TA SJUN Génesis, te Biblia ya yal te bitʼil te Dios la yalbey te Abraham te ay banti namal ya xbajtʼ swenta ya yakʼ chikʼbil majtʼanil. Te Biblia jich ya yal: «Te Abraham och ta stsʼalel te siʼil te milbil mahtanil, la yaʼbe scuch bahel te Isaac te snichʼane. Ha la stuch bahel xutunteʼ soc cuchillo, hich baht schebalic» (Génesis 22:6).

Te Biblia maba ya yal bin-utʼil ya stsumik kʼajkʼ te ants winiketik ta namey kʼinal. Jich yuʼun, ¿nailbal la stsumik kʼajkʼ te Abraham sok te Isaac sok labal yichʼik bael? Jtul te machʼa ya yilbey skʼoplal temaetik yuʼun Biblia la yal te tupʼniwan te kʼajkʼ te jichuk la spasike, melel najtʼ beenik bael. Te bin la yal stukele, jaʼ te laniwan yichʼik bael te bintik ya xtuun yuʼunik ta stsumel kʼajkʼ te Abraham sok te snichʼane.

Jaʼukmeto ay yantik te machʼa ya yilbeyik skʼoplal te Biblia ya yalik te wokol ta tsumel kʼajkʼ ta kʼajkʼal-abi. Jich yuʼun te kʼalal jich ya xjuʼ ta pasele, te ants winiketik ya stsum skʼajkʼik sok yakʼal yan kʼajkʼ te yak ta tilele. Jaʼniwan ya stuuntesik te yakʼal skʼajkʼ spatxujkike. Bayal te machʼatik ya yilbeyik skʼoplal te Biblia ya skuyik bitʼil te Abraham nail la sle akʼal te kʼalal lokʼ baele. Ya skuyik te la yichʼ bael te akʼal ta yawil kʼajkʼ te jich yilel bitʼil jun oxom te ya yichʼ tsakel ta jun kadena (Isaías 30:14). Jich yuʼun te Abraham laniwan stuuntes akʼal sok takin bikʼtal xejtʼelul teʼ kʼalal la stsum te kʼajkʼ te tuun yuʼune.