allinta yachaq wakin runakuna nisqan jina, chay tiempopiqa sasas karan ninata jap’ichiy. Chaysi runakunaqa sansallawan ninata jap’ichinkuman karan, yaqapaschá wasimasinkumanta mañakuspa. Abrahanpa viajasqanmanta rimaspan nillankutaq: “Yaqapaschá llaqtamanta lloqsinankupaq juj cadenawan watasqa mankapi sansata aparanku”, nispa (Is. 30:14). Abrahanqa yaqapaschá chay sansawan ch’aki k’aspikunapiwan yanapachikuspa ninata jap’ichinman karan.