ANTA kʼGénesis, lichuwinankan pi Dios limapakgsilh Abrahán pi makgat xʼalh xlakata xtlawalh akgtum tamakamastan. Biblia wan: «Abrahán tiyalh kiwi nema xlilhkuyulh tamakamastan chu malinilh xkgawasa, Isaac. Chu tiyalh lhkuyat chu cuchillo, chu xchatiykan akxtum ankgolh» (Gén. 22:6).

Biblia ni lichuwinan la xtlawakgo latamanin xlakata namapasikgo lhkuyat. Wa xlakata, ¿pulana mapasikgolh lhkuyat Abrahán chu Isaac chu alistalh linkgolh? Chatum tiku lakputsanan xlakata Biblia wan pi nila chuntiya xpasalh lhkuyat xlakata makgat niku xʼamakgolh. Xla wan pi max Abrahán chu xkgawasa putum linkgolh tuku xtalakaskin xlakata xmapasikgolh lhkuyat.

Pero amakgapitsi tiku na lakputsanankgo xlakata Biblia wankgo pi ama kilhtamaku tuwa xmapasikan lhkuyat. Wa xlakata akxni xmatlanikgo, latamanin xlimaklakaskinkgo jalanat nema xpasanita. Max xmaklakaskinkgo jalanat nema xkgalhi xtalakatsujkan. Lhuwa tiku na lakputsanankgo wankgo pi max Abrahán makaxli jalanat niku xwi. Lakpuwankgo pi max xlin la akgtum olla nema xlitachinit cadena (Is. 30:14). Max Abrahán limaklakaskilh jalanat chu laktsu kiwi xaskakni akxni xmapasiputun lhkuyat.