1-3. Aha do na lang ihorjahon nabi hun Juda ai, janah sonaha ujungni? (Idah gambar bani alaman 20.)

SANGGAH ipajongjong Raja Jerobeam anjapanjap bani naibata na legan, isuruh Jahowa do sada nabi hun Juda laho patugahkon barita panguhuman bani si Jerobeam. Itangihon nabi na toruh maruhur ai do Jahowa janah laho padaskon barita ai. Marah do raja halani ai, tapi iondingi Jahowa do ia.—1 Raj. 13:1-10.

² Iparentahkon Jahowa do nabi ai ulang mangan atap minum i Israel janah seng boi mulak hun bani dalanni hinan. I pardalanan mulak, jumpah ia ma nabi na matua na marladung, mangkatahon dong tonah ni Jahowa bani. Iarahkon ma ia ase rap mangan ampa minum hu rumahni. Laho do ia mangihutkonsi, lang be itangihon Jahowa. Marah do Jahowa halani ai. Sanggah laho mulak, isoroh singa ma ia janah matei.—1 Raj. 13:11-24.

³ Lang ibotoh hita mase rahanan pangahapni manangihon nabi na matua ai sedo Jahowa. Tapi ibotoh hita  do anggo ia lang totap “marparlahou ibagas toruh ni uhur”. (Basa Mika 6:8.) Bibel mangkatahon, sahalak na sihol marhasoman pakon Jahowa maningon do toruh maruhur, artini porsaya, marpangunsandeian, ampa manangihon Jahowa. Anjaha maningon do ia tongtong martonggo. Porini mubah parentah ni Jahowa, tontu anggo toruh maruhur nabi ai, isungkun do parlobei Jahowa. Sipata hita porlu mambahen haputusan, tapi lang sai iarusi hita na pinindo ni Jahowa hubanta. Anggo toruh maruhur hita, ipindo do podah-Ni ase lang mambahen hasalahan.

4. Bani artikel on, aha do na laho iulas hita?

⁴ Bani parlajaran na salpu, domma iulas hita arti ni toruh maruhur janah mase porlu hita martoruh ni uhur. Tapi sonaha ase hita lambin martoruh ni uhur? Anjaha panorang na sonaha do na pataridahkon anggo hita toruh maruhur atap lang? Ulas hita ma tolu situasi bani artikel on.—Pod. 11:2.

5, 6. Sonaha si Barsilai pataridahkon toruh maruhur?

⁵ Sanggah mubah situasi atap pe tugasta, taridah do hita toruh maruhur atap lang humbani pambahenanta. Hita boi marlajar humbani si Barsilai, hasoman ni Raja Daud na setia. Sanggah marumur 80 tahun, iontang si Daud do ia hu istana. Hassi pe sada hasangapon na banggal do on, tapi si Barsilai mangkatahon dearan do anggo si Kimham ma na laho hujai.—2 Sam. 19:31-37.

⁶ Mase seng ijalo si Barsilai ontangan ai? Ai mabiar do ia ibere tugas? Lang, tapi halani toruh maruhur do ia. Ibotoh do sonaha situasi ampa hahuranganni. (Basa Galatia 6:4, 5.) Songon si Barsilai, porlu do homa hita martoruh ni uhur. Ulang ma tongtong mamingkirhon hinarosuhta atap pausih-usihkon diri bani na legan. Na siporlunan, hita sihol mambere na sidearan bani Jahowa sedo sihol ipasangap atap gabe halak na tarsar. (Gal. 5:26) Anggo toruh maruhur hita, malas do uhurta marhorja pakon hasomanta laho pasangapkon Jahowa janah mangurupi na legan.—1 Kor. 10:31.

7, 8. Sonaha martoruh ni uhur mangurupi hita lang marpangunsandeian bani diri sandiri?

⁷ Sanggah ibere buei tanggung jawab, ra do payah pangahapta totap martoruh ni uhur. Tapi hita boi marlajar humbani si Nehemia. Sanggah itangar si Nehemia dong masalah i Jerusalem, mangindo pangurupion ni Jahowa ma ia. (Neh. 1:4, 11) Ibalosi Jahowa do tonggoni. Ibahen Raja Artasasta ma ia gabe gubernur ijai. Hassi pe bayak janah markuasa si Nehemia, tapi lang ongga ia mangihutkon pingkiranni sandiri. Totap do ia marpangunsandeian bani Jahowa janah tongtong mambasa titah-Ni. (Neh. 8:2, 9, 10) Si Nehemia lang mamakei kuasani laho mambuat untung atap pe kasar bani na legan.—Neh. 5:14-19.

⁸ Songon si Nehemia, totap ma hita martoruh ni uhur hassi pe ibere buei tanggung jawab hubanta atap mubah tugasta. Hita lang  marpangunsandeian bani dirinta sandiri. Sonaha do halak na marpangunsandeian bani dirini sandiri? Sontohni, sada sintua lang martonggo lobei laho mangurus haporluan i kuria. Atap, dong hasomanta na lang martonggo lobei paima mambahen haputusan. Hassi pe domma bahat pangalamanni, halak na toruh maruhur lang marpangunsandeian bani dirini sandiri. Totap do ia mardingat anggo hapentaranni seng dos pakon Jahowa. (Basa Podah 3:5, 6.) Sonari, bahat do halak na sihol ase lobihan dirini humbani na legan. Tapi juakjuak ni Jahowa seng sonai. Ulang iagan hita halani dong tanggung jawab mambahen hita gabe lobihan humbani hasomanta na i kuria atap i kaluarga. Tapi, dingat hita ma tanggung jawabta ibagas organisasi ni Naibata janah rap marhorja ma hita pakon hasomanta sahaporsayaon.—1 Tim. 3:15.

9, 10. Sonaha martoruh ni uhur boi mangurupi sanggah dong na manrisai hita?

⁹ Ra do sogam pangahapta sanggah irisai. Ai ma na masa bani si Hanna. Hassi pe ia do haholongan ni paramangonni, tapi lang marniombah ia. Halani ai, sai tongtong do ia irisai si  Pennina, imbangni ai. On do na mambahen pusok uhurni. Bani sada ari laho ma ia hu tabernakel laho martonggo. Sanggah ididah Malim Eli tangis-tangis ia, ihatahon do ia na tenggen! Hassi pe on boi mambahen marah si Hanna, tapi totap do ia hormat mambalosi si Eli. Anjaha martonggo do si Hanna, na pataridahkon holong ampa haporsayaonni bani Jahowa.—1 Sam. 1:5-7, 12-16; 2:1-10.

¹⁰ Anggo toruh maruhur hita, on boi mangurupi hita ‘manaluhon na jahat marhitei na madear’. (Rom 12:21) Bahat do hajahaton i dunia Setan. Jadi ulang pala tarsonggot hita anggo adong na mambahen na jahat hubanta. Hassi pe ai boi mambahen hita marah, porlu do hita manrajai diri. (Ps. 37:1) Tapi boritan do uhurta sanggah dong parsoalan pakon hasoman i kuria. Anggo ai do na masa, usihi hita ma Jesus. Bibel mangkatahon, “Seng manrisai Ia sanggah na hona risa.” Tapi “iondoskon do ai bani Panguhum na pintor in”. (1 Ptr. 2:23) Toruh maruhur do Jesus, janah ibotoh padearhonon ni Jahowa do holi ganup hasedaon halani hagedukon. (Rom 12:19) Hita pe martoruh ni uhur janah ‘ulang balas na jahat imbang ni na jahat’.—1 Ptr. 3:8, 9.

11, 12. (a) Sonaha hita totap martoruh ni uhur sanggah ipuji? (b) Sonaha hita pataridahkon toruh ni uhur humbani parpakeian ampa parlahou?

 ¹¹ Taridah do hita martoruh ni uhur atap lang, sanggah dong na mamuji hita. Bahat do na mamuji si Ester. Ia do na sijengesan humbani bahat naboru na jenges i Persia. Sadokah satahun ibere do minak siparanggirhonon hu bani rap pakon naboru-naboru na legan na laho iboban hu lobei ni raja. Tapi ia do na ipilih raja gabe ratu. Hassi pe sonai lang gabe marginjang ni uhur si Ester. Totap do ia pataridahkon toruh ni uhur, bujur, janah hormat.—Est. 2:9, 12, 15, 17.

¹² Anggo toruh maruhur hita, parlahou ampa parpakeianta pataridahkon hormat bani na legan. “Martonduy na lamlam” ma hita, sedo pajuntul-juntulhon diri bani na legan. (Basa 1 Petrus 3:3, 4; Jer. 9:23, 24) Taridah do humbani parsahap ampa parlahounta sonaha paruhuranta na sasintongni. Sontohni, halani na hinorjahonta, atap pe pambotohta, atap pe ise na itanda hita, ibahen hita ma ase iagan halak lobihan do hita humbani na legan. Atap mambahen ase iagan halak hita sandiri do na mangkorjahon tugas na ponting, hapeni dong do na mangurupi hita. Dingat ma Jesus. Boi do bahenonni ase longang halak mangidah hapentaranni. Tapi, aha na ihatahonni gati do ibuat humbani Hata ni Naibata. Lang ra ia ipasangap. Sihol do ia ase Jahowa na tongtong ipasangap.—Joh. 8:28.

13, 14. Sonaha martoruh ni uhur mangurupi hita mambahen haputusan?

¹³ Porlu do hita martoruh ni uhur sanggah mambahen haputusan, atap sanggah hasomanta mambahen haputusan na dong kaitanni hubanta. Sanggah si Paulus tading i Kesarea, sihol do ia laho hu Jerusalem pasaloseihon tugas na binere ni Jahowa. Tapi ipasingat si Agabus, anggo laho ia, itangkap atap ibunuh ma ia. Ipindo hasomanni ma ase ulang laho ia. Tapi totap do si Paulus laho. Ai marpangunsandeian bani dirini do ia? Lang, tapi halani toruh maruhur janah porsaya bani Jahowa. Toruh maruhur do homa hasomanni. Jadi ipaturut sidea ma ia laho.—Lah. 21:10-14.

¹⁴ Martoruh ni uhur boi mangurupi hita mambahen haputusan na dear hassi pe lang ibotoh hita na masa i lobei ni ari. Sontohni, hita sihol mambere gok panorang laho mangidangi. Tapi sonaha anggo hita boritan? Atap namatorasta porlu iurupi halani boritan? Aha do bahenonta anggo matua hita? Hassi pe ipingkirhon janah itonggohon, lang boi ibalosi hita ganupan ai. (Par. 8:16, 17) Tapi anggo porsaya bani Jahowa, ibotoh hita do hahuranganta. Ipingkirhon hita do situasini, mangindo podah, janah siporlunan martonggo ase iurupi Jahowa. Dob ai dalankon ma panogu-noguan ni Jahowa marhitei tonduy-Ni. (Basa Parambilan 11:4-6.) Ipasu-pasu Jahowa do hita ase boi mambahen haputusan na legan.—Pod. 16:3, 9.

15. Anggo irimangi pasal Jahowa, sonaha do ai mangurupi hita martoruh ni uhur?

¹⁵ Sonaha ase hita lambin martoruh ni uhur? Dong ompat cara. Parlobei, porlu irimangi pasal Jahowa, pingkirhon ma Naibata na sonaha do Ia. Dob irimangi hita pasal dirinta pakon Jahowa, ibotoh hita ma aha pe lang hita. (Jes. 8:13) Dingat ma anggo hita manombah Naibata, sedo jolma atap malekat. Anggo irimangi hita on, iurupi ma hita patoruh diri “hu toruh ni tangan ni Naibata na gogoh in”.—1 Ptr. 5:6.

16. Anggo irimangi hita holong ni Jahowa, sonaha ai mangurupi hita martoruh ni uhur?

¹⁶ Paduahon, rimangi hita ma banggal ni holong ni Jahowa hubanta. Isarupahon apostel Paulus do pagori ni kuria pakon pagori ni angkula. Arga do ganup pagori ni angkula ibahen Jahowa. (1 Kor. 12:23, 24) Ganup hita maharga i lobei-Ni. Seng ipausih-usih Jahowa hita bani na legan. Totap do holong uhur-Ni hubanta hassi pe dong hasalahanta. Malas uhurta halani mambotoh anggo Jahowa mangkaholongi hita.

17. Aha gunani anggo ipindahi hita na dear humbani hasomanta?

¹⁷ Patoluhon, hita boi lambin martoruh ni uhur anggo ipindahi hita na dear humbani hasomanta, songon na ibahen Jahowa. Dearan do hita manangihon podah hun na legan marimbangkon pajuntul-juntulhon diri atap mangatur na legan. (Pod. 13:10) Malas do uhurta anggo hasomanta i kuria pe mandapot tanggung jawab. Martarima kasih do homa hita bani Jahowa halani ipaturut mangidangi-Si.—1 Ptr. 5:9.

18. Sonaha manlatih panggora ni uhur mangurupi hita lambin martoruh ni uhur?

¹⁸ Paompathon, lambin martoruh ni uhur do hita anggo mamakei prinsip hun Bibel laho manlatih panggora ni uhurta. Humbani prinsip ai, ibotoh hita sonaha pangahap ampa pingkiran ni Jahowa. Jadi iurupi ma hita mambahen haputusan na pamalaskon uhur-Ni. Lambin dear ma panggora ni uhur anggo hita marlajar, martonggo, janah mandalankon na iparlajari. (1 Tim. 1:5) Marlajar ma mamingkirhon haporluan ni na legan. Marjanji do Jahowa laho ‘pauli-ulihon’ hita ase lambin toruh maruhur.—1 Ptr. 5:10.

19. Sonaha hita iurupi ase tongtong martoruh ni uhur?

¹⁹ Ai idingat nasiam do nabi na iulas bani mula ni artikel on? Halani lang tongtong martoruh ni uhur, seda ma parhasomananni pakon Jahowa janah matei. Tapi boi do hita tongtong martoruh ni uhur hassi pe payah mandalankon ai. Bahat do siusihan humbani juakjuak ni Jahowa boi mangurupi hita martoruh ni uhur. Totap ma hita marpangunsandeian bani Jahowa. (Pod. 8:13) Lang soal sonaha situasinta, boi do tongtong hita marhasoman pakon Jahowa. On do hasangapon na sibanggalan. Pongkut ma hita ase tongtong martoruh ni uhur ampa marhasoman pakon Jahowa.