ΚΙ Γένεση, κο κεφάλαιος 22, η Αγία Γραφή βακερέλα ότι ο Ντεβέλ βακερντάς κο Αβραάμ τι τζαλ εκχέ τθανέστε σο ισινέ ντουρ λέσκε κχερέσταρ για τι κερέλ εκ θυσία. Η Γραφή βακερέλα: «Ο Αβραάμ λιντάς ο καστά ι θυσιάκε ντα τσσουντάς-λεν οπράλ κο Ισαάκ πι τσσαβέστε· ντα λιντάς πι βαστέντε ι γιακ ντα ι τσσουρί, ντα συνεχιντέ ο ντούι-ντα γιεκ πουμαρό ντρομ».—Γένεση 22:6.

Η Γραφή να βακερέλα σαρ τσσουβένας γιακ ο τζενέ κο πουρανέ μπρεσά. Άρα, μήπως ο Αβραάμ ντα ο Ισαάκ τσσουντέ γιακ ντα σοράν λιντέ οντιά γιακ παλά-πουμέντε; Εκ σπουδαγμέ τζενό, σο γραφιντάς κάποια πράγματα ι Γραφιάκε, βακερέλα ότι η γιακ να κα μπορίνελας “τι συνεχίνελ τι πφαμπόλ μέχρι τι τζαλ ο Αβραάμ οτθέ σο μανγκέλας”. Οκιά μπάνταρ όμως, ο Αβραάμ ντα λέσκο τσσαβό κα μπορίνενας τι λεν παλά-πουμέντε ο πράγματα σο χρειαζίντιβενας για τι τσσουβέν γιακ.

Όμως γιαβερά τζενέ βακερένα ότι οντουλά μπρεσά να ισινέ εύκολος τι τσσουβέλ γιακ εκ τζενό. Οτθάρ, άμα εκ γείτονας κα τσσουβέλας γιακ, ο τζενέ μπορεί τι λένας εκ ανγκάρ λέσταρ για τι τσσουβέν βον-ντα γιακ. Μπουτ σπουδαγμέ τζενέ πακιάνα ότι ο Αβραάμ, πριν τι νασέλ, λιντάς παλά-πέστε ανγκαρά σο πφαμπόνας. Μπορεί τι τσσουντάς-λεν αντρέ εκχέ βαζόστε σο ασταρέλας-λες εκχέ τζαντζιριάταρ ντα τι ακχαρέλας ο βάζος ενώ ισινέ κο ντρομ. (Ησαΐας 30:14) Σοράν, κάνα κα μανγκέλας, κα μπορίνελας τι χρησιμοποιήνελ οντουλά ανγκαρά ντα χουρντέ σουκέ καστά για τι τσσουβέλ γιακ.