1-3. Rosai nabi ḇero Yehuda ine ifrurḇa na, ma rosai bon ya? (Mam sonin ro randak artikel ine.)

RAJA YEROBOAM ro Israel ifrur rokef farsarser fa sḇukisyom amfyainir ro mnu ḇeba Betel. Inja, Yahwe iwan nabi ḇero Yehuda fa ḇyuk samamyai ḇe Yeroboam i. Nabi ḇena sne ḇerun ine isouser ma ikofenḇadir anun ani. Raja imsor kaku nabi ani, ḇape Yahwe kyadaun i.—1 Raja-Raja 13:1-10.

² Yahwe ḇyuk parenta ḇe nabi ani insama ipok fa dan ḇaido dinem ro Israel ma kyaḇer ḇe rum roro nyan ḇese. Rofyor ibur kaḇer, nabi ani isrow kuker mansar apus ḇeankar i, kuker doḇe dun anun ḇerama ro Yahwe I. Apus ani dor nabi ani fa iso ḇe rum ḇyedi fa inan ma dinem. Nabi ani isouser Yahwe parenta Ḇyena ḇa mboi iso apus ani. Nafnai fa Yahwe imarisen ḇa. Ro marandan ḇe rum ḇyeja, singa oso dark i ra imar.—1 Raja-Raja 13:11-24.

³ Kofawi ḇa rosai ḇefnai fa nabi ani ryower apus ani bardiḇur iso Yahwe I. Inja, ine ’fyasnai sne ḇerun ḇa rofyor  imbran’ pdef kuker Yahwe I. (Wasya Mikha 6:8.) Refo ikofenḇair, kombran kuker Yahwe ine kyurfasna kokyar faro Yahwe, kokyar faro farkankin Ḇyena, ma kosouser I. Snonkaku ḇena sne ḇerun fyawi snar fandun fa ḇyenadi dor farkankin ro Yahwe I. Nabi ani nya sne ḇerun ido, nari ifuken resari Yahwe fyadwer parenta Ḇyena kwar ke roḇa. Fyorno ido, ko kako samswen fa kofrur snemuk, ma imbude kokmom rosai Yahwe dor ro ko na. Ḇape, kona sne ḇerun ido, nari kor Yahwe farkankin Ḇyena. Inja na kofrur sasar ḇeba ḇa.

4. Rosai nari kofarkor ro artikel ine?

⁴ Ro artikel ḇepon iwara, kofarkor rosai knam ro sne ḇerun ma sai ḇefnai fa fyandun kaku faro ko. Ḇape, rariso na kofasnai sne ḇerun syadi wer? Ma fafisu risai monda ḇefrur samswen ko fa kona sne ḇerun ya? Mkorama kowawos fafisu rikyor ḇemnis rarirya.—Yakobus 4:6.

5, 6. Rariso Barzilai fyasnai ima nya sne ḇerun?

⁵ Mamam koḇena fyor fafisu ḇaido fararur koḇena nefararwe nefasnaiḇair kona sne ḇerun ke roḇa. Na kofarkor ro Barzilai, Raja Daud bati ḇyedi. Rofyor Barzilai ḇyeumur taun ri 80, Daud dor i fa ḇyarek ro istana. Ine iso ḇaḇesyowi ḇeba kaku faro i. Ḇape, Barzilai ikofen ipyum syadi ya fararur ani sḇuk monda ḇe Khimham i, romawa ḇyedi.—2 Samuel 19:31-37.

⁶ Rosai ḇefnai fa Barzilai imewer ismai fararur ani? Ine snar imewer ismai fakamamar ḇaido imbe ikenem samswen ḇa ke? Oroḇa, snaro nya sne ḇerun. Fyawi snar nya samambraḇ nabor werḇa. (Wasya Galatia 6:4, 5.) Imnis Barzilai i, fandun fa kona sne ḇerun ḇardibur komam monda faro rosai komarisenna ḇaido komam kopyum syadi ro snonkaku ḇesesya. Komarisen koḇuk roi ḇepyum syadi faro Yahwe I. Ine ḇyefandun syadi ḇardibur kona fararur ḇepyum ḇaido kona snonsnon. (Galatia 5:26) Kona sne ḇerun ido, nari kofararur kayam kuker naek srar koḇesi fa kosandik Yahwe ma kofnoḇek snonkaku ḇesesya.—1 Korintus 10:31.

7, 8. Rosai ḇefnai fa snonkaku ḇena sne ḇerun ikyar faro mankundi ḇa?

⁷ Samswen fa kona sne ḇerun rofyor sḇuk fakamamar ḇaido papoik nabor ḇeko. Na kofarkor ro Nehemia i. Rofyor Nehemia ryower snar snonkaku ḇero Yerusalem sismai samswen ḇebor, ḇyenadi dor farfnoḇek ro Yahwe I. (Nehemia 1:4, 11) Yahwe ryower nadi ḇyena. Raja Artahsasta ikanow Nehemia i ḇe Gubernur Yerusalem. Nehemia nya papoik ma ḇaḇenana nabor raryano, ikyar faro mankundi ḇa. Syewar farkankin ro Yahwe I ma iwasya Yahwe sasoser Ḇyena ro ras ḇe ras. (Nehemia 8:1, 8, 9) Nehemia nya papoik faro snonkaku ḇebor sya. Ḇape ḇyuk papoik ḇyena ḇa faro fandandun mankun ḇyena ḇaido ifrurmnisḇa snonkaku ḇesesya.—Nehemia 5:14-19.

⁸ Raris Nehemia i, rofyor kosmai fakamamar nabor ḇaido fararur koḇena nefararwe ido, komam mnis insama kofasnai sne ḇerun pdef. Komewer  kokyar faro samambraḇ ḇaido ḇaḇekir mankun koḇena. Rariso snonkaku oso ikyar faro mankundi rai? Imnis raris, penatua oso imbude imarisen ifnoḇek sidang mboi ḇyenadi ḇepon ḇa. Naek ḇaido srar oso ifrur snemuk ḇepon kwar, insape ḇyenadi ḇe Yahwe insama ḇyebarakas snemuk ifrurna. Ḇape, snonkaku bena sne ḇerun na ikyar mankundi ḇa, iba syadiwer faro rosai ifrur kwarna. Iswarepen rarya kwar snar samambraḇ ḇyena namnis Yahwe samambraḇ Ḇyena ḇa. (Wasya Amsal 3:5, 6.) Ro dunya ine, snonkaku sibor sfaḇri mankunsi ma simarisen smanen si. Ḇape, Yahwe manfamyan Ḇyesi sima siḇese. Na kokara ḇa snar kona fakamamar, ḇefrur fa kopyum syadi snonkaku ḇesesya ro kina ḇaido sidang. Ipyum syadi ya, koswarepen fararur koḇena ro Allah ma kofararur kayam kuker naek srar koḇesi.—1 Timotius 3:15.

9, 10. Rariso mamam snonkaku ḇena sne ḇerun rofyor sisurem i?

⁹ Nari kofafayaf rofyor ono sisya sisurem famfnom ko. Ine nkur Hana i. Swari iswar kaku i rariryano, Hana ismai sneprei ḇa. Hana imarisen nya romawa kako ḇape pyansnasem. Penina kyai ḇyedi, kyoryae i ker. Ras oso rofyor  Hana ḇyesneso kaku ryaḇe Tabernakel fa ḇyenadi. Imam Ḇeḇa Eli myam kyanes ma doḇerada Hana imser! Hana na imsor kaku. Ḇape, kuker syowi ikofenḇair rosai ḇekuri ḇe Eli. Ḇarpurya, Hana ḇyenadi inema fyasnai kakyar faro Yahwe ma iswar I.—1 Samuel 1:5-7, 12-16; 2:1-10.

¹⁰ Kofasnai sne ḇerun ido, na ’kokafyo ḇarḇorya kuker ḇaḇyeya’. (Roma 12:21) Dunya Setan ine ifo kuker roi ḇeḇarḇor. Inja, kopok kokandor ḇa rofyor sifrurmnis ko ḇa. Ine nafrur fa komsor rariryano, fandun fa kopampum sneḇaḇir ḇeradirya. (Mazmur 37:1) Nari koduf syadiwer rofyor komasasoryae kuker naek ma srar ro sidang. Ine nbejadi ido, komarisen koso farari Yesus i. Refoya ikofen ḇo doḇe, ”Rofyor sonef-sifyaki, ima dakonef-dakfyak ḇa.” Ḇape, ”ḇyuk mankundi faro Allah, Mankara ḇenapesya.” (1 Petrus 2:23) Yesus nya sne ḇerun ma ikyar nari Yahwe ifrurmnis kaḇer ḇaḇenanapes ḇa. (Roma 12:19) Fandun kako fa kofasnai sne ḇerun ma ’komunsu awer ḇarḇor kuker ḇarḇor’.—1 Petrus 3:8, 9.

11, 12. (a) Rariso mamam ro snonkaku ḇena sne ḇerun rofyor sisandik ḇaido simanen i? (b) Rariso snonkaku ḇena sne ḇerun ikenem ma isansun i rai?

¹¹ Wos sandik ḇaido mananen na nefrowes sne ḇerun koḇena. Ester  ismai sanandik ma wos manen naḇore. Ima bin ḇedoser kaku oso ro Persia. Ro swaf taun oser Ester ma binkbor ḇesesya sun si fa sekaramas si insa sidoser ma siḇensewar fa sun Raja sneri. Ḇape, raja kyinfir Ester i ḇe ratu ḇyedi. Rosai raja ifrur nane nafur fa darareri ḇa. Fyasnai pdef ima nya sne ḇerun, ifrurpyum ma fyasnai syowi.—Ester 2:9, 12, 15, 17.

¹² Rofyor kona sne ḇerun ido, sansun ma kenem koḇena nari napyum ma nafrur snonkaku ḇesesya sifafayaf ḇa. Ḇardibur kararer ko ḇaido kofrur snonkaku sya smanen ko, komarisen kona ”rur ḇefafir ma ḇeknon”. (Wasya 1 Petrus 3:3, 4; Yeremia 9:23, 24) Kakara kuker mankunko nari nasnaibos ro wos ma rosai kofrurna. Imnis raris, imbude na kofrur snonkaku ḇesesya skara koma kopyum syadi snar fararur koḇena, fawawi ḇaido mansei kofawi sya. Ḇaido kofasnai ḇe snonkaku ḇesesya snar rosai kofrurna iso samambraḇ mankun koḇena, ḇape kakuya snonkaku ḇesesya siso ḇefnoḇek ko. Ḇape, koswarepen Yesus farari ḇyena. Na ifrur snonkaku ḇesesya smaneni snar fawawi ḇyena. Ḇape, dap ker Allah Wos Sren Ḇyena. Imewer snonkaku sya sisandik i. Imarisen sanandik ani sḇuk ḇe Yahwe I ḇesya kwar.—Yohanes 8:28.

13, 14. Rosai ḇefnai fa snonkaku ḇena sne ḇerun na sifrur snemuk ḇepyum?

¹³ Fandun fa kona sne ḇerun rofyor kofrur snemuk, ḇaido rofyor snemuk snonkaku ḇesesya nawyae ko. Rofyor Paulus ḇyarek ro Kaisarea, imarisen ryaḇe Yerusalem fa ifrur Yahwe fararur ḇyuk ḇe i na. Ḇape, nabi Agabus ikofen ḇe Paulus ryamura ido, nari sfori ma smuni kako. Naek srar sya sor kaku ḇe Paulus i insa ryamura awer. Ḇape, Paulus dun snemuk fa ryamura ḇediwa. Ifrur rarirya snar ikyar mankundi ke? Aroḇa, Paulus fyasnai nya sne ḇerun ma ikyar kaku ḇe Yahwe I. Naek srar sya kako sifasnai sna sne ḇerun. Inja, snemuk Paulus dun nane sisonem na.—Farfyar 21:10-14.

¹⁴ Kofasnai sne ḇerun nari nafnoḇek ko fa kofrur snemuk ḇepyum rofyor fafisu kofawiḇa na ndrama kanandor fa nkur ko. Imnis raris na komarisen kofarmyan ḇe Yahwe ro oras ḇesiper. Ḇape, rofyor koduf ido, na rarso? Rariso rofyor sinan koḇesya siduf ma sfandun farfnoḇek? Rosai nari kofrurya rofyor koḇesinan kwar? Imbude koḇenadi ma kokara roi anna kwar, ḇape kofawi kankarem ḇyena ḇa. (Pengkhotbah 8:16, 17) Ḇape kokyar faro Yahwe ido, nari kokofen snar kona ḇaḇeraryar ḇa. Nari kokarauser rosai kosmaina, kor ananun ma ḇefandun syadiwer koḇenadi fa kor farkankin. Ramnai, koso akurfasna ḇerama ro Yahwe rur Ḇyedi. (Wasya Pengkhotbah 11:4-6.) Yahwe nari ḇyebarakas snemuk kunna, ḇaido ifnoḇek ko fa kofadwer rosai imbe kofrurna.—Amsal 16:3, 9.

15. Rariso kona sne ḇerun rofyor kowasen mura ro Yahwe I?

¹⁵ Rariso kofasnai kaku sne ḇerun ya?  Nari kawos nyan rifyak. Oser ya, fandun fa kowasen mura ro Yahwe I, kuker kokarauser rari ma Allah baba Ḇyena. Rofyor kofawi nabor Yahwe I kwar, nari komam snar koinema kokasun ma kona fawawi nabor ḇa. (Yesaya 8:13) Koswarepen snar kofarmyan ḇe Allah ḇena Papoik Syadi, ḇape snonkaku ḇaido malaikat sya ḇa. Kuker kowasen roi nane, nari korun mankunko ”faro Manseren ḇramin ḇesambraḇ ḇyesuya”.—1 Petrus 5:6.

16. Rariso kona sne ḇerun rofyor kowasen Allah saswar Ḇyedi?

¹⁶ Nyan ḇesuru iso kowasen rariso Yahwe saswar Ḇyeja faro ko. Paulus doḇe sidang ima imnis kuker baken ro snonkaku. Yahwe myam ḇar nakam ro baken snonkaku nḇemaeja kaku. (1 Korintus 12:23, 24) Yahwe myam ko oser-oser koḇemaeja kaku. Myamfarfir ko kuker ḇesesya ḇa, ma iswar ko pdef rofyor kofrur sasar. Na koḇesneprei snar kofawi Yahwe iswar ko.

17. Rariso na kosmai fainda rofyor kosewar ḇaḇenaḇye ro snonkaku ḇesesya?

¹⁷ Ḇekyor ya, nari koḇe sne ḇerun syadi rofyor kosewar ḇaḇenaḇye ro snonkaku ḇesesya, Raris Yahwe ifrurna. Komarisen kor ananun ro snonkaku ḇesesya ma komarisen korower kakara sena. Komewer kosewar snonsnon faro ko ḇaido kun snemuk ḇe snonkaku ḇesesya. (Amsal 13:10) Koḇeaski kuker naek srar koḇesi rofyor sismai fararur ḇepyum kaku. Ma kokofen kasumasa snar ḇyuk swaf kwar ḇeko fa kofarmyan ḇe I.—1 Petrus 5:9.

18. Rariso kofari sneuser ine na nafnoḇek ko fa kofasnai sne ḇerun syadiwer?

¹⁸ Ḇefyak ya, nari kofasnai sne ḇerun syadiwer rofyor koḇuk wos ḇefarkin ro Refo fa ḇyefari sneuser koḇena. Wos ḇefarkin nane nafnoḇek ko fa komambir kaku kakara ma Yahwe sneḇaḇir Ḇyedi. Rofyor kofarkor fa komam roi nakam ro Yahwe mamam Ḇyedi, na kofrur snemuk ḇeyun marisen ḇe Allah I. Imnis kofarkor kwar, nadi ma kofrur rosai kofarkor kwarna ido, nari sneuser koḇena syambraḇ syadiwer. (1 Timotius 1:5) Kofarkor fa kofakapon snonkaku ḇesesya. Kofrur roi nane ido, Yahwe ḇyeasas nari fyasos ma isonem ko, ma ifnoḇek ko fa kona sne ḇerun syadiwer.—1 Petrus 5:10.

19. Rariso nyan ya insama kofasnai sne ḇerun isof fyoro-fyoro?

¹⁹ Waswarepen nabi ḇerama ro Yehuda kawos ro randak artikel ine ke? Ismai marmar ma ḇaḇebati ḇyedi kuker Yahwe napromes snar fyasnai sne ḇerun ḇa. Ḇape, bisa kofasnai sne ḇerun pdef rofyor samswen fa kofrurna. Contoh ḇebor ro Allah manfamyan Ḇyesi sifasnai kwar snar sna sne ḇerun. Kofarmyan fyoro ḇe Yahwe ine kyurfasna fandun fa kokyar syadiwer faro I. (Amsal 8:13) Fafisu koḇena nefararwe rariryano, komarisen kombran pdef kuker Yahwe I. Ine iso fakamaman ḇeba kaku kosmana. Inja, mkorama kofrur rosai monda ḇeḇye ya insama kona sne ḇerun pdef ma kombran kuker Yahwe isof fyoro-fyoro.