IA GENESE pene 22, te karanga ra te Pipiria e kua akakite te Atua kia Aberahama kia teretere aere ki tetai ngai mamao mei tona kainga ei oronga i te atinga. Te na ko ra: “E kua rave iorā Aberahama i te vaie no taua atinga karakaratio ra, kua tuku atura ki runga i tana tamaiti ia Isaaka; e kua rave iora i te ai, e te matipi i tona rima; e aere atura raua katoa.”​—Genese 22:6.

Kare te Pipiria i akakite mai e akapeea te tangata i tera tuatau i te maani anga i te aʼi. No reira kua tutungi ainei a Aberahama raua ko Isaaka i te aʼi e oti kua apai i te reira? Akakite mai tetai tangata kimikimi Pipiria e penei kare te aʼi “e kā ua i te tere mamao.” Mari ra, kua apai a Aberahama e tana tamaiti i te au apinga tei anoanoia kia tutungi i te aʼi.

Inara karanga tetai pae e kare i te mea māmā i te maani i te aʼi i tera tuatau. No reira, me rauka ka maani te tangata i te aʼi na te rave anga i te ngarau mei te aʼi e kā ua ra, penei e ngarau mei te aʼi a tetai tangata i te pae mai. E maata te aronga kimikimi tei irinaki e kua rave a Aberahama i te ngarau mei te aʼi i mua ake i tona tere. Penei kua tuku aia i te reira ki roto i te vairanga, penei e pani te tautau ua ra mei runga i te vivi, e ka apai aere aia i te pani i tona tere. (Isaia 30:14) E oti penei ka taangaanga aia i te ngarau vera e te au ungaunga rakau rikiriki marō me inangaro aia i te maani i te aʼi.