KA Genesisi xipimo 22, a Biblia gi wula lezaku Nungungulu i byelile Abrahama aku i wa suke aya ka wutshamu ga le kule ni kaya kakwe kasi aya nyikela muphahlo. Gi ngalo: “Abrahama i lo teka tihunyi ta munyikelo wa kuhiswa, a rwexa Isaka a n’wana wakwe; yena i lo teka a nzilo ni mukwana, va famba vona vambiri.” — Genesisi 22:6.

A Biblia a gi tlhamuseli lezi a vanhu zikhatini za kale va nga lumekisa zona nzilo. Makunu, xana Abrahama na Isaka va no lumeka nzilo va gumesa va wu teka na wu vura va famba nawo? A mutlhamuseli wo kari wa timhaka ta Biblia i te kuzilava a nzilo wu wa nga ta “simama wu vura lipfhumbeni lontlhe.” Wutshanwini ga lezo, kuzilava Abrahama na Isaka va no teka zontlhe zi nga wa ta laveka kasi ku lumeka nzilo.

Kanilezi a vokari ve zi wa nga olovi ku lumeka nzilo zikhatini lezo. Hikwalaho xontlhe xikhati, loku zi koteka, a vanhu va woya hi ku woka makhala ka muakelane loku va lava ku lumeka nzilo. A titlhari to tala ti kholwa lezaku Abrahama i sukile kaya ni makhala ma nga hi ni nzilo. Za koteka ku ngha a ma chelile ka xibya, xo kota mbita yi nga ni chini go khoma hi gona, a gumesa a teka mbita leyo a enza nayo. (Isaya 30:14) Hi ndlela leyo, kuzilava xontlhe xikhati a nga lava ku lumeka nzilo i tirisile makhala lawo ya nzilo ni zihlahlana zo woma.